Nagunggonaan Itayo Diad Pantepel ed Irirap

“Ibilang tayo a mapalar so saray managtepel.”​—SANTIAGO 5:11.

1, 2. Anto so mangipapabitar ya ag-inggagala nen Jehova a manirap iray totoo?

 ANGGAPO so toon limpioy nonot to a labay toy manirap; tan anggan say Manamalsa tayon si Jehova a Dios et agto labay a nanengneng so totoo a manirap. Ontan so namoria tayo sano usisaen tayo so impuyan a Salita to tan imanoen tayo iray agawa kayari ton pinalsa so inmunan laki tan bii. Unona, pinalsa na Dios so laki. “Si Jehova a Dios, say sapok na dalin so ginawa to a too, tan inlinawa to ed saray sangab na eleng to so linawa na bilay; et say too nagmaliw a too a mabilay a sikakamarerwa.” (Genesis 2:7) Si Adan et ayadyari ed laman tan nonot, kanian sikatoy agbalot mansakit odino ompatey.

² Komusta balet so kipapasen na panagbilay nen Adan? Onia so inkuan na Biblia: “Si Jehova angitanem na sakey a tanamanan ed Eden ed dapit bukig; et diman to impasen so too a ginawa to. Tan si Jehova pinabutay to ed dalin so saray amin a kiew a makaroyroyo ed mata tan maong ira a kanen.” (Genesis 2:8, 9) On, alay-abig na ayaman nen Adan, tan anggapoy antokaman a pansengegan na irap ed Eden.

3. Anton alay abig a pribilehyo so niiter ed inmunan sanasawa?

³ Onia so ibabaga ed sikatayo na Genesis 2:18: “Inkuan nen Jehova a Dios, Aliwan maong a manbukbukor so too, igawaan ko na sakey a manepeg a katulongan to.” Si Jehova et inggawaan to si Adan na sakey a perpekton asawa, pian niwala ed dalin so maliket a pamilya. (Genesis 2:21-23) Insan onia ni so inkuan na Biblia: “Manbunga kayo tan ondakel kayo, tan makmakan yo so dalin, tan sikato so patuloken yo.” (Genesis 1:28) Alay abig so pribilehyo na sayan inmunan sanasawa, salanti, paawangen da so Paraison Eden ya anggad nasabisabin magmaliw lan paraiso so interon dalin. Tan makmakan da so dalin na maliket iran ananak ya agmanirap. Talagan alay abig a gapo!​—Genesis 1:31.

Ginmapo so Irap

4. Base ed saray agawa diad inlalabas na panaon, anto so mapatpatnag nipaakar ed katooan?

⁴ Balet, no imanoen tayo so kipapasen na katooan diad inlalabas na saray panaon, mapatpatnag a walay agawan mauge-uges. Aliwliwa laray nagagawa tan masyado lay paniirap na katooan. Diad loob na nilasus lan taon et sasagmaken na amin ya ilalak nen Adan tan Eva so sakit, itatatken, tan ipapatey.  Sayan dalin et talagan aliwan sakey a paraiso a napno na maliket a totoo. Matukotukoy so impaneskribe na Roma 8:22 ed sayan kipapasen: “[Say] lapag a pinalsa maningel ira ya amin tan maniirap ira . . . ya anggad natan.”

5. Panon a natetel met iray inmunan ateng tayo ed inggapoy irap na katooan?

⁵ Aliwan si Jehova so natetel ed abayag lan nagagawa a pinasyan irap. (2 Samuel 22:31) Say sakey a natetel et saray katooan. “Say kiwakiwas da et makaderal, karimdimla so paraan na pidedeneng da.” (Salmo 14:1, NW) Marakep ya amin so gapoan ya inter ed saray inmunan ateng tayo. Say kekerewen lambengat ed sikara pian napansiansia ra itan et say itulok da ed Dios, balet ta pinili di Adan tan Eva so magmaliw ya independente ed si Jehova. Lapud impulisay da si Jehova, agla ra mansiansian ayadyari. Kalkalna laran onletey ya anggad sikaray ompatey. Nipatawir ed sikatayo so ag-inkayadyari.​—Genesis 3:17-19; Roma 5:12.

6. Anto so ginawa nen Satanas a sengegan met na inggapoy irap?

⁶ Say sakey nin sengegan na inggapoy amin ya irap et say espiritun pinalsa a nagmaliw a Satanas a Diablo. Sikatoy inikdan na Dios na kawayangan a mandesisyon. Balet ta inusar to itan ed pikewet a paraan ta labay toy narayew anta si Jehova lambengat so makanepegan ed satan, aliwan saray pinalsa to. Si Satanas so anukso ed si Adan tan Eva ya onsian ed si Jehova, a singano talagan magmaliw iran ‘singa Dios a makaamta no anto so maong tan mauges.’​—Genesis 3:5.

