D sã n sakd namsgo, na n naf-d lame
D sã n sakd namsgo, na n naf-d lame
“Tõnd yetame tɩ bark bee neb nins sẽn sakd namsg ne sũ-marã zutu.”—ZAK 5:11.
1, 2. Bõe n wilgd t’a Zeova ra pa rat tɩ ninsaal namse?
NED kae n dat n nams ye. A Zeova sẽn yaa ãdem-biisã Naandã me pʋd n pa rat tɩ ned nams ye. D sã n karem a Gomdã n bãng bũmb nins a sẽn naan n kõ pipi raoã ne a pagã sɩngrẽ wã, d mikdame t’a sɩd ra pa rat tɩ ãdem-biisã nams ye. Pipi, Wẽnnaam naana a Ãdem. Biiblã yeta woto: “Zusoab a Wẽnnaam yãka tẽnga tom n naan ninsaala n fʋʋs b vɩɩm vʋʋsem a yõ-bogdẽ wã, la ninsaal lebga nin-vɩɩga.” (Sɩngre 2:7) A Ãdem da pa tar yel-wẽnd ye. Rẽnd a ra pa segd n lʋɩ bãag wall a ki ye.
2 La a Ãdem da na n vɩɩmda yɛ, la a rɩ bõe? Ad Biiblã sẽn yete: “Zusoab a Wẽnnaam sela tɩɩs Edɛn sẽn be yaangã n ning ninsaal bãmb sẽn da naanã beenẽ. La Zusoab a Wẽnnaam kɩtame tɩ tɩɩs buud fãa bul n yi tẽnga pʋgẽ, bãmb yaa neere la b womda bi-sõama rɩɩb yĩnga.” (Sɩngre 2:8, 9) Wẽnnaam sẽn zĩnig a Ãdem zĩig ningã ra yaa sõma hal wʋsgo. Edɛnne, namsg ra kae ye.
3. Pipi ninsaalb a yiibã vɩɩm da segd n yɩɩ wãn-wãna?
3 Sɩngre 2:18 wã yet-d-la woto: “Zusoab a Wẽnnaam yeelame: ‘A ka neer tɩ ninsaal zĩnd a yembr ye. Mam na n maana sõangd sẽn zems ne yẽ n kõ-a.’” Dẽ poore, a Zeova naana pag sẽn pa tar yel-wẽnd n kõ a Ãdem, n da rat tɩ b naag taab n vɩɩmd ne sũ-noogo. (Sɩngre 2:21-23) Biiblã paasa woto: “Wẽnnaam ninga bãmb zut barka, n yeel-b tɩ b rog kamb n pid dũniyã la b tõog-a.” (Sɩngre 1:28) Wẽnnaam da yeela a Ãdem ne a Hawa tɩ b tʋm n kɩt tɩ tẽngã fãa lebg arzãna, wa zĩig ning b sẽn bool tɩ Edɛnnã. Tʋʋm kãngã sɩd ra yaa zu-noog tʋʋmd tɛkẽ. Sẽn paase, b ra na n paama kamb la yagens sẽn na n vɩɩmd ne sũ-noog tɩ namsg kaẽ ye. Ad ãdem-biisã sɩngr sɩd yɩɩ neer wʋsgo!—Sɩngre 1:31.
Namsgã sɩngre
4. Hal pĩnd wẽndẽ n tãag rũndã-rũndã, ãdem-biisã vɩɩm sẽn yaa to-to wã wilgda bõe vẽenega?
4 D sã n yaool n ges ninsaalbã vɩɩm sẽn yɩ to-to pĩnd wẽndẽ n tãag rũndã-rũndã wã, d nee vẽeneg tɩ toeeng n zĩndi, n kɩt tɩ vɩɩmã sãam fasɩ. Tʋʋm wẽns n zĩnd n nams ãdem-biisã hal wʋsgo. Hal pĩnd n tãag masã, ãdem-biisã fãa bẽedame, b kʋʋndame la b kiidẽ. Woto fãa kɩtame tɩ tẽngã pa arzãn n pid ne ãdem-biis sẽn vɩ sũ-noog pʋgẽ ye. Rom dãmba 8:22 pʋgẽ wã, b bilga ninsaalbã vɩɩm sẽn yaa to-to wã tɩ zems kɛpɩ, n yeel tɩ ‘hal tɩ ta masã, bõn-naandsã wẽeda siri, n namsd wa pag sẽn dat n doge.’
