Makikinabang Kita Paagi sa Pagtagal sa Kasakitan
Makikinabang Kita Paagi sa Pagtagal sa Kasakitan
“Inaapod tang maogma idtong mga nakatagal.”—SANTIAGO 5:11.
1, 2. Ano an nagpapaheling na bakong katuyohan ni Jehova na magsakit an tawo?
MAYONG normal na tawo an gustong magsakit. An satong Kaglalang, si Jehova Dios, habo man na magsakit an mga tawo. Maheheling niato ini kun sisiyasaton niato an saiyang ipinasabong na Tataramon asin mangnohon kun ano an nangyari pagkatapos na lalangon nia an lalaki asin babae. Enot, linalang nin Dios an lalaki. “Pinorma ni Jehova Dios an tawo hale sa kabokabo kan daga asin hinangosan sia sa saiyang dongo kan hinangos nin buhay, asin an tawo nagin buhay na kalag.” (Genesis 2:7) Sangkap an hawak asin isip ni Adan, asin dai sia magkakahelang o magagadan.
2 Kumusta man an kamugtakan nin buhay ni Adan? “Si Jehova Dios nagtanom nin hardin sa Eden, sa sirangan, asin duman nia ibinugtak an tawo na saiyang hinaman. Sa siring pinatubo ni Jehova Dios sa daga an gabos na kahoy na kawiliwiling paghelingon asin marahay na kakanon.” (Genesis 2:8, 9) Iyo, si Adan igwa nin marahayon na erokan. Mayo nin pagsakit sa Eden.
3. Igwa nin anong paglaom an enot na mag-agom?
3 An Genesis 2:18 nagsasabi sa sato: “Si Jehova Dios nagsabi: ‘Bakong marahay na an lalaki magsolosolo. Magibo ako nin katabang para sa saiya, bilang komplemento nia.’” Linalang ni Jehova an sarong sangkap na agom na babae para ki Adan, na ginigibong posible an paglaom na maogmang buhay pampamilya. (Genesis 2:21-23) An Biblia nagsasabi pa sa sato: “Binendisyonan sinda nin Dios asin sinabihan sinda nin Dios: ‘Pangagbunga asin pangagdakol kamo asin panoa nindo an daga patin sakopa nindo iyan.’” (Genesis 1:28) An enot na tawong mag-agom magkakaigwa kan makangangalas na pribilehio na pahiwason an Paraiso sa Eden sagkod na pag-abot nin panahon makalakop iyan sa bilog na daga, na ginigibong paraiso an bilog na globo. Asin magkakaigwa sinda nin maogmang mga aki, na dai makakaeksperyensia nin kasakitan. Kahangahanga nanggad na kapinonan!—Genesis 1:31.
Nagpoon an Kasakitan
4. Sa ipinapaheling kan kasaysayan, ano an risang-risa manongod sa katawohan?
4 Pero, kun hehelingon niato an kamugtakan kan pamilya nin tawo sa bilog na kasaysayan, risang-risa na nagin labi-labi karaot an mga situwasyon. Nangyari an maraot na mga bagay, asin nagsakit nin grabe an pamilya nin tawo. Sa nag-aging mga siglo, an gabos na aki ni Adan asin Eva nagkahelang, naggurang, asin sa katapustapusi nagadan. An daga harayo nanggad sa pagigin sarong paraiso na pano nin maogmang mga tawo. An kamugtakan eksakto nanggad na ilinaladawan sa Roma 8:22: “An gabos na linalang padagos na nag-aaragrangay nin iriba asin nakokolgan nin iriba sagkod ngonyan.”
