E Mafai Ona E Feagai ma Faiga Lē Tonu!

O AI e leʻi oo i ai ni faiga lē tonu i lona soifuaga? O nisi o faiga lē tonu e mafai ona iloa i le mafaufau pe manatu i ai, ae o isi o ni mea moni lava o loo tutupu.

O le taimi lava e oo ai faiga lē tonu iā i tatou, e tigā ai o tatou faalogona ma e ono aafia ai la tatou faiā ma Ieova. Atonu tatou te faanaunau e faasaʻo le tulaga ua tulaʻi mai. Aiseā? O se tasi o māfuaaga ona o Lē na Faia i tatou o Ieova le Atua, “e lē o iā te ia se amiolētonu,” na ia tuuina i tagata le faalogona malosi o le faia o le mea ua tonu. (Teuteronome 32:4; Kenese 1:26) Ae peitaʻi, e tatou te ono fesagaʻi ma tulaga e tatou te lagona ai ua leai se faimeatonu. Na mātau e le tagata poto e faapea: “Ona ou toe manatunatu lea i sauāga uma ua faia i lalo o le lā; faauta foʻi i loimata o ē ua sauāina, ua leai foʻi sē na te faamāfanafanaina i latou; ua lima malosi foʻi ē na sauā iā te i latou; a ua leai sē na te faamāfanafanaina i latou.” (Failauga 4:1) O lea la, e faapefea ona tatou feagai ma faiga lē tonu?

O le ā Moni Lava le Mea e Taʻu o Faiga Lē Tonu?

O faiga lē tonu, o se tulaga lē tonu po o le faaleagaina o tapulaa amiotonu. O le ā le faatulagaga o le amiotonu mo tagata? E manino le mata o le vai, ua faatulaga e Lē na Faia i tatou ma o lē e amiotonu ma e lē masuia ona ala, faatulagaga mo le mea e tonu ma le mea e lē tonu. Mai i lana silafaga, o le savali i “sauniga e ola ai” e aofia ai le ‘lē faia o le amio leaga.’ (Esekielu 33:15) O lea, ina ua faia e Ieova le uluaʻi tagata, na ia tuu iā te ia se lotofuatiaifo—o se lagona i totonu e fesoasoani iā te ia e iloa ai le saʻo ma le sesē. (Roma 2:14, 15) E lē gata i lea, ua faatulaga e Ieova i lana Afioga le Tusi Paia, faaupuga e faatatau i mea ua tonu ma mea lē tonu.

Ae faapefea pe afai e tatou te lagona ua lē tonu faiga ua oo iā i tatou? O le fautuaga, e lelei ona tatou iloiloina le mataupu e aunoa ma le faaituʻau, ina ia iloa ai pe na lē tonu moni lava faiga ua oo iā i tatou. Seʻi fai ma faataʻitaʻiga le tulaga na oo i ai le perofeta Eperu o Iona. Na tofia o ia e Ieova e taʻu atu i le nuu o Nineva le mala ua faaloloʻi ane. Muamua lava, na sola Iona e leʻi faataunuuina lona tofiga. Peitaʻi, mulimuli ane na toe alu lava i Nineva ma lapataʻia tagata i le mala na faaloloʻi ane. Ona o le talilelei ane o le nuu, na filifili ai Ieova e faasao le aai ma ē na nonofo ai. O le ā le lagona o Iona na iai? “Ua matuā leaga lava lenei mea iā Iona, ua ita lava o ia.” (Iona 4:1) O lona manatu ua matuā faimealētonu lava Ieova.

E manino lava e leʻi faia e Ieova se mea sesē, auā e mafai ona ia silafia loto ma “e fiafia o ia i  le amiotonu ma le faamasinoga.” (Salamo 33:5) Na tatau ona iloa e Iona o filifiliga a Ieova e ōgatasi ma lana faamasinoga tonu. Pe a tatou lagona ua lē tonu le faiga o i tatou, e ao ona tatou fesili ifo iā i tatou lava, ‘Pe atonu ona e ese le auala e silasila ai Ieova i mea?’

