Ka Puapinga Tatou na te Akakoromakianga i te Mamaeanga
Ka Puapinga Tatou na te Akakoromakianga i te Mamaeanga
‘Te karanga nei tatou e, e ao to te aronga i tamou marie i te akakoromaki.’—IAKOBO 5:11.
1, 2. Eaa te akaari maira e kare a Iehova i akakoro ana i te tangata kia kite i te kino?
KARE tetai tangata noa ua e inangaro ana kia kite mai i te kino; e kare katoa Tei Anga mai ia tatou, ko te Atua ko Iehova, e inangaro ana i te au tangata kia kite mai i te kino. Ka kite mai tatou i teia me akara matatio tatou i tana Tuatua akauruia e e akatau i tei tupu i muri ake i tona anga mai anga i te tane e te vaine. Te mea mua, kua anga te Atua i te tane. “Kua anga iora te Atua ra ko Iehova i te tangata i te one-pueu o te enua nei, kua akapuangi iora aia i te aʼo ora ki roto i tona putaiu; riro akera te tangata ei tangata ora.” (Genese 2:7) E tangata apa kore a Adamu i te pae kopapa e te pae manako e kare aia e kite mai i te maki me kore i te mate.
2 Akapeea te au turanga nooanga o Adamu? “Kua tanu oki te Atua ra ko Iehova i te kainga i te pae i te itinga o te rā i Edene ra; e kua tuku iora aia i te tangata i tana i anga ra ki reira. Kua akatupu oki te Atua ra ko Iehova i te au rakau taurekareka katoa kia akara, e tei meitaki ei kai.” (Genese 2:8, 9) Ae, e kainga manea tikai to Adamu. Kare e kino i Edene.
3. Eaa te au manakonakoanga ta te nga tokorua mua i kite mai?
3 Te akakite maira a Genese 2:18 kia tatou e: “Kua tuatua iora te Atua ra ko Iehova, Kare ïa e meitaki kia noo ua te tangata koia anake ra; e anga au i tetai tauturu tau nona ra.” Kua akamata a Iehova i te anga mai i tetai vaine apa kore na Adamu, kia rauka te manakonakoanga no tetai oraanga pamiri mataora. (Genese 2:21-23) Te karanga katoa maira te Pipiria e: “Kua akameitaki atura te Atua ia raua, e kua tuatua maira te Atua kia raua, Kia anau korua, e kia maata roa, e e akaki i te enua nei, e e akavi.” (Genese 1:28) Tei te nga tokorua mua te atianga meitaki tikai kia akatotoa i te Parataito o Edene e tae rava ki te tuatau, e kapi takiri ei te enua, i te akatupuanga i tetai parataito i te ao katoa. E ka anau mai raua i tetai uanga mataora, e kare ratou e kite mai i te kino. Mei teaa tikai tetai akamataanga manea tikai!—Genese 1:31.
Akamata te Mamaeanga
4. I te akaraanga o te tuatua enua, eaa te kiteia ra no runga i te tangata ravarai?
4 Inara, me akara tatou i te turanga o te pamiri i roto i te tuatau o te tuatua enua, te kiteia ra e e apinga tetai tei tarevake kino rava. Kua tupu te au apinga kino, e kua kite mai te pamiri tangata i te mamae maata. No tetai au anere mataiti, pouroa te au uanga a Adamu raua ko Eva, kua makiia, kua ruaine, e kua mate atu i te pae openga. E mea papu tikai e kare te enua i te parataito tei ki i te au tangata mataora. Te akataka meitaki maira a Roma 8:22 i teia turanga e: “Te ngunguru anake nei te au mea katoa i angaia mei te mamae anau ra e tae rava akenei i teianei rā.”
