Jehovah Ama Edinen Ikpe
Jehovah Ama Edinen Ikpe
“Ami Jehovah mmama [“edinen,” NW] ikpe.”—ISAIAH 61:8.
1, 2. (a) Nso ke ikọ oro “edinen ikpe” ye “ufịk” ẹwọrọ? (b) Nso ke Bible etịn̄ aban̄a Jehovah ye edinen ikpe esie?
EDINEN IKPE edi unana asari, edinam se inende inyụn̄ ifọnde. Ufịk esịne editụk owo, edisari asari, edinam se mînenke, nnyụn̄ mfiomo mbon en̄wen.
2 Kop se Moses ekewetde n̄kpọ nte isua 3,500 emi ẹkebede aban̄a Jehovah, Ọbọn̄ Andikara ekondo: “Utom esie ọfọn ama: koro kpukpru usụn̄ esie ẹnende: Abasi akpanikọ emi mînamke ukwan̄n̄kpọ.” (Deuteronomy 32:4) Ke isua ikie itiaba ẹma ẹkebe, Abasi ama ọnọ Isaiah spirit man ewet ikọ emi: “Ami Jehovah mmama [“edinen,” NW] ikpe.” (Isaiah 61:8) Ekem Paul ama ọdọhọ ke akpa isua ikie ete: “Nte Abasi akwan̄a ikpe? Idịghe ntre!” (Rome 9:14) Kpa ke akpa isua ikie oro, Peter n̄ko ama ọdọhọ ete: “Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.” (Utom 10:34, 35) Ke akpanikọ, “Jehovah [ama] edinen ikpe.”—Psalm 37:28; Malachi 3:6.
Idiọkido Ẹyọyọhọ Kpukpru Ebiet
3. Didie ke idiọkido ọkọtọn̄ọ ke isọn̄?
3 Edinen ido iwakke mfịn. Ẹkeme ndinam nnyịn idiọk ke ebiet ekededi—ke itieutom, ke ufọkn̄wed, ke nte mme andikara ẹnamde n̄kpọ ye nnyịn, ye ke mme usụn̄ en̄wen—idem ke esịt ubon. Edi utọ n̄kpọ oro idịghe obufa n̄kpọ. Enye ọkọtọn̄ọ ke ini ọsọn̄ibuot edibotn̄kpọ eke spirit oro, Satan kpa Devil, akanamde akpa ete ye eka nnyịn ẹsọn̄ ibuot ẹbiat ibet. Ke akpanikọ, Adam ye Eve ye Satan ndikada ifụre oro Jehovah ọkọnọde mmọ mmek ndisọn̄ ibuot ye andikakam nnọ mmọ utịbe utịbe enọ emi ikọfọnke. Idiọkn̄kpọ mmọ ama ada akwa ndutụhọ ye n̄kpa ọsọk ofụri ubonowo.—Genesis 3:1-6; Rome 5:12; Mme Hebrew 2:14.
4. Idiọkido ebịghi adan̄a didie?
4 Idiọkido enen̄ede ọdọn̄ n̄kam tọn̄ọ ẹkebot owo ke se ikande isua 6,000 emi ẹbede toto ke ini oro ẹkesọn̄de ibuot ke Eden. Ikpaha owo idem ndikụt emi koro Satan edi abasi ererimbot emi. (2 Corinth 4:4) Enye edi osu nsu ye ete nsu, ọdọk-edidọk, ye andibiọn̄ọ Jehovah. (John 8:44) Idụhe ini oro enye mînamke ata ukwan̄n̄kpọ. Ke uwụtn̄kpọ, idiọk odudu Satan eketiene abiat ererimbot mbemiso Ukwọ eyo Noah, tutu Abasi okụt “idiọk-n̄kpọ owo nte okponde ke isọn̄, kpukpru n̄kpọ ke ekikere esịt esie ẹnyụn̄ ẹsụk ẹdi idiọk kpukpru ini.” (Genesis 6:5) N̄kpọ okosụk etie ntre ke ini Jesus okodude ke isọn̄. Enye ọkọdọhọ ete: “Afanikọn̄ [utọ nte ufịk eke] usen ekem ye usen.” (Matthew 6:34) Bible enen ke ini ọdọhọde ete: “Ofụri ubonowo ke omụm mmụm ọtọkiet onyụn̄ odu ke ubiak ọtọkiet tutu esịm emi.”—Rome 8:22.
