Manathithi La Atre Xomihni Ngöne La Akötr
Ita Ne Thup göi 7 OKOTROPA
Nyima 12 me 7 Qene Drehu
Manathithi La Atre Xomihni Ngöne La Akötr
“Eësha mekune laka manathithhi angete xomi hni.”—IAKOBO 5:11.
1, 2. Nemene la ka amamane ka hape thaa aja i Iehova kö ekö tro la atr a mele hnine la akötr?
PËKÖ atre ka ajane troa akötr, nge ketre, ame Iehova, tre, thaa ajane kö Nyidrëti troa akötr la itre atr. Easa trotrohnine lai ngöne la easa goeëne la Wesi Ula i Nyidrë, me atrehmekune la aqane xupe Nyidrëti la trahmanyi me föe. Ame la hnapan, tre, hnei Akötresie hna xupe la trahmany. “Hnei Iehova Akötesieti hna xupe la ate xaxau qa ngöne la hnadro, me mano kowe la lue hnafiji angeice la mano ne mel; ene pe u ka mele la at.” (Genese 2:7) Ka pexeje Adamu ngöne la ngönetrei me ngöne la mekun, nge pëkö sine meci angeic maine tro pena a mec.
2 Nge tune kaa la mele i Adamu? “Hnei Iehova Akötesieti hna eëne la hlapa ekohië e Edena ; nge hnei nyidrëti hna amë e cili la ate hnei nyidrëti hna xup. Nge hnei Iehova Akötesieti hna aciane qa kuhu hnadro la nöjei sinöe asëjëihë ka sheminge nune wange me ka loi nune xen.” (Genese 2:8, 9) Eje hi lai laka, lolo catre la götrane hna mele ngön hnei Adamu. Nge paatre fe kö la akötre ekö e Edena.
3. Nemene la itre hna thingahnaeane ka lolo kowe lo pane lue trefën?
3 Kola thuemacanyi së ngöne Genese 2:18, ka hape: “Hnei Iehova Akötesieti hna ulatin, ka hape, Tha loi kö e troa lapa casi la at ; tro ni a kuca thataqai angeice la ixatua ka ijiji angeic.” Thupene lai, hnei Iehova hna xupe la föe ka pexej nyine föi Adamu, me aijijë nyidroti troa madrin e hnine la mele i nyidro lue trefën. (Genese 2:21-23) Kola qaja mina fe hnei Tusi Hmitrötr, ka hape: “Hnei Akötesieti hna amanathithi nyido, nge Akötesieti a ulatine koi nyido, ka hape, Manapi me hate, me atiqane la fene hnengödrai, me xom’ acon’ ej.” (Genese 1:28) Lolo catre la hnëqa hna hamëne kowe la lue pane atr, ene la troa atrune trongëne la Paradraiso e Edena, uti hë la Paradraiso asë la fen. Nge troa madrine mina fe la itre matra i nyidro, thaa tro kö angatr a mele e hnine la akötr. Drei la ketre mele ka mingöming ekö ngöne la qaan!—Genese 1:31.
Qaan La Akötr
4. Nemene la ewekë ka mama hnyawa ngöne la aqane trongene la mele ne la atr?
4 Ame ngöne la easa goeëne la aqane trongene la mele ne la itre atr, kola mama hnyawa laka, hetre ewekë ka ngazo ka traqa ekö matre kola tro ngazo la fene enehila. Hna traqa la itre ewekë ka ngazo, matre kola akötr atraqatre la itre atr. Ame ngöne la itre hadredre macatre, tre, hna wezipo asë hi la itre matra i Adamu me Eva, me uti ipië trootro uti hë la mec. Nanyi catre lo hna hape ekö troa paradraiso la fen, nge troa tiqa hnei atr ka mele madrin. Hna qaja hnyawa la pengöne mele cili, ngöne Roma 8:22, kola hape: “Kola awe, me thë la ite ewekë hna xup’ asë uti hë enehila.”
