Wi kan kisi wini te wi e horidoro, aladi wi e pina
Wi kan kisi wini te wi e horidoro, aladi wi e pina
„Wi e taki dati den sma di horidoro, na koloku sma.”—YAKOBUS 5:11.
1, 2. Sortu buweisi de taki Yehovah no ben wani libisma fu pina?
NOWAN libisma wani pina, èn wi Mekiman, Yehovah Gado, no wani tu taki libisma e pina. Wi kan si dati te wi e leisi na ini en Wortu san ben pasa baka di a meki a fosi man nanga uma. Na a fosi presi Gado meki a man. „Yehovah Gado teki doti fu a gron èn a meki a man. Ne a bro libi na ini en noso-olo, so taki a man tron wan libisani” (Genesis 2:7). Adam ben abi wan volmaakti skin nanga wan volmaakti frustan, a no ben abi fu kon siki èn a no ben abi fu dede.
2 Fa a libi fu Adam ben de? „Yehovah Gado seti wan dyari na ini Eden, na a owstusei, èn drape a poti a man di a ben meki. Na so fasi Yehovah Gado meki ala sortu bon gro komoto na ini a gron. Den bon ben moi fu si èn den ben e gi froktu di ben bun fu nyan” (Genesis 2:8, 9). Iya, Adam ben abi wan tumusi moi tanpresi. A no ben e pina na ini Eden.
3. Fa a libi ben o de gi Adam nanga Eva?
3 Genesis 2:18 e taki: „Yehovah Gado taki: ’A no bun taki a man tan en wawan. Mi o meki wan yepiman gi en, leki wan patna di fiti en.’” Yehovah meki wan volmaakti wefi gi Adam, so taki a ben kan abi wan koloku osofamiri libi (Genesis 2:21-23). Bijbel e taki moro fara: „Gado blesi den, dan a taigi den: ’Meki pikin èn kon furu, teleki unu kon lai na grontapu, èn poti grontapu na un ondro’” (Genesis 1:28). A fosi man nanga uma ben o abi a tumusi moi grani fu meki a Paradijs na ini Eden kon moro bigi, teleki heri grontapu ben tron wan paradijs. Èn den ben o kisi pikin di ben de koloku, èn di no ben o pina. A libi ben switi trutru na ini a bigin!—Genesis 1:31.
Sma e bigin pina
4. Te wi e luku fa sani waka na ini den hondrohondro yari di pasa, dan san libisma ondrofeni?
4 Ma te wi e luku fa sani waka gi libisma na ini den hondrohondro yari di pasa, dan dati e sori wi krin taki wan sani no go bun kwetikweti. Furu takru sani pasa, èn a libisma famiri pina srefisrefi. Na ini a heri pisi ten dati, ala den bakapikin fu Adam nanga Eva kon siki, den kon owru, èn den e dede te fu kaba. Nownowde grontapu no de wan paradijs kwetikweti, èn sma no de koloku. Romesma 8:22 e sori krin fa a situwâsi de now. A tekst e taki: „Ala den sani di Gado meki, e tan geme èn te now ete den alamala abi pen.”
5. Fa Adam nanga Eva tyari pina kon gi a libisma famiri?
5 A no Yehovah meki taki so furu libisma pina na ini den hondrohondro yari di pasa (2 Samuel 22:31). Na a wan sei, na libisma srefi tyari a pina disi kon na den tapu. „Den du furu ogri, den no handri bun kwetikweti” (Psalm 14:1). Adam nanga Eva ben kisi ala den sani di ben de fanowdu fu man abi wan koloku libi. A wan-enkri sani di den ben musu du fu tan koloku, na taki den ben musu gi yesi na Gado. Ma Adam nanga Eva bosroiti fu libi sondro a tiri fu Yehovah. Fu di den drai baka gi Yehovah, meki den no ben de volmaakti moro. Den kon owru, èn te fu kaba den dede. Na so wi leki bakapikin fu den kisi sondu.—Genesis 3:17-19; Romesma 5:12.
6. Fa Satan meki tu taki libisma e pina?
6 Wan tra sma di meki tu taki libisma e pina, na a yeye di kon tron Satan Didibri. A ben kisi a reti fu teki en eigi bosroiti. Ma a fasi fa a gebroiki a reti dati no ben bun, fu di a ben wani taki sma ben musu anbegi en. Fu taki en leti, wi no musu anbegi den sani di Yehovah meki, ma wi musu anbegi En wawan. Na Satan meki taki Adam nanga Eva trangayesi Yehovah, fu di a taigi den taki den ben ’o de leki Gado, iya, den ben o sabi san na bun èn san na ogri’.—Genesis 3:5.
