Naalliuutit naammagalugit atornerat iluaqutigisinnaavarput

„Pinertusaartut pilluarnerartarpavut.“ — JAAKU 5:11.

1, 2. Sumit erserpa inuit naalliunnissaat Jehovap siunertarinngikkaa?

INUK eqqarsartaatsimigut peqqissoq kinaluunniit naalliukkusunngilaq; aamma Pinngortitsisup, Jehova Guutip, inuit naalliunnissaat kissaatiginngilaa. Tamanna paasisinnaavarput taassuma oqaasia isumassarsiarititaasoq misissorutsigu maluginiarlugulu angut arnarlu pinngortereermagit qanoq pisoqarnersoq. Siullermik Guutip angut pinngortippaa. „Guuti [Jehova] inuliorpoq issumit, sorluisigullu anersaartornermik uumassutaasumik sulluarlugu. Taamaalilluni inuk pinngortitanngorpoq uumassuseqartoq.“ (1 Mosesi 2:7) Adami isumakkut timikkullu naammalluinnartuuvoq, qaqugumulluunniillu napparsimalertariaqarnanilu toqusariaqanngilaq.

² Adamip inuunermini atugai qanoq ippat? „Guuti [Jehova] Edenimi naatsiiviliorpoq kangiani, inulianilu tassunga pisippaa. Guutip [Jehovap] nunamit naalersippai orpiit tamalaat takorannersut neriffigiuminartut.“ (1 Mosesi 2:8, 9) Aap, Adami nuanningaartumik angerlarsimaffeqarpoq. Naatsiivimmi Edenimi naalliuunnartoqanngilaq.

3. Inuit aappariit siulliit qanoq siunissaqaraluarpat?

³ Mosesimik allakkani siullerni 2:18-imi ima paasitinneqarpugut: „Guuti [Jehova] oqarpoq: ’Iluanngilaq inuk kisimiimmat, ikiortissiussavara taassumunnga tulluartumik.’“ Jehova Adamip nuliassaanik naammalluinnartumik pinngortitsivoq taamaalillunilu inuit ilaqutariittut pilluarnissaannut periarfissillugit. (1 Mosesi 2:21-23) Taava nangilluni ima allassimavoq: „Guutip pilluaqquai oqarfigalugit: ’Kinguaassiorlusi amerliartoritsi nunarsuaq tamakkerlugu ilissinnullu naalatsigitillugu.’“ (1 Mosesi 1:28) Guutip inuit aappariit siulliit nuannersumik immikkut pisinnaatitaaffilerpai paratiisimik Edenimik annertusisitsinissamik piffissap ingerlanerani nunarsuarmik tamarmik tamakkiinissaa tikillugu. Aamma nuannaartunik pilluartunillu kinguaassiussapput naalliuuteqartussaanngitsunik. Aallartinnerata nuannissusia! — 1 Mosesi 1:31.

Naalliuutit aallartipput

4. Oqaluttuarisaaneq eqqarsaatigalugu inuiaat nalunanngitsumik qanoq ingerlasimappat?

⁴ Oqaluttuarisaanerulli ingerlanerani inuiaat qanoq atugaqarsimanerat misissorutsigu, erseqqippoq ajorluinnartumik pisoqarsimasoq. Ajortorpassuarnik pisoqarsimavoq, inuillu naalliuuteqarsimaqaat. Ukiut hundredellit ingerlaneranni Adamip Evallu kinguaavi  tamarmik napparsimasarlutillu utoqqalisarlutillu toqusarput. Nunarsuaq tassaanngilluinnarpoq paratiisi inunnik pilluartunik ulikkaartoq. Pissutsit Romamiunut allakkani 8:22-mi eqqorluartumik ima allaatigineqarput: „Pinngortitat tamarmik suli peqatigiillutik anersaarulullutillu [nimaarput].“

5. Siuaasavut siulliit inuiaat naalliuuteqartalernerannut qanoq akisussaappat?

⁵ Jehova naalliuuterpassuarnut maannamut suli atuuttunut pisuutinneqarsinnaanngilaq. (2 Samueli 22:31) Ilaatigut inuit namminneq pisuupput. „Ajortumik maajunnartumillu iliorput.“ (Tussiaat 14:1) Siuaasavut siulliit takorloorneqarsinnaasunit tamanit pitsaanerpaamik aallartipput. Pissutsit ajunngitsuujuarnissaannut pisariaqartoq tassaavoq Guutimut naalanneq, Adamili Evalu Jehovamit oqartussaaffigineqarniarnatik aalajangerput. Siuaasavut siulliit Jehovamit qimagukkamik inuttut naammalluinnartutut taassumannga inuuinnartinneqarnavianngillat. Sanngiilliartussapput naggataatigullu toqullutik. Naammalluinnanngissuseq kingornupparput. — 1 Mosesi 3:17-19; Romamiut 5:12.