5. Akapeea to tatou nga metua mua i te o atu anga ki te akamataanga o te mamaeanga i roto i te pamiri?
5 Kare e rauka i te akaapa ia Iehova no te tuatau roa i tupu ei te mamae maata. (2 Samuela 22:31) Ka tau tetai tuanga o te akaapaanga ki runga i te tangata. “Kua kino ratou, e ta ratou i rave ra, e mea viivii roa ïa.” (Salamo 14:1) I te akamataanga, e meitaki pouroa te au mea tei orongaia ki to tatou nga metua mua. Te apinga ua e umuumuia ra kia vai akapera ua rai, koia oki ko te akarongo ki te Atua, inara kua iki a Adamu raua ko Eva i te aruaru i te akatakake anga mei ia Iehova. I te mea e kua kopae to tatou nga metua mua ia Iehova, kare aia e akono akaou i to raua turanga apa kore. Ka kino ua atu rai raua e mate ua atu. Kua iri mai te tu apa ua ki runga ia tatou.—Genese 3:17-19; Roma 5:12.
6. Eaa ta Satani tuanga i roto i te akamataanga o te mamaeanga?
6 Tetai katoa tei o mai ki roto i te akamataanga o te mamaeanga katoatoa koia oki ko te mea ora vaerua tei kapikiia e ko Satani te Tiaporo. Kua orongaia kiaia te tu rangatira. Inara, kua taangaanga tau kore aia i taua tikaanga ra i te tautaanga kia rauka iaia te akamorianga. I na, ko Iehova anake ua te ka akamoriia, kare ko tana au mea i anga mai. Na Satani i akakeu ia Adamu raua ko Eva kia kimi i te akatakake anga mei ia Iehova, mei te mea rai e ka riro mai raua “mei te Atua ra te tu, i te kite i te meitaki e te kino.”—Genese 3:5.
Tei ia Iehova Anake Ua te Tikaanga kia Tutara
7. Eaa ta te au tupuanga no te meameaauanga ia Iehova e akaari maira?
7 Te akaari maira te au tupuanga kino no te meameaauanga e tei ia Iehova anake ua, te Ngateitei i te Ao Katoa e Pini Ua Ake, te tikaanga kia tutara, e nana ua te tutaraanga tuatua tika. Te akaari maira te au tauatini mataiti i topa e kua akatupu a Satani, tei riro mai e ko “te ariki o teianei ao,” i tetai tutaraanga kino, te tuatua tika kore, e te kino pakari tei tau kore tikai. (Ioane 12:31) Kua akaari katoa mai te tutaraanga roa, e te taitaia a te au tangata i raro i te akatereanga a Satani e, te ngere ra ratou i te kite i te tutara atu ma te tuatua tika. (Ieremia 10:23) No reira, pouroa te au tu tutaraanga tei manakoia, i te pae mai i ta Iehova, papu tikai e ka puapinga kore ua. Te akapapu meitaki maira tikai te tuatua enua i te reira tikaanga.
8. Eaa ta Iehova akakoroanga no runga i te au tu tutaraanga tangata ravarai, e akapeea aia i te akatupuanga i te reira akakoroanga?
8 I te mea e kua akatika a Iehova no te au tauatini mataiti, i te au tangata kia timata i te tutaraanga akatakakeia mei iaia, kua tau aia i te akaatea i teia au tu tutaraanga pouroa mei te enua nei e te tupau anga i te reira ki tana uaorai kavamani. Te karanga ra tetai totou no runga i teia e: “I te au rā o taua au ariki ra, e akatupu ei te Atua no te rangi i tetai basileia, te ka kore rava e akakoreia e tuatau ua atu: . . . e riro na te reira e akapueurikiriki e e akapou i taua au basileia katoa ra, e ka vai rai te reira e tuatau ua atu.” (Daniela 2:44) Ka ope te tutaraanga a te temoni e te tangata, e ko te patireia anake ua o te Atua i te rangi te ka vai ua e ka tutara atu i te enua nei. Ko Karaiti te Ariki, e e 144,000 tangata tiratiratu tei apainaia atu mei te enua nei, te ka tutara kapiti atu kiaia.—Apokalupo 14:1.
Puapinga Anga mei te Mamaeanga
9, 10. Akapeea a Iesu i puapinga ai mei te kite mai anga i te au kino?