5. Ntak emi ufịk ẹwakde idahaemi ẹkan nte akanam edide?
5 Ntem, idụhe ini oro ndiọi n̄kpọ oro ẹtịbede ke ntak ufịk mîdụhe tọn̄ọ ẹkebot owo. Enye etetịm ọdiọk idahaemi akan nte akanam edide. Ntak-a? Koro ebịghi idiọk editịm n̄kpọ emi okodụk “mme akpatre usen” esie, ndien “ndiọkeyo” enen̄ede odu nte utịt asan̄ade ekpere. Bible ama ebem iso etịn̄ ete ke ini emi, mme owo “ẹyedi mme ama idem, mme ama okụk, ẹwụt idem, ẹtan̄ idem, ẹsụn̄i isụn̄i, . . . ẹnana esịtekọm, inyeneke nsọn̄ọnda, inyeneke ndammana ima, inyịmeke ndidụk ediomi ekededi, mbon edidọk, ẹnana mfara ke idem, ẹtie obom obom, imaha eti ido, mme andida owo nnọ, ẹsọn̄ ibuot, ẹkohode idem.” (2 Timothy 3:1-5) Utọ ndiọi edu emi ẹdi ntak kpukpru orụk ufịk.
6, 7. Nso enyene-ndịk ibak ke ẹnam ubonowo ke eyo nnyịn?
6 Ẹma ẹnam mme owo idiọk ke isua ikie oro ẹsụk ẹbede ke usụn̄ oro mînyeneke mbiet. Ntak kiet oro anamde idọhọ ntre edi sia idụhe ini oro ẹn̄wanade ekọn̄ nte isua ikie oro ẹsụk ẹbede mi. Ke uwụtn̄kpọ, ndusụk mme ewetmbụk eset ẹdọhọ ke udiana ekọn̄ ererimbot kpọt okowot n̄kpọ nte owo miliọn 50 esịm miliọn 60, ndien ekese ke otu emi ikakam idịghe mbonekọn̄, edi ẹkedi ikpîkpu irenowo, iban, ye idem nditọwọn̄. Tọn̄ọ ekọn̄ oro eketre, ediwak ekọn̄ ẹwot ata ediwak owo, ndien ekese ke otu emi idịghe mbonekọn̄. Iyatesịt anam Satan esịn udọn̄ ọnọ mme utọ ukwan̄n̄kpọ emi, sia enye ọfiọk ke Jehovah ọmọn̄ ọsọp osobo imọ efep. Ntịn̄nnịm ikọ Bible ọdọhọ ntem ete: “Devil omosụhọde etiene mbufo, asan̄ade ye akwa iyatesịt, sia ọfiọkde ete ini imọ edi ibio.”—Ediyarade 12:12.
7 Ẹbiat n̄kpọ nte triliọn dollar kiet kpukpru isua ke ofụri ererimbot ẹnọ ekọn̄. Ata ediwak miliọn owo inyeneke akpan n̄kpọ udu uwem, mmọdo kere nti n̄kpọ oro ẹkpedade adan̄a akpakịp okụk oro ẹnam edieke ẹkpebiatde enye ke eti usụn̄. N̄kpọ nte owo biliọn kiet inyeneke udia oro ekemde mmọ, ke adan̄aemi mmọ eken ẹnyenede barasuene. N̄wed United Nations kiet ọdọhọ ke n̄kpọ nte nditọwọn̄ miliọn ition ẹsikpan̄a ke ntak ọ-biọn̄ kpukpru isua. Nso ukwan̄n̄kpọ ke emi edi ntem! Kere n̄ko ban̄a ekese nseknditọ esịt idịbi oro mîfiọkke n̄kpọ ndomokiet, emi ẹsiwotde ke usion̄o idịbi. Ndụn̄ọde owụt ke ẹsision̄o idịbi awak esịm n̄kpọ nte miliọn 40 esịm miliọn 60 ke ofụri ererimbot kpukpru isua. Nso enyene-ndịk ibak ke emi edi ntem!