Yehovah wawan abi a reti fu tiri
7. San na opo di sma opo densrefi teige Yehovah, tyari kon na krin?
7 Den ogri di pasa baka di Adam, Eva, nanga Satan opo densrefi teige a Moro Hei Tiriman, e sori taki Yehovah wawan abi a reti fu tiri, èn taki en wawan e tiri na wan regtfardiki fasi. A fasi fa sani waka na ini den dusundusun yari di pasa, e sori taki Satan, „a tiriman fu a grontapu disi”, no tiri grontapu na wan regtfardiki fasi, ma na wan ogri-ati fasi di no tyari wini kon gi libisma kwetikweti (Yohanes 12:31). Fu di grontapu de na ondro a makti fu Satan, meki libisma tiri grontapu na wan ogri-ati fasi wan langa pisi ten. A sani disi tyari kon na krin tu taki libisma no man tiri na wan regtfardiki fasi (Yeremia 10:23). Sobun, iniwan tirimakti di no de fu Yehovah, sa tyari takru bakapisi kon gi libisma. Den sani di miti libisma na ini ala den yari di pasa, e sori taki a sani disi tru.
8. San Yehovah o du nanga ala den libisma tirimakti, èn fa a o du dati?
8 Now di Yehovah gi pasi taki libisma tiri densrefi dusundusun yari langa, dan a abi leti fu tyari wan kaba kon na ala den tirimakti fu grontapu, èn fu poti a tirimakti fu en na ini a presi fu den. Disi na san wan profeititori e taki fu a tori: „Na ini den dei fu den kownu dati [libisma tirimakti], a Gado fu hemel sa opo wan kownukondre [a hemel tirimakti fu en di abi Krestes leki kownu] di noiti no sa kisi pori. . . . A sa broko ala den kownukondre disi na pisipisi èn a sa tyari wan kaba kon na den, èn ensrefi sa tan te ten di no skotu” (Danièl 2:44). Ogri yeye nanga libisma no sa tiri moro, ma a hemel Kownukondre fu Gado wawan sa de, èn a o tiri grontapu. Krestes o tiri leki Kownu, èn 144.000 getrow libisma di Gado teki puru fu grontapu o tiri makandra nanga en.—Openbaring 14:1.
Wi kan kisi wini fu a pina di wi e pina
9, 10. Sortu wini Yesus kisi fu a pina di a pina?
9 A bun fu luku efu den wan di o tiri na ini a hemel Kownukondre, bun nofo fu du a wroko dati. Na a fosi presi, Krestes Yesus sori taki a bun nofo fu tiri leki Kownu. Na ini den someni dusun yari di a ben de makandra nanga Yehovah na ini hemel, a du a wani fu en Tata leki En „tumusi bun wrokoman” (Odo 8:22-31). Di Yehovah ben wani seni en kon na grontapu, dan Yesus ben de klariklari fu go. Di a ben de na grontapu, dan a moro prenspari wroko di a du, na taki a fruteri sma fu a reti di Yehovah abi fu tiri hemel nanga grontapu, èn a fruteri den tu fu a Kownukondre. Yesus ben de wan tumusi bun eksempre gi wi alamala, fu di a gi yesi na Yehovah ala ten.—Mateyus 4:17; 6:9.
10 Sma frufolgu Yesus, èn te fu kaba den kiri en. Di a ben e du a diniwroko fu en, dan a si fa sma ben e pina. A tyari wini kon gi en di a si fa sma ben e pina, èn di en srefi pina? Iya. Hebrewsma 5:8 e taki: „Aladi a ben de [Gado] Manpikin, toku den pina di miti en, ben leri en fu gi yesi.” Den sani di miti Yesus di a ben de na grontapu yepi en fu kon frustan moro bun fa libisma e firi, èn a ben abi sari-ati nanga den. En srefi ondrofeni den sani di libisma ondrofeni. A ben e firi gi den sma di ben e pina, èn a kon frustan moro bun fu san ede Gado ben o gebroiki en fu frulusu den. Luku fa na apostel Paulus e poti prakseri na a tori disi na ini a buku Hebrewsma: „A ben musu kon de leki den ’brada’ fu en na ala fasi, so taki a ben kan tron wan granpriester di abi sari-ati èn di de getrow na ini a diniwroko fu Gado. Na so fasi a ben kan tyari wan ofrandi di e tapu den sondu fu a pipel èn di e meki den kon bun baka nanga Gado. Bika fu di ensrefi nyan pina di a ben e kisi tesi, meki a man kon yepi den sma di e kisi tesi.” „Wi no abi wan granpriester di no man frustan den swakifasi fu wi, ma wi abi wan granpriester di kisi tesi na ala fasi neleki wi, ma en no ben abi sondu. Fu dati ede, meki wi go na fesi a kownusturu fu Gado di e sori wi no-frudini bun-ati, èn meki wi taki nanga en sondro fu frede, so taki a kan abi sari-ati nanga wi èn a kan sori wi no-frudini bun-ati fu yepi wi na a yoisti ten.”—Hebrewsma 2:17, 18; 4:14-16; Mateyus 9:36; 11:28-30.
