Magmaalisto sa Paghatag ug Komendasyon

NAKADUNGOG ka na ba sukad ug usa ka tawo nga nagreklamo kay wala siya dayega sa iyang amo? Ingon ba usab niana ang imong reklamo? O kon ikaw usa ka batan-on, diha bay higayon nga ikaw mireklamo tungod kay wala ka dayega sa imong mga ginikanan ug mga magtutudlo?

Lagmit nga makataronganon ang pipila sa maong mga reklamo. Apan ang usa ka Aleman nga magtatambag nag-ingon nga ang kakulang sa komendasyon dili mao ang pangunang hinungdan kon nganong moreklamo ang mga empleyado kondili ang kawalay interes sa ilang amo ngadto kanila. Bisan unsa pay rason sa ilang pagreklamo, tataw nga aduna gayoy problema. Ang paghatag ug komendasyon ug pagpakitag personal nga interes parehong hinungdanon aron atong matagamtam ang malipayong relasyon sa uban.

Tinuod usab kini kon bahin sa pagsimba. Diha sa Kristohanong kongregasyon, gikinahanglan ang komendasyon, mainit nga pagtagad, ug pagpakitag personal nga interes. Ang matag usa diha sa kongregasyon makahimo niana pinaagi sa pagsunod sa mga giya sa Bibliya. Apan bisag mahigugmaon kaayo ang mga igsoon sa atong kongregasyon, mahimo pa kining pauswagon. Atong hinumdoman kini samtang atong tagdon ang tulo ka maayong sulondan sa paghatag ug komendasyon: si Elihu nga alagad sa Diyos sa wala pa ang Kristohanong panahon, si apostol Pablo, ug si Jesu-Kristo mismo.

Matinahorong Paagi sa Pagtambag

Si Elihu, nga lagmit layo nga paryente ni Abraham, dakog nahimo sa pagtabang kang Job nga makabaton ug timbang nga panglantaw sa iyang relasyon sa Diyos. Si Elihu matinahoron. Siya mapailobong naghulat sa iyang turno sa pagsulti. Si Elihu dili sama sa mini nga mga higala ni Job nga sayop ray gibantayan kay gawas sa paghatag ug tambag kang Job, siya nagdayeg usab kaniya tungod sa iyang pagsubay sa matarong nga dalan. Si Elihu lahi sa uban tungod kay siya nagpakitag pagkamainiton ug personal nga interes kang Job isip higala, pinaagi sa paglitok mismo sa iyang ngalan. Siya matinahorong mihangyo: “Oh Job, palihog paminawa ang akong mga pulong, ug paminawa ang tanan kong isulti.” Sa matinahorong paagi, iyang gibutang ang iyang kaugalingon sa kahimtang ni Job, ug miingon: “Tan-awa! Ako sama ra kanimo alang sa matuod nga Diyos; gikan sa yutang-kulonon ako giumol, ako usab.” Agig komendasyon, siya miingon: “Kon anaay imong igsusulti, tubaga ako; sulti, kay gikahimut-an ko ang imong pagkamatarong.”—Job 33:1, 6, 32.

Ang matinahorong pagtratar sa uban maoy usa ka paagi sa paghatag ug komendasyon. Sama rag atong giingnan ang atong mamiminaw nga, ‘Gipabilhan ti ka ug angay kang tahoron.’ Nianang paagiha, kita nagpakitag pagkamainiton ug personal nga interes kaniya.

Ang pagkamatinahoron nagkinahanglan ug labaw pa kay sa pagsunod lamang sa mga lagda  sa maayong pamatasan. Aron matandog ang kasingkasing sa uban, kita kinahanglang sinsero sa atong pagpakitag pagtahod kanila. Kini kinahanglang tinukmod sa tinuod nga interes ug gugma.

Mataktikanhon nga Paghatag ug Komendasyon

Gipakita ni apostol Pablo ang kahinungdanon sa pagkamataktikanhon sa dihang maghatag ug komendasyon sa uban. Pananglitan, samtang nagsangyaw sa Atenas sa iyang ikaduhang misyonaryong panaw, iyang gidepensahan ang Kristiyanidad atubangan sa Gregong mga pilosopo. Matikdi kon sa unsang paagi napalampos niya kining malisod nga buluhaton sa mataktikanhong paagi. “Dihay pipila sa mga Epicureo ug ingon man sa mga pilosopong Estoiko nga nakiglantugi kaniya, ug ang pipila nanag-ingon: ‘Unsay buot isulti niini nga witwitan?’ Ang uban: ‘Siya daw usa ka magmamantala sa langyawng mga bathala.’” (Buhat 17:18) Bisan pa sa maong mga komento, si Pablo nagpabiling kalmado ug miingon: “Mga taga-Atenas, akong nakita nga sa tanang butang kamo daw mas mahadlokon sa mga bathala kay sa uban.” Inay hukman ang ilang idolatrosong pagsimba, gidayeg sila ni Pablo tungod sa ilang pagkadiyosnon.—Buhat 17:22.