5. Ano an paninimbagan kan satong enot na mga magurang sa pagsakit kan pamilya nin tawo?
5 Bakong si Jehova an may paninimbagan sa grabeng kasakitan na haloy nang nangyayari. (2 Samuel 22:31) An mga tawo igwa nin kabtang sa paninimbagan na iyan. “Sinda guminawe sa kapahapahamak na paagi, sinda guminawe nin makauuyam nin makuri sa saindang mga gibo.” (Salmo 14:1) Itinao sa enot na mga magurang niato an gabos na marahay na bagay. Tanganing magpadagos an siring na kamugtakan, an kahagadan sana sa sainda iyo an pagkuyog sa Dios, alagad pinili ni Adan asin Eva an pagigin independiente ki Jehova. Huling isinikwal si Jehova kan enot niatong mga magurang, sinda dai na magigin sangkap. Maluya sinda sagkod na sinda magadan. Ipinamana sa sato an pagkabakong sangkap.—Genesis 3:17-19; Roma 5:12.
6. Ano an nagin kabtang ni Satanas sa pagpoon nin kasakitan?
6 Kalabot man sa pagpoon nin gabos na kasakitan an espiritung linalang na nagin si Satanas na Diablo. Tinawan sia nin libreng kabotan. Minsan siring, ginamit nia sa salang paagi an libreng kabotan na iyan sa pagprobar na sambahon man sia. Pero, si Jehova sana an maninigong sambahon, bakong an saiyang mga linalang. Si Satanas an nagsutsut ki Adan asin Eva na maghingoang magin independiente ki Jehova, na garo baga sinda magigin “arog nin Dios, na nakakamidbid kan marahay asin maraot.”—Genesis 3:5.
Si Jehova Sana an May Deretso na Mamahala
7. Ano an napatunayan kan mga resulta nin pagrebelde tumang ki Jehova?
7 An maraot na mga resulta kan pagrebelde nagpapaheling na solamente si Jehova, an Unibersal na Soberano, an igwa nin deretso na mamahala asin na an saiyang pamamahala sana an matanos. An nakaaging rinibong taon nagpatunay na si Satanas, na nagin “namamahala sa kinaban na ini,” nagkaigwa nin maraot, bakong matanos, asin madahas na pamamahala na biyong dai nakakapanigo. (Juan 12:31) An halawig, miserableng pamamahala kan mga tawo na kontrolado ni Satanas nagpaheling man na mayo sinda kan kakayahan na mamahala sa matanos na paagi. (Jeremias 10:23) Sa siring, an gabos na maiisip na klase nin pamamahala na siblag sa pamamahala ni Jehova siertong dai magigin mapanggana. Dai nang kadudaduda na pinatunayan ini nin kasaysayan.
8. Ano an katuyohan ni Jehova may koneksion sa gabos na klase nin pamamahala nin tawo, asin paano nia ootobon an katuyohan na iyan?
8 Ngonyan na rinibo nang taon na tinogotan ni Jehova an mga tawo na mag-eksperimento nin pamamahala na independiente sa saiya, may katanosan sia na haleon sa daga an gabos na klaseng ini nin pamamahala asin salidahan iyan kan sadiri niang gobyerno. An sarong hula manongod digdi nagsasabi: “Sa mga aldaw kan mga hadeng idto [mga pamamahala nin tawo] an Dios nin kalangitan mapatindog nin sarong kahadean [an saiyang langitnon na gobyerno sa kamot ni Cristo] na dai noarin man malalaglag. . . . Iyan an maronot asin matapos kan gabos na ining kahadean, asin iyan mismo magdadanay sagkod sa mga panahon na daing talaan.” (Daniel 2:44) Mawawara na an pamamahala nin mga demonyo asin tawo, asin an langitnon na Kahadean nin Dios na sana an magdadanay asin mamamahala sa daga. Si Cristo an magigin Hade, asin kaiba niang mamamahala an 144,000 na maimbod na mga tawo na kinua sa daga.—Kapahayagan 14:1.
Pakinabang Huli sa Kasakitan
9, 10. Paano si Jesus nakinabang sa mga bagay na saiyang tinios?
