E “Tèstamènt Bieu” Tin Nifikashon pa Nos Awe?

NA 1786 un médiko franses a publiká un buki ku e título Traité d’anatomie et de physiologie (Un Análisis di Anatomia i Fisiologia). E ta ser konsiderá e obra neuro-anatómiko di mas eksakto di su tempu, i un di e poko ehemplarnan ku ta eksistí ainda a ser bendé resientemente pa mas ku 27.000 dòler! No opstante, masha poko pashènt awe lo konfia un siruhano ku ta dependé riba e investigashon médiko ku e buki ei, di mas ku dos siglo bieu, ta kontené. E balor históriko i literario di un buki asina no ta yuda un hende ku aworakí ta malu.

Hopi hende ta pensa meskos di e asina yamá Tèstamènt Bieu. Nan ta duna balor na su relato tokante e historia di Israel i ta atmirá su bunita lenguahe poétiko. Pero nan no ta haña ta rasonabel pa sigui un guia ku ta mas ku 2.400 aña bieu. Konosementu sientífiko, komersio i asta bida di famia ta masha diferente awe for di loke nan tabata tempu ku a skirbi Beibel. Philip Yancey, eks-redaktor di Christianity Today, ta skirbi den su buki The Bible Jesus Read (E Beibel Ku Hesus A Lesa): “No ta tur ora bo ta komprond’é; i te na ora bo komprondé algun parti di dje, e ta ofensivo pa e oreanan djawe. P’e motibu aki i tambe otronan, hopi hende no ta lesa e Tèstamènt Bieu, ku ta forma tres kuarta parti di Beibel.” E pensamentu ei no ta nada nobo.

Ménos ku 50 aña despues di apòstel Juan su morto rònt di aña 100 di nos era, un yònkuman riku ku tabata yama Marcion a deklará públikamente ku kristiannan mester rechasá e Tèstamènt Bieu. Segun e historiadó ingles Robin Lane Fox, Marcion a bisa ku e “‘Dios’ di Tèstamènt Bieu tabata un ‘salbahe’ ku a faboresé bandidu- i teroristanan manera Rei David di Israel. Di otro banda, Kristu tabata e revelashon nobo i apart di un Dios kompletamente diferente for di esun di e Tèstamènt Bieu.” Fox a skirbi ku e kreensianan aki “a bira ‘marcionismo’ i pa gran parti di siglo 4 a sigui atraé siguidónan, foral e hendenan di abla sirio den oriente.” Te ainda tin hende ta pega n’e kreensianan aki. Komo resultado, mas ku 1.600 aña despues, Philip Yancey a skirbi: “Konosementu di e Tèstamènt Bieu ta disparsiendo rápidamente entre kristiannan i práktikamente a pèrdè den sosiedat moderno.”

E Tèstamènt Bieu a ser remplasá? Kon nos por sa ku e “SEÑOR di ehérsitonan” den e Tèstamènt Bieu ta e mesun “Dios di amor i di pas” den e Tèstamènt Nobo? (Isaias 13:13; 2 Korintionan 13:11) Bo por saka algun benefisio awe for di e Tèstamènt Bieu?