5. Bõe la pipi raoã ne a pagã maanẽ tɩ d tõe n yeel tɩ ãdem-biisã sẽn namsd rũndã-rũndã wã, yaa bãmb yelle?
5 B pa tõe n ning a Zeova taal namsgã la yel-beed nins fãa sẽn be wã poorẽ ye. (2 Sãmwɛll 22:31) Yaa ãdem-biisã meng n yaa sabab tɩ yel-kãensã kẽer beẽ. “B maanda wẽng hal tɩ yõsge, n tʋmd tʋʋm põaasa.” (Yɩɩl Sõamyã 14:1) Wẽnnaam a Zeova sẽn kõ pipi raoã ne a pagã bũmb nins sɩngrẽ wã fãa ra yaa sõma. A Ãdem ne a Hawa sã n da rat n tall bõn-kãens wakat fãa, b ra segd n kell n saka a Zeova. La b tõdgame n bao n na n soog b mense. B sẽn tõdg a Zeova wã, b ra pa ye tõe n kell n yɩ wa b sẽn da yaa to-to sɩngrẽ wã ye. Rẽ tɛka, b keelmã ra na n talla boogr hal tɩ b wa ki. Yaa bãmb n long tõnd yel-wẽnã.—Sɩngre 3:17-19; Rom dãmba 5:12.
6. A Sʋɩtãan maana bõe tɩ kɩt tɩ ãdem-biisã namsdẽ?
6 Malɛk ning b sẽn wa n bool kaoosg zugẽ tɩ Sʋɩtãanã me tara taal ãdem-biisã sẽn namsdã pʋgẽ. Wẽnnaam da naan-a lame n kõ-a tõog t’a tõe n yãk yam n maan a sẽn date. La a tʋma ne tõog-kãng kɛgre. A baoome tɩ b waoog-a wa Wẽnde, tɩ yaool n yaa a Zeova bal n segd ne waoog-kãnga. Yaa a Sʋɩtãan n tudg a Ãdem ne a Hawa tɩ b kɩɩs a Zeova n bao n na n soog b mense, n tẽed tɩ b ra na n ‘lebga wa Wẽnnaam n mi sõama ne wẽng n bake.’—Sɩngre 3:5.
A Zeova bal n segd n soog ãdem-biisã
7. A Ãdem ne a Hawa sẽn kɩɩs a Zeova tɩ wa ne yɛl ninsã wilgda bõe?
7 Kɩɩsgã sẽn wa ne zu-loees ninsã wilgda vẽeneg tɩ yaa a Zeova sẽn yaa ãndũniyã fãa Naabã n tar sor n na n soog ãdem-biisã, la tɩ yẽ naamã bal n zemse. D sã n ges yɛl nins fãa sẽn zĩnd yʋʋm tusa wã sẽn loogã pʋgẽ wã, d nee vẽeneg t’a Sʋɩtãan sẽn lebg “dũniyã naabã” tɛka, waa ne wẽnem, tʋʋm kɛg la na-toos sẽn nams la ket n namsd nin-buiidã. (Zã 12:31) Ãdem-biisã nanambs a Sʋɩtãan sẽn so wã naam sẽn wa ne yel-beed ninsã fãa wilgdame tɩ b pa tõe n dɩ naam tɩ naf b taabã ye. (Yelbũna 20:24) Dẽnd a Zeova naamã sẽn yãk a toogo, naam buud baa a ye kae n tõe n naf nin-buiidã ye. Ãdem-biisã yɛl sẽn yaa to-to hal b sẽn be tẽng zug tɛkã wilgda rẽ vẽenega.
