Jehovap naapertuilluarneq nuannaraa

„Uanga [Jehova] iluarsuseq [eqqortoq, NV] nuannaraara.“ — ESAJA 61:8.

1, 2. (a) Naapertuilluartuliorneq naapertuilluanngitsuliornerlu qanoq paasisariaqarpat? (b) Jehova taassumalu naapertuilluassusia pillugit Biibilimi qanoq allassimasoqarpa?

EQQORTULIORNEQ naapertuilluartuliornerlu kinaassusersiortuunnginnertut unneqqarissuunertullu, ileqqussatigut eqqortuullutillu assuarnaatsunut naapertuuttumik iliornertut paasisariaqarput. Naapertuilluanngitsuunermut ilaapput unneqqaserluttuuneq, paqumisukkajuttuuneq, ajorniartuuneq pisuussuteqanngitsunillu ajoqusiineq.

² Ukiut 3500-ngajaat matuma siorna Mosesip qilammi nunamilu kisimi oqartussaalluni naalagaasoq, Jehova, ima allaatigaa: „Innarluitsuupput [Eqqortuupput, NV] aqqutigisai tamarmik. Guutiuvoq aalajaatsoq, salloqittaanngisaannartoq.“ (5 Mosesi 32:4) Ukiut 700-t missiliorlugit tamatuma kingorna Guutip Esaja isumassarsisillugu ima allatsippaa: „Uanga [Jehova] iluarsuseq [eqqortoq, NV] nuannaraara.“ (Esaja 61:8) Ukiuni hundredelinni siullerni Paulusi ima allappoq: „Guutimi iluanngitsoqarnerpa [naapertuilluanngitsoqarnerpa, NV]? Naamerluinnaq!“ (Romamiut 9:14) Aamma apustili Petrusi nalunaarpoq „Guuti kinaassusersiortuunngitsoq, tassaasorli inuiaqatigiinni kikkuusuniluunniit imminik mianerinnittumik iluartuliortumillu [naapertuilluartuliortumillu, NV] ilassinnittartoq“. (Apustilit Suliaat 10:34, 35) Aap, ’Jehovap eqqortoq iluaraa’. — Tussiaat 37:28; Malaki 3:6.

Naapertuilluannginneq ingasatsippoq

3. Nunarsuarmi naapertuilluanngitsuliornerit qanoq aallartippat?

³ Ullumikkut naapertuilluassuseqarpianngilaq. Inuiaqatigiinni sumiluunniit naapertuilluanngitsuliorfigineqarsinnaavugut — suliffitsinni, atuarfimmi, oqartussaasunit aamma allatigut — aap, allaat ilaqutariit iluanni. Soorunami inuit akornanni taamatut naapertuilluanngitsoqartarnera nutaajunngilaq. Naapertuilluanngitsoqartarnera aallartippoq siuaasavut siulliit inatsisaatsunngorlutik pikitsitsimmata, pinngortitamit anersaajusumit pikitsitsiumatuumit Saatani Diaavulunngortumit pileritsatsitaallutik. Adamip, Evap Saatanillu nammineq piumasatut iliorsinnaanermik tunissummik Jehova Guutip imminnut tunniussaanik atornerluinerat naapertuilluarnerunngilluinnarpoq. Naapertuilluanngitsuliornerat inuiannut naalliunnartorpassuarnik toqumillu kinguneqarpoq. — 1 Mosesi 3:1-6; Romamiut 5:12; Hebræerit 2:14.

4. Naapertuilluannginneq inuiaat oqaluttuarisaanerannut qangali ilaalerpa?

⁴ Edenimi pikitsitsisoqarnerata kingorna ukiut 6000-t missiliorlugit ingerlaneranni inuiaat naapertuilluannginnermit sunnerneqarsimapput. Saatanili silarsuarmut matumunnga guutiummat tamanna naatsorsuutigineqaannarsinnaavoq. (2 Korinthimiut 4:4) Taanna sallutuujullunilu sallumut ataataavoq, mamarliisuullunilu Jehovamik akerlilersuisuuvoq. (Johannesi 8:44) Ingasattunik naapertuilluanngitsuliortuarpoq. Assersuutigalugu Noap ulluini Ulersuaq sioqqullugu ’nunarsuarmi inuit ajussusiannut angeqisumut ullorlu tamaat iliuuseriumasaannut pilersaarusiaannullu ajortuinnaasunut’ ilaatigut pissutaavoq Saatanip ajortumik sunniinera. (1 Mosesi 6:5) Aamma Jiisusip nalaani taamaappoq. Jiisusi ima oqarpoq: „Ullup suugaluartulluunniit erloqinartua ullormut naammattarpoq,“ tassa imaappoq ullup nammineq ajornartorsiutai nukillalaarnartut, soorlu naapertuilluannginneq. (Matthæusi 6:34) Biibilimi ilumoortumik ima allassimasoqarpoq: „Pinngortitat tamarmik suli peqatigiillutik anersaarulullutillu [nimaarput].“ — Romamiut 8:22.