9 E mea meitaki i te akara matatio i te au umuumuanga e anoanoia ra no te aronga te ka tutara atu i roto i te Patireia i te rangi. Te mea mua, kua akaari a Iesu Karaiti e kua tau meitaki aia i tona taoonga ei Ariki. Kua roa te tuatau iaia i te nooanga i te pae ia Iehova i te raveanga i te anoano o tona Metua, ei “pu rave angaanga” Nona. (Maseli 8:22-31, NW) I to Iehova akanoonooanga iaia kia aere mai ki te enua, kua ariki puareinga ua a Iesu. I te enua nei, kua akamou aia i te akakiteanga ki etai ke i to Iehova turanga ngateitei e tona Patireia. Kua akanoo a Iesu i tetai akaraanga meitaki tikai no tatou pouroa na te kauraro takiri anga ki te reira turanga ngateitei.—Mataio 4:17; 6:9.
10 Kua kite mai a Iesu i te takinokinoanga, e i te openga iora kua tamateia aia. I te tuatau o tana angaanga orometua, kua kite mai aia i te turanga tangi tikai o te au tangata ravarai takapini iaia. Kua puapinga ainei aia i te kite anga i te reira e te rokoia anga tikai e te kino? Ae. Te karanga ra a Ebera 5:8 e: “Tamaiti ua rai oki aia, i kite aia i te akamoraro i tona au mate.” No te au apinga tei tupu kia Iesu iaia i te enua nei, kua maata atu tona marama e tona tangi aroa. Kua kite mai tikai aia i te turanga o te pamiri tangata. Ka rauka iaia i te tangi atu i te aronga tei kite mai i te kino e ka marama meitaki atu i tana tuanga i te tauturuanga ia ratou. E akara ana e akapeea te apotetoro ko Paulo i te akaketaketaanga i teia i roto i te puka a Ebera: “I tikaʼi iaia kia akariroia mai mei tona au taeake te tu i te au mea katoa ra, kia riro aia ei taunga maata tuatua-mou e te aroa ua, i te au mea a te Atua ra, kia tatara aia i te ara a te tangata nei. E koia uaorai oki i mate i te mea rokoia e te timataanga ra, e tika oki iaia kia tauturu mai i te aronga i timataia ra.” “Kare oki to tatou i te taunga maata e kore e tika kia aroa mai ia tatou i to tatou au paruparu nei; i rokoia katoa oki aia i te au timataanga katoa, mei ia tatou katoa nei rai, kare rava ra e ara. E teianei e akavaitata ua atu tatou i te terono o te aroa ua ma te mataku kore, kia aroaia mai tatou nei, e kia rauka te meitaki ei tauturu mai ia tatou i te tuatau e tau ei ra.”—Ebera 2:17, 18; 4:14,-16; Mataio 9:36; 11:28-30.
11. Akapeea te au ariki e te au taunga no te tuatau ki mua, i te puapinga anga mei te au tupuanga i te enua nei?
11 Ka rauka katoa te reira kia tuatuaia no te 144,000, tei “okoia” mei te enua nei kia tutara kapiti atu kia Iesu Karaiti i te Patireia i te rangi. (Apokalupo 14:4) Kua anau pouroaia ratou ei au tangata i te enua nei, kua tupu mai i roto i tetai ao tei koropiniia e te mamaeanga, e kua kite katoa mai ratou uaorai i te kino. E manganui tei takinokinoia, e tetai pae kua tamate katoaia no te akono anga i to ratou tiratiratu kia Iehova e no te inangaro anga i te aru ia Iesu. Inara kare ratou i ‘akama ana i te tuatua-akakite a to ratou Atu, i te āriki anga i ta ratou tuanga i te mate o te evangelia nei.’ (2 Timoteo 1:8) No ta ratou i kite mai i te enua nei, kua tau tikai ratou kia akava i te pamiri tangata mei te rangi mai. Kua kite mai ratou i te akaari maata atu i te tu tangi, te takinga meitaki e te maroiroi i te tauturuanga i te tangata.—Apokalupo 5:10; 14:2-5; 20:6.
Mataora o te Aronga ma te Manakonakoanga i te Enua Nei
12, 13. Akapeea te aronga e manakonakoanga to ratou i te enua nei e puapingaia ai mei te kino?