6. Naalliuunnartoqalernera Saatanip qanoq akisussaaffigaa?

⁶ Naalliuterpassuaqalerneranut ilaatigut pisuusoq tassaavoq pinngortitaq anersaajusoq Saatani Diaavulunngortoq. Nammineq piumasamisut iliorsinnaatitaavoq. Namminerli piumasamisut iliorsinnaatitaanini atornerluppaa pallorfigineqarnissani anguniarsaralugu. Jehovali kisimi, taassuma pinngortitai pinnagit, pallorfigineqartussaavoq. Saatanip Adami Evalu Jehovamit siulersorneqarusukkunnaarsinniarpai, salloqittarlugit taamaaliornermikkut ’Guutisut ilersinnaasut ajunngitsoq ajortorlu nalujunnaarlugit’. — 1 Mosesi 3:5.

Jehova kisimi naalakkersuinissamut pisinnaatitaavoq

7. Jehovamut pikitsitsinerup kinguneri sumik ersersitsippat?

⁷ Pikitsitsinerup kingunipiluini erserpoq Jehova, qilammi nunamilu kisimi oqartussaasoq, naalakkersuinissamut pisinnaatitaaffeqartutuaasoq, aamma taassuma aqutsinera kisimi naapertuilluartuusoq. Ukiuni tusindilinni kingullerni erserpoq Saatanip, ’silarsuarmi matumani naalagaaninngortup’, naalakkersuinermik ajortumik, naapertuilluanngitsumik, peqqarniitsumik naammaginanngilluinnartumillu ineriartortitsisimanera. (Johannesi 12:31) Aamma inuit Saatanip naalagaaffigisaani sivisuumik aqutsinerlunneranni erserpoq naapertuilluartumik naalakkersuisinnaanngitsut. (Jeremia 10:23) Taamaattumik naalakkersueriaatsit suulluunniit Jehovap naalakkersuineranit allaanerusut iluatsinngisaannassapput. Tamanna oqaluttuarisaanermi erseqqissumik uppernarsarneqarpoq.

8. Jehovap inuit naalakkersueriaasii tamaasa sussavai, tamannalu qanoq naammassissavaa?

⁸ Maanna Jehovap inuit ukiuni tusindilinni naalakkersueriaatsinik imminut atanngitsunik misileraasereeramigit taakkuninnga tamanik atorunnaarsitsinissaminut taakkualu nammineq naalagaaffimminik taarsernissaannut pisinnaatitaalluinnarpoq. Tamanna pillugu ima siulittuuteqarpoq: „Kunngit taakkua [naalakkersuisut nunamiusut] inuutillugit qilaap Guutiata naalagaaffik qaqugumulluunniit atasussaq [Guutip naalagaaffia qilammiittoq Kristusimit siulersorneqartoq] pilersikkumaarpaa. . . . Guutip naalagaaffiata kunngeqarfiit allat tamaasa aserortissavai suujunnaarsillugillu, namminerli soraajuitsumik atassaaq.“ (Danieli 2:44) Anersaapiluit inuillu naalakkersueriaasii atorunnaassapput, Guutillu naalagaaffia qilammiittoq kisimi piussaaq nunarsuarmullu naalakkersuissalluni. Naalagaaffimmi tamatumani Kristusi kunngiussaaq, naalakkersueqatigissavaalu inuit aalajaatsut nunamit tiguneqartut 144.000-it. — Saqqummersitat 14:1.

Naalliuutit ajunngitsumik kinguneqarsinnaapput

9, 10. Jiisusip naalliuutit atukkani qanoq iluaqutigai?

