Chhel Taka Hrehawm Tawrh Chu Kan Hlâwkpui Thei
Chhel Taka Hrehawm Tawrh Chu Kan Hlâwkpui Thei
“Tuartute chu engthâwl kan ti.”—JAKOBA 5:11.
1, 2. Mihringte hrehawm tawrhtîr chu Jehova thiltum a nih lohzia engin nge târ lang?
MI PANGNGAI tumahin hrehawm tawrh chu an duh lo va, min Siamtu Pathian Jehova pawhin mihringte hrehawm tawrh chu a duh bawk hek lo. Chu chu a thâwk khum Thu kan enfiah a, mipa leh hmeichhia a siam hnua thilthleng kan han hmuh hian kan hre thei a ni. A hmasain, Pathian chuan mipa a siam a. “LALPA Pathianin leia vaivutin mihring a siam a, a hnârah chuan nunna thaw chu a thaw lût a: tichuan mihring chu mi nung a lo ni ta a.” (Genesis 2:7) Adama kha taksa leh rilru ṭha famkim nei a ni a, a na ngai lo vang a, a thi ngai hek lo vang.
2 Adama nun dân dinhmun chu eng ang nge ni? “LALPA Pathianin chhak lamah, Eden-ah chuan huan a siam a; a mihring siam chu chutah chuan a awmtîr ta a. Tin, lei aṭangin LALPA Pathianin thing mit la tak leh ei mi tinrêng a ṭotîr a.” (Genesis 2:8, 9) Ni e, Adama chuan chênna hmun ropui tak a nei a ni. Eden huanah khân hrehawm tawrhna rêng a awm lo.
3. Mihring tuak hmasa ber khân eng hmabâk nge an neih?
3 Genesis 2:18 chuan heti hian min hrilh a ni: “LALPA Pathian chuan, ‘Mihring amah chauhva awm hi a ṭha lo ve: amah ṭanpuitu tûr a kawppui âwm mi ka siamsak teh ang,’ a ti a,” tiin. Jehova chuan Adama tân nupui ṭha famkim chu a siam a, chutiang chuan chhûngkaw nun hlim neih theihna hmabâk a pe a ni. (Genesis 2:21-23) Bible chuan heti hian min hrilh belh a: “Pathianin anmahni mal a sâwm a: Pathian vêkin an hnênah, ‘Chi tam tak thlaha lo pungin, leilung hi luah khat ula, in thu thuin awmtîr rawh u,’ . . . a ti a,” tiin. (Genesis 1:28) Nupa tuak hmasa ber chuan Eden huan Paradis chu zauh zêla lei pum pui chu paradis-a chantîr tûrin chanvo ropui tak an nei a ni. Tin, anni chuan hrehawm tawrhna laka zalên tûr, tu leh fa hlim takte chu an nei dâwn a ni. Bul inṭanna ropui a va ni êm!—Genesis 1:31.
Hrehawm Tawrhna A Inṭan
4. Thilthleng chanchin aṭanga thlîr chuan, eng nge mihringte chungchângah thil lang chiang tak chu?
4 Mahse, mihring chhûngkaw dinhmun zawng zawng kan han en chhuah vek chuan, thil engemaw chu a kal sual nasa hle tih chu a lang chiang a. Thil ṭha lote a thleng a, mihringte chuan nasa takin hrehawm an tuar a ni. Kum zabi kalta zawng zawng chhûng khân, Adama leh Evi thlahte zawng zawng chu an nâ a, an tar a, a tâwpah chuan an thi bawk a ni. He lei hi mihring hlim takte luahkhah paradis a ni lo chiang hle. Dinhmun chu Rom 8:22 chuan: “Thil siam zawng zawngte chu tûn thlengin rûm leh nauvei na tuarin an awm hlawm,” tiin dik takin a sawi a ni.