5. Hna axulune tune kaa hnene la lue pane keme me thine së la akötr kowe la itre atr asë?
5 Thaa Iehova kö la atrekë zöne la akötre ka tru ka haöthe la fen qaane hë ekö. (2 Samuela 22:31) Ame la ketre nyine troa upezöne enehila pine la akötr, tre, itre atr. “Ngazo hë angat; hnei angate hna kuca la huliwa ka sis.” (Salamo 14:1) Ame ngöne la qaan, tre, ewekë ka loi hmekuje hi la hna hamëne kowe la pane keme me thine së. Ame la ewekë ka sisitria hna thele thei nyidro, tre, ene la tro nyidroti a drengethenge Akötresie; ngo hnei Adamu me Eva hna iëne troa ketre sipu kuci mekun. Pine laka hnene la pane keme me thine së hna nuetriji Iehova, haawe, thaa pexeje hë nyidro xajawa i Iehova. Kösë kolo pë hë a troa uti ipië trootro la mele i nyidro uti hë la thepe nyidroti hnene la mec. Easë pë hë la a xeni pune la ngazo i nyidro.—Genese 3:17-19; Roma 5:12.
6. Kola mama tune kaa ka hape Satana fe ekö lo ketre atrekë zöne la akötr?
6 Ame mina fe la qaane la akötr, tre ene la ketre ua hna hëne ka hape, Satana lo Diabolo. Hna xupi angeic cememine la atreine troa ië aja. Ngo ame la engazon, hnei angeic hna huliwane menune la atreine cili; ame pena ha la aja i angeic, tro la itre atr a thili koi angeic. Iehova hmekuje hi la nyine troa thili kow, ngo thaa tro kö a thili kowe la itre hnei Nyidrëti hna xup. Ngo Satana hi lo ka uku Adamu me Eva troa icilekeu me Iehova; me iaö nyidro, me qaja ka hape, “mate kösë lue akötesie [nyidro], mate ate hmekune la loi me ngazo.”—Genese 3:5.
Iehova Hmekuje Hi La Ka Ijije Troa Mus
7. Nemene la hna amamane hnene la itre ethane la hna icilekeu me Iehova?
7 Kola amamane hnene la itre ethane la hna icilekeu, laka, Iehova hi la Atre Musi e koho hnengödrai me e celë fen, ke Nyidrëti hmekuje hi la ka ijije troa mus, nge ame la musi Nyidrë, tre, ka meköt. Mama hnyawa ha ngöne la itre macatre ka nyimu thauzane laka, Satana lo “tane celë fen,” ke, hnei angeic hna sipu kuca la musi angeic ka ngazo, me ka thaa meköti kö, nge ka iakötrë; pëkö caa eloin. (Ioane 12:31) Kola amamane mina fe hnene la engazone la aqane musi ne la itre atr fene la ihnatrapaime i Satana laka, thatreine kö angatr troa musi cememine la meköt. (Ieremia 10:23) Qa ngöne lai, pë pi kö caa aqane musi e tröne la musi Iehova ka troa hetre thangane ka loi. Kola mama hnyawa lai qaane ekö uti hë enehila.
8. Nemene la hna troa kuca hnei Iehova kowe la nöjei aqane musi ne la itre atr, nge nemene la aqane tro Nyidrëti a eatrëne la aja i Nyidrë?
8 Ase hë Iehova nue la itre thauzane macatre matre tro la atr a ketre sipu mus, ijiji Nyidrëti hë enehila troa thapa asë la itre aqane musi cili qa la fene hnengödrai, me nyihnane itre ej hnene la sipu musi Nyidrë. Hna perofetane hë ekö la ewekë cili, kola hape: “Ngöne la ite drai ne la ite joxu cili [itre musi atr] tro Akötesieti ne hnengödrai a axulune la kete baselaia [mus i Nyidrë e koho hnengödrai hna cilëne hnei Keriso] ka tha tro kö a apaten’ epine palua. . . . tro ej’ a lep’ anyilanyilane me apatene la nöjei baselaia asëjëihë cili, nge tro ej’ a cile hut’ epine palua.” (Daniela 2:44) Ka troa paatr elanyi la musi ne la itre demoni memine la itre atr ka ngazo. Tro hmekuje hi la Baselaia i Akötresieti e koho hnengödrai a cil me musi e celë fen. Tro Keriso a Joxu ne la Baselaia cili, nge troa ce musi me nyidrë la itre atr ka mele nyipici ka ala 144 000, hna xome qaa celë fen.—Hna Amamane 14:1.
Itre Manathith Qa Ngöne La Hna Akötr
9, 10. Tune kaa la aqane kepe thangane Iesu la itre ewekë ka akötrë nyidrë?