Si Jehova Labat so Makanepegan a Manuley

7. Anto so ipapabitar na saray resulta na impanrebelde ed si Jehova?

⁷ Ipapabitar na saray mauges a resulta na satan a rebelyon a si Jehova labat, say Soberano na Uniberso, so makanepegan a manuley tan say uley to lambengat so matunong. Diad nilibolibo lan taon a linmabas et apaneknekan a say pananguley nen Satanas, a nagmaliw a “prinsipe na sayan mundo,” et marelmeng, agmatunong, tan maruksa, a talagan makapadismaya. (Juan 12:31) Ipapabitar met na say abayag lan miserablin uley na too ed silong na panangontrol nen Satanas ya agda nayarian so manuley ed inkatunong. (Jeremias 10:23) Kanian, antokaman a naisip dan klase na uley a sian ed si Jehova et seguradon mansumpal ed anggapo. Ontan so malinlinew a papaneknekan na awaran.

8. Anto so gawaen nen Jehova ed amin a klase na uley na too, tan panon to itan a sumpalen?

⁸ Natan ta nilibolibo met lan taon so inyabuloy nen Jehova ed totoo pian man-eksperimento ed saray klase na uley a sian ed sikato, makatunongan labat ya ekalen to la irayan amin a pananguley ed dalin pian isalat so mismon uley to. Onia so ibabaga na sakey a propesiya nipaakar ed saya: “Dia ed saray agew naani na saratan ya ar-ari [saray uley na too], say Dios na tawen mamaalagey naani na sakey a panarian [say gobierno to ed tawen ya uleyan nen Kristo] ya anggan kapigan agnaani naderal . . . Buybuyaken to naani tan upoten to naani so saraya ya amin a panarian, et sikato so mansiansia lawas.” (Daniel 2:44) Naandi la so uley na demonyo tan too, tan say Panarian labat na Dios ed tawen so mansiansia tan manuley ed dalin. Si Kristo so magmaliw ya Ari, tan walaray kakaiba ton manuley a 144,000 a tugyopen na saray matoor a totoon manlapud dalin.​—Apocalipsis 14:1.

Walay Gunggona ed Panirap

9, 10. Panon ya agunggonaan si Jesus ed saray irap a sinagmak to?

⁹ Makapainteres ya usisaen iray kualipikasyon na saramay manuley ed mangatatawen a Panarian. Unona, si Kristo Jesus et pinaneknekan to a sikatoy talagan kualipikado ed posisyon to bilang Ari. Andukerukey a panaon so impakapiulop to ed Ama ton si Jehova ed panggagawa na linawa To bilang “uloen [To] a komikimey.” (Uliran 8:22-31) Sanen sikatoy imbaki nen Jehova diad dalin, sikatoy mabulbulos a tinmulok. Tan nen wadia’d dalin, insentro toy  bilay to ed pangitongtong ed arum na inkasoberano tan Panarian nen Jehova. Impanengneng nen Jesus so alay abig ya ehemplo parad sikatayon amin diad sigpot ya impanpasakop to ed inkasoberano nen Jehova.​—Mateo 4:17; 6:9.

¹⁰ Si Jesus so apasegsegang, tan diad kaunoran et impapatey. Legan na impanministeryo to, naimano to so pakaskasin kipapasen na katooan ed kaliberliber to. Wala kasi agunggona to ed impakanengneng to ed saratan ya irap tan diad impanagmak ton mismo ed saratan? On. Onia so inkuan na Hebreos 5:8: “Anggan sikato so Anak [na Dios], inaral to so katutulok lapu ed saray bengatlan intepel to.” Lapud saray naeksperiensya nen Jesus diad dalin, sikatoy nagmaliw a mas makatalos tan maabagey. Naeksperiensya ton mismo no antoy kipapasen na pagmaliw a kabiangan ed pamilya na too. Sikatoy makapilikna ed saramay maniirap tan mas amta to no panon iran tulongan. Imanoen pa so impangipabitar ed saya nen Pablo diad libro na Hebreos: “Kanian manepeg ed amin a mipara ed saray agagi to, pian sikato komon so mapangasi tan matoor ya atagey a saserdote dia ed saray bengatla a nipaakar ed Dios, pian manggawa na makapapa a nipaakar ed saray kasalanan na baley. Ta lapud no sikaton dili et nantepel na pakatukso, nayarian to a tulongan so saray natukso.” “Anggapo so sakey ya atagey a saserdote tayo ya agmakayarin mangasi ed saray kakapuyan tayo; noag say sakey a tinukso ed amin a singa sikatayo, ingen anggapo so kasalanan to. Onsingger itayo sirin a mailalo ed trono na grasya pian makagamor itayo na panangasi, tan makalmo itayo na grasya, pian natulongan to itayo sano panaon a kinepeg to.”​—Hebreos 2:17, 18; 4:14-16; Mateo 9:36; 11:28-30.