8. Anie kpọt ekeme nditre ufịk?
8 Mme andikara ikemeke nditre ikpọ mfịna oro ẹsịmde ubonowo mfịn, idotenyịn inyụn̄ idụhe ke owo eyekeme nditre mme mfịna emi. Ikọ Abasi ama ebem iso etịn̄ ete ke “ndiọi owo ye mbon abian̄a ẹyedọdiọn̄ ẹdiọk ẹka iso, ẹbian̄a owo, ẹyenyụn̄ ẹbian̄a mmọ.” (2 Timothy 3:13) Ufịk enen̄ede okpon ke ererimbot emi tutu owo ikemeke nditre. Abasi edinen ikpe kpọt ekeme nditre enye. Enye ikpọn̄ ekeme ndisio Satan, mme demon, ye ndiọi owo mfep.—Jeremiah 10:23, 24.
An̄wan̄a Ntak Emi Ufịk Afịnade Mme Owo
9, 10. Ntak emi idem ekememde Asaph?
9 Ke eset, idem ndusụk mme andiwet Bible ẹma ẹkere ntak emi Abasi mîketreke mfịna ubonowo inyụn̄ inam ata edinen ikpe ye edinen ido ẹdu. Ke uwụtn̄kpọ, kere ban̄a eren kiet oro okodude uwem ke ini oro ẹkewetde Bible. Ẹwet enyịn̄ Asaph ke ikọ enyọn̄ ibuotn̄wed Psalm 73. Ekeme ndidi andiwet psalm emi ekedi Asaph eyen Levi, kpa ọwọrọiso ọkwọikwọ emi okodude ke ini ukara Edidem David, mîdịghe ekeme ndidi enye ekedi ọkwọikwọ ke ubon emi Asaph ekedide ibuot. Asaph ye nditọ esie ẹma ẹwet ekese ikwọ oro ẹkesikwọde ẹtoro Abasi ke otu. Edi isan̄ kiet, andiwet psalm emi ama okop mmemidem ke n̄kan̄ eke spirit. Enye ama okụt uforo mme idiọkowo, onyụn̄ okụt ke etie nte mmọ ẹsiwak ndikop uyụhọ inyụn̄ ikwe ukụt.
10 Enye ọkọdọhọ ete: “[N̄kefịbe] mbon iseri ufụp, n̄kụt ifụre mme idiọk owo. Koro ndutụhọ mîdụhe ke ini n̄kpa mmọ: odudu mmọ onyụn̄ ọsọn̄. Mmọ ikwe ukụt owo; inyụn̄ itụkke mmọ nte owo efen.” (Psalm 73:2-8) Edi nte ini akakade, andiwet Bible emi ama edifiọk ke utọ ekikere oro inenke. (Psalm 73:15, 16) Enye ama odomo ndikpụhọde ekikere esie, edi enye ikenen̄ekede ifiọk ntak emi etiede nte mme idiọkowo isibọhọ ufen idiọkn̄kpọ mmọ ke adan̄aemi nti owo ẹsikam ẹbọde ufen.
11. Nso ke Asaph emi eketienede ewet psalm ekedi edifiọk?
11 Nte ini akakade, Asaph, kpa anam-akpanikọ eren eset oro ama edifiọk se ikanade ibet mme idiọkowo, ye nte ke Jehovah eyenen̄ede se ikwan̄ade ke akpatre. (Psalm 73:17-19) David ekewet ete: “Bet Jehovah, nyụn̄ nịm ido esie, ndien enye eyemenede fi enịm ke enyọn̄, man ada isọn̄ enyene. [“Ke ini ẹdikpokde mme idiọkowo ẹfep, afo oyokụt,” NW].”—Psalm 37:9, 11, 34.
12. (a) Nso ke Jehovah aduak aban̄a idiọkn̄kpọ ye ufịk? (b) Afo ese didie nte Jehovah aduakde nditre ufịk?
12 Ke akpanikọ, Jehovah aduak ndisio idiọkn̄kpọ ye ufịk mfep ke isọn̄ emi ke edikem ini esie. Idem ata mme Christian ẹnyene nditi emi kpukpru ini. Jehovah oyosobo mbon oro mînamke uduak esie, onyụn̄ ọdiọn̄ mbon oro ẹdude uwem ekekem ye uduak esie. “Enyịn esie ese, n̄kpọk enyịn esie ẹdomo nditọ owo. Jehovah odomo edinen owo: ndien ama edi idiọk owo, ye owo eke amade afai, ukpọn̄ esie asua mmọ. Enye ayanam afia edep anam mme idiọk owo; ikan̄, ye brimstone, ye edifiop ofụm . . . Koro edinen Jehovah amade se inende.”—Psalm 11:4-7.
