Magin Listo sa Kahalagahan nin Komendasyon

MAY nadangog na daw kamong siisay man na nagreklamo na kadikiton sanang komendasyon an itinatao sa saiya kan saiyang among? Kamo daw posibleng may arog man kaiyan na reklamo? O kun kamo sarong hoben, nasabi na daw nindo an arog kaiyan manongod sa saindong mga magurang o sa saindong mga maestra?

Posibleng totoo an nagkapira sa mga reklamong ini. Alagad oyon sa sarong Aleman na nagtatao nin pagsasanay paagi sa motibasyon, kun an mga empleyado may arog kaining reklamo, an orog na makolog sa saindang boot bako nanggad an kakulangan nin komendasyon kundi an kawaran nin personal na interes kan saindang among. Ano man an dahelan, malinaw na igwa nin kulang. An pagtao nin komendasyon asin pakamate nin personal na interes parehong mahalagang marhay tanganing magkaigwa kita nin nakakakontentong mga relasyon.

Kun dapit sa pagsamba, totoo man ini. An Kristianong kongregasyon kaipuhan na mamidbid na igwa nin espiritu na pagtao nin komendasyon, mainit na pakikiiba, asin pakamate nin personal na interes. An mga miembro kaiyan nagkakaigwa asin napapagdanay an siring na marahayon na kamugtakan paagi sa pagkuyog sa mga giya kan Biblia. Minsan siring, gurano man kamamomoton kan kongregasyon, pirmeng posible an pag-oswag. Nasa isip ini, helingon niato an tolong marahayon na halimbawa sa pagtao nin komendasyon: si Eliu na lingkod nin Dios na nabuhay bago kan mga Kristiano, si apostol Pablo, asin si Jesu-Cristo mismo.

Maboot Asin Magalang na Hatol

Si Eliu, na minalataw na harayong paryente ni Abraham, may importanteng kabtang sa pagtabang ki Job na magkaigwa nin timbang na pagmansay dapit sa relasyon kaini sa Dios. Si Eliu maboot asin magalang. Pasensioso niang hinalat an saiyang turno na magtaram. Asin mantang an naghihingakong mga katood ni Job hinanapan sana sia nin sala, si Eliu, apuera sa pagtao nin hatol, listong nagtao nin komendasyon ki Job huli sa tanos na pamumuhay kaini. Ginibo nia iyan na may kapadangatan asin malinaw na may pakamate nin personal na interes bilang katood, na ginagamit an ngaran ni Job, bakong arog kan iba. Magalang siang nakiolay: “O Job, tabi dangoga an sakong mga tataramon, asin sa gabos kong pagtaram maghinanyog ka.” Magalang na nakikidamay ki Job, inadmitir nia: “Uya! Ako kapareho mo man sana sa atubangan kan tunay na Dios; gikan sa kabokabo ako pinorma, ako man.” Dangan sa pagtao nin komendasyon, sinabi nia: “Kun igwang ano man na tataramon na ikakasabi, simbagon mo ako; magtaram ka, huli ta naogma akong marhay sa saimong katanosan.”—Job 33:1, 6, 32.

An maboot asin magalang na pagtratar sa iba masasabing sarong paagi nin pagtao nin komendasyon sa sainda. Garo man sana sinasabi niato sa naghihinanyog sa sato, ‘Ibinibilang taka na maninigo sa sakong atension asin maninigo kang trataron nin marahay.’ Sa siring ipinapahayag niato an pakamate nin kapadangatan asin ipinapaheling an satong personal na interes sa saiya.

An pagigin magalang labi pa sa pagsunod sana sa mga susundon dapit sa marahay na ugale.  Tanganing maabot an puso nin iba, an satong kabootan asin pagigin magalang dapat na sinsero asin gikan sa puso. Iyan dapat na kapahayagan nin tunay na interes asin pagkamoot.

Mataktikang Pagtao nin Komendasyon

Ipinaheling ni apostol Pablo kun gurano kaepektibo kan pagigin mataktika sa pagtao nin komendasyon sa iba. Halimbawa, mantang naghuhulit sa Atenas durante kan saiyang ikaduwang pagbiahe sa pagmimisyonero, idinepensa nia an Kristianismo kan kaolay nia an nagkapirang Griegong pilosopo. Mangnohon kun paano nia mataktikang ginibo an depisil na asignasyon na ini. “May mga pilosopong Epicureo sagkod Estoico na nagpoon na makidiskusyon sa saiya, asin an nagkapira nagsasabi: ‘Ano an boot sabihon kan matabil na ini?’ An iba man: ‘Garo sia parahayag nin dayohan na mga dios.’” (Gibo 17:18) Sa ibong kan siring na mga komento, nagdanay si Pablo na kalmado asin nagsimbag: “Mga lalaki nin Atenas, namamasdan ko na sa gabos na bagay garo kamo orog na natatakot sa mga dios kisa sa iba.” Imbes na kondenaron an pagsamba ninda sa idolo, tinawan sinda ni Pablo nin komendasyon huli sa pagigin deboto ninda sa relihion.—Gibo 17:22.

