Ka Rauka ia Koe te Akono Atu i te Tu Tau Kore!

KOAI ia tangata kare i kite ana i te tu tau kore o etai ua atu tu i roto i tona oraanga? Ko etai au tu tau kore ra penei kua kiteaia me kore kua manakoia, ko etai ra e tika tikai.

Me kite tatou i te tu tau kore, ka kite tatou i etai mamae ngakau e ka kite i te mamae i te pae vaerua. Penei e anoano tikai ana tatou i te akatikatika i te turanga. No teaa ra? Okotai tumu koia oki kua tuku Tei Anga mai ia tatou, ko te Atua ko Iehova, “ma te kore e kitea te tu tau kore ra,” i tetai manako pakari no te tuatua tau ki roto i te au tangata. (Deuteronomi 32:4, NW; Genese 1:26) Inara, penei ka aro atu tatou i te au turanga kare to tatou manako anga no te tuatua tau e akamerengoia. Kua akakite mai tetai tangata pakari e: “Te oki ra au te akamaara ra i te au takinga-kino katoa i raveia i raro ake i te rā nei: e i na, te roi-mata o te aronga i takinga-kinoia ra, kare ra o ratou e akapumaana: e te mana oki tei te pae takinga-kino ra; kare ra o ratou e akapumaana.” (Koheleta 4:1) Akapeea, i reira, tatou i te akono atu anga i te tu tau kore?

Eaa Tikai te Tu Tau Kore?

E turanga te tu tau kore me kore e ravenga no te aatianga i te au turanga o te tuatua tau. Eaa i reira te turanga no te tuatua tau no te au tangata? Te taka meitaki ra e, e tikaanga to Tei Anga tika ra e te taui kore ia tatou i te akanoo i te turanga no te tika e te tika kore. Mei tona turanga manako, te aaere anga “na te au akonoanga e oraʼi” te kapiti maira “ma te rave kore i te kino ra.” (Ezekiela 33:15) No reira, i te anga mai anga a Iehova i te tangata mua, kua tuku Aia i tetai akava ngakau ki roto iaia​—tetai reo i roto ake te ka tauturu iaia i te akataka i te tika mei te tarevake. (Roma 2:14, 15) Pera katoa, kua akanoo a Iehova ki roto i tana Tuatua, te Pipiria, te au tuatua e eaa te mea tau me kore te mea tau kore.

Akapeea me te manako ra tatou e kua raveia te tu tau kore kia tatou? E mea meitaki kia akara matatio tikai tatou i te tumu i te akara e me kua rave tikaiia te tu tau kore. Ei akaraanga, e akamanako ana i te turanga o te peroveta Epera ko Iona i tei tupu kiaia uaorai. Kua akaue a Iehova iaia kia akakite ki te ngati Nineve i te tumatetenga te vaitata maira. I te akamata anga, kua oro ke atu a Iona ma te akatupu kore anga i te angaanga. Inara, i te openga ra, kua aere atu aia ki Nineve e kua akamatakite atu i te au tangata i te tumatetenga te vaitata maira. I to ratou ariu mareka mai anga, kua iki a Iehova i te paruru i te oire e te akaora i tona au tangata. Eaa ra to Iona manako? “Kinokino roa akerā Iona, e maata atura tona riri.” (Iona 4:1) Kua manako aia e e tu tau kore tikai to Iehova tua.

I te akara anga, ko Iehova ra, tei kite i te tatau i te au ngakau e tei ‘inangaro i te tuatua-tika e te tuatua tau,’ kare e tarevake ana. (Salamo 33:5) E mea tau kia kite ua atu a Iona e ko te mataara ta Iehova i iki ra te rotai ra ki te tuatua tau apa  kore. Me manako tatou e kua raveia te tu tau kore kia tatou, penei e ui tatou kia tatou uaorai e, ‘Penei te akara tuke mai ra a Iehova i te tumu?’

