O ka Swaragana le go Hloka Toka!

KE MANG yo a sa kago a swarwa ka tsela e hlokago toka bophelong bja gagwe? Gaešita le ge go hloka toka go gongwe go ka ba go tsebja goba go ka naganwa, go gongwe ke ga kgonthe.

Nako le nako ge re swarwa ka tsela e se nago toka, re kwa bohloko maikwelong gomme re ka gobala moyeng. Re ka ba le kganyogo e tšwago pelong ya go lokiša boemo. Ka baka la’ng? Lebaka le lengwe ke gore Mmopi wa rena, Jehofa Modimo, “Mo-ila-bokxôpô” o dirile gore batho ba be le maikwelo a matla a go ba le toka. (Doiteronomio 32:4; Genesi 1:26) Lega go le bjalo, re ka lebeletšana le maemo ao go ona re naganago gore dilo ga di dirwe ka tsela ya toka. Monna yo bohlale o kile a bolela gore: “Ka buša ka bôna mehlakô ka moka e hlakišaxo batho fá tlase xa letšatši. Ka bôna mexôkxô ya bahlaki, bà se n’e mohomotši. Ka bôna bahlakiši ba bôná bà na le matla, bôná bà se n’e mohomotši.” (Mmoledi 4:1) Ka baka leo, re ka swaragana bjang le go hloka toka?

Ge e le Gabotse go Hloka Toka ke Eng?

Go hloka toka ke boemo goba mokgwa wa go roba ditekanyetšo tša toka. Ke’ng seo e tlago go ba tekanyetšo ya toka bakeng sa batho? Go molaleng gore Mmopi wa rena yo a nago le toko le yo a sa fetogego o na le tshwanelo ya go bea ditekanyetšo tša mabapi le seo e lego toka le seo e lego go hloka toka. Go ya ka yena, go sepela ka “molaô wo o phedišaxo” go akaretša go se sa ‘dira tše kgopo.’ (Hesekiele 33:15) Ka gona, ge Jehofa a be a bopa motho wa pele, O ile a mo tsenya letswalo—lentšu la ka gare leo le bego le tla mo thuša go kgethologanya se se nepagetšego go seo se fošagetšego. (Baroma 2:14, 15) Go oketša moo, Jehofa ka Lentšung la gagwe, Beibele, o tsentše dipolelo tša mabapi le seo e lego toka goba go hloka toka.

Go thwe’ng ge e ba re nagana gore re swerwe ka tsela e hlokago toka? Re dira gabotse ge re hlahloba taba ka tsela e nepagetšego go bona ge e ba ruri go dirilwe go hloka toka. Ka mohlala, ela hloko boemo bjoo moporofeta wa Moheberu e lego Jona a ilego a ikhwetša a le go bjona. Jehofa o ile a mo laela gore a ye go botša Baninife ka kotsi yeo e bego e le kgaufsi le go ba wela. Mathomong, Jona o ile a tšhaba a se a phetha kabelo ya gagwe. Lega go le bjalo, mafelelong o ile a ya Ninife gomme a lemoša badudi ka kotsi e lego kgaufsi. Ge ba se na go arabela gabotse, Jehofa o ile a kgetha go phološa motse woo le badudi ba wona. Jona o ile a ikwa bjang? “Jona, yêna tša mmefêla ka xoxolo, a kxarametšêxa.” (Jona 4:1) O be a nagana gore Jehofa o mo swere ka tsela e tlogago e hloka toka.

Go molaleng gore Jehofa, yoo a kgonago go bona dipelo le yoo a ‘ratago toko le toka,’ o be a se a foša. (Psalme 33:5) Jona o be a swanetše go fo kwešiša gore phetho ya Jehofa e be e kwana le toka e phethagetšego. Ge re nagana gore re  swerwe ka tsela e se nago toka, re ka ipotšiša gore, ‘Na e ka ba gore Jehofa o tla lebelela taba ka mo go fapanego?’