Si Pablo daw nagsasaginsagin kaidto? Dai nanggad. Aram nia na bako niang katongdan na husgaran an mga naghihinanyog sa saiya; aram niang marhay na sia mismo dating daing aram dapit sa katotoohan. An sugo sa saiya iyo na ipresentar an mensahe nin Dios, bako na husgaran an iba. Aram nia basado sa saiyang eksperyensia na totoo an nanompongan kan dakol sa Mga Saksi ni Jehova ngonyan: An nagkapirang sinserong parasurog nin falsong relihion nagigin kabilang sa pinakamaigot na mga parasurog kan tunay na relihion pag-abot nin panahon.

Marahay an pamamaagi ni Pablo, asin nagbunga iyan nin marahayon na mga resulta. “An nagkapirang tawo uminiba sa saiya asin nagturubod, na saro man sa sainda si Dionisio, sarong hokom kan korte nin Areopago, asin an sarong babae na an ngaran Damaris, asin an iba pa apuera sa sainda.” (Gibo 17:34) Madonong nanggad si Pablo sa pagtao nin komendasyon sa mga taga Atenas huli sa sinsero nindang mga paniniwala—minsan ngani falso—imbes na kondenaron sinda huli sa kawaran ninda nin tamang kaaraman! An mga tawong ikinakalagalag nin salang impormasyon sa parate may marahay na puso.

Kan hagadon ki Pablo na gumibo nin pagdepensa sa atubangan ni Herodes Agripa II, naggamit man si Pablo nin mataktikang pamamaagi. Si Herodes midbid na may incestong relasyon sa saiyang tugang na si Berenice, sarong bagay na malinaw na kinokondenar kan Tataramon nin Dios. Minsan siring, si Pablo mayo nin sinabing mga tataramon nin pagkondenar. Imbes, nakanompong sia nin rasonableng basehan na tawan nin komendasyon si Herodes. “Mapadapit sa gabos na bagay na inaakusar sa sako kan mga Judio, Hadeng Agripa, ibinibilang kong maogma an sakong sadiri na sa atubangan mo ako magdedepensa sa aldaw na ini, orog na ta ika eksperto sa gabos na kostumbre saka mga kontrobersia sa tahaw nin mga Judio.”—Gibo 26:1-3.

Madonong nanggad kun gagamiton man niato an kaagid na mataktikang pamamaagi sa pagtratar sa iba! An pagtao nin komendasyon sa sarong kataed, kapwa estudyante, o katrabaho puedeng magpaoswag nin matoninong na mga relasyon asin magresulta sa marahay na gawe-gawe. Kun aaboton an puso paagi sa pagtao nin angay nanggad na komendasyon, kun beses puede niatong mamotibar an sinserong mga indibiduwal na salidahan an saindang falsong mga pangangatanosan asin gawe-gawe tanganing iyan magin kaoyon nin tamang kaaraman.

An Sangkap na Halimbawa ni Jesus sa Pagtao nin Komendasyon

Nagtao si Jesus nin komendasyon. Halimbawa, pakatapos kan saiyang pagkabuhay liwat asin pagsakat sa langit, si Jesus, sa paggiya nin Dios, nagtao nin mensahe sa pitong kongregasyon sa Asia Minor paagi ki apostol Juan. Pirme niang tinatawan nin komendasyon an mga maninigong tawan kaiyan. Sa mga kongregasyon sa Efeso, Pergamo, asin Tiatira, ginamit nia an mga pananaram na siring kan: “Aram ko an saimong mga gibo, asin an saimong pagpapagal saka pakatagal, asin na dai mo natitios an maraot na mga tawo”; “padagos kang nangangapot nin higot sa sakong ngaran, asin dai mo pinagnegaran an saimong pagtubod sa sako”; asin “aram ko an saimong mga gibo, asin an saimong pagkamoot asin pagtubod asin ministeryo patin pakatagal, asin na an mga gibo mo kaining huri orog kisa mga naenot.” Dawa sa Sardis, na duman an kongregasyon nangaipo nin makosog na hatol, tinawan ni Jesus  nin atension an mga indibiduwal na maninigong tawan nin komendasyon, na sinasabi: “Minsan siring, igwa ka nin nagkapirang ngaran sa Sardis na dai dinigtaan an saindang pang-ibabaw na mga gubing, asin sinda malakaw na kaibanan ko na nakaputi, huli ta sinda maninigo.” (Kapahayagan 2:2, 13,19; 3:4) Marahayon nanggad na halimbawa an itinao ni Jesus!