⁹ Naalagaaffimmi qilammiittumi naalakkersuisussat piukkunnaataat misissussallugit soqutiginarpoq. Pingaarnerpaamik Jiisusip Kristusip ersersippaa kunngitut suliassamut qanoq piukkunnartigaluni. Ukiuni kisissaanngitsuni Jehova ilagaa, Ataatami piumasai suliarisarlugit ’suliortuulluni’ (1900/1961). (Ussatit 8:22-31) Jehovalu aalajangermat Jiisusi nunarsuarmukartinniarlugu  Jiisusi kajumilluni akuersivoq. Nunarsuarmiitilluni Jehovap kisimi oqartussaassusia naalagaaffialu pillugit inuit allat oqaluttuunnissaat ulapputigaa. Jiisusi Jehovap kisimi oqartussaassusianut naalatsigitilluinnarnermigut tamatsinnut asseqanngitsumik maligassiuivoq. — Matthæusi 4:17; 6:9.

¹⁰ Jiisusip malersorneqarnini naammagalugu atorpaa naggataatigullu toqutaalluni. Kiffartornermini inuit eqqaminiittut atugaat alianartut maluginiarpai. Tamakkuninnga takunninnini namminerlu naalliunnini arlaatigut iluaqutigaa? Aap. Hebræerinut allakkani 5:8-mi ima allassimavoq: „Ernerugaluarluni naalliuutimigut naalanneq ilinniartariaqarpaa.“ Jiisusip nunarsuarmiinnermini nalaatani paasinninnerulissutigalugillu misiginneqataanerulissutigai. Pissutsit inuiaat atugaat ilisimasaqarfigilerpai. Naalliuttut misiginneqatigisinnaavai, taakkuninngalu ikiuinerup qanoq paasisariaqarnera paasilluarneruaa. Maluginiariaruk apustilip Paulusip Hebræerinut allakkani tamatuminnga erseqqissaanera: „Tamatigorluinnaq qatanngutini assigilertariaqarpai tassaalerumalluni Guutip saani palasiunerusoq naakkinnittoq unneqqarissorlu inuit ajortaannik matuuisinnaasoq. Nammineq usserneqarlunilu naalliutsitaagami usserneqartut ikiorsinnaavai.“ „Palasiuneqanngilagut qajannassutsitsinni naakkiginnissinnaanngitsumik, kisianni tamatigut uagutsitut usserneqarsimasumik, ajorteqanngitsumilli. Taamaattumik nakimanata sassarniarta saammaannerup issiavissaarsuanut, nallittorneqaqqulluta saammaanneqaqqullutalu piffissaq eqqorlugu ikiorneqaatissatsinnik.“ — Hebræerit 2:17, 18; 4:14-16; Matthæusi 9:36; 11:28-30.

11. Siunissami kunngiullutillu palasiusussat nunarsuarmi misilittakkatik Kristusimik naalakkersueqateqarnerminni qanoq iluaqutigissavaat?

¹¹ 144.000-it, naalagaaffimmi qilammiittumi Jiisusi Kristusip naalakkersueqatissaasut nunarsuarmit ’immikkoortinneqarsimasut’ aamma taamatupajaaq oqaatigineqarsinnaapput. (Saqqummersitat 14:4) Taakku tamarmik nunarsuarmi inuttut inunngorput, silarsuarmi naalliunnartunik ulikkaartumi peroriartorlutik namminnerlu naalliullutik. Ilarpassui malersugaapput, ilaallu allaat toqutaallutik Jehovamut assuarnaattuaramik Jiisusimillu malinninnissamut piumassuseqaramik. ’Naalakkatsinnilli nalunaajaat kanngusuutiginngilaat, iivangkiiliulu pillugu naallioqataallutik’. (2 Timotheusi 1:8) Nunarsuarmi misigisimasatik inuiannik qilamminngaanniit eqqartuussinissamut immikkut piukkunnaateqalissutigaat. Misiginneqataanerunissartik, inussiarnernerunissartik inunnillu ikiuinissaminnik ilungersuutiginninnissartik ilikkarsimavaat. — Saqqummersitat 5:10; 14:2-5; 20:6.

Nunamik kingornussisussat pilluartut

12, 13. Naalliuutit nunarsuarmi inuunissamik neriugisalinnut qanoq ilillutik ajunngitsumik kinguneqarsinnaappat?

¹² Maannakkut naalliuutigineqartut nunarsuarmi paratiisiusumi, nappaateqarfiunanilu aliasuttoqarfiunanilu toqusoqarfiunngitsumi, naassaanngitsumik inuunissamik neriugisalinnut arlaatigut iluaqutaasinnaappat? Naalliuutit kingunerisaat aliasuutit isumakuluutillu kissaatiginanngilluinnarput. Naalliuutilli tamakku naammagalugit atortarutsigit inuttut  pissuserineqartussanik ajunngitsunik ineriartortitsisinnaassaagut aamma nuannaarlutalu pilluarsinnaassaagut.