Go Lebeletšana le go Hloka Toka

Beibele e bolela ka ditiragalo tše dintši tša ba bangwe bao ba ilego ba swarwa ka tsela e hlokago toka. Re ka ithuta mo gontši ka go hlahloba kamoo ba ilego ba swaragana le mathata a bona a magolo. Ela hloko Josefa, yoo a ilego a rekišwa gore e be lekgoba Egipita ke bo-mogolo’agwe bao ba nago le lehufa. Kua Egipita mosadi wa mong wa gagwe o ile a leka go goketša Josefa gomme ge a be a mo gana, o ile a mo latofatša ka maaka a gore o mo lekile ka boitshwaro bjo bo gobogilego. Ka baka la seo, Josefa o ile a golegwa. Lega go le bjalo, tumelo ya gagwe e be e tiile go feta ditšhipi tšeo a bego a tlemilwe ka tšona. Ga se a ka a dumelela go hloka toka go fokotša boemo bja gagwe bja moya goba go fokodiša go bota ga gagwe Jehofa.—Genesi 37:18-28; 39:4-20; Psalme 105:17-19.

Monna yo mongwe yoo a ilego a welwa ke go hloka toka ke Nabothe. O ile a ba mohlaselwa wa boradia bjo bošoro bja Isebele, mosadi wa Kgoši Ahaba wa Isiraele. Kgoši ye e be e duma tšhemo e botse yeo e bego e le bohwa bja Nabothe yeo e bego e le kgaufsi le ngwako wa mošate. Moisiraele o be a sa dumelelwe go rekiša bohwa bja gagwe, ka baka leo Nabothe o ile a gana go rekišetša kgoši naga yeo. (Lefitiko 25:23) Ke moka, mosadi yo kgopo wa Ahaba o ile a hloma dihlatse tša maaka tšeo di ilego tša latofatša Nabothe ka gore o rogakile Modimo le kgoši. Ka baka leo, Nabothe le barwa ba gagwe ba ile ba bolawa. Nagana kamoo Nabothe a ilego a ikwa ka gona ge batho ba be ba topa matlapa gore ba mmolaye!—1 Dikxoši 21:1-14; 2 Dikxoši 9:26.

Lega go le bjalo, se re sa tšwago go kwa ka sona ga se selo ge se bapetšwa le go hloka toka moo go ilego gwa wela Kriste Jesu. Kahlolo ya gagwe ya lehu e be e akaretša maaka le tsheko e sego molaong. Mmušiši wa Roma yo a bego a le setulong sa boahlodi o be a hloka matla a go emela seo a bego a bona se lokile. (Johane 18:38-40) Ee, Sathane o ile a wetša Kriste Jesu ka go hloka toka mo gogolo kudu go feta go hloka  toka moo a kilego a go wetša mothong le ge e le ofe!

Na ditiragalo tše di bontšha gore Jehofa o hlokomologa go hloka toka? Aowa! Jehofa o be a sa lebelele maemo ao ka pono ya batho. (Jesaya 55:8, 9) Ka ge Josefa a ile a rekišwa gore e be lekgoba, o ile a kgona go phološa lapa labo. O bile molaki wa dijo wa Egipita pele ga ge tlala e kgolo yeo e ilego ya kgoma lapa labo e thoma. Nagana feela ge nkabe Jehofa a se a ka a dumelela go hloka toka, Josefa nkabe a se a ka a ya kgolegong. O be a le moo ge a be a hlalosa ditoro tša bagolegwa-gotee le yena ba babedi, bao yo mongwe wa bona ka morago a ilego a botša Farao ka Josefa, e lego seo se lebišitšego go beng ga Josefa molaki wa dijo.—Genesi 40:1; 41:9-14; 45:4-8.

Go thwe’ng ka Nabothe? Anke o leke go lebelela dilo ka tsela yeo Jehofa a ilego a di lebelela ka yona. Nabothe o be a sa phela ka kgopolong ya Jehofa, yo a kgonago go tsoša bahu, gaešita le nakong ya ge setopo sa gagwe se rapaletše fase. (1 Dikxoši 21:19; Luka 20:37, 38) Nabothe o swanetše go letela nako yeo ka yona Jehofa a tlago go mmiletša bophelong gape, eupša nako yeo e fo ba eka ke e kopana, ka gobane bahu ga ba tsebe selo. (Mmoledi 9:5) Go ba gona, Jehofa o ile a lefeletša Nabothe ka go ahlola Ahaba le lapa la gagwe.—2 Dikxoši 9:21, 24, 26, 35, 36; 10:1-11; Johane 5:28, 29.