Fesagaʻi ai ma Faiga Lē Tonu

Ua lipotia mai i le Tusi Paia le tele o mea na tutupu i nisi na pagatia i faiga lē tonu. E tele mea e tatou te aʻoaʻoina i le iloiloina o le auala na fesagaʻia ai e tagata o latou faafitauli faigatā. Seʻi manatu iā Iosefa, na faatau atu o se pologa i Aikupito e ona uso loto leaga. A o iai i Aikupito na taumafai le avā a lona matai e maileia o ia e fai se gaoioiga lē saʻo, ma ina ua teena e Iosefa o ia, ona ia tuuaʻia sesē lea o Iosefa faapea na taumafai e fai ni amioga lē mamā ma ia. O le iʻuga, na faafalepuipuiina ai Iosefa. E ui i lea, na malosi atu lona faatuatua i lo uʻamea na lokaina ai o ia. E leʻi avea faiga lē tonu e faavaivaia ai lona itu faaleagaga, po o le vaivai ai o lona faatuatuaina o Ieova.—Kenese 37:18-28; 39:4-20; Salamo 105:17-19.

O le isi tamāloa na feagai ma faiga lē tonu o Napota. Na aafia o ia i faufauga leaga na faia e Iesepela, le avā a le tupu Isaraelu o Aapo. Na faananau le tupu i le fanua o Napota sa latalata ane i lona maota. Peitaʻi, sa lē faatagaina se tagata Isaraelu e faatau motu atu se fanua o lona tofi, o lea na lē talia ai e Napota le fanoga o le tupu e faatau lona tofi. (Levitiko 25:23) Na fafau e le avā amioleaga a Aapo ni molimau sesē e molia ai Napota faapea, ua faifai i le Atua ma le tupu. O le iʻuga, na faasalaina i le oti Napota ma ona atalii. Seʻi manatu i lagona o Napota ina ua fetagofi tagata i maa e fetogi ai o ia!—1 Tupu 21:1-14; 2 Tupu 9:26.

Ae peitaʻi, o le mea na tupu e matuā faatauvaa lava pe a faatusatusa atu i faiga lē tonu na fai iā Iesu Keriso. O le faasala o ia i le oti na aofia ai ni molimau sesē ma se faamasinoga e lē tusa ma le tulafono. Sa leai se malosi o le kovana Roma na faia le faamasinoga, e faia ai le mea na ia iloa e saʻo. (Ioane 18:38-40) Ioe, na faaoo e Satani iā Iesu Keriso faiga lē tonu e  aupito sili ona leaga, e leʻi faapea ona faia muamua i se isi!

Po o nei ea mea na tutupu e faaalia ai e lē manatu mamafa Ieova i faiga lē tonu? E leai! E lē silasila Ieova i na mea na tutupu, mai i se vaaiga faaletagata. (Isaia 55:8, 9) Ona o le faatauina atu o Iosefa e fai ma pologa, na mafai ai ona ia faasaoina lona aiga. Na avea o ia ma pule e faasoasoaina meaʻai i Aikupito, a o leʻi oo i le oge tele lea na aafia ai lona aiga. Seʻi manatu pe ana lē faatagaina e Ieova faiga lē tonu, semanū e lē iai Iosefa i le falepuipui. O i inā na ia faamatalaina ai miti a pagota e toʻalua, ma o se tasi o i laʻua na ia taʻu atu Iosefa iā Farao, lea na oo ina avea ai Iosefa ma tagata e pule i le faasoasoaina o meaʻai.—Kenese 40:1; 41:9-14; 45:4-8.

Ae faapefea Napota? Seʻi toe vaai i mea e pei ona silasila i ai Ieova. I le finagalo o Ieova o lē na te toe faatutūina ē ua oti, e ui lava ua maliu Napota, ae o loo ola pea o ia i lona finagalo. (1 Tupu 21:19; Luka 20:37, 38) E ao ona faatalitali Napota i le taimi e toe faatūina ai o ia e Ieova, ma o lenā taimi ua pei o se taimi puupuu ona e lē o iloa e le tagata ua maliu se mea. (Failauga 9:5) E lē gata i lenā, na faia e Ieova le faamasinoga tonu mo Napota i lona faasalaina o Aapo ma lona aiga.—2 Tupu 9:21, 24, 26, 35, 36; 10:1-11; Ioane 5:28, 29.