8. Bõe la a Zeova na n maan ãdem-biisã goosneemã rãmbã, la wãn to la a na n maan rẽ?
8 Hal sẽn na n maan yʋʋm tusa a Zeova sẽn bas ãdem-biisã tɩ b soog b mens n lugl b goosneema rãmbã, b wilga vẽeneg tɩ b pa tõe n zã taab ye. Woto yĩnga, a tara sor masã n na n menes-b fãa la a lugl a toorẽ goosneema. Biiblã ra pĩnd n goma rẽ yell n yeel woto: “Rĩm dãmb kãens [ãdem-biisã goosneema rãmbã] sẽn dɩt naam wakate, Wẽnnaam sẽn be yĩngrã na n kɩtame tɩ soolem sẽn ka tõe n sãam [a saasẽ goosneema wã a sẽn bobl Kiristã] . . . zĩndi. A na n wãa soolem kãens fãa tɩ b menem n bas-a t’a yaas wakat fãa.” (Daniɛll 2:44) Wẽnnaam na n sãama goosneem kãensã a Sʋɩtãan ne a zĩn dãmbã sẽn so wã la a kɩt t’a Rĩungã sẽn be saasẽ wã bal soog dũniyã fãa. Yaa Kiristã n na n yɩ Rĩungã Rĩmã, la b yãka neb sẽn maan Wẽnnaam daabã tẽngã zug ka tɩ b na n tɩ naag-a n dɩ naamã. B sõorã yaa neb 144000.—Wilgri 14:1.
Neb sẽn sak namsg tɩ naf-ba
9, 10. Wãn to la a Zezi sẽn namsã la bũmb nins a sẽn yã tẽng zug ka wã nafd-a?
9 Yɩta sõma tɩ d bao n bãng sẽn na n dɩ-b naam saasẽ Rĩungã pʋgẽ wã sẽn yaa neb nins buudu. D reng n gom a Zezi Kirist yelle. A wilga ne a tʋʋm la ne bũmba fãa t’a na n yɩɩ Rĩm sõngo. Hal yʋʋm sẽn kõn bãng n sõde, a zĩnda a Ba a Zeova sɛɛgẽ wa “tʋʋm mita,” n maan a raabã. (Yelbũna 8:22-31) A Zeova sẽn wa n dat t’a wa tẽngã zugã, a sakame. A sẽn wa wã, a rɩka a sẽkã fãa n gom ne nebã a Zeova naamã la a Rĩungã yelle. A Zezi sẽn wilg wakat fãa tɩ Wẽnnaam naam la sõma wã, a sɩd kõo tõnd fãa mak-sõngo.—Matɩe 4:17; 6:9.