Aroanga Atu i te Tu Tau Kore

E manganui te au akatauanga ta te Pipiria i ripoti mai o etai aronga tei na roto i te tu tau kore. E maata ta tatou ka kite mai na te akara matatio anga e akapeea ratou i te aro atu anga i to ratou au manamanata. E akamanako ana ia Iosepha, tei okoia e tona au taeake vareae ei tuikaa i Aiphiti. I Aiphiti kua timata te vaine a tona pu ia Iosepha, e i te patoiia atu anga aia, kua akaapa pikikaa atu aia ia Iosepha no te au akainangaro anga tau kore. Tei tupu mai, kua kite mai a Iosepha iaia uaorai i roto i te are auri. Inara, e ketaketa atu tona akarongo i te au auri tapeka anga tei tapekaia aia ra. Kare aia i akatika ana i te tu tau kore kia akakore i tona tu i te pae vaerua e kare katoa i akaparuparu ana i tona irinaki ia Iehova.​—Genese 37:18-28; 39:4-20; Salamo 105:17-19.

Ko Nabota tetai tangata tei aro atu i te tu tau kore. Kua riro mai aia ko tetai tangata tei takinokinoia na roto i te ravenga pikikaa a Iezebela, te vaine a te Ariki ko Ahaba o Iseraela. Kua noinoi te ariki i te potonga enua o Nabota tei vaitata i te are o te ariki. Kua tureia tetai tangata Iseraela e auraka e oronga tinamou atu i tona kainga ipukarea, no reira a Nabota i patoi ei i ta te ariki patianga kia oko kiaia te enua. (Levitiku 25:23) No reira, kua akanoo te vaine kino a Ahaba i tetai au kite pikikaa tei akaapa ia Nabota no te akakino anga i te Atua e te ariki. Tei tupu mai, kua tamateia a Nabota e tana au tamaroa. E akamanako ana e eaa to Nabota manako i te akamata anga te au tangata i te koi i te au toka ei tamate iaia!​—1 Ariki 21:1-14; 2 Ariki 9:26.

Inara, e meangiti ua teia au mea i taikuia i mua akenei me akaaiteia atu ki te au tu tau kore tei tukunaia ki rungao ia Iesu. Te utunga mate tei tukunaia ki runga iaia ra kua o mai te pikikaa e tetai akavaanga tei kore i tika i te ture. Kare te kavana o Roma i runga i te akavaanga i maroiroi ana i te turu i tana i kite atu e e tika. (Ioane 18:38-40) Ae, i runga ia Iesu Karaiti, kua tuku mai a Satani i te tu tau kore maata rava kare i tukunaia ana ki runga i tetai ke!

 Te akaari maira ainei teia au mea i tupu e kare a Iehova e manako maira i te tu tau kore? Kare! Kare a Iehova i akara mai ana i taua au turanga ra mei te akaraanga ua a te tangata nei. (Isaia 55:8, 9) No te mea e kua okonaia a Iosepha ei tuikaa, kua rauka iaia te akaora i tona pamiri. Kua riro mai aia ei tangata akaaere no te kai i Aiphiti i mua ake ka tupu mai ei tetai onge maata ki tona pamiri. E akamanako ana, naringa kare a Iehova i akatika i te tu tau kore, kare a Iosepha e apainaia atu ki roto i te are auri. I roto i taua ngai ra i rauka ai iaia i te akakite i te au moemoea a te nga mouauri e rua, i muri maira na tetai i akakite atu kia Pharao no runga ia Iosepha, i te akariro anga ia Iosepha ei tangata akaaere i te kai.​—Genese 40:1; 41:9-14; 45:4-8.

Akapeea ra a Nabota? E akamanako akaou ana i te turanga mei ta Iehova rai akara anga mai. Kia Iehova, tei rauka i te akatu mai i tei mate ra, te ora ua ra a Nabota i roto i tona manako, noatu e te vai ua ra tona kopapa i runga i te one. (1 Ariki 21:19; Luka 20:37, 38) Ka tiaki roa a Nabota kia tae ua atu ki te tuatau ka akaora akaou mai ei a Iehova iaia, inara e poto ua te tuatau, no te mea kare a te aronga i mate ra e tuatua i kitea. (Koheleta 9:5) Pera katoa oki, kua tutaki a Iehova ia Nabota na te akavaanga ia Ahaba e tona ngutuare tangata.​—2 Ariki 9:21, 24, 26, 35, 36; 10:1-11; Ioane 5:28, 29.