Nagminaot ba si Pablo dinhi? Wala gayod. Wala siya moadto didto aron hukman ang mga tawo; siya mismo nahibalo nga kaniadto wala usab siyay alamag sa kamatuoran. Siya gipadala didto aron ipahayag ang mensahe sa Diyos, dili aron hukman ang mga tawo. Iyang nasinati ang naeksperyensiyahan sa mga Saksi ni Jehova karon: Ang pipila ka tawo nga masiboton sa bakak nga relihiyon sa ngadtongadto nahimong masiboton kaayo sa matuod nga relihiyon.

Epektibo ang pamaagi ni Pablo, ug kini maayog mga resulta. “Dihay pipila ka tawo nga miduyog kaniya ug nahimong mga magtutuo, apil kanila usab mao si Dionisio, usa ka maghuhukom sa korte sa Areopago, ug usa ka babayeng ginganlag Damaris, ug uban pa gawas kanila.” (Buhat 17:34) Maalamon gayod ang gihimo ni Pablo sa pagdayeg sa sinserong pagtuo sa mga taga-Atenas—bisag kini sayop—inay hukman sila tungod sa ilang kawalay tukmang kahibalo! Ang mga tawo nga nalimbongan sa bakak nga pagtulon-an sagad nga maayog kahimtang sa kasingkasing.

Sa dihang gipaatubang si Pablo kang Herodes Agripa II sa pagdepensa sa iyang kaugalingon, siya usab misulti nga mataktikanhon. Nabaniog nga giunay ni Herodes ang iyang igsoon nga si Bernice, usa ka relasyon nga gidili gayod sa Pulong sa Diyos. Bisan pa niana, wala siya sawaya ni Pablo. Hinunoa, si Pablo nakahunahunag maayong katarongan aron dayegon si Herodes. “Mahitungod sa tanang butang nga niini ako gisumbong sa mga Hudiyo, Haring Agripa, giisip ko ang akong kaugalingon nga malipayon nga sa imong atubangan himoon ko ang akong pagdepensa karong adlawa, ilabina nga ikaw nakasinati sa tanang kostumbre ingon man sa mga lantugi taliwala sa mga Hudiyo.”—Buhat 26:1-3.

Maalamon gayod nga magmataktikanhon usab kita sa dihang makiglabot sa uban! Ang pagdayeg sa silingan, sa klasmet, o sa kauban sa trabaho moresulta sa maayong relasyon ug motukmod sa uban sa pagpakitag kaayo. Kon atong matukbil ang kasingkasing pinaagi sa paghatag ug nahiangayng komendasyon, mahimong madasig nato ang sinserong mga tawo sa pagsalikway sa ilang sayop nga panghunahuna ug buhat ug sa pagsubay sa dalan nga nahiuyon sa tukmang kahibalo.

Hingpit nga Panig-ingnan ni Jesus sa Paghatag ug Komendasyon

Si Jesus naghatag ug komendasyon. Pananglitan, human mabanhaw ug mokayab sa langit, si Jesus misulti pinaagi kang apostol Juan ngadto sa pito ka kongregasyon sa Asia Minor ilalom sa pagtultol sa Diyos. Iya gayong gihatagag komendasyon kadtong takos niini. Ngadto sa mga kongregasyon sa Efeso, Pergamo, ug Tiatira, siya namulong: “Nahibalo ako sa imong mga buhat, ug sa imong kahago ug paglahutay, ug nga ikaw dili makaagwanta sa daotang mga tawo”; “ikaw padayong nangupot pag-ayo sa akong ngalan, ug wala mo ilimod ang imong pagtuo kanako”; ug “nahibalo ako sa imong mga buhat, ug sa imong gugma ug pagtuo ug ministeryo ug paglahutay,  ug nga ang imong ulahing mga buhat mas labaw pa kay sa mga nahauna.” Bisan sa Sardis, diin ang kongregasyon nanginahanglan ug bug-at nga tambag, si Jesus nakamatikod niadtong takos sa komendasyon nga nag-ingon: “Bisan pa niana, ikaw adunay pipila ka ngalan sa Sardis nga wala maghugaw sa ilang panggawas nga mga besti, ug sila magalakaw uban kanako nga magbesti ug puti, tungod kay sila takos man niini.” (Pinadayag 2:2, 13, 19; 3:4) Pagkamaayong panig-ingnan ang gihatag ni Jesus!