5. Engtin nge kan nu leh pa hmasa berte chu mihringte hrehawm tawrhna inṭannaah an tel?
5 Jehova chu hun rei tak chhûng awh hrehawm tawrhna nasa tak awmtîrtu anga mawhpuh tûr a ni lo. (2 Samuela 22:31) Puhna ṭhenkhat chu mihringte chunga nghah tûr a ni. Anni chu “an chhe zo va, thil tenawm tak an ti.” (Sâm 14:1) Kan nu leh pa hmasa berte chu atîrin thil ṭha engkim pêk an ni a. Chutiang thil ṭha nei zawm zêl tûr chuan Pathian thu an âwih zêl a ngai a; mahse, Adama leh Evi chuan Jehova laka inlâk hran chu an thlang ta zâwk a ni. Kan nu leh pa hmasa berte chuan Jehova an hnâwl tâk avângin, mi ṭha famkim an ni ta lo. An thih thlengin an chhe telh telh dâwn a. Chu ṭhat famkim lohna chu kan rochun ta a ni.—Genesis 3:17-19; Rom 5:12.
6. Hrehawm tawrhna inṭannaah Setana’n eng chanvo nge a neih?
6 Hrehawm tawrhna zawng zawng inṭannaah chuan Diabol-Setana lo ni ta thlarau thil siam pawh a inhnamhnawih bawk a. Ani chu zalên taka duhthlan theihna pêk a ni. Amaherawhchu, chibai bûkna chan tumin chu duhthlan theihna chu a hmang khaw lo va. Mahse, chibai bûk tûr chu thil siamte ni lovin, Jehova chauh chu a ni. Jehova laka Adama leh Evi inlâk hrantîrtu chu Setana a ni a, anni chu “a chhia leh a ṭha hriain Pathian ang” lo ni mai tûr angin a hrilh a ni.—Genesis 3:5.
Jehova Chauhvin Rorêl Tûrin Dikna A Nei
7. Jehova laka helna sawhkhâwkte chuan eng nge a târ lan?
7 Helna sawhkhâwk ṭha lote chuan Lei leh Vâna Lalchungnungber, Jehova chauhvin rorêl tûrin dikna a nei a, a rorêlna chauh hi a fel tih a târ lang. Kum sâng têl liam tate khân, “he khawvêl lal” lo ni ta Setana hian suahsualna te, fel lohna te, leh lungawithlâk lo tak tharum thawha rorêlna te chu a awmtîr tih a târ lang a ni. (Johana 12:31) Setana thununna hnuaia hun rei tak chhûng mihring rorêlna lungngaihthlâk tak pawh hian fel taka ro an inrêl theih lohzia a târ lang bawk. (Jeremia 10:23) Chutichuan, Jehova tel lova mihringte ngaihtuah chhuah theih rorêlna engpawh chu a hlawhchham ngei ngei dâwn. Chu chu mihring chanchin chuan chiang takin a târ lang tawh a ni.
8. Mihring rorêlna chi hrang hrangte chungchânga Jehova thiltum chu eng nge ni a, engtin nge chu thiltum chu a hlen dâwn?
8 Jehova chuan mihringte chu a hnên aṭanga inla hranga mahnia ro inrêl chhin nân kum sâng têl chu hun a pe tawh a, chuvângin lei aṭanga hêng rorêlna zawng zawngte thianfai a, ama sawrkârna din tûr chuan thiam a chang tawh hrim hrim a ni. Chu mi chungchâng hrilh lâwkna chuan: “Chûng lalte [mihring rorêltute] nîah chuan vân Pathianin ram [Krista kuta vân sawrkâr chu] a rawn din ang a, chu chu a chhe ngai tawh lo vang . . . hêng ram zawng zawngte hi a tikeh sawmin a tiral zâwk ang a, kumkhuain a ding reng ang,” a ti. (Daniela 2:44) Ramhuai leh mihringte rorêlna chu a tâwp ang a, Pathian vân lam Lalram chauh a awm ang a, lei hi a awp ang. Krista chu Lal a ni ang a, ani chuan rorêlpui lei aṭanga lâk mi rinawm 1,44,000 a nei ang.—Thu Puan 14:1.
Hrehawm Tawrhna Chuan Hlâwkna A Thlen Thei
9, 10. Engtin nge Isua chuan a thil tawrhte chu a hlâwkpui?