5. Sooq ullumikkut aatsaat taama naapertuilluanngitsoqartigaa?

⁵ Taamaammat inuiaat oqaluttuarisaanerata  ingerlanerani ullut tamaasa ajortumik iliortoqartarlunilu naapertuilluanngitsuliortoqartarpoq. Aamma ullumikkut pissutsit aatsaat taama ajortigipput. Sooq? Pissutigalugu pissutsit aaqqissuussaanerata guutiitsup maanna atuuttup ’ullui kingulliit’ ukiorpassuarni atuussimammata, tamatumalu naggatissaa qanilliartortillugu pissutsit ’ernumanartorsiornarneruleraluttuinnarlutillu’ ’anigoruminaanneruleraluttuinnarmata’ (NV). Biibilimi siulittuutigineqarpoq oqaluttuarisaanermi piffissami matumani inuit tassaajumaartut „namminissarsiortut, aningaaserituut, usorsitsaartut, anneruniartut, asissuingaartut, . . . qujasuitsut, mitalliisut, asanniuitsut, saammartitassaanngitsut, mamarliisut, naammatsiuitsut, qiningasut, ajunngitsunut akeraasut, killuussisut, puffajasut, makitaniartut“. (2 Timotheusi 3:1-5) Pissuserineqartut ajortut tamakku naapertuilluannginnernik qanorluunniit ittunik kinguneqartarput.

6, 7. Naapertuilluannginnerujussuit nalitsinni inuiaat naalliuutigisaat suuppat?

⁶ Ukiuni hundredeni kingullerni aatsaat taama naapertuilluanngitsuliortoqartigaaq. Pissutaasut ilaat tassaavoq aatsaat taama sorsuttoqartiginera. Assersuutigalugu oqaluttuarisaanermik ilisimatuut sorsunnersuit aappaannaanni toqusut 50 millionit 60 millionillu akornanniissoraat, taakkualu amerlanerpaartaat sakkutuujunngillat — angutit, arnat meeqqallu pisuussuteqanngitsut. Sorsunnerup tamatuma qaangiunnerata kingorna inuit millionillit allat akerleriinnerni assigiinngitsuni toqutaapput, aamma taakkua amerlanerpaartaat sakkutuujusimanngillat. Saatani naapertuilluannginnernik tamakkuninnga siuarsaavoq qanittukkut Jehovamit ajorsartinneqarluinnarnissani kamaatigigamiuk. Siulittuummi Biibilimiittumi tamanna ima allaatigineqarpoq: „Diaavulu ilissinnut [aqqarpoq] kamattorsuulluni, piffissakissutsi nalunnginnamiuk.“ — Saqqummersitat 12:12.

⁷ Silarsuaq tamakkerlugu sakkutooqarnermut aningaasartuutigineqartut tamaasa katillugit maanna ukiumut koruunit 5,6 billionit missaanniipput. Inuit 100 millionilikkuutaat inuunermi pisariaqartut pingaaruteqarnerpaat amigaatigaat, taava eqqarsaatigeriaruk aningaasat taakkua tamarmik eqqissinermik siuarsaaniarluni atorneqartuuppata qanoq iluaqutaatigissagaluartut. Inuit milliardit missaat naammattunik nerisassaqanngillat, allat naammattorsuarnik nerisassaqartut.  Paasissutissat FN-imeersut naapertorlugit ukiut tamaasa meeqqat 5 millionit missiliorlugit perlertarput. Ila naapertuilluanngissusia! Eqqarsaatigeriakkillu pisuussuteqanngitsorpassuit naartuersinnermi toqunneqartartut — missiliukannerlugu silarsuaq tamakkerlugu ukiut tamaasa 40 millionit 60 millionillu akornanniittut! Naapertuilluannginnerup alianassusia!

