Jehova Chuan Rorêlna Fel A Ngaina
Jehova Chuan Rorêlna Fel A Ngaina
“Kei, LALPA hian rorêlna fel ka ngaina si a.”—ISAIA 61:8.
1, 2. (a) “Rorêlna fel” leh ‘rorêlna fel lo’ tih thu malte hian eng awmzia nge a neih? (b) Bible-in Jehova leh a rorêlna fel chungchâng eng nge a sawi?
RORELNA FEL tih chu ‘thlei bîk neih lohna, dikna, nungchang dik leh ṭha zâwma thiltih’ tia hrilhfiah a ni ṭhîn. Rorêlna fel lovah chuan hleih neihna, pâwngpaw huatna, sualna, mi dangte an phu loh khawpa tawrhtîrna a tel a ni.
2 Kum 3,500 dâwn lai kal taah khân, Mosia chuan Lei leh Vâna Lalchungnungber, Jehova chungchângah: “A kawng zawng zawng chu rorêlna fel a ni. Rinawmna Pathian, rorêlna fel lo nei lova chu,” tiin a ziak a. (Deuteronomy 32:4, NW) A hnu kum zabi sarih aia tamah Pathian chuan Isaia chu he thu hi ziak tûrin a thâwk khum a ni: “Kei, LALPA hian rorêlna fel ka ngaina si a,” tih chu. (Isaia 61:8) Tichuan, kum zabi khatnaah Paula chuan: “Pathianah chuan fel lohna a awm em ni? Hnai lo ve,” tiin a sawi chhuak a. (Rom 9:14) Chu mi hun lai vêk chuan Petera chuan: “Pathianin mi duhsak bîk a nei lo . . . nimahsela hnam tin zîngah tupawh amah ṭiha fel taka ti apiang a lâwmzâwng mi an ni ṭhin,” tiin a puang chhuak bawk. (Tirhkohte 10:34, 35) Ni e, “LALPA chuan rorêlna fel a ngaina” a ni.—Sâm 37:28; Malakia 3:6.
Rorêlna Fel Lo A Tam
3. Engtin nge leiah rorêlna fel lo a awm ṭan?
3 Rorêlna fel chu tûn laia mize langsâr a ni lo. Khawtlâng dinhmun eng ang hnuaiah pawh—kan hnathawhna hmunah te, school-ah te, thu neitute kan dâwrnaah te, leh kawng dang dangah te—rorêlna fel lo thiltih chu kan tuar thei a, in chhûngkhur ngeiah te pawh kan tuar thei bawk a ni. Chutiang rorêlna fel lo chu thil thar a ni lo. Diabol-Setana lo ni ta thlarau thil siam hel hmang turna avânga kan nu leh pa hmasa berte an hela dân an bawhchhiat khân, rorêlna fel lo chu mihring chhûngkuaah a lo awm ṭan a. Adama, Evi, leh Setana te tân Jehova thilpêk ropui tak, zalên taka duh thlan theihna an hmang sual kha rorêlna fel lo a ni chiang hle. An thiltih dik lo chuan mihring zawng zawngte hrehawm tawrhna nasa tak leh thihna chu a thlen a ni.—Genesis 3:1-6; Rom 5:12; Hebrai 2:14.
4. Rorêlna fel lo chu eng chen nge mihringte zînga a awm tawh?
4 Rorêlna fel lo chu Eden huana helna aṭanga kum 6,000 vêl mihringte zîngah a awm tawh a. Setana chu he khawvêl pathian a nih avângin hei hi kan beisei tûr rêng a ni. (2 Korinth 4:4) Ani chu dawthei leh dâwt pa, Jehova sawichhetu leh dodâltu a ni. (Johana 8:44) Ani chuan englai pawhin rorêlna fel lo tak tak a thlentîr a. Entîr nân, Nova hun lai Tuilêt hma khân, Pathianin “leiah hian mihring sualzia chu nasa tak a ni tih leh, an rilru suangtuahzia rêng rêng chu sual hlîr a ni fo mai” a ti a, chutianga an sual chhan chu engemaw chenah chuan Setana sual thununna vâng a ni. (Genesis 6:5) Chu dinhmun chu Isua hun laiah pawh khân a la awm cheu va. Ani chuan: “Ni khat atân ni khat hrehawm chu a tâwk a ni,” tia a sawi chu rorêlna fel lo ang chi buaina manganthlâk takte chu a ni. (Matthaia 6:34) Bible pawhin: “Thil siam zawng zawngte chu tûn thlengin rûm leh nauvei na tuarin an awm hlawm,” tiin dik takin a sawi bawk.—Rom 8:22.