12 Ka akatupu ainei te mamaeanga i teianei i te au apinga meitaki i roto i te aronga e manakonako ra i te ora mutu kore i runga i tetai enua parataito e kare e maki, e mii, e te mate? Te mamae e te manako taitaia ta te mamaeanga e apai maira, e au apinga inangaro koreia te reira. Inara me akakoromaki tatou i te reira kino, ka akameitaki atu te reira i to tatou uaorai au tu meitaki e ka tupu mai te mataora.
13 E akamanako ana i ta te Tuatua akauruia a te Atua e akakite maira no runga i te reira: “E kia mate rai kotou i te tuatua-tika ra, e ao rai to kotou.” “Kia akakinoia kotou i te ingoa o te Mesia ra, e ao to kotou.” (1 Petero 3:14; 4:14) “E ao to kotou, kia akakino mai, e kia takinga-kino mai, e kia tapepe pikikaa ua mai te tangata ia kotou i te au kino katoa nei, noku nei: E rekareka kotou, e kia rere ua i te rekareka; e tutaki maata oki ta kotou i te ao ra.” (Mataio 5:11, 12) “E ao to te tangata e akakoromaki i te timataanga: kua akatika anakeia mai aia ra, e rauka ïa iaia te korona ora.”—Iakobo 1:12.
14. Eaa te apinga te mataora ra te aronga akamori ia Iehova i te tamamaeia anga?
14 Kare e ko te kino tikai ta tatou e na roto maira, te apinga e mataora ra tatou. Ko te mataora, te merengo anga, mei te kite anga e te mamae ra tatou no te mea te rave ra tatou i te anoano o Iehova e te aru ra i te akaraanga o Iesu. Ei akaraanga, i roto i te anere mataiti mua, kua tapekaia tetai au apotetoro e oti kua apainaia atu ki mua i te akavaanga nui o te ngati Iuda e kua akaapaia no te tutu anga ia Iesu Karaiti. Kua papaia ratou e oti kua tukunaia kia aere. Eaa to ratou manako? Te akakite maira te tataanga Pipiria e kua “aere atura ratou mei te aroaro atu o te Sunederi, ma te rekareka, i te mea, no tona ingoa i manakoiaʼi ratou e tau ia ratou taua takinga-kino ra.” (Angaanga 5:17-41) Kua mataora ratou, kare no te papaanga e te mamaeanga ki te kopapa tei aru mai, mari ra no te maramaanga e kua tupu teia no te mea kua akono ratou i to ratou tiratiratu kia Iehova e kua aru i te takainga vaevae o Iesu.—Angaanga 16:25; 2 Korinetia 12:10; 1 Petero 4:13.
15. Akapeea to tatou akakoromakianga i te mamaeanga i teianei e puapinga ia tatou no te tuatau ki mua?
15 Me tamou marie tatou i te patoianga e te takinokinoanga ma te manako tau, ka akamaroiroi te reira i te akakoromaki i roto ia tatou. Ka tauturu teia ia tatou i te akakoromaki i te au mamaeanga ka tupu mai. Te tatau ra tatou e: “E aku au taeake ra, kia rokoia kotou e te au timataanga e manganui te tu ra, ka tuatua e, e mea rekareka anake ïa; Kua kite oki kotou e, na taua timata anga i to kotou akarongo ra e akatupu i te akakoromaki.” (Iakobo 1:2, 3) Mei te reira rai, te akakite maira a Roma 5:3-5 kia tatou e: “Te rekareka katoa nei ra tatou i te tumatetenga; kua kite oki tatou e, na te au tumatetenga e akatupu i te akakoromaki; E na te akakoromaki e akatupu i te kite; e na te kite e akatupu i te tatari: Kare oki te tatari e taakama mai.” E no reira te maata atu i to tatou akakoromakianga i te au timataanga i teianei no to tatou aerenga Kerititiano, te meitaki atu ia i to tatou tu kite i te akakoromaki anga i te au timataanga ka tupu mai i roto i teia akatereanga o te au mea nei.
