Makaantos Ka sa Inhustisya!

ANG tanang tawo makasinati gayod ug usa ka matang sa inhustisya sa iyang kinabuhi. Bisag pag ang pipila ka inhustisya tingali anaa ra sa hunahuna o hinanduraw lang, ang uban tinuod gayod.

Kon makasinati kitag inhustisya, mahimong maguol kita ug ang atong relasyon sa Diyos maapektohan. Gusto natong matul-id ang kahimtang. Ngano man? Ang usa ka hinungdan maoy tungod kay gitisok sa atong Maglalalang, si Jehova nga Diyos, “nga kaniya walay inhustisya,” ang dulot nga pagbati sa hustisya diha sa mga tawo. (Deuteronomio 32:4; Genesis 1:26) Bisan pa niana, makaatubang tingali kitag mga kahimtang nga mobati kitang walay hustisya. Usa ka maalamong tawo kanhi miingon: “Ako mibalik aron makita ko ang tanang buhat sa pagpanglupig nga ginabuhat ilalom sa adlaw, ug, tan-awa! ang mga luha niadtong mga gilupigan, apan sila walay maghuhupay; ug sa mga nanglupig kanila diha ang gahom, mao nga sila walay maghuhupay.” (Ecclesiastes 4:1) Nan, sa unsang paagi makaantos kita sa inhustisya?

Unsa ba Gayoy Inhustisya?

Ang inhustisya mao ang makanunayong paglapas sa mga sukdanan sa hustisya. Unsa ba ang sukdanan sa hustisya alang sa mga tawo? Tin-aw, ang atong matarong ug way-pagkausab nga Maglalalang mao ang may katungod sa pagbutang ug sukdanan kon unsay matarong ug dili-matarong. Sumala sa iyang panglantaw, ang usa ka tawo nagasubay sa “mga lagda sa kinabuhi” kon siya ‘dili magbuhat sa inhustisya.’ (Ezequiel 33:15) Busa, sa dihang gilalang ni Jehova ang unang tawo, Iyang gitisok kaniya ang usa ka tanlag, nga maoy tingog sa kahiladman aron makatabang kaniya sa pag-ila sa husto gikan sa sayop. (Roma 2:14, 15) Dugang pa, si Jehova nagpadayag diha sa iyang Pulong, nga mao ang Bibliya, ug mga pahayag kon unsay matarong o dili-matarong.

Komosta man kon nagtuo kita nga may inhustisya nga gihimo kanato? Maayo nga atong susihon kana sa di-madapigong paagi aron masuta kon tinuod bang may inhustisya nga nahimo. Tagda, pananglitan, ang kahimtang sa Hebreohanong manalagna nga si Jonas. Siya gisugo ni Jehova sa pagmantala ngadto sa mga taga-Nineve nga nagsingabot ang usa ka katalagman. Sa sinugdanan, si Jonas mikalagiw ug wala motuman sa gisugo kaniya. Apan sa kadugayan siya miadto sa Nineve ug gipasidan-an ang mga molupyo bahin sa nagsingabot nga kalaglagan. Tungod sa maayo nilang sanong, gihukom ni Jehova nga dili laglagon ang siyudad ug ang mga molupyo niini. Unsay gibati ni Jonas? “Alang kang Jonas kadto dili gayod makapahimuot, ug siya nanginit sa kasuko.” (Jonas 4:1) Gibati niya nga ang gihimo ni Jehova maoy dakong inhustisya.

Dayag nga si Jehova wala masayop tungod kay siya makabasa sa mga kasingkasing ug “nahigugma sa pagkamatarong ug sa hustisya.” (Salmo 33:5) Angayng masayran lang ni Jonas nga ang  paagi sa paghukom ni Jehova nahiuyon gayod sa hingpit nga hustisya. Kon gibati nato nga may inhustisya nga gihimo kanato, makapangutana kita, ‘Mahimo kaha nga lahi ang pag-isip ni Jehova bahin niini?’