8. Kina kisimi naapertuilluarnermik piviusumik inunnut atuutilersitsisinnaava?

⁸ Naalakkersuisut nunamiusut ajornartorsiuterujussuit ullumikkut inuiannit naalliuutigineqartut aaqqiissutissarsisinnaanngilaat; inuillu ilungersuuteqarneratigut pissutsit siunissami pitsaanerulernavianngillat. Guutip oqaasiani siulittuutigineqarpoq ullutsinni ’inuit ajortut peqquserluttullu ajortumut nakkaakkiartuinnassasut, ilaminnik tammartitsillutik imminnullu tammartillutik’. (2 Timotheusi 3:13) Naapertuilluannginneq inuunermut ima ilanngussimatigaaq inunnit peerneqarsinnaanani. Naapertuilluarnerup Guutiata kisimi peersinnaavaa. Taassuma kisimi Saatani, anersaapiluit inuillu ajortut peersinnaavai. — Jeremia 10:23, 24.

Isumakuluttoqarnera paasinarpoq

9, 10. Sooq tussiaasiortoq nikallorpa?

⁹ Itsaq allaat Biibilimik allattut ilaasa tupigusuutigaat Guutip pissutsinut inuit atugaannut akuliutereersimannginnera naapertuilluarnermillu piviusumik atuutititsilereersimannginnera. Misissoriartigu angummik Biibilip nalaani inuusumik pisimasoq. Tussiaat 73-ip qulequtaani allassimavoq tussiaat taanna Asafimit allanneqarsimasoq, atermilu tamatumani kunngip Daavip naalakkersuinerata nalaani nipilersortartoq nuimasoq Levikkuusoq pineqanngikkuni nipilersortartut Asafip kinguaavi pineqarput. Asafi taassumalu kinguaavi nipilersugassiarpassuaqarput peqatigiilluni pallorfiginninnermi atorneqartartunik. Ilaannili tussiaammik tamatuminnga allattoq nikallungalerpoq anersaakkullu ittunik pingaartitsisutut naliliilluarsinnaajunnaarluni. Iluaatsut, imaluunniit guutiitsut, pigissaarnerat takuaa malugalugulu inuunerminnik nalerisimaarutiginnippasittarnerat pissusilersornermillu kingunipiluinik misigisaqartannginnguatsiarnerat.

¹⁰ Ima allassimavoq: „[Uumitsaatigisarpakka]  anneruniartut, takugaangakkit iluaatsut pilluarlutik inuusut. Misigisimasaqanngillat naalliuutinik, peqqipput pualallutillu. Inuit naalliunnerini peqatiginngilaat, inuit naalliuutinik eqqorneqartartut assiginngilaat.“ (Tussiaat 73:2-8) Piffissalli ingerlanerani Biibilimik allattup taassuma paasilerpaa taamatut ajortumik isiginnittaaseqarneq kukkulluinnartuusoq. (Tussiaat 73:15, 16) Eqqarsartaatsini aaqqinniarsaraa, taamaakkaluartorli Jehovamik pallorfiginnittut naalliutsillugit sooq guutiitsut pillarneqanngitsoorpasittarnerat paasilluarsinnaanngilaa.

11. Tussiaasiortup Asafip suna paasivaa?

¹¹ Angutilli aalajaatsup taassuma guutiitsut qanoq siunissaqarnerat paasiartulerpaa — tassa Jehovap naggataatigut taakku pillarumaarai. (Tussiaat 73:17-19) Daavi ima allappoq: „[Jehova] neriuffiguuk aqqutigeqqusaalu atuarlugu, taava nunamik kingornussisussanngortikkumaarpaatit, takujumaarpallu iluanngitsut piiagaanerat.“ — Tussiaat 37:9, 11, 34.

12. (a) Ajussutsimut naapertuilluannginnernullu tunngatillugu Jehovap siunertaa suua? (b) Naapertuilluannginneq pillugu ajornartorsiummut aaqqiissutissaq tamanna illit qanoq isumaqarfigaajuk?

¹² Qularnanngilluinnarpoq Jehovap piffissaq aalajangikkani nalliuppat nunarsuarmi ajussutsimik naapertuilluannginnernillu nungutitsinissani siunertarigaa. Aamma kristumiut ilumoorfiginnittut tamanna pillugu imminut eqqaasittuartariaqarput. Jehovap piumasaminik akerlilersuisut piiassavai, piumasanilu malillugu inuusut akissarsisissavai. „Isai nakkutilliipput, isigernata inuit misissuiffigai. [Jehovap] iluartoq [naapertuilluartoq, NV] iluanngitsorlu misissuiffigai, nakuusernermillu nuannarisaqartoq uumigaa. Iluanngitsut siallersitsivigai aamanik innerusunik ikuallassaammillu anorilu uunaannaasoq atugarissavaat. Iluartuugamimi [Jehovap] iluarneq nuannarisaraa [Jehovami naapertuilluartuuvoq; naapertuilluartuliornerit nuannarai, NV].“ — Tussiaat 11:4-7.