5. Engvângin nge kan hunah hian tûn hma zawng aia rorêlna fel lo a tam?
5 Chutiang chuan, mihring chanchin zawng zawngah rorêlna fel lo tak avânga thil ṭha lote chu a thleng reng a. Tûnah hian dinhmun chu tûn hma zawng aiin a chhe tawh zâwk a ni. Engvângin nge? Pathian ngaihsak lo he khawvêl hi kum sâwmbi tam tak chhûng chu a ‘ni hnuhnûngah’ a awm tawh a, a tâwp a hnaih ruala ‘hun khirh takte’ a hmachhawn vâng a ni. Bible chuan he hun chhûng hian, mite chu “mahni inhmangaihtu te, tangka ngainatu te, intivei te, chapo te, Pathian sawichhetu te, . . . lâwm nachâng hre lo te, thianghlim lo te, hmangaihna pianpui nei lo te, huaikawmbâwl te, hêktu te, insûm thei lo te, mi kawlhsen te, ṭha duh hauh lo te, vervêk te, thuhnudâwn lo te, inngaihlu te,” an ni dâwn tih a sawi lâwk a ni. (2 Timothea 3:1-5) Hêng miziate hian rorêlna fel lo tam tak a awmtîr a ni.
6, 7. Eng rorêlna fel lo nasa takin nge tûn laia mihringte a tihhrehawm?
6 Kum za kal ta chuan rorêlna fel lo chu tûn hma zawng aia nasain a tawng a. A chhan pakhatah chuan, hêng kumahte hian indona tam tak a thlen vâng a ni. Entîr nân, thilthleng chanchin ziaktu ṭhenkhat chuan Khawvêl Indopui II-na chhûng chauhva thite chu mi maktaduai 50 aṭanga 60 vêl niin an chhût a, chuta a tam zâwk chu tualchhûng mi—pawi sawi lo mipa, hmeichhia, leh naupangte an ni. Chu indona a tâwp aṭangin, mi maktaduai têlte chu indona chi hrang hrangah an thi a, a tam zâwkte chu tualchhûng mi an ni leh a. Jehova’n amah a tiboral thuai dâwn tih a hriata a thinur êm avângin, Setana chuan hêng rorêlna fel lo takte hi a awmtîr a ni. Bible hrilh lâwkna chuan heti hian a sawi: “Diabola chuan hun tlêm tê chauh a nei tih a inhriat avânga thinur êm êma in hnêna a lo chhuk tâk avângin,” tiin.—Thu Puan 12:12.
7 Khawvêl pum puia sipai atân kum khatah dollar tlûklehdingâwn sângkhat vêl hman ral a ni a. Chutih lai chuan mi maktaduai za têlte chuan nun atâna mamawh thilte an nei si lo; chûng pawisate chu remna ûm nâna hman ni ta se, a ṭangkai dân tûr chu han ngaihtuah teh. Mi dangte’n ei tûr an hnianghnâr hle laiin, mi tlûklehdingâwn khat vêl chu kham khawp nei lovin an awm a. United Nations sawi dânin, kum tinin naupang maktaduai nga vêl chu rilṭâm avângin an thi a ni. Rorêlna fel lo a va ni tak êm! Pawisawi lo nautê tam tak tihtlâkna pawh hi han ngaihtuah teh. Kum tinin khawvêl pumah maktaduai 40 aṭanga maktaduai 60 lai tihtlâk nia chhût a nih chu! Rorêlna fel lo râpthlâk tak a va ni êm!