9 Ka lolo catr troa pane wange la itre hna amekötine kowe la itre ka troa musi e koho hnengödrai. Ame la hnapan, tre, hnei Iesu hna amamane laka, ijiji nyidrë troa xome la hnëqa i nyidrë, ene la troa Joxu. Nyimutre catre la itre macatre ne ce nyidrë me Iehova; kola kuca la aja ne la Tretretro i Nyidrë, tune la “ate xup.” (Ite Edomë 8:22-31) Thaa hnei Iesu kö hna thipëne lo Iehova a mekune troa upi nyidrëti a tro celë fen. Hnei nyidrë hna kuca asë la hnei nyidrëti hna atrein, matre troa thuemacane la itre xan la pengöne la musi cile i Iehova memine la Baselaia. Hnei Iesu hna hamëne la ketre tulu ka sisitria catr koi së asë, ngöne laka, hnei nyidrëti hna lapa hnyawa fene la musi cile i Iehova Tretretro i Nyidrë.—Mataio 4:17; 6:9.
10 Hnei Iesu hna akötr ngöne la icilekeu, uti fe hë la humuthi nyidrë. Nge ame ngöne la ijine nyidrëti a cainöj e celë fen, hnei nyidrëti hna öhne la aqane akötre ne la itre atr ka mele xötreithi nyidrë. Nemene la thangane ka loi hnei nyidrëti hna kapa qa ngöne la hnei nyidrë hna öhne la akötre ne la itre atr, me qa ngöne la hnei nyidrëti hna sipu akötr? Kola qaja ngöne Heberu 5:8, ka hape: “Ngaca ma Hupunati [Akötresieti] nyidë, te, hna inine hnei nyidë troa idei hnene la nöjei ewekë hnei nyidëti hna xomi hnin.” Hetrenyi la itre ewekë hnei Iesu hna melën e celë fen, ka aijijë nyidrë troa trotrohnine hnyawa me utipine la itre atr. Hnei nyidrëti hna melëne la pengöne mel ne la atr. Ijije hi tro nyidrëti a utipine la itre atr ka akötr me trotrohnine hnyawa la hnëqa i nyidrë, ene la troa xatua angatr. Drei la aqane amamane hnyawa hnei Paulo aposetolo la ewekë cili ngöne la tusi nyidrë koi angetre Heberu, kola hape: “Ijije troa celohmë nyidë tune la ite tejine me nyidë ngöne la nöjei ewekë asëjëihë, mate tro nyidëti a ate huje ka sisitia ka ihnimi me nyipici ngöne la nöjei ewekë i Akötesie, mate troa huje pine la nöjei ngazo ne la nöj. Ijijë hë nyidrëti troa xatua angatre hna tupath.” “Tha hetenyi kö shë la ate huje ka sisitia ka tha hane kö aköte ngöne la ite kucakuca shë ; ngo hna tupathi nyidë ngöne la nöjei ewekë asëjëihë tui eëshë, ngo pë pe ngazo i nyidë. Qa ngöne lai tro sha tro cate kowe la therone ne ihnimi gufa, mate troa hnimi shë, nge troa öhne la ihnimi gufa nyine ixatua ngöne la ijine ka cei tun.”—Heberu 2:17, 18; 4:14, 15; Mataio 9:36; 11:28-30.
11. Nemene la aqane troa hetre thangane elanyi la itre hna melëne e celë fen hnene la itre ka troa joxu me itretre huuj?
11 Ijije mina fe troa hane qaja tune kowe la ala 144 000, ene lo itre atr “hna itöne” qaa la fen matre troa ce musi me Iesu Keriso ngöne la Baselaia i nyidrë e koho hnengödrai. (Hna Amamane 14:4; 20:6) Hna hnaho angatr asë hi e celë fen; nge hna tru hnei angatre ngöne la fen ka tiqa hnei akötr, nge ketre hna akötrë angatre mina fe. Nyimutre la itre hna icilekeu memin, nge hna humuthe fe la itre xan pine laka angatr a mele inyipicikeu me Iehova me catre xötrethenge Iesu. Ngo ‘thaa hmahma kö angatr troa anyipicine la Joxu i angatr, loi pe troa hane sine la nöjei aköte ne la maca ka loi thenge la mene i Akötesie.’ (2 Timoteo 1:8) Hnene laka hnei angatr hna mel e celë fen, haawe, ijiji angatre hi troa amekötine la itre atr ngöne la angatr a musi qaa koho hnengödrai. Hnei angatr hna inine troa hetrenyi la utipin, me thiina ka menyik, me thele pala hi troa xatuane la itre atr.—Hna Amamane 5:10; 14:2-5; 20:6.
Manathithi Ne La Itre Ka Troa Mele Pe e Celë Fen
12, 13. Tune kaa la aqane troa kepe thangane ka loi qa ngöne la akötr, hnene la itre atr ka mejiune troa mele e celë fen?