E ui na maliu Iesu, ae na toe faatūina o ia e le Atua ma faaeaina o ia i se tulaga “e silisili lava i alii sili uma lava, ma faipule, ma ē ua malolosi, ma alii, ma igoa uma lava.” (Efeso 1:20, 21) O faiga lē tonu a Satani iā Iesu Keriso e leʻi taofia ai Ieova mai le tauia o lona Alo. Na mautinoa e Iesu e mafai e Ieova i lenā lava taimi, ona aveesea faiga lē tonu i le auala na puʻea ai o ia lea e lē tusa ma le tulafono, pe ana o Lona finagalo lea. Na silafia foʻi e Keriso e iai le taimi a Ieova e faataunuu ai mea o loo taʻua i le Tusi Paia, ma aveesea so o se faiga lē tonu o loo iai.

E moni e faaoo e Satani ma ona sui faiga lē tonu i ē amiotonu, ae o le a faasaʻoina lava e Ieova mea, ma o le a ia aveesea e faavavau faiga lē tonu. O lea la, ina ia faasaʻo faiga lē tonu, e ao lava ona tatou faatalitali atu i le Atua.—Teuteronome 25:16; Roma 12:17-19.

Le Māfuaaga ua Lē Taofia ai e Ieova Faiga Lē Tonu

Atonu e iai māfuaaga a Ieova e na te lē faasaʻoina ai se mea patino e tupu. Ona o se vaega o le toleniga faa-Kerisiano o i tatou, atonu e lē taofia ai le oo mai o faiga lē tonu iā i tatou. O le mea moni, ‘e lē mafai ona faaosoosoina e le Atua se tasi i ni mea leaga.’ (Iakopo 1:13) Ae atonu e na te faataga se mea e tupu e aunoa ma lona faalavelave atu i ai, ma e na te lagolagoina i latou e gaoioi e tusa o na toleniga. Ua faamautinoa mai e le Tusi Paia iā i tatou e faapea: “Pe a tigāina outou i nai aso, e faaatoatoaina outou e ia lava, e faatumauina, e faamalosia foʻi outou.”—1 Peteru 5:10.

E lē gata i lea, pe a lē taofia e Ieova nisi faiga lē tonu, e ono avatu ai i tagata o loo faia ia faiga le avanoa e salamō ai. I ni nai vaiaso talu ona fasiotia Iesu, na faalogo ai nisi o tagata Iutaia i faasaʻoga na faia e Peteru “ona tuia lea o latou loto.” Na latou talia afioga a le Atua ma papatisoina i latou.—Galuega 2:36-42.

O le mea moni, e lē o tagata uma e faia faiga lē tonu o le a salamō. O nisi e atili ai ona fai faiga lē tonu e sili ona leaga. Peitaʻi, ua faapea mai le Faataoto 29:1: “O le tagata ua aʻoaʻiina soo, a e faamaaa lona ua, e faafuaseʻi ona nutimomoia o ia, a e leai se fofō.” Ioe, e iʻu lava ina gaoioi Ieova e tafiesea i latou e faaauau ona faia amioga lē tatau.—Failauga 8:11-13.

Po o le ā lava le umi faatoʻā faaleleia faiga lē tonu, ae tatou te mautinoa e silafia e Ieova le auala e fesoasoani ai ina ia tatou maua se mapusaga mai na faiga. Ma e mautinoa na te aveesea so o se faiga lē tonu e tatou te ono pagatia ai i lenei faiga amioleaga o mea. E lē gata i lea, ua ia folafola mai le taui o le a maua, o le ola e faavavau i le lalolagi fou lea o le a “mau ai le amiotonu.”—2 Peteru 3:13.

[Ata i le itulau 16, 17]

O ā ni lagona o Napota a o ia fesagaʻi ma faiga lē tonu e sili ona leaga?