8. Eng kawng chauhvin nge mihringte tâna rorêlna fel a lo awm theih?
8 Mihring rorêltute chuan tûn lai mihringte chîmbuaitu buaina nasa takte tihvên ngaihna chu an hre lo va, mihringte thawh rimna avângin dinhmun chuan ṭhat lam a pan hek lo. Pathian Thu chuan kan hunah hian “mi sual leh tihdertute erawh chu mi bum leh buma awmin an sual zual deuh deuh ang” tiin a sawi lâwk a ni. (2 Timothea 3:13) Rorêlna fel lo thiltihte chu nî tin nunah a beh tlat tawh avângin, mihringte tihbo theih rual a ni lo. Rorêlna fel ngainatu Pathian chauhvin a tibo thei a. Amah chauhvin Setana, ramhuaite, leh mi sualte chu a tiboral thei a ni.—Jeremia 10:23, 24.
Lungngaihna Hriatthiam Awm Tak
9, 10. Engvângin nge Asapha chu a lunghnual?
9 Hun kal tawhahte khân, Bible ziaktute zînga ṭhenkhat pawhin mihringte chung thua Pathian a inrawlh loh chhan leh rorêlna fel leh felna tak tak a awmtîr loh chhan chu an ngaihtuah a. Entîrna atân Bible hun laia mi pakhat hi han en ta ila. Sâm 73-na a chunga thuziakah chuan Asapha hming a chuang a, chu chuan Lal Davida lal chhûnga rimawi tum thiam Levia mi hmingthang tak emaw, rimawi tum thiamte chhûngkaw puipa ber emaw a kâwk a ni. Asapha leh a thlahte chuan vântlâng inkhâwmnaa hman ṭhin hla tam tak chu an phuah a. Mahse, ṭum khat chu he fakna hla ziaktu hi thlarau lamah a chau va. Ani chuan mi suaksualte hausakna chu a hmu a, rah ṭha lo engmah seng si lovin, an nunah an lungawi tâwk hle niin a hria a ni.
10 Heti hian kan chhiar a ni: “Mi suaksualte vânneihzia ka hmuhin, mi uangthuangte chu ka awt si a. An thih lai chuan tuarna rêng an nei lo va; an chakna chu a nghet zâwk mah si a. Mi dang anga hrehawmin an awm lo va; mi dang anga sawisakin an awm hek lo,” tiin. (Sâm 73:2-8) Mahse, he Bible ziaktu hian a hnuah chuan chutiang thlîr dân chu a dik lo tih a hre chhuak a ni. (Sâm 73:15, 16) Fakna hla phuahtu chuan a ngaihtuahna chu siam rem a tum a; mahse, mi rilru ṭhate’n an tawrh ṭhin laia mi suaksualte hrem lova chhuah nia an lan chhan chu a hre thiam chiah lo a ni.
11. Fakna hla phuahtu Asapha chuan eng nge a hriat thiam tâk?
11 Amaherawhchu, chu hmân lai mi rinawm chuan mi suaksualte hmabâk tûr—a tâwpah chuan Jehova’n thil a chingfel dâwn tih thu a hre thiam ta a ni. (Sâm 73:17-19) Lal Davida chuan: “LALPA chu nghâk la, a kawng chu zawh rawh, tichuan ram hi luah tûrin a chawimawi ang che: mi suaksualte tihborala an awm lai chu i la hmu ang,” tiin a ziak a ni.—Sâm 37:9, 11, 34.
12. (a) Mi suaksualte leh rorêlna fel lo chungchânga Jehova thiltum chu eng nge ni? (b) Rorêlna fel lo tihvên dân tûr hi engtin nge i ngaih?
12 Jehova chuan a hun ruatah suahsualna rualin, he lei aṭang hian rorêlna fel lo zawng zawng nuai bo a tum tih chu a chiang hle. Chu chu Kristian rinawmte pawhin an inhriatnawntîr reng tûr thil a ni. Jehova chuan a duhzâwng kalhtute chu a tiboral dâwn a, a duhzâwng mila nungte chu lâwmman a pe ang. “Mihring fate hi a mitin a en a, an thiltihte a hmu. LALPA chuan mi fel chu a fiah ṭhîn a: mi suaksual leh nunrâwnna ngaina erawh chu a nunnain a haw ṭhîn. Mi suaksualte chungah chuan thangte a surtîr ang a; mei leh kât leh thli lum tak hi. . . . Lalpa chu a fel si a; felna hi a ngaina ṭhîn a.”—Sâm 11:4-7.