11. Fa den sani di miti den wan di o tron kownu nanga priester e yepi den fu tron bun tiriman?
11 Na so a de tu nanga den 144.000 sma di Gado „bai puru” fu grontapu fu tiri makandra nanga Krestes Yesus na ini a hemel Kownukondre (Openbaring 14:4). Den alamala gebore leki libisma na grontapu, den kweki na ini wan grontapu pe furu sma e pina, èn den pina tu. Furu fu den kisi frufolgu, èn sma kiri wan tu fu den fu di den tan getrow na Yehovah èn fu di den ben de bakaman fu Yesus. Ma den ’no ben e syen fu fruteri sma fu wi Masra, èn den ben nyan pina tu gi a bun nyunsu’ (2 Timoteyus 1:8). Fu di ala den sani disi miti den na grontapu, meki den doro den markitiki fu krutu a libisma famiri komoto fu hemel. Den leri fu firi gi trawan, fu sori switifasi, èn fu de klariklari fu yepi sma.—Openbaring 5:10; 14:2-5; 20:6.
Den wan di o libi na grontapu o de koloku
12, 13. Fa sma di abi a howpu fu libi na grontapu kan kisi wini fu a pina di den e pina?
12 Soleki fa wi si, dan wi kan libi fu têgo na ini a paradijs grontapu pe siki, sari, nanga dede no sa de moro. Ma a de so taki a pina di wi e pina nownowde kan tyari wini kon gi wi? Nowan sma wani pina, fu di a sani dati e tyari sari nanga bruya kon. Ma te wi e horidoro aladi wi e pina, dan wi kan tron moro bun sma, èn wi sa de koloku.
13 Luku san Gado Wortu e taki fu a tori disi: „Srefi efu unu ben sa musu pina fu di unu e du san de regtfardiki, toku unu sa de koloku.” „Efu sma e kosi unu fu Krestes nen ede, dan unu de koloku” (1 Petrus 3:14; 4:14). „Koloku fu unu te sma e gi unu porinen èn te den e frufolgu unu, aladi den e lei èn e taki ala sortu ogri fu unu, fu mi ede. Un musu breiti èn prisiri pasa marki, fu di unu o kisi wan bigi pai na hemel” (Mateyus 5:11, 12). „Koloku fu a sma di e tan horidoro te tesi e miti en, bika te Yehovah feni en bun, dan a o pai en nanga libi.”—Yakobus 1:12.
14. Fu san ede den anbegiman fu Yehovah e firi koloku aladi den e pina?
14 A no fu di wi e pina meki wi de koloku. Wi de koloku fu di wi sabi taki wi e du a wani fu Yehovah, èn taki wi e teki na eksempre fu Yesus. Fu eksempre, na ini a fosi yarihondro, sma ben poti wan tu fu den apostel na strafu-oso. Bakaten, den tyari den go na a Hei Krutubangi fu den Dyu, èn a krutubangi disi gi den strafu fu di den ben e fruteri sma fu Yesus Krestes. Baka di sma wipi den, dan den seni den gowe. Fa den apostel ben feni a sani disi? Bijbel e taki dati den „gowe libi a Sanhedrin èn den ben e prisiri fu di den ben warti nofo fu kisi syen fu Yesus nen ede” (Tori fu den Apostel 5:17-41). Den no ben breiti taki den kisi fonfon èn taki den ben abi skin-ati. Den ben de koloku fu di den ben sabi taki den sani disi ben miti den fu di den tan getrow na Yehovah èn fu di den teki na eksempre fu Yesus.—Tori fu den Apostel 16:25; 2 Korentesma 12:10; 1 Petrus 4:13.