10 B namsa a Zezi n wa baas n kʋ-a. A koe-moonegã sasa, a yãa tood nins fãa sẽn namsd ãdem-biisã. Rẽ yĩnga yẽ mengã sẽn nams la a leb n yã nebã zu-loeesã tara yõod bɩ? Vẽenega! Hebre rãmb 5:8 wã yeta woto: “Baa bãmb sẽn yaa Wẽnnaam Biigã, bãmb zãmsa sakre ne namsg nins bãmb sẽn namsã.” A Zezi sẽn vɩɩmd la a yã yɛl nins tẽngã zugã kɩtame t’a tõe n zoe ãdem-biisã nimbãaneg n yɩɩg pĩnda. Bala, a bãnga b zu-loeesã fãa. A sã n wa na n ges nin-buiidã yelle, a na n bãnga a sẽn tõe n sõng-b to-to tɩ yɩ sõma. Kelg-y tʋm-tʋmd a Poll sẽn wilgd rẽ to-to a lɛtr ning a sẽn tool Hebre rãmbã pʋgẽ. A yeela woto: “Yɩɩ tɩlae tɩ bãmb lebg wa bãmb ba-biisã ne bũmb fãa la b yɩ maan-kʋʋdb kãsem sẽn yaa nimbãan-zoɛta, la sẽn maan Wẽnnaam tʋʋmd ne sɩda, n yiis neba yel-wẽnã, la b yiis yell ninga sẽn da be bãmb ne Wẽnnaam sʋkã. Tɩ bõe, bãmb menga sẽn paam makr n namsã, bãmb tõe n sõnga neb nins sẽn tar makrã.” “Maan-kʋʋdba kãsma tõnd sẽn tara ka a soab sẽn ka zoet tõnd nimbãanega tõnd pãn-komsem pʋgẽ ye, la bãmb dag n paama makr ne bũmb fãa wa tõndo, la bãmb ka maan yel-wẽn baa bilf ye. Dẽ yĩnga, bɩ d kolg Wẽnnaam barka geer ne daood n paam nimbãan-zoeer la barka tɩ b sõng tõnd d sẽn dat sõngr wakate.”—Hebre dãmba 2:17, 18; 4:14-16; Matɩe 9:36; 11:28-30.
11. Wãn to la neb nins sẽn na n tɩ yɩ rĩm dãmb la maan-kʋʋdb saasẽ wã namsgã nafd-ba?
11 Yaa woto me ne neb 144000 b sẽn yãk tẽngã zug tɩ b na n tɩ rɩ naam ne Kirist Zezi saasẽ wã. (Wilgri 14:4) B fãa roga ka n bɩ ka, n mi zu-loees nins fãa sẽn namsd ãdem-biisã. Bãmb mens namsame. B namsa bãmb kẽer la b kʋ sãnda meng b sẽn da sakd a Zeova n dat n tũ a Zezi wã yĩnga. La b pa ‘zoe yãnd b Zusoabã kaset yĩng’ ye. B ‘lagmame n nams koe-noogã yĩnga.’ (2 Tɩmote 1:8) B sẽn vɩɩmd tẽng zug ka n yã yɛl ninsã kɩtame tɩ b mi b sẽn na n zĩnd saasẽ n kao ãdem-biisã bʋʋd to-to tɩ zemse. Kɩtame me tɩ b mi b sẽn tõe n kʋm nebã la b sõng-b to-to sõma.—Wilgri 5:10; 14:2-5; 20:6.
Sẽn na n wa vɩɩmd-b tẽngã zugã sẽn namsdã, nafd-b lame
12, 13. Wãn to la namsgã na n naf neb nins sẽn na n wa vɩɩmd arzãnã pʋgẽ wã?
12 La sẽn na n vɩɩmd-b tẽng zug arzãnã pʋgẽ wakat sẽn kõn sa, zĩig ning bãase, sũ-sãams la kũum sẽn pa na n ye zĩndã yẽ? Rẽ yĩnga bãmb me sẽn namsdã, na n naf-b lame bɩ? Yaa sɩd tɩ namsgã sẽn wat ne sũ-sãams la toog ningã pa sõma ye. La d sã n sakd rẽ ne sũ-mare, d paamda zʋg-sõma n paasdẽ tɩ kõt-d sũ-noogo.
13 Kelg-y Wẽnnaam Gomdã sẽn yet rẽ wɛɛngẽ. A yeta woto: “Baa yãmb sã n nams tɩrlem yĩnga, yãmb paamda sũ-noogo.” “Bark bee yãmb zutu neb sã n gomd yãmb wẽng Kirist yʋʋrã yĩnga.” (1 Pɩɛɛr 3:14; 4:14) “Bark bee yãmb zutu neb sẽn na n gom yãmb wẽnga, la nams yãmba, la sãbs yãmb mam yĩnga. Bɩ y maan sũ-noogo n kɩdem, yãmb keoor sẽn yaa kãseng [saasẽ] wã yĩnga.” (Matɩe 5:11, 12) “Bark bee ned ninga zugu sẽn yalsd kãn-kãe makr wakate, tɩ bõe, a sã n paam makr n tõoge, a na n deega vɩɩm maanf Zusoaba sẽn kãab neb nins sẽn nong bãmbã.”—Zak 1:12.