9 Interesanteng siyasaton an mga kualipikasyon kan mga mamamahala sa langitnon na Kahadean. Enot, ipinaheling ni Cristo Jesus na sia kualipikadong marhay sa saiyang katongdan bilang Hade. Bilang “pangenot na trabahador” ni Jehova, dai mabilang na mga panahon na nakaibanan nia si Jehova na ginigibo an kabotan kan saiyang Ama. (Talinhaga 8:22-31) Kan iareglo ni Jehova na magpasiring sia sa daga, gikan sa boot na nagsunod si Jesus. Kan yaon digdi sa daga, nagkonsentrar sia sa pagsabi sa iba manongod sa soberaniya asin Kahadean ni Jehova. Ipinaheling ni Jesus sa sato gabos an marahayon na halimbawa paagi sa lubos na pagpasakop sa soberaniyang iyan.—Mateo 4:17; 6:9.
10 Si Jesus pinersegir, asin sa katapustapusi sia ginadan. Durante kan saiyang ministeryo, naobserbaran nia sa palibot nia an kaherakherak na kamugtakan nin katawohan. Igwa daw nin ano man na pakinabang na naheling nia iyan asin na sia personal na nagsakit? Igwa. An Hebreo 5:8 nagsasabi: “Minsan ngani sia Aki [nin Dios], sia nakanood nin pagkuyog hale sa mga bagay na saiyang tinios.” An mga naeksperyensiahan ni Jesus mantang nasa daga ginibo siang mas mapagsabot asin mapagmalasakit. Naeksperyensiahan nia mismo an kamugtakan sa laog kan pamilya nin tawo. Puede siang makisimpatiya sa mga nagsasakit asin mas masasabotan nia an saiyang katongdan sa pagtabang sa sainda. Mangnohon kun paano ini idinodoon ni apostol Pablo sa libro nin Hebreo: “Sia kinaipuhan na magin kabaing kan saiyang ‘mga tugang’ sa gabos na bagay, tangani na sia magin maheherakon asin maimbod na halangkaw na saserdote sa mga bagay na manonongod sa Dios, tanganing makapagdolot nin pampagian nin boot na atang para sa mga kasalan kan banwaan. Huli ta mantang sia mismo nagtios kaidtong binabalo, sia makakasurog sa mga binabalo.” “An satong halangkaw na saserdote, bakong saro na dai makakapakidamay sa satong mga kaluyahan, kundi saro na nabalo na sa gabos na bagay arog niato, alagad dai nin kasalan. Kita, kun siring, dumolok na may katalingkasan sa pagtaram sa trono nin dai na kutana maninigong kabootan, tanganing kita magkamit nin pagkaherak asin makakua nin dai na kutana maninigong kabootan na makakatabang sa tamang panahon.”— Hebreo 2:17, 18; 4:14-16; Mateo 9:36; 11:28-30.
11. Paano an eksperyensia sa daga kan magigin mga hade asin saserdote matao sa sainda nin pakinabang bilang mga namamahala?
11 Iyan man an masasabi manongod sa 144,000, na “binakal” hale sa daga tanganing magin kairibang namamahala ni Cristo Jesus sa langitnon na Kahadean. (Kapahayagan 14:4) Sinda gabos namundag bilang tawo digdi sa daga, nagdakula sa kinaban na napapalibotan nin kasakitan, asin sinda mismo nagsakit man. Dakol an pinersegir, asin may mga ginadan pa ngani huli sa pagpapadanay kan saindang integridad ki Jehova asin pagigin andam na sumunod ki Jesus. Alagad ‘dai ninda ikinasupog an patotoo dapit sa saindang Kagurangnan, na nakikikabtang sinda sa pagtios nin maraot para sa maogmang bareta.’ (2 Timoteo 1:8) An saindang eksperyensia sa daga ginibo sindang kualipikado nanggad tanganing hale sa langit hokoman ninda an pamilya nin tawo. Nakanood sinda na magin mas maduminamay, maboot, asin andam na tumabang sa mga tawo.—Kapahayagan 5:10; 14:2-5; 20:6.
An Kaogmahan kan mga May Daganon na Paglaom
12, 13. Paano makikinabang sa kasakitan an mga may daganon na paglaom?