¹³ Eqqarsaatigeriaruk Guutip oqaasiani isumassarsiarititaasumi tamanna pillugu qanoq allassimasoqarnersoq: „Iluarneq [Naapertuilluarneq, NV] pissutigalugu atugarliortitaassagaluarussi pilluarpusi.“ „Pilluarpusi Kristusip aqqa pissutigalugu mitaatigineqarussi.“ (1 Petrusi 3:14; 4:14) „Pilluarpusi ilissi uanga pillunga mitaatigippasi qinugalusilu tamanillu ajortunik oqaatigippasi sallullutik. Tipaatsugitsi nuannaarlusilu akissarsiassarsi qilanniittoq angeqimmat.“ (Matthæusi 5:11, 12) „Pilluarpoq inuk misilinneqarnermini pinertusaartoq, misilinneqarninimi attakkuniuk piumaaramiuk ajugaasumut niaqorusiussassaq inuussutaasoq.“ — Jaaku 1:12.

14. Jehovap kiffaasa naalliunnertik pissutigalugu pilluarnerat qanoq paasisariaqarpa?

¹⁴ Soorunami naalliuuterpiaq immaqa misigisariaqagarput pillualissutiginavianngilarput. Pilluarlutalu nalerisimaarsinnaavugut nalunngikkutsigu Jehovap piumasaatut iliornerput Jiisusillu maligassiaanik malinninnerput pissutigalugit naalliuttarluta. Assersuutigalugu ukiuni hundredelinni siullerni apustilit ilaat parnaarunneqarput, juutit eqqartuussisoqatigiivinut sassartinneqarlutillu unnerluutigineqarlutik Jiisusi Kristusi pillugu oqaluussigamik. Iperartorneqarput tamatumalu kingorna iperagaallutik. Tamanna qanoq periarfigaat? Biibilimi oqaluttuarineqarpoq „Killisiuisarfik [qimakkaat] nuannaarlutik Jiisusip aqqa pillugu narrunarsagaanissamut qinngaqqunnartitaannginnamik“. (Apustilit Suliaat 5:17-41) Pilluarput, iperartugaanertik timikkullu anniartitaanertik pissutiginagit, kisianni paasigamikku naalliunnerminnut pissutaasut tassaasut Jehovamut assuarnaattuarnertik Jiisusillu tumaanik malinninnertik. — Apustilit Suliaat 16:25; 2 Korinthimiut 12:10; 1 Petrusi 4:13.

15. Maannakkut naalliuutinik naammagittarluta atuinerput siunissami qanoq iluaqutigisinnaavarput?

¹⁵ Eqqortumik isiginnittaaseqarluta akerlilersorneqarneq malersorneqarnerlu naammagittarluta atorutsigit tamanna pinertusaarsinnaanitsinnut nakussatsissutaassaaq. Tamanna aamma siunissami naalliuutigilersinnaasatta naammagalugit atornissaannut iluaqutigissavarput. Ima allassimavoq: „Qatanngutikka, tamalaanik misilinneqartarnisi nuannaarutigiinnartassavasi; nalunngilarsimi uppernersi misilinneqaraangami nikallujuitsunngortitsisartoq.“ (Jaaku 1:2, 3) Tamatumunnga assingusumik Romamiunut allakkani 5:3-5-imi ima allassimavoq: „Usorsisimaarutigaavut annikilliortarnivut, nalunnginnatsigu annikilliornerup nikallujuinneq pilersittaraa, nikallujuissutsip aalajaatsunngorneq, aalajaassutsillu neriugisaqarneq. Neriunnerlu taanna pakatsisitsissanngilaq.“ Tassa kristumiutut inuunerput pissutigalugu annikilliuutit maanna naammagalugit atukkavut amerliartuinnartillugit pissutsit aaqqissuussaaneranni ajortumi maanna atuuttumi annikilliornartut suli allat naammagalugit atornissaat uagutsinnut sapernannginneruleraluttuinnassaaq.