12 Hapeue mina fe la akötr enehila, tro kö a hetre thangane ka loi la ewekë cili thene la itre ka troa mele epine palua ngöne la Paradraiso gaa pë wezipo, me hleuhleu me mec? Pëkö ketre e easë ka ajane troa akötr me hleuhleu. Ngo ame pe la easë a xomihnine ahoeane la itre akötre cili, ketre kolo fe hi lai a nyihnyawane la itre thiina ka lolo the së, nge easë mina fe a kapa la manathith.
13 Hanawange la hna qaja hnene la Wesi Ula i Akötresie göne lai, kola hape: “Maine akötë nyipunie pine la thina ka meköt, manathithi hë nyipunie.” “Maine qaja angazonyi nyipunie pine la thina ka meköt, manathithi hë nyipunie.” (1 Peteru 3:14; 4:14) “Manathithi nyipunie e troa qaqa nyipunie me axösisin, me sili ewekë nyipunie la nöjei ewekë ka ngazo asë pi ini. Madinejë nyipunie, me aciacin, ke atraqate la june thatraqai nyipunie e hnengödrai.” (Mataio 5:11, 12) “Manathithi la ate xomi hnine la itupath, ke e ase hë tupath, tro angeic a hetenyi la korona ne mel.”—Iakobo 1:12.
14. Nemene la aliene la mekune hna hape, kola madrine la itre hlue i Iehova ngöne la angatr a akötr?
14 Eje hi lai laka, thaa celë kö la akötr hne së hna xomihnin ahoean enehila, la ka hamë madrine koi së. Ame la madrine së, tre, ka xulu qa ngöne laka, atrehmekune hi së laka, easë a akötr hnene la hne së hna kuca la aja i Iehova me xötrethenge la itre thupaca i Iesu. Hanawang la ketre ceitun, ame ngöne lo hneijine i Iesu, hna akalabusine la itre xaa aposetolo, nge thupene lai, hna tro sai angatr kowe la hnakootre ka tru i angetre Iudra; nge e cili kola jele ngazo angatr pine laka hnei angatr hna cainöj me qeje Iesu Keriso. Qëmekene troa nue angatr, hna pane none kau angatr. Nemene hë la pengö i angatr thupene lai hna lepi angatr? Kola qaja hnei Tusi Hmitrötr laka, “ angat’ a tropi qa ngöne la qëmeke ne la angete ieman, me madine ngöne laka hna meku angate laka ijije troa xomi hmahma pine la atesiwa.” (Ite Huliwa 5:17-41) Thaa angatre kö a madrine qa ngöne la hna none kau angatr memine la itre akötrene la hna lepi angatr. Ngo angatre pe a madrin, pine laka, angatr a trotrohnine ka hape, kola traqa tune lai, pine la hnei angatr hna catre mele nyipici koi Iehova me xötrethenge la itre thupaca i Iesu.—Ite Huliwa 16:25; 2 Korinito 12:10; 1 Peteru 4:13.
15. Tune kaa la aqane tro sa kepe thangane hnyawa elanyi la hne së hna xomihni ahoeanyi enehila?
15 Maine tro sa catre xomihnine ahoeane la icilekeu memine la iakötrë cememine la thiina ka lolo, haawe, tro ha eköthe the së la xomihni ahoean. Tro ha xatua së troa xomihnine ahoeane la itre akötre së elany. Drei la hna cinyihan, kola hape: “Ange tejine me ini fe, loi e tro nyipunie a mekun, laka nyine amadin’ atraqat’ e traqa koi nyipunie la nöjei itupathi ka nyimu pengön; ke ate hë nyipunie, laka ate aciane la xomi hni la kola tupathe la lapaune i nyipunie.” (Iakobo 1:2, 3) Ketre tune mina fe, kola thuemacanyi së ngöne Roma 5:3-5, ka hape: “Ngo eësha madine la aköte fe ; ke ate hë shë la kola aciane la xomi hni la aköt; nge ame la xomi hni, te, aciane la wangate hmekun, nge ame la wangate hmekun, te, kola aciane la mejiun ; nge ame la mejiun, te, tha ahmahmane kö.” Qa ngöne lai, maine tro sa catre xomihnine enehila la itre akötr pine la hmi së itre keresiano, haawe, tro hë së a catre xohminine hnyawa fe la itre xaa akötre ka troa traqa koi së ngöne la fene ka ngazo celë.