11. Panon a mangunggona ed panuley na saramay magmaliw ya arari tan saserdote so eksperiensya ra diad dalin?

¹¹ Mipadpara met ed satan so kipapasen na saray 144,000 ya “asaliw” ed dalin pian magmaliw a kaiba nen Kristo Jesus a manuley ed mangatatawen a Panarian. (Apocalipsis 14:4) Inyanak ira bilang totoo diad dalin, tan binmaleg ira ed mundon napno na kairapan, tan asagmak da met a mismo iratan. Dakel ed sikara so pinasegsegang, tan pinatey ni ingen so arum ed sikara lapud katooran da ed si Jehova tan inkamabulos dan ontumbok ed si Jesus. Balet agda ‘imbaing so pamatua na Katawan da, noag ingen akidamay ira ed saray irap lapud ebanghelyo.’ (2 Timoteo 1:8) Lapud saray naeksperiensya ra diad dalin, sikaray nagkalautlan kualipikado a mangukom ed katooan manlapud tawen. Naaralan da so magmaliw a mas masimpatiya, mapangasi, tan magunaet ya ontulong ed totoo.​—Apocalipsis 5:10; 14:2-5; 20:6.

Manliket Iramay Walaan na Mangaraldalin ya Ilalo

12, 13. Panon a nagunggonaan iramay walaan na mangaraldalin ya ilalo ed irap a nasasagmak da?

¹² Wala kasi nagunggona ed paniirap na saramay  walaan na ilalon manbilay ya andi-anggaan ed paraison dalin ya anggapo lay sakit, ermen, tan patey? Siempre say naliliknan ot-ot tan ermen lapud paniirap et aliwan makapaliket. Balet ta no susungdoan tayo iray ontan ya irap, lalon onaligwas iray maabig a kalidad tayo tan manresulta itan ed panliket tayo.

¹³ Imanoen pa no antoy ibabaga na impuyan a Salitay Dios nipaakar ed saya: “Bang mas no wala so bengatlan liknaen yo nisengeg ed katunongan, mapalar kayo.” “No napabpabanday kayo ed ngaran nen Kristo, mapalar kayo.” (1 Pedro 3:14; 4:14) “Mapalar kayo sano balawen da kayoy totoo, tan pasegsegangen da kayo, tan salitaen day amin a nengneng na mauges a sumpad sikayo, nisengeg ed siak, a mantila ra. Manggayaga kayo tan manliket kayon mapalalo; ta balbaleg so tumang yo ed tawen.” (Mateo 5:11, 12) “Mapalar so too a mantepel na panalsali, ta no asali la, awaten to so balanget na bilay.”​—Santiago 1:12.

14. Diad anton paraan a say panirap et makapaliket ed saray mandadayew ed si Jehova?

¹⁴ Seguradon aliwa met a samay mismon irap a nayarin nasagmak tayo so panliketan tayo. Sikatayo so manliliket tan napepenek lapud amta tayon maniirap itayo ta gagawaen tayo so linawa nen Jehova tan tutumboken tayo so ehemplo nen Jesus. Alimbawa, nen inmunan siglo, arum ed saray apostoles et impriso insan inyarap ed atagey a korte na Judio tan kinondena lapud impanpulong da nipaakar ed si Jesu-Kristo. Sikaray nilelewet insan imbulos. Balet panon so inkiwas da? Insalaysay na Biblia a sikaray “pinmaway ed arap na singbatan, a malikeliket ira lapud kinmana ra a nantepel na baing ed ngaran nen Jesus.” (Gawa 5:17-41) Maliket ira aliwan lapud impanlelewet ed sikara tan ed sakit a resulta na satan, noagta lapud amta ran agawa iyan mauges a bengatla ta nansiansia iran matoor ed si Jehova tan tinumbok da so bakat nen Jesus.​—Gawa 16:25; 2 Corinto 12:10; 1 Pedro 4:13.