15. Fa den tesi di wi e kisi now kan yepi wi na ini a ten di e kon?
15 Te wi e tan abi a yoisti denki aladi sma e gens wi èn e frufolgu wi, dan dati kan yepi wi fu horidoro. Disi sa yepi wi fu pasa tra tesi di wi o kisi na ini a ten di e kon. Bijbel e taki: „Un musu prisiri srefisrefi, mi brada, te difrenti tesi e miti unu, fu di unu sabi taki a bribi fu unu di kisi tesi na a fasi disi, e meki taki unu man horidoro” (Yakobus 1:2, 3). Romesma 5:3-5 e taki tu: „Meki wi prisiri tu te banawtu e miti wi, bika wi sabi taki te banawtu e miti wi, dan dati o leri wi fa fu horidoro; te wi e horidoro, dan Gado o feni wi bun; te Gado feni wi bun, dan wi sa abi howpu; a howpu dati no sa meki wi kisi syen.” Sobun, o moro wi e kisi tesi fu di wi na Kresten, o moro wi sa man horidoro te tra tesi sa miti wi na ini na ogri sistema disi.
Yehovah sa blesi den wan di e pina
16. Fa Yehovah sa blesi den wan di o tron kownu nanga priester?
16 Wi kan lasi den gudu fu wi te sma e gens wi noso te den e frufolgu wi fu di wi na Kresten. Toku wi kan de koloku fu di wi sabi taki Yehovah sa blesi wi bogobogo. Fu eksempre, disi na san na apostel Paulus ben skrifi gi wan tu fu den sma di ben abi a howpu fu go na hemel: „Unu ben e prisiri awansi sma ben e fufuru den sani fu unu, fu di unu sabi taki unu abi wan moro betre gudu di e tan fu ala ten” (Hebrewsma 10:34). Èn prakseri fa den sa prisiri te den sa meki den libisma na ini a nyun grontapu kisi tumusi moi blesi, èn den sa du dati makandra nanga Yehovah nanga Krestes. Na apostel Paulus ben abi leti di a skrifi den getrow Kresten: „Mi denki taki a fasi fa wi e pina nownowde, na wan pikin sani te wi teki en gersi nanga a glori di o de fu si na ini wi.”—Romesma 8:18.
17. San Yehovah sa du gi den getrow futuboi fu en di abi a howpu fu libi na grontapu?
17 Na so a sa de tu gi den wan di abi a howpu fu libi na grontapu. Awinsi san den e lasi noso awinsi san den e libi na baka fu di den e dini Yehovah, toku A sa blesi den bogobogo na ini a ten di e kon. A sa gi den têgo libi leki volmaakti sma na ini wan paradijs grontapu. Na ini a nyun grontapu dati, Yehovah „o figi ala watra puru na den ai, èn dede no sa de moro; nowan sari, noso krei, noso pen no sa de moro” (Openbaring 21:4). Dati na wan tumusi moi pramisi! Nowan sani di wi e libi na baka, èn nowan sani di wi e lasi fu di wi e dini Yehovah, warti leki a tumusi moi libi di Yehovah o gi den getrow futuboi fu en di e horidoro.
18. Sortu moi sani Yehovah pramisi wi soleki fa wi kan leisi na ini a Wortu fu en?
18 Awinsi sortu tesi wi sa kisi na ini a ten di e kon, toku dati no sa tapu wi fu kisi têgo libi na ini a nyun grontapu fu Gado. Den tumusi moi blesi di wi sa kisi na ini a nyun grontapu sa meki wi frigiti ala den tesi dati. Yesaya 65:17, 18 e taki: „Sma no sa memre den sani fu fositen moro, èn den no sa kon na ini na ati tu. Ma un pipel, un musu breiti srefisrefi èn un musu prisiri fu têgo nanga den sani di mi e meki.” Fu dati ede, a ben fiti taki Yakobus, Yesus en afu brada, ben taki: „Wi e taki dati den sma di horidoro, na koloku sma” (Yakobus 5:11). Iya, te wi e horidoro na wan getrow fasi aladi wi e kisi tesi, dan wi sa kisi wini nownow kaba èn na ini a ten di e kon.
San yu ben sa piki?
• Fa a du kon taki libisma e pina?
• Sortu wini den wan di o tron tiriman èn den wan di o libi na grontapu, kan kisi fu a pina di den e pina?
• Fu san ede wi kan de koloku nownow kaba, awinsi wi e pina?
[Aksi fu a tori disi]
[Prenki na tapu bladzijde 27]
Adam nanga Eva ben o abi wan tumusi moi libi
[Prenki na tapu bladzijde 29]
Yesus si fa sma pina, èn dati yepi en fu tron wan bun Kownu èn wan bun Granpriester
[Prenki na tapu bladzijde 31]
Den apostel „ben e prisiri fu di den ben warti nofo fu kisi syen fu Yesus nen ede”