Silarsuassaq nutaaq naapertuilluarfiusoq

13, 14. Sooq naapertuilluarneq silarsuassami nutaami atuutissava?

¹³ Jehovap pissutsit aaqqissuussaanerat naapertuilluanngitsoq manna Saatanip naalakkersugaa aseroreeruniuk silarsuaq alianaatsoq nutaaq atulersissavaa. Silarsuaq tamanna aqunneqassaaq Guutip naalagaaffianit qilammiittumit, Jiisusip ajoqersukkaminut qinnutigisaqqullugu ilinniartitsissutigisaanit. Ajussuseq naapertuilluannginnerlu naapertuilluarnermik taarserneqassapput, taamaalippammi qinnutigisartagarput manna tamakkiisumik akineqassaaq: „Naalagaaffiit tikiulli, piumasat qilammisut nunamissaaq pili.“ — Matthæusi 6:10.

¹⁴ Biibilimi paasitinneqarpugut naalakkersuineq qanoq ittoq utaqqisinnaagipput, tassa naalakkersuineq ullumikkut inuit eqqortuliorusuttut tamarmik kissaatigisaat. Taamanikkussamut Tussiaat 145:16 tamakkiilluinnartumik eqquutissaaq: „Assatit ammartarpatit [Jehova Guuti] pinngortitallu tamaasa kissaatigisaannik qaarsillartittarlugit.“ Aamma Esaja 32:1-imi ima allassimavoq: „Takuuk! Kunngi [Jiisusi Kristusi qilammi] naapertuilluartumik naalakkersuiumaarpoq, naalagartallu [Kristusimut sinniisuusut nunarsuarmiittut] eqqortumik naalakkersuiumaarput.“ (NV) Kunngi Jiisusi Kristusi Esaja 9:6-imi ima siulittuutigineqarpoq: „Naalagaassusia angissaqaaq eqqissinerlu atajuassalluni Daavip issiavissaarsuani naalagaaffianilu, tunngavilissagamiuk aalajangersarlugulu iluarnikkut naapertuilluarnikkullu, maannamiit naassaanngitsumik. Katersaarsuit [Jehovaata] ilungersornera taamaalisitsiumaarpoq.“ Illit nammineq naalagaaffiup naapertuilluartup tamatuma aqutsinerani inuullutit takorloorsinnaaviuk?

15. Silarsuassami nutaami Jehova inuiannut qanoq iliorumaarpa?

¹⁵ Guutip silarsuassaani nutaami Oqaluussisartup oqaasii 4:1-imi allassimasutut ima oqarnissamut pissutissaarutissaagut: „Tulliutillugit takuakka qunutitaanerit seqernup ataani pisartut. Takuakka qunutitaasut qullii, tuppallersarneqanngillallu. Takuakka qunutitsisunit nakuuserfigineqarnerat  tuppallersarneqanngillallu.“ Soorunami takorluuisinnaassuserput naammalluinnanngitsuummat silarsuassap naapertuilluarfiusup nutaap tamatuma qanoq nuannertiginissaa paasiuminaatsissinnaavarput. Ajussuseqarunnaarluni ullut tamarluinnarmik nuannersunik ulikkaassapput. Aap, Jehovap ajortut tamaasa aaqqissavai, taamaaliussaarlu uagut paasinnissinnaassutsitsinnik qimmuingaartumik periaaseqarluni. Tamatumunnga naapertuuttumik Jehova Guutip apustili Petrusi ima allannissaanut isumassarsisippaa: „Neriorsuutaa naapertorlugu ilimagisaraavut qilaat nutaat nunalu nutaaq iluassutsip najugarisassai [naapertuilluassuseqarfiusut, NV].“ — 2 Petrusi 3:13.

16. „Qilaat nutaat“ qanoq pilersinneqarpat, ’nunamullu nutaamut’ piareersaatitut ullumikkut susoqarpa?