Bilang pag-arog ki Jesus, maninigo na nungka niatong pagkondenaron an sarong bilog na grupo huli sa pagkukulang nin pira sana o nungka kitang magtao nin kaipuhan na hatol na dai man nagtatao nin angay na komendasyon. Minsan siring, marahay na isaisip na kun nagtatao kita nin komendasyon huli sana ta nagpaplano kitang magtao nin hatol, kun beses an satong komendasyon tibaad dai intindihon. Magin buka an palad sa pagtao nin komendasyon basta posible iyan! Sa siring, kun kaipuhan an hatol sa ibang panahon, iyan mas madaling aakoon.

Kamagurangan na Nagtatao nin Angay na Komendasyon

Nagigirumdoman ni Cornelia, sarong Kristianang naglilingkod na ngonyan sa sarong sangang opisina kan Mga Saksi ni Jehova sa Europa, na durante kan enot na mga taon kan dekada nin 1970, kinumusta kan nagsongko na nagbibiaheng paraataman an saiyang personal na pag-adal asin pagbasa nin mga magasin. “Medyo nasupog ako,” an sabi nia. Alagad inadmitir nia na dai nia nababasa an gabos na artikulo sa magasin. “Imbes na hanapan ako nin sala huli kaini,” an nagigirumdoman nia, “tinawan nia ako nin komendasyon huli sa paghihingoa ko na magbasa. Naparigon akong marhay huli sa saiyang komendasyon kaya poon kaidto, nagin determinado akong basahon an gabos na artikulo.”

Nagigirumdoman ni Ray, na naglilingkod sa sarong sangang opisina sa Europa, an saiyang enot na  aldaw nin paglilingkod bilang payunir. An nangengenot na paraataman sa kongregasyon, na may trabaho asin mga obligasyon sa pamilya saka dakol na paninimbagan sa kongregasyon, naglaog sa Kingdom Hall kan bangging iyan asin duminiretso ki Ray asin naghapot, “Kumusta an saimong enot na aldaw nin paglilingkod bilang payunir?” Ngonyan, pakalihis nin haros 60 taon, nagigirumdoman pa man giraray ni Ray an pagkamaginirumdom kan magurang na iyan sa kongregasyon.

Arog kan ipinapaheling kan duwang eksperyensiang iyan, an sinsero asin mamomoton na kapahayagan nin pag-apresyar sa nagibo nin iba—bako sanang dai inisip na mga tataramon o daing kahulogan na pambobola—puedeng magin kapakipakinabang na marhay. Sa Kristianong kongregasyon, kadakol kita nin dahelan na tawan nin komendasyon an satong mga kapagtubod. Isip-isipa na sana an saindang pagmawot na maglingkod ki Jehova, an saindang mga komento na inandam na marhay, an saindang pag-oswag na mapangganahan an takot sa atubangan nin mga tawo tanganing magpahayag o magpartisipar sa mga kabtang sa pagtiripon, an saindang kaigotan sa paghuhulit asin pagtotokdo, asin an saindang paghihingoa na enoton an intereses kan Kahadean saka espirituwal na mga pasohan. Kun nagtatao kita nin komendasyon sa iba, nag-aako kita nin nagsosopay na bendisyon. Iyan nagpapaogma sa sato asin nagtatabang sa sato na mansayon nin positibo an mga bagay-bagay.—Gibo 20:35.

Maninigong tawan kan kamagurangan nin komendasyon an kongregasyon huli sa marahay na gibo kaiyan. Asin kun kaipuhan an hatol, itinatao ninda iyan sa mamomoton na paagi. Sa ibong na lado, linilikayan ninda na mag-asa na magigibo sa sangkap na paagi an gabos na bagay, na ibinibilang na grabeng kaluyahan an ano man na pagkabakong sangkap.

An Kristianong kamagurangan na inaarog an halimbawa kan magalang asin mamomoton na kabootan na ipinaheling ni Eliu, an mataktikang pamamaagi na ginamit ni Pablo, asin an mamomoton na pagmakolog na ipinaheling ni Jesus magigin ginigikanan nin tunay na pagparigon sa boot sa saindang mga tugang. An komendasyon magpaparigon sa iba na magin mas marahay na mga Kristiano asin maresulta sa magayagaya saka may pagkaoroyon na mga relasyon. Sierto nanggad na naggayagaya si Jesus sa saiyang bautismo kan madangog an saiyang langitnon na Ama na nagtatao sa saiya nin komendasyon paagi sa mga tataramon na: “Ika an sakong Aki, an namomotan; inoyonan taka”! (Marcos 1:11) Logod na pagayagayahon niato an puso kan satong mga tugang paagi sa satong sinsero asin makahulogan na mga tataramon nin komendasyon.

[Mga Ritrato sa pahina 15]

Kun paanong an mataktikang pamamaagi nagbunga nin marahayon na mga resulta para ki Pablo, iyo man para sa sato

[Ritrato sa pahina 16]

An mamomoton asin sinserong komendasyon puedeng magin kapakipakinabang na marhay