?“Oltesteman” i Stret Yet Long Taem Blong Yumi?

LONG 1786, wan dokta blong Franis i raetem wan buk, nem blong hem Traité d’anatomie et de physiologie (Stadi Long Saed Blong Ol Haf Blong Bodi Mo Olsem Wanem Oli Wok). Ol man oli talem se save long buk ya long saed blong ol nev * i stret moa i bitim ol narafala buk long taem blong hem, mo i no longtaem i pas, oli salem wan kopi blong buk ya we praes blong hem i bitim 27 taosen dola from we i no moa gat plante kopi blong hem. Nating se ol man oli tinghae long buk ya, i no gat plante sikman tede we bambae oli trastem wan dokta we i dipen long save blong buk ya, we i blong plante handred yia bifo finis. Histri mo ol save we i stap long buk ya oli bin givhan long ol man bifo, be oli no moa stret blong halpem wan sikman tede.

Plante man oli gat sem tingting long saed blong Oltesteman. Oli tinghae long histri blong ol man Isrel mo oli laekem ol naesfala toktok we i stap long hem. Be, from we oli raetem Baebol 2,400 yia bifo finis, plante man oli ting se advaes blong hem i no stret long yumi tede. Tede, save we yumi gat long saed blong saens, bisnes, mo famle laef oli defren olgeta long taem ya we oli bin raetem Baebol. Man ya Philip Yancey, we bifo i stap raetem niuspepa ya Christianity Today, i raetem long buk blong hem, The Bible Jesus Read i se: “I had tumas blong kasem save long sam haf blong hem, mo ol haf we yumi kasem save long olgeta, plante taem ol man tede oli no laekem olgeta. From samting ya mo sam narafala risen bakegen, ol man oli no ridim Oltesteman, hemia 75 pesen blong Baebol.” Hemia i no wan niufala tingting.

Aposol Jon i ded samples long yia 100. Fifti yia i no pas yet afta long ded blong hem, wan yangfala rijman, nem blong hem Marcion, i tijim se ol Kristin oli mas sakemaot Oltesteman. Wan man Inglan we i stadi long histri, Robin Lane Fox, i talem se Marcion i tijim se “ ‘God’ ya long Oltesteman i wan ‘man bus stret,’ hem i laekem ol man we oli brekem loa mo ol teroris olsem King Deved blong Isrel. Be Kraes i defren olgeta, hem i wan niufala God we i antap olgeta.” Fox i raetem se ol man we oli folem bilif ya “oli statem skul blong ‘Marcion,’ mo go kasem ol yia 300, plante man oli joen long skul ya, antap moa ol man blong Is we oli toktok lanwis Syriak.” Sam man tede oli gohed blong folem ol bilif ya. Taswe, bitim 1,600 yia biaen, Philip Yancey i raetem se ol “save we ol Kristin oli gat long Oltesteman i stap godaon mo naoia klosap ol man oli no save hem nating.”

?Niutesteman i tekem ples blong Oltesteman? ?Olsem wanem blong kasem save se God ya “we i gat olgeta paoa,” we Oltesteman i tokbaot, i sem mak long God ya “we i lavem ol man tumas, mo i stap givim pis oltaem” we Niutesteman i tokbaot? (Aesea 13:13; 2 Korin 13:11) ?Oltesteman i save givhan long yu tede?

[Futnot]