Obufa Ererimbot Oro Edinen Ikpe Edidude
13, 14. Nso idinam edinen ido ye edinen ikpe ẹdu ke obufa ererimbot?
13 Ke Jehovah ama okosobo ererimbot ufịk oro Satan akarade mi, Enye ọyọtọn̄ọ utịbe utịbe obufa ererimbot. Obio Ubọn̄ Abasi eke heaven, emi Jesus ekekpepde mme anditiene enye ete ẹbọn̄ akam ẹben̄e, edikara ini oro. Idiọkido ye ufịk ididụhe, edi edinen ido ye edinen ikpe ẹdidu. Ini oro, ẹyenen̄ede ẹbọrọ akam emi: “Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.”—Matthew 6:10.
14 Bible asian nnyịn orụk ukara oro idoride enyịn ndikụt, kpa orụk ukara oro kpukpru ndinen owo ẹnen̄erede ẹyom idahaemi. Ikọ Psalm 145:16 emi eyenen̄ede osu: “Afo [Jehovah Abasi] atat ubọk fo, onyụn̄ ọnọ kpukpru mme andidu uwem se mmọ ẹmade, ẹyụhọ.” Akan oro, Isaiah 32:1 ọdọhọ ete: “Sese, edidem kiet [Christ Jesus ke heaven] ayakama obio nte enende; ama edi mbọn̄, [mme andida ke ibuot Christ ke isọn̄], mmọ n̄ko ẹyeda ubọn̄ ke eti ido.” Isaiah 9:7 etịn̄ ntịn̄nnịm ikọ aban̄a Edidem Jesus Christ ete: “Ubọn̄ ye emem ididopke ndikọri ke ebekpo David, ye ke itie ubọn̄ esie, man enịm enye, onyụn̄ [ọsọn̄ọ] owụk enye ke [edinen] ikpe ye ke edinen ido, ke emi ye ke nsinsi. Ufụp Jehovah mme udịm ayanam n̄kpọ emi.” Nte emekeme ndikụt idemfo ke idak ukara emi?
15. Nso ke Jehovah edinam ọnọ ubonowo ke obufa ererimbot?
15 Ke obufa ererimbot Abasi, inyeneke se idinamde nnyịn ifiak iseme utọ eseme oro ẹwetde mi ke Ecclesiastes 4:1: “Ndien ami n̄wọn̄ọde nnyụn̄ nse kpukpru ufịk emi ẹnamde ke idak utịn: ndien se mmọn̄eyet mmọ emi owo ẹfịkde: ndien baba owo kiet eke ọdọn̄de mmọ esịt idụhe; mme andifịk mmọ ẹnyụn̄ ẹkan mmọ ubọk; ndien baba owo kiet eke ọdọn̄de mmọ esịt idụhe.” Edi akpanikọ ke ọsọsọn̄ nnyịn emi idide mme anana-mfọnmma owo nditịm mfiọk adan̄a nte edinen obufa ererimbot oro edinemde eketre. Idiọkn̄kpọ ididụhe aba, edi kpukpru usen ediyọhọ ye nti n̄kpọ. Ke akpanikọ, Jehovah eyenen̄ede kpukpru se ikwan̄ade ke usụn̄ oro nnyịn mîkekereke-kere. Ntak edi oro Jehovah Abasi ọkọnọde apostle Peter spirit ewet ete: “Mbufa enyọn̄ ye obufa isọn̄ ẹdu emi nnyịn itiede ibet nte ekemde ye un̄wọn̄ọ esie, ndien edi mi ke edinen ido edidụn̄.”—2 Peter 3:13.