12 An kasakitan daw sa presente nagtatao nin ano man na pakinabang sa mga naglalaom na mabuhay nin daing sagkod sa sarong paraisong daga na mayo na nin helang, pagmondo, asin kagadanan? An kolog asin labi-labing kamondoan na resulta nin kasakitan segurado na dai niato mamawoton. Alagad kun tinatagalan niato an siring na kasakitan, napapaoswag an marahay na personal na mga kualidad asin nagbubunga iyan nin kaogmahan.
13 Helingon kun ano an sinasabi kan ipinasabong na Tataramon nin Dios manongod digdi: “Minsan pa kun kamo magsakit dahel sa katanosan, maogma kamo.” “Kun kamo pinag-oolog-olog huli sa ngaran ni Cristo, maogma kamo.” (1 Pedro 3:14; 4:14) “Maogma kamo kun an mga tawo pinag-oolog-olog kamo asin pinepersegir kamo patin putik na nagtataram nin lambang klase nin maraot na bagay tumang sa saindo dahel sa sako. Maggayagaya kamo asin lumukso kamo huli sa kagayagayahan, huli ta dakula an saindong balos sa kalangitan.” (Mateo 5:11, 12) “Maogma an tawo na padagos na nagtatagal sa pagbalo, huli ta sa pagigin inooyonan aakoon nia an korona nin buhay.”—Santiago 1:12.
14. Sa anong paagi na an kasakitan nagtatao nin kaogmahan sa mga parasamba ki Jehova?
14 Sierto nanggad na dai niato ikinakaogma an aktuwal na kasakitan na tibaad tinatagalan niato. An kaogmahan asin satispaksion minagikan sa pakaaram na nagsasakit kita huling ginigibo niato an kabotan ni Jehova asin sinusunod an arogan na itinao ni Jesus. Halimbawa, kan enot na siglo, an nagkapira sa mga apostol ibinilanggo dangan inatubang sa korte suprema kan mga Judio asin idinenunsiar huli sa paghuhulit manongod ki Jesu-Cristo. Sinda hinampak dangan binutasan. Ano an nagin saboot ninda? An pagkasaysay sa Biblia nagsasabi na sinda “naghale sa Sanhedrin, na naggagayagaya huli ta pinapagkanigo sinda na magtios nin kasupganan huli sa saiyang ngaran.” (Gibo 5:17-41) Maogma sinda, bakong huli sa paghampak asin sa pisikal na kolog na bunga kaiyan, kundi huli sa pakasabot na nangyari ini huling napagdanay ninda an saindang integridad ki Jehova asin sinunod ninda an lakad ni Jesus.—Gibo 16:25; 2 Corinto 12:10; 1 Pedro 4:13.
15. Paano an pagtagal niato sa kasakitan ngonyan nagtatao sa sato nin pakinabang sa ngapit?
15 Kun tinatagalan niato an pagtumang asin persekusyon na may tamang saboot, puede iyan na magpatalubo sa sato nin pakatagal. Makakatabang ini sa sato na matagalan an maabot na kasakitan. Mababasa niato: “Ibilang nindong bilog na kagayagayahan, mga tugang, kun kamo napapaatubang sa manlaenlaen na pagbalo, sa pakaaram na ining nabalong kualidad kan saindong pagtubod nagbubunga nin pakatagal.” (Santiago 1:2, 3) Kaagid kaiyan, an Roma 5:3-5 nagsasabi sa sato: “Mag-ogma kita mantang nasa mga kahorasaan, mantang aram niato na an kahorasaan nagbubunga nin pakatagal; dangan, an pakatagal, nin pagkainooyonan; dangan, an pagkainooyonan, nin paglaom, asin an paglaom dai nagbubunga nin pagkadesganar.” Kaya mientras na orog kitang nagtatagal ngonyan nin mga pagbalo huli sa Kristianong dalan niato, orog man kitang magigin andam na tagalan an dugang pang mga pagbalo sa maraot na sistemang ini nin mga bagay.