15. Panon itayon nagunggonaan ed arapen sano itepel tayo iray nasasagmak tayon irap natan?

¹⁵ No sungdoan tayo so isusumpa tan panamasegsegang tekep na dugan awawey, mas makapantepel itayo. Ontulong iya ed sikatayo a naarap iray onsabi nin ir-irap. Onia so nabasa tayo: “Agagik ira, ibilang yo ya amin a liket no napelag kayo ed nambabangil a katuksoan. Amtaen yo a say panalsali ed pananisia yo gawaen to so anos.” (Santiago 1:2, 3) Mipadpara, oniay ibabaga ed sikatayo na Roma 5:3-5: “Manliket itayo ni ed saray kairapan tayo: tan amta tayo a say kairapan, mangiter na anos. Tan say anos, pakapatnagan; tan say pakapatnagan, ilalo. Tan say ilalo agmangibabaing.” Kanian no susungdoan tayo natan iray subsubok lapud Kristianon kabibilay tayo, lalon akaparaan itayon mansungdo ed arum niran onsabin subok diad sayan marelmeng a sistema na bengabengatla.

Si Jehova so Manumang

16. Antoy itumang nen Jehova ed saramay magmaliw ya ari tan saserdote lapud irirap da?

¹⁶ Naandian man itayo na materyal iran bengatla lapud isusumpa odino panamasegsegang diad pantutultuloy tayon manbilay unong saray estandarte na Dios, makalikna itayo na inkapnek ta amta tayon tumangan itayo nen Jehova na daakan. Alimbawa, oniay insulat nen apostol Pablo diad arum ed saramay awalaan na ilalon onla ed tawen: “Inako yo a sililiket so panamsam ed saray kayarian yo, ta amta yo a wala ed sikayon dili ed tawen so sakey a magmaong a kayarian yo tan maando”  bilang manuley ed Panarian na Dios. (Hebreos 10:34) Tan isipen pa labat so panliket da sano mibiang la ra ed panginabang na alay-abig iran bendisyon ed saray manaayam ed dalin diad balon mundo, legan iran iwawanwan nen Jehova tan si Kristo. Petepeteg iray imbaga nen apostol Pablo ed saray matoor a Kristiano: “Ibilang ko a saray irirap ed sayan kaplesan a panaon ag-ira makana ya ipara ed arapen a gloria a nipuyan ed sikatayo naani.”​—Roma 8:18.

17. Anto so itumang nen Jehova ed saramay walaan na ilalon manbilay diad dalin a matoor a manlilingkor ed sikato natan?

¹⁷ Mipadpara, antokaman so naandi odino isasakripisyo natan na saramay walaan na ilalon manbilay diad dalin lapud panlilingkor da ed si Jehova, sikaray tumangan to na agnasabsabaan. Ikdan to ra na ayadyari tan andi-anggaan a bilay diad paraison dalin. Diad satan a balon mundo et “punasen [nen Jehova] so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot.” (Apocalipsis 21:4) Makapalikliket a sipan! Antokaman ya isakripisyo tayo ed sayan mundo parad si Jehova et agmakakompara ed alay-abig a bilay diad arapen ya iter to ed saray matoor a lingkor to a mantetepel na irirap.

18. Anton makaligliwan sipan so intarya nen Jehova panamegley na Salita to?

¹⁸ Antokaman ya irap a kaukolan tayo nin sungdoan et seguradon agmangapekta ed nalikna tayon liket ed andi-anggaan a bilay diad balon mundo na Dios. No wadman itayo la a makakaeksperiensya ed alay abig iran kipapasen, agtayo la nanonotan so amin na saratan. Onia so ibabaga na Isaias 65:17, 18: “Saray inmuna a bengatla ag-ira la nanonotan, ag-ira la onla ed nonot. Balet manggayaga tan manliket kayo ed ando lan ando ed saman a palsaen ko.” Kanian, talagan tua imay inyabawag na agi nen Jesus ed ina a si Santiago ya: “Ibilang tayo a mapalar so saray managtepel.” (Santiago 5:11) On, no matoor itayon mantepel ed amin a nasasagmak tayo natan ya irap, nagunggonaan itayo natan tan diad arapen.

Panon Mon Ebatan?

• Panon a ginmapo so impanirap na katooan?

• Anto so nayarin nagunggona na saray magmaliw a manuley diad dalin tan saramay manayam dia lapud paniirap da?

• Akin a nayarian tayoy manliket natan anggan sano maniirap tayo?

[Tepetepet Parad Panagaral]

[Litrato ed pahina 27]

Alay abig ya arapen so manatalaran ed saray inmunan ateng tayo

[Litrato ed pahina 29]

Lapud naimatonan a mismo nen Jesus so irap, sikatoy atulongan a magmaliw a maabig ya Ari tan Atagey a Saserdote

[Litrato ed pahina 31]

‘Malikeliket’ iray apostoles ‘lapud kinmana ra a mantepel na baing’ lapud pananisia ra