Tro Iehova a Të Me Mekune La Itre Hna Thepe Ewekën
16. Nemene la hnei Iehova hna troa kuca elany thatraqane la itre joxu me itretre huuj nyine troa të la itre akötre i angatr?
16 Ngacama kola thapa la itre ewekë së hnene la itre icilekeu maine itre iakötrë pena, ngo ijije hi tro sa madrine ke atre hi së laka, tro Iehova a amanathithi së hnyawa qa ngöne la hne së hna catre catr kowe la hmi keresiano. Drei la ketre ceitune göne lo itre atr ka mejiune troa tro koho hnengödrai; hnei Paulo aposetolo hna cinyihane ka hape: “Hnei nyipunie . . . hna xomi hni madine la hna thöeëne la ite ewekë i nyipunie, nge ate hë nyipunie laka hetenyi hë nyipunie la tenge mo ka nyipi ewekë me cile hut”; celë hi ewekë hna kuca hnene la itretre musi ngöne la Baselaia i Akötresie. (Heberu 10:34) Pane mekune jë së la madrine i angatr elanyi ngöne la angatr a ce huliwa me Iehova me Keriso, matre troa hamëne la itre manathithi ka lolo catr kowe la itre atr ngöne la fene ka hnyipixe. Kola anyipicine hnyawa hnene la itre trenge ewekë i Paulo aposetolo kowe la itre Keresiano ka mele nyipici; öni nyidrë: “Ini a mekune laka, tha ijije la aköte ngöne la ijine celë, memine la hadehadeu hna tro ha amamane koi shë.”—Roma 8:18.
17. Nemene la hnei Iehova hna troa kuca kowe la itre atr ka mejiune troa mele e celë fen, nge ka nyihlue i Nyidrëti hnyawa cememine la nyipici?
17 Ketre tune mina fe la itre atr ka troa mele pe e celë fen, laka, thaa tro kö angatr a xou maine nue xanëne la itre ewekë i angatr göi troa nyihlue i Iehova, ke tro kö Nyidrëti elanyi a nyithupene me amanathithi angatre hnyawa elany. Tro Nyidrëti a hamëne koi angatre la mele ka pexej me ka pë pun e celë fen hna troa aparadraisone hmaca. Ame ngöne lai fene ka hnyipixe cili, tro Iehova a “köle tije la nöjei tenge timida asëjëihë qa ngöne la ite lue meke i angat ; nge pa hmaca kö mec; me hace hni me teij, me aköt.” (Hna Amamane 21:4) Drei la ketre hna thingehnaeane ka lolo catr! Pëkö ewekë hne së hna nue xeciën maine hna thapa pena qa the së ngöne la fene celë, pine la ihnimi së koi Iehova, ka ihmeku memine la mele ka lolo catr elany, mel hnei Nyidrëti hna troa hamëne kowe la itre sipu hlue i Nyidrëti ka xomihnine ahoeane la akötr.
18. Nemene la hna thingehnaeane ka akeukawane la itre hni së hna hamë së hnei Iehova hnine la Wesi Ula i Nyidrë?
18 Ketre thaa tro jë kö la itre akötre cili hne së hna xomihnin ahoean a nyi ethanyine elanyi kowe la madrine së troa mele epine palua ngöne la fene ka hnyipixe i Akötresie. Tro hë la itre aqane mele elanyi ngöne la fene ka hnyipixe, a he la itre akötre hne së hna melën enehila; ene pe tro hë së a thëthëhmine la itre akötre cili. Kola ahnithe ngöne Isaia 65:17, ka hape: “Thaa tro hmaca kö a mekune la hnapan, me xulu e kuhu hni at. Ngo madinejë me aciacine pala jë la ewekë ini a xup.” Qa ngöne lai, meköti e troa qaja hnei Iakobo, ketre trejine me Iesu, ka hape: “Eësha mekune laka manathithi angete xomi hni.” (Iakobo 5:11) Eje hi lai laka, maine tro sa xomihnine ahoeane la akötr enehila, tro hë së a kepe thangane ka loi, enehila me ngöne la itre drai elany.
Nemene La Itre Nyine Troa Sa?
• Pine nemene la atre jë la itre atr la akötr?
• Nemene la itre thangane ka loi hna troa kapa qa ngöne la akötr, hnene la itre ka troa musinëne elanyi la ihnadro memine la itre atren?
• Pine nemene matre ijije hi tro sa madrin enehila, ngacama tru la nöjei akötre së?
[Thying]