Si Jehova an Mabalos
16. Ano an gigibohon ni Jehova para sa magigin mga hade asin saserdote bilang balos sa pagtagal ninda sa kasakitan?
16 Dawa kun nakakaeksperyensia kita nin pagkawara nin materyal na mga bagay huli sa pagtumang o persekusyon na tinitios niato huli sa pangangapot niato sa Kristianong dalan, puede kitang magin kontento sa pakaaram na lubos kitang babalosan ni Jehova. Halimbawa, para sa mga may paglaom na magduman sa langit, si apostol Pablo nagsurat: “Magayagaya nindong inako an pagsamsam sa saindong mga rogaring, sa pakaaram na kamo mismo igwa nin rogaring na orog karahay asin nagdadanay” bilang mga namamahala sa Kahadean nin Dios. (Hebreo 10:34) Asin imahinaron an kagayagayahan na mapapasainda kun huli sa paggiya ni Jehova asin ni Cristo makikikabtang sinda sa pagtao nin makangangalas na mga bendisyon sa mga mag-eerok sa daga sa bagong kinaban. Totoo nanggad an mga tataramon ni apostol Pablo sa maimbod na mga Kristiano: “Ibinibilang ko na an mga pagsakit sa presenteng kapanahonan daing ano man na halaga kun ikokomparar sa kamurawayan na ihahayag sa sato.”—Roma 8:18.
17. Ano an gigibohon ni Jehova para sa mga may daganon na paglaom na maimbod na naglilingkod sa saiya ngonyan?
17 Kaagid kaiyan, ano man an tibaad mawara o gikan sa boot na butasan kan mga may daganon na paglaom huli sa paglilingkod ki Jehova, tatawan nia sinda nin nagsosopay na balos paagi sa gigibohon nia sa ngapit. Itatao nia sa sainda an sangkap asin daing katapusan na buhay sa sarong paraisong daga. Sa bagong kinaban na iyan, “papahidon [ni Jehova] an gabos na luha sa saindang mga mata, asin dai na magkakaigwa nin kagadanan, ni magkakaigwa pa man nin pagmondo o pagtangis o kolog.” (Kapahayagan 21:4) Kanigoan kamakangangalas na panuga! Mayo nin ano man na kaya niatong isakripisyo para ki Jehova sa presenteng kinaban na ini an makakapantay sa makangangalas na buhay sa ngapit, na itatao nia sa maimbod na mga lingkod nia na makakatagal sa kasakitan.
18. Anong nakakarangang panuga an itinatao sa sato ni Jehova sa saiyang Tataramon?
18 Ano man na kasakitan an tibaad kaipuhan pa niatong tagalan, dai nanggad iyan makakaolang sa sato na ikaogma an buhay na daing katapusan sa bagong kinaban nin Dios. An gabos na iyan biyong masasalidahan nin kahangahangang mga kamugtakan sa bagong kinaban. An Isaias 65:17, 18 nagsasabi sa sato: “An dating mga bagay dai na magigirumdoman, ni masabong pa iyan sa puso. Alagad ta magpakagayagaya kamo, asin maggayagaya kamo sagkod lamang sa sakong linalalang.” Bilang resulta, angay na sabihon kan tugang sa ina ni Jesus na si Santiago: “Inaapod tang maogma idtong mga nakatagal.” (Santiago 5:11) Iyo, kun maimbod niatong tatagalan an kasakitan sa presente, makikinabang kita ngonyan asin sa ngapit.
Ano an Isisimbag Nindo?
• Paano nagpoon na maeksperyensiahan nin mga tawo an kasakitan?
• Anong mga pakinabang an tibaad ibunga kan kasakitan sa mga mamamahala asin mag-eerok sa daga sa ngapit?
• Taano ta puede kitang magin maogma ngonyan sa ibong kan kasakitan?
[Mga Hapot Para sa Pag-adal]
[Ritrato sa pahina 27]
An enot niatong mga magurang may makangangalas na ngapit sa enotan ninda
[Ritrato sa pahina 29]
An pakaobserbar sa kasakitan nakatabang na iandam si Jesus na magin marahay na Hade asin Halangkaw na Saserdote
[Ritrato sa pahina 31]
An mga apostol “naggagayagaya huli ta pinapagkanigo sinda na magtios nin kasupganan” huli sa saindang pagtubod