9 Vân lam Lalrama rorêl tûrte thil tlin tûr bih chian chu a tuiawm hle a. A hmasa berin, Krista Isua chuan Lal ni tûra a tlinzia a târ lang a ni. Hun rei tak chhûng Jehova bulah awmin, a Pa duhzâwng a ti a, A “mi themthiam” a ni. (Thufingte 8:22-31) Jehova’n leia lo kal tûra rem a ruatsak khân, Isua chuan inhuam takin a zâwm nghâl a ni. Leiah chuan Jehova lalchungnunna leh Lalram chanchin mi dangte hnêna hrilh chu hnapui berah a nei a. Chu lalchungnunna laka intulût ṭhakin, Isua chuan kan vai atân entawn tûr ṭha tak a siam a ni.—Matthaia 4:17; 6:9.
10 Isua chuan tihduhdahna a tuar a, a tâwpah chuan tihhlum a ni. A rawngbâwl chhûng chuan amah hual vêla mihringte dinhmun khawngaihthlâk tak chu a hmu a. Chu mi a hmuhna leh amah ngeia hrehawm a tawrhna chu a hlâwkpui em? Hlâwkpui e. Hebrai 5:8 chuan: “[Pathian] Fapa meuh pawh ni mah sela a thil tuarahte chuan thu âwih a zîr ta a ni,” tiin a sawi a. Leia a awm laia Isua hrehawm tawrhna chuan hriatthiamna leh khawngaihna a neih lehzualtîr a ni. Mihringte dinhmun chu amah ngeiin a tawng a. Hrehawm tuarte chu a tawrhpui theiin, anmahni chhanhim tûra a chanvo neih chu a hlut lehzual thei a ni. He mi chungchâng tirhkoh Paula’n Hebrai lehkhabua a sawi dân hi han chhinchhiah teh: “Mite tân sual thupha chawina siamsak tûrin, Pathian lam thilahte chuan Puithiam Lalber mi lainat thei leh rinawm tak a nih theih nân, engkima a unaute anga lo awm chu a tân a ṭûl rêng a ni. Amah ngei chuan thlêmna tâwkin a lo tuar tawh avângin thlêmna tâwkte chu a ṭanpui thei a ni.” “Puithiam Lalber kan chak lohnate min hriatpui thei lo nei kan ni si lo; keimahni anga kawng tinrênga thlêmna tâwk tawh, sual erawh chu sual lo, nei kan ni zâwk e. Chutichuan zahngaihna kan hmuh theihna tûr leh puih kan ngaih huna ṭanpuina khawngaihna kan hmuh theihna tûrin, khawngaihna lalṭhutphah chu huai takin i hnaih ang u,” tihte chu.—Hebrai 2:17, 18; 4:14-16; Matthaia 9:36; 11:28-30.
11. Engtin nge nakina lal leh puithiam ni tûrte chuan leia an thiltawnte chu an hlâwkpui?
11 Vân lam Lalrama Krista Isua rorêlpui tûr lei aṭanga “tlan” tawh mi 1,44,000 te pawh chutiang tho chu an ni, a tih theih ang. (Thu Puan 14:4) An vaiin lei mihringa lo piangin, hrehawm tawrhna khawvêlah an ṭhang chho va, anmahni ngeiin hrehawm chu an tuar a ni. Tam takte chu tihduhdah an ni a, ṭhenkhat phei chu Jehova laka an rinawmna an vawn avâng leh Isua hnung zui an inhuam avângin tihhlum hial an ni bawk. Mahse, anni chuan ‘an Lalpa thu hriattîrna chu zahpui lovin, chanchin ṭha avângin hrehawm an tuar zâwk’ a ni. (2 Timothea 1:8) Leia an thiltawnte chuan vân aṭanga mihringte chunga rorêl tûrin a tlintîr lehzual a. Anni chuan khawngaihna leh ngilneihna lantîr lehzual dân an zir tawh a, mite ṭanpui chu an châk hle a ni.—Thu Puan 5:9, 10; 14:2-5; 20:6.