Jesu le yena o ile a hwa. Lega go le bjalo, Modimo o ile a mo tsoša gomme a mo godišetša boemong bja “godimo-dimo ga mmušo o mongwe le o mongwe le bolaodi le matla le borena le leina le lengwe le le lengwe le le bitšwago.” (Baefeso 1:20, 21) Go hloka toka moo Sathane a ilego a go wetša Kriste Jesu ga se gwa ka gwa thibela Jehofa go šegofatša Morwa wa gagwe. Jesu o be a kgodišegile gore Jehofa o be a ka dirolla go hloka toka ga go golegwa ga gagwe mo go bego go se molaong, ge e ba seo e be e le thato ya Gagwe. Lega go le bjalo, Kriste gape o be a tseba gore Jehofa o na le nako ya go phethagatša Mangwalo le ya go dirolla go hloka toka le ge e le gofe.

Ke therešo gore Sathane le batseta ba gagwe ba ile ba swara batho ba lokilego ka go hloka toka, eupša Jehofa o ile a feleletša ka go lokiša boemo gomme a dirolla goba o tla dirolla go hloka toka ka moka. Ka go rialo, gore go hloka toka go lokišwe, re swanetše go letela Modimo.—Doiteronomio 25:16; Baroma 12:17-19.

Lebaka Leo ka Lona Jehofa a ka Dumelelago go Hloka Toka

Jehofa gape a ka ba le mabaka a go se lokiše boemo bjo itšego. A ka dumelela gore re welwe ke go hloka toka e le karolo ya tlwaetšo ya rena ya Bokriste. Ke therešo gore ‘Modimo ga a leke motho le ge e le ofe ka dilo tše mpe.’ (Jakobo 1:13) Lega go le bjalo, a ka dumelela boemo bo tšwelela ntle le go bo šitiša, le gona a ka matlafatša bao ba arabelago tlwaetšong e bjalo. Beibele e re kgonthišetša gore, “Ka morago ga ge le tlaišegile ka lebakanyana, Modimo wa botho bjohle bjo bo sa swanelago . . . o tla fetša go tlwaetšwa ga lena, o tla le tiiša, o tla le matlafatša.”—1 Petro 5:10.

Go oketša moo, go dumelela ga Jehofa go hloka toka go itšego go ka nea bahlasedi nako ya go itshola. Dibeke tše sego kae feela ka morago ga go bolawa ga Jesu, Bajuda ba bangwe bao ba ilego ba theetša temošo ya Petro ba ile ba “hlabega dipelo.” Ba ile ba amogela lentšu la Modimo ka pelo ka moka gomme ba kolobetšwa.—Ditiro 2:36-42.

Ke therešo gore ga se badiri ba go hloka toka ka moka bao ba tlago go itshola. Ba bangwe ba ka ba ba phegelela go dira ditiro tša go hloka toka mo gošoro. Lega go le bjalo, Diema 29:1 e re: “Pala-balai ó tlo thšoxa à robêxa, xo se bê le moreku.” Ee, Jehofa o tla feleletša ka go gata mogato gomme a fediša bao ba phegelelago boitshwarong bjo bo sa swanelago.—Mmoledi 8:11-13.

Go sa šetšwe nako yeo re e tšeago re fola bohloko bja go swarwa ka tsela e hlokago toka, re ka kgodišega gore Jehofa o tseba kamoo a swanetšego go re thuša ka gona go fola. Gomme o tla tloga a dirolla go hloka toka le ge e le gofe moo go ilego gwa re wela mo tshepedišong ye e kgopo ya dilo. Go oketša moo, o re holofeditše moputso wa mafelelo, bophelo bjo bo sa felego lefaseng le lefsa leo ‘toko e tlago go aga go lona.’—2 Petro 3:13.

[Seswantšho go letlakala 17]

Nabothe o swanetše go ba a ile a ikwa bjang ge a be a lebeletšane le go hloka toka mo gogolo?