Ka Tutaki a Iehova
16. Eaa ta Iehova ka rave no te au ariki e te au taunga i te tuatau ki mua, ei tutaki no to ratou tamamaeia anga?
16 Noatu me ka ruti tatou i te au apinga materia no te patoianga me kore no te takinokino anga tei tupu kia tatou no te aru anga i te aerenga Kerititiano, ka mataora tatou i te kite anga e ka akameitaki pu tikai a Iehova ia tatou. Ei akaraanga, ki te aronga e manakonakoanga to ratou no te aere anga ki te rangi, kua tata te apotetoro ko Paulo e: “Kua āriki ua kotou i te noni anga i to kotou apinga ma te rekareka, kua kite oki kotou e apinga meitaki maata ua atu ta kotou e tika i te vai marie anga tei te ao.” (Ebera 10:34) E akamanako ana i to ratou mataora i raro ake i te aratakianga a Iehova e Karaiti, e ka piri atu ratou ki roto i te oronga anga i te au akameitakianga manea rava ki te aronga i te enua nei i roto i te ao ou. E tika tikai te au tuatua a te apotetoro ko Paulo ki te au Kerititiano tiratiratu e: “Te karanga nei oki au e, kare teianei au mate ravarai e tau kia arite atu i te kakā e akakiteia mai ia tatou nei.”—Roma 8:18.
17. Eaa ta Iehova ka rave no te aronga e manakonakoanga i te enua nei to ratou te tavini tiratiratu ra iaia i teianei?
17 Mei te reira katoa rai, noatu e eaa te apinga ta te aronga ma te manakonakoanga i te enua nei ka ngere me kore ka akaruke puareinga ua no te tavinianga ia Iehova, ka akameitaki maata tikai aia ia ratou i tana ka rave no te tuatau ki mua. Ka oronga aia kia ratou i tetai oraanga apa kore, e te mutu kore i runga i tetai enua parataito. I roto i te reira ao ou, ka “orei [a Iehova] i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa.” (Apokalupo 21:4) Mei teaa tikai te manea i taua taputou ra! Kare takiri e apinga ka akaruke puareinga ua tatou me kore kare e akaruke puareinga ua i roto i teia ao nei no Iehova e arite atu ki te oraanga manea tikai e aere maira, tana ka oronga ki tona au tavini tiratiratu e akakoromaki ra i te kino.
18. Eaa te taputou pumaana ta Iehova e oronga maira kia tatou i roto i tana Tuatua?
18 Noatu te au mamaeanga ta tatou ka akakoromaki atu, kare rava te reira e kanga atu i to tatou rekarekaanga i tetai oraanga mutu kore i roto i to te Atua ao ou. Pouroa te reira, ka tupau takiriia e te au turanga umere rava tikai i roto i te ao ou. Te akakite maira a Isaia 65:17, 18 kia tatou e: “Kare oki te muatangana ra e maaraia, kare e akamanako akaouia atu. E rekareka ra kotou, e e rere ua i te rekareka e tuatau ua atu, i taku e anga nei.” No reira, kua tau rai a Iakobo te teina o Iesu kia karanga e: ‘Te karanga nei tatou e, e ao to te aronga i tamou marie i te akakoromaki.’ (Iakobo 5:11) Ae, me akakoromaki tiratiratu tatou i te mamaeanga i teianei, ka puapinga tatou i teia taime e i te tuatau ki mua.
Akapeea Koe me Pau?
• Akapeea te au tangata i te kite mai anga i te mamaeanga?
• Eaa te au puapinga ta te mamaeanga ka apai mai ki te au tutara e te aronga ka noo i te enua nei no te tuatau ki mua?
• Eaa tatou ka mataora ai i teianei noatu te mamaeanga?
[Au Uianga Apii]
[Tutu i te kapi 27]
E manakonakoanga manea tikai ta to tatou nga metua mua no te tuatau ki mua
[Tutu i te kapi 29]
Te kite anga i te kino kua tauturu ia Iesu kia riro mai ei Ariki e ei Taunga Maata meitaki tikai
[Tutu i te kapi 31]
Kua ‘rekareka te au apotetoro i manakoiaʼi ratou e e tau ia ratou taua takinga-kino ra’ no to ratou akarongo