Pag-atubang sa Inhustisya

Ang Bibliya nagtaho ug daghang kaso sa inhustisya. Makakat-on kitag daghang butang pinaagi sa pagsusi kon giunsa nila pag-atubang ang bug-at nilang mga suliran. Tagda si Jose nga gibaligya sa iyang masinahong mga igsoon ingong ulipon sa Ehipto. Samtang didto si Jose sa Ehipto, gitental siya sa asawa sa iyang agalon sa pagpakighilawas, ug kay midumili man siya, ang maong babaye namakak ug miakusar nga buot siyang lugoson. Busa nabilanggo si Jose. Hinunoa, ang iyang pagtuo mas lig-on kay sa iyang mga gapos nga puthaw. Ang maong inhustisya wala makadaot sa iyang relasyon kang Jehova ug wala makapahuyang sa iyang pagsalig kaniya.—Genesis 37:18-28; 39:4-20; Salmo 105:17-19.

Ang laing nakasinatig inhustisya mao si Nabot. Siya nabiktima sa grabeng pagpanglupig ni Jezebel, ang asawa ni Haring Ahab sa Israel. Gusto sa hari nga panag-iyahon ang panulondong yuta ni Nabot nga kasikbit sa palasyo. Apan ang usa ka Israelinhon gidid-an sa pagbaligya nga permanente sa iyang yutang panulondon, mao nga wala mosugot si Nabot nga paliton kadto sa hari. (Levitico 25:23) Tungod niadto, ang daotang asawa ni Ahab nga si Jezebel nagpatunghag bakakong mga saksi nga nagsumbong kang Nabot nga nagpasipala kono sa Diyos ug sa hari. Busa gipatay si Nabot ug ang iyang mga anak. Handurawa kon unsay gibati ni Nabot sa dihang ang mga tawo namunit ug mga bato aron patyon siya!—1 Hari 21:1-14; 2 Hari 9:26.

Hinuon, ang mga hitabo nga nahisgotan wala ra sa kumingking kon itandi sa mga inhustisya nga naagoman ni Kristo Jesus. Siya gisilotan ug kamatayon pinasukad sa bakakong mga saksi ug tungod sa paghusay nga dili subay sa balaod. Ang maghuhukom nga Romanong gobernador walay kalig-on sa paglaban kang Jesus bisan pag iyang nasabtan nga siya walay sala. (Juan 18:38-40) Gipaagom gayod ni Satanas kang Kristo Jesus ang kinagrabehang inhustisya!

 Kini bang mga hitaboa nagpaila nga si Jehova walay pagtagad sa inhustisya? Wala! Si Jehova wala mag-isip sa maong mga inhustisya sumala sa tawhanon lamang nga panglantaw. (Isaias 55:8, 9) Tungod kay si Jose nabaligya ingong ulipon, siya nakahimo sa pagluwas sa iyang pamilya. Siya ang nahimong tagdumala sa pagkaon sa Ehipto sa wala pa mahitabo ang dakong kagutom nga nasinati usab sa iyang pamilya. Hunahunaa ra, kon wala pa itugot ni Jehova ang inhustisya, si Jose wala unta mabilanggo. Didto niya gihubad sa bilanggoan ang mga damgo sa duha ka binilanggo, nga sa ulahi ang usa kanila misugilon kang Paraon bahin kang Jose, ug misangpot kadto sa pagkahimo ni Jose nga tagdumala sa pagkaon.—Genesis 40:1; 41:9-14; 45:4-8.

Komosta ang bahin kang Nabot? Paningkamoti na usab ang pag-isip niana sama sa kang Jehova. Alang kang Jehova, kinsa makabanhaw sa mga patay, si Nabot nahisamag buhi ra, bisan pag siya patay na. (1 Hari 21:19; Lucas 20:37, 38) Kinahanglang magpaabot si Nabot sa panahong siya banhawon ni Jehova, apan daw kadiyot ra ang maong panahon sa pagpaabot, kay ang mga patay walay nahibaloan nga bisan unsa. (Ecclesiastes 9:5) Gawas pa, gipanimalos ni Jehova si Nabot pinaagi sa paglaglag kang Ahab ug sa iyang panimalay.—2 Hari 9:21, 24, 26, 35, 36; 10:1-11; Juan 5:28, 29.