14. Bõe yĩng tɩ baa b sã n namsd a Zeova nin-buiidã, b sũy noome?
14 Yaa vẽeneg tɩ pa namsgã n kõt-d sũ-noogã ye. Yaa d sẽn mi tɩ yaa d sẽn tũud a Zezi nao n maand a Zeova raabã yĩng la b sẽn namsd tõndã n noom-do. Makre, pipi kiris-nebã wakate, b ra paga tʋm-tʋmdbã kẽer bãense, n wa tall-b n kẽng ne Zʋɩf rãmbã bʋ-kaoodb taoor tɩ b zab-ba, b sẽn moond a Zezi Kirist koe-noogã yĩnga. Rẽ poore, b pãb-b lame la b bas-ba. Tʋm-tʋmdbã manesem yɩɩ wãna? Kibarã sẽn be Biiblã pʋgẽ wã wilgdame tɩ b “yii karenga bʋ-kaoodba sʋk ne sũ-noogo, b sẽn zems tɩ paam namsg a Zezi yʋʋra yĩngã.” (Tʋʋma 5:17-41) Pa b sẽn pãb-bã la toogã n yɩ-b noog ye. Yaa b sẽn da mi tɩ yaa b sẽn tũ a Zezi n kell n sak a Zeova wã yĩng la b sẽn pãb-bã.—Tʋʋma 16:25; 2 Korẽnt dãmba 12:10; 1 Pɩɛɛr 4:13.
15. D sã n tõe toog rũndã-rũndã, wãn to la na n wa naf-do?
15 D sã n sakd namsg ne sũ-mar d tẽebã yĩnga, d wat n lebga ned sẽn tõe toogo. Na n sõng-d lame tɩ b sã n namsd-d nindaar bɩ d tõog n yals kãn-kãe. Biiblã yeta woto: “M ba-biisi, makr toɛy-toɛy sã n paam yãmba, bɩ y geelg bãmb wa sũ-noog bala, tɩ yãmb miime tɩ yãmb tẽeb makr wata ne sũ-mare.” (Zak 1:2, 3) Rom dãmba 5:3-5 wã me yeta woto: “Tõnd maanda sũ-noog wʋsg namsg pʋgẽ me, tõnd sẽn bãng tɩ namsg wata ne sũ-mara yĩnga. La sũ-mar wata ne tõogr makr pʋga, la tõogr kãng kɩtdame tɩ tõnd gũ tõnd tẽeb pidsgu. La tẽeb pidsg gũudum ka belgd ye.” D sã n zoe n sakd namsg d sẽn yaa kiris-nebã yĩnga, na n wa sõng-d lame tɩ d tõog tood a taab dũni wẽn-kãngã pʋgẽ.
A Zeova na n wa rola sẽn paamd-b bõnã
16. Bõe la a Zeova na n maan n kõ sẽn na n wa yɩ-b rĩm dãmb la maan-kʋʋdbã, tɩ rol b sẽn bõnã?
16 Baa b sã n nams tõnd d sẽn dat n tũ Kiristã naoã yĩng tɩ kɩt tɩ d bõn d paoongo, d sẽn mi t’a Zeova na n wa rol-d lame wã, d sũy pa sãamd ye. Wala makre, tʋm-tʋmd a Poll da gʋlsa kiris-neb nins sẽn segd n kẽng saasẽ wã kẽer n yeel-b woto: ‘Yãmb saka yãmb paoong wʋkr ne sũ-noogo, yãmb sẽn bãng tɩ yãmb tara paoong sẽn yaa neer n yɩɩd sẽn ka sãamdã’ yĩnga, bala y na n yɩɩ Wẽnnaam Rĩungã nanambse. (Hebre dãmba 10:34) Tags-y n ges-y nin-kãensã sũy sẽn na n yɩ noog to-to, b sã n wa tɩ naag a Zeova ne Kiristã n tʋmd dũni paalgã neb neer yĩnga, n sõngdẽ tɩ b paam bark wʋsgã. Ad tʋm-tʋmd a Poll sẽn da yeel kiris-nebã bũmb ningã sɩd yaa sɩda. A yeel-b-la woto: “Mam geelgdame tɩ namsg ninga sẽn be masã wã ka zems tɩ mak ne ziir ninga sẽn be taoor n na n puk tõnd yĩnga ye.”—Rom dãmba 8:18.