Rorêlna Fel Khawvêl Thar
13, 14. Engvângin nge khawvêl tharah chuan felna leh dikna chu a dinchan ang?
13 Jehova chuan Setana thununna hnuaia awm he rorêlna fel lo kal hmang hi a tihboral hunah, khawvêl thar ropui tak chu A chhawm lût ang. Chu chu Isua’n a hnung zuite hnêna dîl tûra a zirtîr, Pathian vân lam Lalram chuan a thunun ang. Suahsualna leh rorêlna fel lote chu felna leh diknaa thlâk thleng a ni ang a, chutih hunah chuan: “I ram lo thleng rawh se. I duhzâwng vâna an tih angin leia mi’n ti rawh se,” tia ṭawngṭaina chu chhân famkim a ni tawh ang.—Matthaia 6:10.
14 Bible chuan kan beisei tûr rorêlna chu min hrilh a, chu chu thinlung ṭha zawng zawngte nghahhlelh mêk rorêlna chu a ni. Chutih hunah chuan Sâm 145:16 chu a thleng famkim vek ang: “[Nang Pathian Jehova chuan] i kut i phar a, thil nung zawng zawng châkna chu i tihrehsak ṭhîn,” tih chu. Chu bâkah, Isaia 32:1-na chuan: “Ngai teh, fel taka rorêl tûr lal [Krista Isua chu vânah] a lo awm ang a, dik taka tiṭhîn hotute [lei lama Krista aiawhte] an lo chhuak bawk ang,” a ti bawk. Lal Isua Krista chungchângah Isaia 9:7 chuan heti hian a sawi lâwk a: “A ram a zau zêl ang a, a ramah remnain tâwpintai a nei lo ang; Davida lalṭhutthlêngah a ṭhu ang a, dik tak leh fel taka rorêlin a rawn tinghet ang, tûn aṭanga kumkhuain, Sipaihote LALPA ṭhahnemngaihna chuan chûng chu a ti ang,” tiin. Chu rorêlna fel tak hnuaia awm angah chuan i inmitthla thei em?
15. Khawvêl tharah Jehova’n mihringte tân eng nge a tih dâwn?
15 Pathian khawvêl tharah chuan, Thuhriltu 4:1-a thute hi sawi chhan tûr kan nei tawh lo vang: “Ka han thlîr leh a, ni hnuaia inhnehchhiahna zawng zawngte chu ka hmu a; tin, en teh, hnehchhiaha awmte mittui te chu, thlamuantu an nei lo ve; anmahni hnehchhiahtute chuan thiltihtheihna an nei a, anni zawngin thlamuantu rêng an nei lo,” tih chu. Kan ngaihtuahna ṭha famkim lo nên chuan felna khawvêl thar ropui dân tûr suangtuah chu a har ngei mai a. Sualna a awm tawh dâwn lo va, nî tin mai chu thil ṭhaa tihkhat a ni tawh zâwk ang. Ni e, Jehova chuan thil dik lo engkim chu a siam ṭha ang a, chu chu kan beisei phâk bâkin a ti ang. Pathian Jehova’n tirhkoh Petera chu: “A thutiam ang chuan vân tharte leh lei thar, a chhûnga felna awmte chu kan beisei a ni,” tia ziak tûra a thâwk khum hi a va âwm tak êm!—2 Petera 3:13.