Kon bahin kang Jesus, siya namatay usab. Apan siya gibanhaw sa Diyos ug gituboy sa katungdanan nga “labaw kaayo sa tanang kagamhanan ug awtoridad ug gahom ug pagkaginoo ug sa tanang ngalan nga gingalan.” (Efeso 1:20, 21) Ang inhustisya nga gihimo ni Satanas kang Kristo Jesus wala makapugong kang Jehova sa pagganti sa iyang Anak. May pagsalig si Jesus nga mahimong tul-iron dayon ni Jehova ang inhustisya bahin sa pagdakop kaniya nga dili subay sa balaod kon kadto ang Iyang kabubut-on. Apan nahibalo usab si Kristo nga si Jehova may gitakdang panahon sa pagtuman sa Kasulatan ug sa pagtul-id sa bisan unsang inhustisya.

Tinuod, gipahinabo ni Satanas ug sa iyang mga ahente ang inhustisya sa mga tawong matarong, apan kadto gitul-id ra ni Jehova ug iyang pagatul-iron nga permanente ang inhustisya. Busa kinahanglan kitang magpaabot kang Jehova aron matul-id ang inhustisya.—Deuteronomio 25:16; Roma 12:17-19.

Kon Nganong Mahimong Itugot ni Jehova ang Inhustisya

Mahimong may mga katarongan si Jehova nga dili niya tul-iron ang usa ka kahimtang. Mahimong itugot niya nga kita makasinatig inhustisya ingong bahin sa atong pagbansay isip mga Kristohanon. Siyempre, ‘ang Diyos dili mosulay kang bisan kinsa ug daotang mga butang.’ (Santiago 1:13) Bisan pa niana, mahimong itugot niya nga motungha ang usa ka kahimtang nga dili siya mosalga, apan siya makapalig-on niadtong mosanong sa maong pagbansay. “Human nga kamo makaantos sa makadiyot,” nagpasalig kanato ang Bibliya, “ang Diyos sa tanang dili-takos nga kalulot . . ., magtapos mismo sa inyong pagbansay, siya magpalig-on kaninyo, siya magpakusgan kaninyo.”—1 Pedro 5:10.

Lain pa, ang pagtugot ni Jehova sa inhustisya makahatag ug panahon aron maghinulsol ang mga nakasala. Pipila ra ka semana human sa pagpatay kang Jesus, ang pipila ka Hudiyong namati sa tambag ni Pedro ‘nasamdan sa ilang kasingkasing.’ Kinasingkasing nilang gidawat ang pulong sa Diyos ug sila nabawtismohan.—Buhat 2:36-42.

Dili maghinulsol ang tanan nga nakahimog inhustisya. Mahimong madasig pa ang pipila sa paghimog grabeng inhustisya. Apan ang Proverbio 29:1 nag-ingon: “Ang tawo nga sublisubli nang gibadlong apan nagpatikig sa iyang liog sa hinanali mabali, ug kana wala nay pagkaayo.” Sa pagkatinuod, si Jehova sa kataposan molihok ug maglaglag sa mga nagpadayon sa daotang panggawi.—Ecclesiastes 8:11-13.

Madugay man o madali, segurado kita nga si Jehova nahibalo kon unsaon pagtabang kanato aron dili na kita mahasol sa inhustisya. Ug iya gayong tul-iron ang bisan unsang inhustisya nga tingali atong giantos niining daotang sistema sa mga butang. Dugang pa, nagsaad siya kanatog ultimang ganti, ang kinabuhing walay kataposan sa bag-ong kalibotan diin “magpuyo ang pagkamatarong.”—2 Pedro 3:13.

[Hulagway sa panid 17]

Unsa kahay gibati ni Nabot sa dihang nakaagom siyag grabeng inhustisya?