Sa pagsundog kang Jesus, dili gayod nato hukman ang usa ka grupo sa mga tawo tungod lang sa sayop sa pipila ka membro niini o kon kita mohatag ug tambag, lakipan nato kinig nahiangay nga mga komendasyon. Apan maayong hinumdoman nga kon ang komendasyon ihatag lang panahon nga kita maghatag ug tambag, kini usahay dili epektibo. Busa, magmadagayaon sa paghatag ug komendasyon bisan kanus-a nga kini nahiangay! Sa ingon, kon kinahanglan kitang mohatag ug tambag sa laing higayon, mas dali kining dawaton.

Mga Ansiyano nga Naghatag ug Nahiangayng Komendasyon

Si Cornelia, nga usa ka Kristohanon nga nag-alagad karon sa usa sa mga sangang buhatan sa mga Saksi ni Jehova sa Uropa, nahinumdom nga niadtong mga 1970, gikomosta sa nagapanawng magtatan-aw ang iyang personal nga pagtuon ug pagbasa sa mga magasin. “Naulaw ko sa akong kaugalingon,” miingon siya. Apan miadmitir siya nga dili niya mahurot pagbasa ang tanang artikulo. “Inay sawayon ko,” siya nahinumdom, “iya na hinuon kong gidayeg bisag mao ra kadtoy akong nahimo. Nadasig kaayo ko sa iyang komendasyon nga sukad niadto, ako naningkamot sa pagbasa sa tanang artikulo sa magasin.”

 Si Ray, nga nag-alagad sa usa ka sangang buhatan sa Uropa, nahinumdom sa iyang unang adlaw sa pagpayunir. Ang nagadumalang magtatan-aw sa kongregasyon, usa ka tawo nga okupado kaayo sa iyang negosyo, mga obligasyon sa pamilya, ug sa daghang buluhaton sa kongregasyon, misulod sa Kingdom Hall nianang gabhiona ug miduol kang Ray ug nangutana, “Komosta man ang imong unang adlaw sa pagpayunir?” Karon, mga 60 na ka tuig ang milabay, si Ray nahinumdom gihapon sa pagkamahunahunaon sa maong ansiyano.

Ingon sa gipakita sa duha ka kasinatian, ang sinsero ug mahigugmaong pagpahayag ug komendasyon sa nabuhat sa uban—dili lang taphaw nga pagdayeg o pag-ulog-ulog—maayog epekto. Sa Kristohanong kongregasyon, daghan kitag katarongan aron komendahan ang atong mga igsoon sa pagtuo. Hunahunaa ra ang ilang tinguha nga moalagad kang Jehova, maayong pagkaandam nga mga komento, pagpaningkamot nga mabuntog ang kakulba sa dihang mohatag ug bahin, kadasig sa pagsangyaw ug pagpanudlo, ug ang ilang pagpaningkamot nga unahon ang intereses sa Gingharian ug espirituwal nga mga tumong sa ilang kinabuhi. Kon kita mohatag ug komendasyon sa uban, kita dagayang pagagantihan. Kita magmalipayon ug mahimong positibo sa atong panglantaw sa mga butang.—Buhat 20:35.

Angayng dayegon sa mga ansiyano ang maayong buhat sa mga igsoon sa kongregasyon. Kon gikinahanglan ang tambag, himoon nila kini sa mahigugmaong paagi. Sa laing bahin, sila dili magdahom ug kahingpitan sa mga igsoon, nga kon adunay masipyat isipon dayon siya nga huyang ug pagtuo.

Ang mga ansiyano nga nagsundog sa pagkamatinahoron ni Elihu, pagkamataktikanhon ni Pablo, ug sa pagkamahigugmaon ni Jesus mahimo gayong tuboran sa tinuod nga pagdasig alang sa mga igsoon. Ang paghatag ug komendasyon magdasig sa uban sa pag-uswag ingong mga Kristohanon ug moresulta sa malipayon ug malinawon nga relasyon sa usag usa. Panahon sa pagbawtismo kang Jesus, dayag nga nalipay kaayo siya sa dihang iyang nadungog ang tingog sa iyang langitnong Amahan nga nagdayeg kaniya: “Ikaw mao ang akong Anak, ang hinigugma; giuyonan ko ikaw.” (Marcos 1:11) Hinaot nga atong malipay ang kasingkasing sa atong mga igsoon pinaagi sa atong sinsero ug haom nga komendasyon.

[Mga hulagway sa panid 15]

Maayog resulta ang pagkamataktikanhon ni Pablo, maayo usab ang resulta kon ato kanang sundogon

[Hulagway sa panid 16]

Maayog epekto ang paghatag ug mainiton ug sinserong komendasyon