Jehovap akissarsisissavaatigut

16. Siunissami kunngiullutillu palasiusussat Jehovap naalliussimanerminnik taarsiineralusooq qanoq misigiumaarpaat?

¹⁶ Kristumiunut najoqqutassianik aalajangiusimanninnitta kingunerisaanik akerlilersorneqarnerput malersorneqarnerpulluunniit pissutigalugu nunap piisigut pigisatsinnik annaasaqaraluaruttaluunniit nuannaartuarsinnaavugut, nalunnginnatsigu Jehovap akissarsisingaarumaaraatigut. Assersuutigalugu qilaliarnissamik neriugisalinnut apustili Paulusi ima allappoq: „Pigisassinnik arsaarneqaraangassi nuannaarlusi tamanna naammagiinnartarparsi nalunnginnassiuk ajunnginnerusumik aserortussaanngitsumillu pisuussuteqarlusi.“ (Hebræerit 10:34) Aamma takorlooriaruk qanoq nuannaartigissasut  Jehovamit Kristusimillu siulersorneqarlutik silarsuassami nutaami nunarsuarmi najugaqartunut tamanut pilluaqqussutinik ingerlatitseqqilerunik. Inuppassuit apustilip Paulusip kristumiunut aalajaatsunut oqaasii ukua isumaqatigaat: „Isumaqarpunga naalliunnartut maanna atukkavut suunngitsut naalannarsinissamut uatsinni saqqummersitaajumaartumut naleqqiullugit.“ — Romamiut 8:18.

17. Jehova nunarsuarmi inuunissamik neriugisalinnut maanna ilumoorfiginnillutik imminut kiffartortunut sunik iliuuseqassava?

¹⁷ Taamatuttaaq Jehovap nunarsuarmi inuunissamik neriugisallit pilluaqqungaassavai, taamaaliussaarlu imminut kiffartorsinnaajumallutik sunik annaasaqarsimanerat imaluunniit nammineq kajumissutsiminnik sunik taamaatitsisimanerat apeqqutaatinnagu. Nunarsuarmi paratiisiusumi inuttut naammalluinnartutut naassaanngitsumik inuulersissavai. Silarsuassami nutaami tamatumani Jehovap „qulliit tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq“. (Saqqummersitat 21:4) Neriorsuut nuanningaarami! Jehova pillugu silarsuarmi maanna atuuttumi pilliutigisavut inuunermut nuanningaartumut Jehovap kiffaminut aalajaatsunut naalliukkaluarlutik pinertusaartunut tunniukkumaagaanut sanilliunneqarsinnaanngillat.

18. Jehovap tuppallernartoq suna oqaatsimini neriorsuutigaa?

¹⁸ Naalliuutit immaqa naammagittarluta suli atortariaqakkavut Guutip silarsuassaani nutaami inuunermik naassaanngitsumik nuannaarutiginninnitsinnut sunniuteqanngilluinnassapput. Pissutsit nuanningaartut taamanikkussamut atuuttussat naalliuutigisimasatsinnik tamanik matussusiilluinnassapput. Esaja 65:17, 18-imi ima allassimavoq: „Pereersut eqqaamaneerutissapput eqqaaqqinneqarnatillu. Kisianni pinngortitakka naassaanngitsumik tipaatsuutigalugillu qiimmattaatigissavasi.“ Tamatumunnga naapertuuttumik Jiisusip affarmik qatanngutaa Jaaku ima nalunaarpoq: „Pinertusaartut pilluarnerartarpavut.“ (Jaaku 5:11) Aap, maanna naalliuutigisavut naammagalugit atorutsigit, tamanna maanna siunissamilu iluaqutigisinnaavarput. (wE 8/15 07)

Qanoq akissavit?

• Inuit qanoq ilillutik naalliunnartut misigisalerpaat?

• Naalliuutinik naammagittarluni atuineq nunarsuarmut naalakkersuisussanut nunarsuarmilu innuttaasussanut qanoq iluaqutaasinnaava?

• Sooq naalliukkaluarluta maanna pilluarsinnaavugut?

[Atuaqqissaarnermi apeqqutit]

[Qupp. 27-mi assiliartaq]

Siuaasavut siulliit nuanningaartumik siunissaqaraluarput

[Qupp. 29-mi assiliartaq]

Naalliunnartut Jiisusip takullugillu misigisai kunngiullualernissaanut palasiunerullualernissaanullu piareersaataaqataapput

[Qupp. 31-mi assiliartaq]

Apustilit ’nuannaarput’ uppernertik pillugu ’narrunarsagaanissamut qinngaqqunnartitaannginnamik’