Ko Iesu ra, kua mate aia. Inara, kua akatu mai te Atua iaia e kua akateitei atu iaia ki tetai taoonga “ki runga rava atu i te au ariki ravarai, e te aronga mana, e te marōrō, e te maata, e te au ingoa katoa i akaikiia nei.” (Ephesia 1:20, 21) Te tu tau kore ta Satani i tuku ki runga ia Iesu Karaiti kare i arai ana ia Iehova i te tutaki anga i tana Tamaiti. Kua papu ia Iesu e ka rauka ia Iehova i te akakore viviki atu i te tu tau kore no te opuia anga aia ma te kore i tika i te ture me ko Tona anoanoia. Inara, kua kite katoa a Karaiti e e tuatau to Iehova i te akatupu i te au Tuatua Tapu e no te akakore anga i tetai ua atu au tu tau kore.

E tika rai, kua tuku mai a Satani e tona au rima rave i te tu tau kore ki runga i te aronga tuatua tika, inara i te openga iora ka akatikatika a Iehova i te turanga kino e ka takore takiri me kore ka akakore atu i te tu tau kore. No reira, e akatikatikaia ai te tu tau kore ra, e tiaki tatou i te Atua.​—Deuteronomi 25:16; Roma 12:17-19.

Te Tumu i Akatika Ua Ai a Iehova i te Tu Tau Kore

Penei te vai katoa ra te au tumu kare a Iehova i akatikatika i tetai turanga. Ei tuanga no ta tatou terenianga Kerititiano, penei te akatika ra aia ia tatou kia kite i te tu tau kore. E tika rai, ‘kare rava te Atua e pikikaa i te tangata.’ (Iakobo 1:13) Noatu rai, penei ka akatika aia i tetai turanga kia tupu mai ma te kore e akao mai iaia ki roto, e ka rauka iaia i te akaora i te aronga tei ariu mai ki taua terenianga. “Kia roa iti ake to kotou mate,” te akapapu maira te Pipiria kia tatou e, na ‘te Atua aroa katoa nei, e akameitaki rava ia kotou, e tauturu mai, e akamaroiroi mai, e e akatinamou mai ia kotou.’​—1 Petero 5:10.

Pera katoa, te akatika anga a Iehova i te tu tau kore penei te oronga maira ki te aronga rave kino te tuatau kia tataraara. I nga epetoma i muri ua ake i te tamateia anga a Iesu, kua ‘puta atura te ngakau’ o etai ngati Iuda tei akarongo atu ki ta Petero akoanga. Kua ariki rekareka ratou i te tuatua a te Atua e kua papetitoia.​—Angaanga 2:36-42.

E tika, kare te katoatoa tei rave i te tu tau kore e tataraara. Penei ka akakeuia etai papaki kia rave i te tu tau kore kino roa atu. Inara, te karanga ra a Maseli 29:1 e: “Ko tei ako putuputuia, e kua akaketaketa iora i te kaki, e viviki mai tona mate, e kare e ravenga e oraʼi.” E tika rai, i te openga ra ka rave e ka takore a Iehova i te aronga tei aruaru i te tu kare e tau ana.​—Koheleta 8:11-13.

Noatu e eaa te tuatau ka akaoraia mai ei mei te tu tau kore, papu ia tatou e kua kite a Iehova e akapeea i te tauturu anga i te akaora mai ia tatou. E ka akakore takiri aia i tetai ua atu tu tau kore i tamamae ana ia tatou i roto i teia akatereanga o te au mea nei. Pera katoa, kua taputou mai aia kia tatou te tutaki anga openga, te ora mutu kore i roto i te ao ou e “te vai tika anga o te tuatua-tika ra.”​—2 Petero 3:13.

[Tutu i te kapi 16, 17]

Eaa ra to Nabota manako i tona aro atu anga i te tu tau kore kino pakari ra?