17. Bõe la a Zeova na n maan n kõ neb nins sẽn saagd n na n wa vɩɩmd tẽngã zugã?
17 Woto me, baa neb nins sẽn saagd n na n wa vɩɩmd tẽngã zugã sẽn bõn bũmb ninga, pa rẽ bɩ bũmb nins fãa b sẽn sak n bas a Zeova raabã yĩngã, a Zeova na n wa rol-b lame tɩ seke. A na n wa kɩtame tɩ b vɩɩmd vɩɩm hakɩk wakat sẽn kõn sa tẽng zug arzãnã pʋgẽ. Dũni paalg kãng pʋgẽ, a Zeova “na n yẽesa nintãmã fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye.” (Wilgri 21:4) Kãab-noog tek woto! Bũmb kae tõnd sẽn na n sak n bas bɩ d bõn a Zeova yĩng dũni kãngã pʋgẽ t’a bark zem vɩɩm ning buud a sẽn na n kõ sẽn namsd-b a yʋʋrã yĩngã ye.
18. Bõe la a Zeova kãab tõnd a Gomdã pʋgẽ tɩ kengd d pelse?
18 Baa sẽn yaa toog ning fãa la d reegd rũndã-rũndã, pa tõe n kɩt tɩ vɩɩm ning d sẽn na n vɩɩmd Wẽnnaam dũni paalgã pʋgẽ wã pa yɩ noog ye. Bõn-sõma nins sẽn na n zĩnd be wã na n kɩtame tɩ d yĩm masã namsgã fãa. Ezai 65:17, 18 pʋgẽ wã, b pĩnd n yeela woto: “B ka na n le tẽeg bũmb nins sẽn da zĩnd pĩnda yell ye, b ka na n le tags b yell ye. Maan sũ-noog n kɩdem wakat fãa bũmb ninga mam sẽn na n maana yĩnga.” Rẽ n so t’a Zezi ma-biig a Zak me togs gom-kãensã. A yeela woto: “Tõnd yetame tɩ bark bee neb nins sẽn sakd namsg ne sũ-marã zutu.” (Zak 5:11) Hakɩka, d sã n sɩd sakd rũndã-rũndã namsgã ne sũ-mare, na n naf-d-la masã, la na n naf-d-la wakat sẽn wat me.
Wãn to la y na n leoke?
• Sɩnga wãn tɩ ãdem-biisã wa namsdẽ?
• Wãn to la sẽn na n wa yɩ-b tẽngã rĩm dãmbã la sẽn na n vɩɩmd-b tẽng zug ka wã sẽn namsdã na n naf-ba?
• Bõe yĩng tɩ d sũy yaa noog baa ne d sẽn namsdã?
[Zãmsgã sogsgã]
[Foto, seb-neng 18]
Pipi raoã ne a pagã vɩɩm ra na n talla bark wʋsgo
[Foto, seb-neng 20]
A Zezi sẽn yã nebã namsgã, sõng-a lame t’a na n wa yɩ Rĩm la maan-kʋʋdb Kãsem sẽn mi a tʋʋmd sõma
[Foto, seb-neng 22]
Tʋm-tʋmdbã sũy yɩɩ noog b sẽn nams-b a Zezi yʋʋra yĩngã