Lei Lam Beiseina Neite Hlimna
12, 13. Engtin nge lei lam beiseina neite chuan hrehawm tawrhna chu an hlâwkpui theih?
12 Tûna awm hrehawm tawrhna hian natna te, lungngaihna te, leh thihna te awm lohna lei paradis-a chatuan nun beiseina neite tân hlâwkna a nei em? Tihnat leh lungngaihna nasa tak avânga hrehawm tawrh chu amah ngawr ngawr chuan thil châkawm a ni lo. Mahse, chutiang hrehawmnate kan tawrh hian, kan mize ṭha chu a belhchhahin, hlimna, a nih loh leh engthâwlna a rah chhuak a ni.
13 He mi chungchânga Pathian thâwk khum Thu-in a sawite hi han ngaihtuah teh: “Felna avânga lo tuar ta ang in nih chuan in eng a thâwl ang.” “Krista hming avânga hau in nih chuan in eng a thâwl e.” (1 Petera 3:14; 4:14) “Miin keimah avânga an hau che u a, an tihduhdah che u a, dâwta sual tinrênga an hêk hunah che u, in eng a la thâwl ang. Lâwm ulangin, nasa takin hlim rawh u; vânah in lâwmman a awm hnem si a.” (Matthaia 5:11, 12) “Thlêmna tuar hrâm hrâmtu chu a eng a thâwl e; fiaha a awm hnuin nunna lallukhum . . . chu a hmu dâwn si a,” tihte hi.—Jakoba 1:12.
14. Hrehawm tawrhna chuan eng kawngin nge Jehova chibai bûktute chu a tihlâwm?
14 Min tihlimtu chu hrehawm a taka kan tawrhna hi a ni lo ngei mai a. Hlimna leh lungawina chu Jehova duhzâwng kan tih avâng leh Isua entîrna kan zui avânga tuar kan ni tih inhriatna aṭanga lo awm a ni. Entîr nân, kum zabi khatnaah khân tirhkoh ṭhenkhatte chu Isua Krista chanchin an hril avângin tân ina khung leh Juda rorêlna sânga hruai a, dem an ni a. Sawisak an nih hnuah chhuahtîr an ni. Eng nge an rilru put hmang chu? Bible thuziak chuan anni chu “rorêltute zîng ata an kal chhuak a, chu Hming avâng chuan mualpho tuar tlâka ruat an nih avângin an lâwm hle a,” tiin a sawi. (Tirhkohte 5:17-41) Sawisak an nihna leh chu miin a zui taksa natna vâng ni lovin, Jehova laka rinawmna an vawn avâng leh Isua hniak hnung an zui avânga tuar an ni tih an inhriatna avânga lâwm an ni.—Tirhkohte 16:25; 2 Korinth 12:10; 1 Petera 4:13.
15. Engtin nge tûna hrehawm kan tawrhna chu nakinah kan hlâwkpui theih?
15 Dodâlna leh tihduhdahna chu rilru put hmang dik nêna kan tawrh chhuah chuan, chu chuan keimahniah chhelna a siam thei a. Chu chuan a aia nasa zâwk hrehawmna pawh tuar thei tûrin min ṭanpui ang. Heti hian kan chhiar a ni: “Ka unaute u, in rinna fiahna chuan chhelna a siam tih hriain, thlêmna tinrêng in tawh hunin lâwmna hlîrah ngai rawh u,” tiin. (Jakoba 1:2, 3) Chutiang bawkin, Rom 5:3-5 chuan: “Kan hrehawmnaah pawh lâwmin i awm ang u, hrehawmna chuan chhelna a siam a, chhelna chuan hriatfiahna a siam a, hriatfiahna chuan beiseina a siam tih kan hre si a; . . . beiseina chuan a timualpho lo va,” tih min hrilh a ni. Chuvâng chuan kan Kristian nun kawng avânga hrehawm kan tawrh nasat poh leh he kal hmang suaksuala fiahna dangte chhel taka tuar tûrin kan inthuam ṭha zâwk dâwn a ni.