¹⁶ „Qilaat nutaat“, Guutip naalagaaffia qilammiittoq Kristusimit siulersorneqartoq, pilersinneqareerput. ’Nunamullu nutaamut’, inuiannut nunamiunut eqqortuliorusuttunut nutaanut, tunngaviusussat ulluni kingullerni makkunani katersorneqarput. Taakku 7 millioningajannik amerlassuseqalereerput, ilagiinniillutik 100.000-it missaanniittuni minnerpaamillu nunani 235-niillutik. Millionillit taakkua Jehovap aqqutigeqqusai eqqortuullutillu naapertuilluartut ilinniarsimavaat, tamannalu ataasiussusermik, kristumiutut asaqatigiinnermik tunngaveqartumik, silarsuaq tamakkerlugu nuannaarutiginninnerannik kinguneqarpoq. Ataasiussusiat oqaluttuarisaanermi nukittunerpaallunilu allanngujuinnerpaavoq, ataasiussuseq Saatanimut innuttaasut qaqugumulluunniit misigisinnaasaannik akimuingaartoq. Asanninneq ataasiussuserlu taama ittut piffissamut nuanningaartumut Guutip silarsuassaani nutaami, eqqortumik naapertuilluartumillu aqunneqartussami, takkuttussamut siumut assersuutaapput. — Esaja 2:2-4; Johannesi 13:34, 35; Kolossemiut 3:14.

Saatanip saassussinera iluatsinngitsuussaaq

17. Sooq qularnanngivissumik Saatanip Jehovap innuttaanik inaarutaasumik saassussinera iluatsissanngila?

¹⁷ Qanittukkut Saatani taassumalu malittai Jehovamik pallorfiginnittunik saassussissapput taakkuninnga suujunnaarsitseriaraluarniarlutik. (Ezekieli 38:14-23) Tamanna Jiisusip ’naalliunnartussatut silarsuup pileqqaarneraniit maannamut asseqanngitsussatut nalliuteqqinngisaannartussatullu’ eqqaasaata ilagissavaa. (Matthæusi 24:21) Saatanip saassussinera iluatsissava? Naamik. Guutip oqaasiani ima neriorsoqqissaarneqarpugut: „[Jehovap] eqqortoq iluaraa imminullu ilumoortut imminiiginnarnagit. Taakku sernissorneqartuartarput, iluanngitsulli qitornaat piiagaasarput. Iluartut nuna kingornutissavaat najugaqassallutillu tassani naassaanngitsumik.“ — Tussiaat 37:28, 29.

18. (a) Guuti Saatanip innuttaminut saassussinissaanut qanoq qisuariassava? (b) Naapertuilluarnerup ajugaajumaarnera pillugu paasissutissanik Biibilimik tunngavilinnik tamakkuninnga misissuineq qanoq iluaqutigaajuk?

¹⁸ Saatanip taassumalu malittaasa Jehovap kiffaanik saassussinerat mitaatiginninnerussaaq kingulleq. Sakaria aqqutigalugu Jehova ima siulittuivoq: „Ilissinnik attuisut isima tappiutaat attorpaat.“ (Sakaria 2:12) Jehova isarorneqartutullusooq ikkumaarpoq. Ingerlaannaq qisuariassaaq pisuusullu peerlugit. Jehovap kiffai tassaapput nunarsuarmi inuit asanninnerpaallutillu ataasiussuseqarnerpaallutillu eqqissisimanerpaallutillu inatsisinut naalannerpaat. Taamaattumik saassunneqarnerat tamanna tunngavissaqanngilluinnassallunilu naapertuilluanngilluinnassaaq. Tamanna Jehovap, eqqortumik naapertuilluarnermillu nuannarisaqartup, akuerinavianngilaa. Innuttami iluaqutissaannik akuliuppat taakkununnga akeraasut naassaanngitsumik suujunnaarsinneqassapput, naapertuilluarneq ajugaassaaq, Guutimillu ilumoortutuamik pallorfiginnittut annaanneqassapput. Aap, pisussat nuanningaartut alutornangaartullu nalliutilivipput! — Ussatit 2:21, 22.

Qanoq akissavit?

• Sooq naapertuilluannginneq taama nalinginnaatigaa?

• Nunarsuarmi naapertuilluannginnermut tunngatillugu ajornartorsiut Jehovap qanoq aaqqissavaa?

• Naapertuilluarnerup ajugaajumaarneranik misissuinermi matumani suna qamuuna attorneqaatigaajuk?

[Atuaqqissaarnermi apeqqutit]

[Qupp. 23-mi assiliartaq]

Ulersuaq sioqqullugu ajussuseqaqaaq, aamma ’ulluni kingullerni’ makkunani taamaappoq

[Qupp. 24-mi assiliartaq]

Guutip silarsuassaani nutaami ajussuseq guutiitsuussuserlu naapertuilluarnermik taarserneqassapput