16. Didie ke ẹtọn̄ọ “mbufa enyọn̄,” ndien didie ke ẹtịm idem idahaemi ẹnọ “obufa isọn̄”?
16 Ke akpanikọ, ẹma ẹtọtọn̄ọ “mbufa enyọn̄” emi edide ukara Abasi eke heaven oro Christ akarade. Ke ẹtan̄ ndinen owo ke mme akpatre usen emi ẹbok, kpa mmọ emi ẹdidade ẹtọn̄ọ “obufa isọn̄.” Mmọ ẹwak ẹkpere miliọn owo itiaba idahaemi, ndien mmọ ẹdu ke idụt 235 ke nsụhọde n̄kaha, ye ke n̄kpọ nte esop 100,000. Mmọ ke ẹkpep ndinen usụn̄ Jehovah, ndien emi anam mmọ ẹdiana kiet ke ima ke ofụri ererimbot. Mmọ ẹdiana kiet ẹbịghi ẹkan, ndien emi enen̄ede ọwọrọ etop ke ofụri ererimbot, kpa se mbon emi Satan akarade mînyeneke. Utọ ima ye edidianakiet oro ẹwụt utịbe utịbe idaha oro edidude ke obufa ererimbot Abasi, emi edikarade ke edinen ido ye edinen ikpe.—Isaiah 2:2-4; John 13:34, 35; Colossae 3:14.
Satan Idin̄wanake Ikan
17. Ntak emi Satan mîdikanke ke akpatre en̄wan oro enye edin̄wanade ye ikọt Jehovah?
17 Ke mîbịghike, Satan ye ikọt esie ẹyedaha ẹn̄wana ye mme andituak ibuot nnọ Jehovah man ẹsọhi mmọ ẹfep. (Ezekiel 38:14-23) Oro edidi ikpehe n̄kpọntịbe oro Jesus okokotde “akwa ukụt . . . orụk eke akanam mîdụhe toto ke editọn̄ọ ererimbot tutu esịm emi, eke mîdinyụn̄ idụhe aba.” (Matthew 24:21) Ndi Satan ayakan? Baba-o! Ikọ Abasi ọn̄wọn̄ọ ọnọ nnyịn ete: “Koro Jehovah amade edinen ikpe, ndien ikpọn̄ke mbon-ima esie; eyekpeme mmọ ke nsinsi: edi ẹyesịbe ubon mme idiọk owo ẹfep. Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:28, 29.
18. (a) Didie ke Abasi edinam n̄kpọ ke ini Satan edin̄wanade ye ikọt Esie? (b) Nso ufọn ke afo ọbọ ke ndidụn̄ọde se Bible ekpepde emi aban̄a nte edinen ikpe edikande?
18 Satan ye ikọt esie ndidaha nda n̄n̄wana ye mme asan̄autom Jehovah edidi akpatre usọn̄enyịn esie. Jehovah ama ada Zechariah etịn̄ ete: “Enye emi otụkde mbufo otụk eyen enyịn [mi].” (Zechariah 2:8) Oro etie nte n̄kpọ eke owo esịnde Jehovah ubọk ke n̄kpasịp enyịn. Enye ayawara okụt ete ke imosio ndiọi owo oro ifep. Mme asan̄autom Jehovah ẹdi mbon oro ẹmade ima, ẹdianade kiet, ẹtiede emem emem, ẹnyụn̄ ẹnịmde mbet ẹkan ke isọn̄. Ntre, ididotke ke usụn̄ ndomokiet Satan nditọn̄ọ en̄wan ye mmọ. Akwa Abasi emi “amade edinen ikpe” ididopke-dop ise utọ n̄kpọ oro. Se enye edinamde man anyan̄a ikọt esie edi ndisobo mme asua mmọ, ndien edinen ikpe ayakan, man mbon oro ẹtuakde ibuot ẹnọ ata Abasi kierakiet ẹbọhọ. Nso utịbe utịbe n̄kpọ emi ẹduaide owo idem ẹna ntem ẹbet nnyịn!—Mme N̄ke 2:21, 22.
Didie ke Afo Ọkpọbọrọ?
• Ntak emi ufịk awakde ntem-e?
• Didie ke Jehovah editre ufịk ke isọn̄?
• Nso ke ama akan ke ukpepn̄kpọ oro aban̄ade nte edinen ikpe dikande mi?
[Mme Mbụme Ukpepn̄kpọ]
[Ndise ke page 23]
Idiọkn̄kpọ ama ọyọhọ isọn̄ mbemiso Ukwọ, idiọkn̄kpọ ẹnyụn̄ ẹyọyọhọ isọn̄ ke “mme akpatre usen” emi n̄ko
[Ndise ke page 24, 25]
Edinen ikpe ye edinen ido ẹdidu ke obufa ererimbot Abasi, ke ini idiọkn̄kpọ edibede ifep