Jehova Chuan A Rûl Ang
16. Nakina lal leh puithiam ni tûrte hrehawm tawrhte rulh lêt nân Jehova chuan eng nge a tih ang?
16 Kristian kawng vawn tlat avânga dodâlna leh tihduhdahna tuar a, kan thil neihte kan chân a nih pawhin, Jehova’n a kimin min rûl leh dâwn tih hriatna aṭanga lungawina kan nei thei a ni. Entîr nân, tirhkoh Paula chuan vâna kal tûra beiseina nei ṭhenkhat hnênah Pathian Lalrama rorêltu tûrte in nih anga “sum ṭha zâwk, awm hlen bawk tûr chu mahniin in nei tih hriain in sum lâksakte pawh lâwm takin in lo tuar ta bawk si a” tih a ziak a. (Hebrai 10:34) Khawvêl tharah leia chêngte hnêna Jehova leh Krista kaihhruaina hnuaia malsâwmna ropui tak an sem chhuah hunah an hlim dân tûr chu han ngaihtuah teh. Kristian rinawmte hnêna tirhkoh Paula thusawi: “Tûn laia tuarnate hi nakina kan chunga ropuina tihlan tûr nên chuan tehkhin thamah ka ruat si lo,” tih hi a dik ngei mai.—Rom 8:18.
17. Jehova’n lei lam beiseina nei tûna a rawng rinawm taka bâwlte tân eng nge a tih ang?
17 Chutiang bawkin, lei lama beiseina neite’n Jehova rawng an bâwl avânga an chân emaw, mahni duh thua an kalsan emaw engpawh chu Pathianin nakina a thiltih tûrte hmangin nasa takin mal a sâwm dâwn a ni. Ani chuan lei paradis-a nun ṭha famkim leh tâwp nei lo chu a pe dâwn a. Chu khawvêl tharah chuan, Jehova chuan “an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang.” (Thu Puan 21:4) Thutiam ropui a va ni tak êm! Jehova avânga tûn khawvêla inhuam tak emaw, inhuam lo chung emawa kan chân thil a enga mah hian a chhiahhlawh rinawm hrehawm tuarte hnêna a pêk tûr chatuana nunna chu a tluk thei lo.
18. Jehova’n a Thu-ah eng thutiam thlamuanthlâk tak nge min pêk?
18 Kan la tawrh mai theih tûr hrehawmna engpawh chuan Pathian khawvêl thara kan chen tûr chatuana nunna chu a khawihbuai lo vang. Hrehawm tawrhna zawng zawng chu khawvêl thar dinhmun ropui tak chuan a rûl lêt vek ang. Isaia 65:17, 18 chuan: “Tûn hma thilte chu hriat rengin a awm tawh lo vang a, rilruah pawh a lût tawh hek lo vang. Nimahsela ka thil siamah chuan kumkhuain lâwmin hlim rawh u,” tiin min hrilh a ni. Chuvângin, Isua unaupa Jakoba’n: “Tuartute chu engthâwl kan ti,” tia a sawi chhuah chu a âwm hle. (Jakoba 5:11) Ni e, tûna hrehawmnate rinawm taka kan tawrh chhuah chu tûnah leh nakinah kan hlâwkpui thei a ni. (w07 8/15)
Engtin Nge I Chhân Ang?
• Engtin nge mihringte chuan hrehawm an tawrh ṭan?
• Hrehawm tawrhna chuan nakina leia rorêltu tûrte leh a khua leh tui ni tûrte tân eng hlâwkna nge a thlen theih?
• Engvângin nge tûnah hrehawm tuar reng chungin kan hlim theih?
[Zirlai Atâna Zawhnate]
[Phêk 13-naa milem]
Kan nu leh pa hmasa berte khân hmabâk ropui tak an nei
[Phêk 15-naa milem]
Hrehawm tawrhna a hmuhte chuan Isua chu Lal leh Puithiam ṭha ni tûrin a buatsaih
[Phêk 17-naa milem]
Tirhkohte chu an rinna avânga ‘mualpho tuar tlâka ruat an nih avângin an lâwm’