16. Engtin nge “vân tharte” chu din a nih tawh a, “lei thar” chu tûn laiah din ṭan mêk a nih?
16 Dik tak chuan, Krista kuta Pathian vân lam sawrkârna, “vân tharte” chu din a ni tawh a. “Lei thar,” chu rilru dik tak pute awmna tûr lei lam mipui thar a ni a, chu mi din ṭanna tûrte chu hêng ni hnuhnûng chhûng hian seng khâwm mêk an ni. A lo berah pawh ram 235-a kohhran 1,00,000 vêlah an awm a, mi maktaduai sarih an tling ṭêp tawh a ni. Hêng mi maktaduai têlte hian Jehova felna leh dikna chu an zir mêk a, chuvângin Kristian hmangaihnain a phuar khâwm khawvêl pum puia inlungrualna an nei a ni. An inlungrualna chuan Setana khua leh tuite neih inlungrualna engpawh a khûm a, khawvêl chanchina langsâr ber leh tlo ber a ni. Chutiang hmangaihna leh inlungrualna chu felna leh diknaa rorêlna tûr Pathian khawvêl thar thlîr lâwkna a ni.—Isaia 2:2-4; Johana 13:34, 35; Kolossa 3:14.
Setana Beihna Chu A Hlawhchham Dâwn
17. Engvângin nge Jehova mite chunga Setana beihna hnuhnûng ber chu a hlawhchham ngei ngei dâwn?
17 Setana leh a hnung zuitute chuan Jehova betute chu tihboral tumin an rawn bei thuai ang a. (Ezekiela 38:14-23) Chu chu Isua’n “hrehawm nasa tak . . . chutianga nasa rêng rêng chu leilung pian tirh ata tûn thlengin a la awm ngai lo va, awm pawh engtikah mah a lo awm leh tawh hek lo vang” tia a sawi chu a ni. (Matthaia 24:21) Setana beihna chu a hlawhtling ang em? Hlawhtling lo vang. Pathian Thu chuan heti hian min tiam si a: “LALPA chuan rorêlna fel a ngaina si a, a mi thianghlimte chu a kalsan ngai lo; kumkhua atân vawn ṭhatin an awm a: mi suaksual thlahte erawh chu tihboralin an awm ang. Mi felte chuan ram hi an luah ang a, a chhûngah hian kumkhuain an awm ang,” tiin.—Sâm 37:28, 29.
18. (a) Engtin nge Pathianin a mite chunga Setana beihna chu a chhân lêt ang? (b) Engvângin nge rorêlna fel dinchanna tûr he Bible ṭanchhan thute ennawn chu i tân a ṭangkai?
18 Jehova chhiahhlawhte chunga Setana leh a hote beihna chu inhmuhsitna hnuhnûng ber a ni ang. Jehova chuan Zakaria kal tlangin heti hian a hrilh lâwk tawh a ni: “Nangni khawihtu chuan [“ka,” NW] mit nautê a khawih a ni,” tiin. (Zakaria 2:8) Chu chu tuemawin Jehova mit nautê a kut zungṭanga a khawihsak ang a ni a. Ani chuan a rawn chhâng lêt vat ang a, a rawn khawihtu chu a la bo thuai ang. Jehova chhiahhlawhte chu he leia hmangaihna nei ber, inlungrual ber, inrem ber, leh dân zâwm berte an ni a. Chuvâng chuan, anmahni beih chu an phu lovin, a fel lo hulhual a ni. ‘Rorêlna fel ngainatu’ ropui ber chuan chu chu a dawh dâwn lo. A mite tâna Pathian thiltih tûr chuan a hmêlmate chatuana boralna, rorêlna fel dinchanna, leh Pathian dik awmchhun betute chhandamna a thlen ang. Kan hma lawka lo theng tûr thilte chu a va phûrawm tak êm!—Thufingte 2:21, 22. (w07 8/15)
Engtin Nge I Chhân Ang?
• Engvângin nge rorêlna fel lo chu a hluar êm êm?
• Engtin nge Jehova’n leia rorêlna fel lo awmte chu a tihven ang?
• He rorêlna fel dinchanna chungchâng zirnaah hian engin nge i rilru khawih?
[Zirlai Atâna Zawhnate]
[Phêk 9-naa milem]
Tuilêt hma khân sualna chu a nasa hle, hêng “ni hnuhnûngahte” pawh hian a nasa hle bawk
[Phêk 10, 11-naa milem]
Pathian khawvêl tharah chuan, suahsualna chu dikna leh rorêlna fela thlâkthleng a ni ang