Nu Leh Pate U—Hmangaihnain In Fate Zirtîr Rawh U
Nu Leh Pate U—Hmangaihnain In Fate Zirtîr Rawh U
“In tih apiang chu hmangaiha tih ni vek rawh se.”—1 KORINTH 16:14.
1. Nu leh pate chu fa an neih hian engtin nge an awm ṭhin?
NAU lo piang hi nuna thil hlimawm ber zînga mi a ni tih nu leh pate chuan an pawm deuh vek ang. Nu pakhat, a hming Aleah-i chuan: “Ka fanu piang hlim hmêl ka han hmuh hmasak ber ṭum chuan, kan hlim hle a. Naupang ka hmuh tawh azawnga duhawm ber niin kan hria,” a ti. Mahse, chutiang hun hlimawm tak chuan nu leh pate chu lungkhamna a pe thei bawk. Aleah-i pasal chuan: “Ka lungkham ber chu ka fanu hi nuna buaina lo thleng ṭhînte hlawhtling taka hmachhawn tûrin ka buatsaih thei ang em, tih a ni,” a ti. Nu leh pa tam tak chuan chutiang lungkhamna chu an nei ve a, hmangaihna nêna an fate zirtîr a ngai tih an hria a ni. Amaherawhchu, chutianga fate zirtîr duh Kristian nu leh pa te chuan harsatnate chu an hmachhawn a. Chûng harsatnate zînga ṭhenkhat chu engte nge ni?
2. Eng harsatnate nge nu leh pate’n an hmachhawn?
2 He kal hmang tâna ni hnuhnûngah hian kan awm mêk a. Hrilh lâwk a nih tawh angin, khawvêl hi hmangaihna nei lo mite’n an luah khat a ni. Chhûngkaw zîngah ngei pawh, mite chuan “hmangaihna pianpui” an lantîr loh avângin, mi “lâwm nachâng hre lo te, thianghlim lo te, . . . insûm thei lo te, mi kawlhsen te” an lo ni bawk. (2 Timothea 3:1-5) Chutiang mizia lantîrtute nêna nî tina indâwrna chuan Kristian chhûngkuate incheibâwl tawn dân chu a nghawng thei a. Chu bâkah, nu leh pate chuan an rochun ṭhat famkim lohna avângin insûm theihna tlâkchham châng an nei a, ṭawngkam na tak an hmang palhin, thu tlûkna fing an siam thei ṭhîn lo bawk.—Rom 3:23; Jakoba 3:2, 8, 9.
3. Engtin nge nu leh pate chuan an fate chu naupang hlim tak ni tûra an enkawl theih?
3 Nu leh pate chuan hêng harsatnate hi an hmachhawn reng chung pawhin, an fate chu Pathian hmangaihtu hlim takte ni tûrin an enkawl thei a. Engtin nge an tih theih? Bible thurâwn: “In tih apiang chu hmangaiha tih ni vek rawh se,” tih zuiin a ni. (1 Korinth 16:14) Ni e, hmangaihna chu “phuar famkimna a ni” si a. (Kolossa 3:14) Tirhkoh Paula’n Korinth mite hnêna a lehkha thawn hmasaa a târ lan hmangaihna hmêlhmangte zînga pathum chu bih chiangin, nu leh pate’n an fate an zirtîrna kawnga he mizia an hman theih dân kawng ṭhenkhat i lo sawiho vang u.—1 Korinth 13:4-8.
Dawhtheih A Ngai
4. Engvângin nge nu leh pate tân dawhtheih a ngaih?
4 Paula chuan: “Hmangaihnain a dawhthei a,” tiin a ziak a. (1 Korinth 13:4) Grik thu mal “dawhtheihna” tia lehlin hian thinnelna a kâwk a ni. Engvângin nge nu leh pate tân dawhtheih a ngaih? Nu leh pa a tam zâwkte chuan a chhan tam tak an ngaihtuah thei ngei ang. Entîrna ṭhenkhat chauh han ngaihtuah ta i la. Naupangte chuan an thil duhzâwng chu vawi khat mai an ngên ngai meuh lo. Nu leh pate’n an phal lo bur a nih pawhin, a tâwpa an phal theih mai beiseiin an ngên nawn ngut ngut ṭhîn a ni. Tleirâwl chhuak hlimte chuan nu leh pate’n âtthâk an tih thil ṭhenkhat tihtîr phal tûrin an hnial ṭâng ṭâng duh mai thei bawk a. (Thufingte 22:15) Tin, naupangte chuan kei mahni ang bawkin an thil tih sualte chu an tinawn leh palh ṭhîn bawk a ni.—Sâm 130:3.
5. Engin nge nu leh pate chu dawhthei tûra ṭanpui thei?
5 Nu leh pate chu an fate laka dawhthei lehzual tûrin engin nge ṭanpui thei? Lal Solomona chuan: “A ngaihruat thiamnain mi a thin a tihnelsak ṭhîn,” tiin a ziak a. (Thufingte 19:11) Nu leh pate chuan anni pawhin tûn hma khân ‘naupang ṭawngin an ṭawng a, naupang hriatin an hria a, naupang ngaihtuahin an ngaihtuah’ ṭhîn tih hriat chhuahna hmangin, an fate awm dân ngaihruat thiamna an nei thei a ni. (1 Korinth 13:11) Nu leh pate u, in nu emaw, pa emaw hnêna naupang chhia anga thil in ngen lai in la hre chhuak thei em? Ṭhalai i nih chhoh lai khân, i nu leh pate’n i rilru emaw, i buaina emaw hre thiam thei lo niin i hre ngai em? I hre ngai a nih chuan, i fate chuan chutianga thil an tih chhan chu i hriatthiam ngei a rinawm a; tin, thu tlûkna i siamte chu dawhthei taka hriatnawntîr fo an ngaih chhan chu i hriat thiam a rinawm bawk. (Kolossa 4:6) Jehova’n Israel nu leh pate chu an fate hnêna a dânte ‘ṭhahnemngai taka zirtîr’ tûrin a hrilh a, chu chu chhinchhiah tlâk tak a ni. (Deuteronomy 6:6, 7) ‘Ṭhahnemngai taka zirtîr’ tia lehlin Hebrai thu mal awmzia chu “sawi nawn,” “hrilh nawn fo,” “rilrua tuh,” tihna a ni a. Chu chuan nu leh pate tân an fain Pathian dânte a zawm nân vawi tam tak an sawi nawn fo a ngai dâwn tih a kâwk a ni. Chutiang bawkin, nuna thil zir tûr dangte atân pawh sawi nawn fo a ngai bawk.
6. Engvângin nge dawhtheihna nei nu leh pa chu Pathian duh lohzâwng thilte an ngeithei tihna a ni loh?
6 Mahse, dawhtheihna nei nu leh pate chuan Pathian duh lohzâwng thilte an ngaithei tihna erawh a ni lo. Pathian Thu chuan: “Naupang thlahthlam chuan a nu zahna a thlen ṭhîn,” tiin a vaukhân a. Chutiang thil thleng lo tûr chuan: “Tiang leh zilhhaunain a tifing,” tiin chu thufing vêk chuan a sawi. (Thufingte 29:15) A châng chuan, naupangte chuan anmahni thunun tûrin an nu leh pate chuan thuneihna an nei lo niin an ngai mai thei. Mahse, Kristian chhûngkuate chu nu leh pate’n naupangte remtihna chauhva dân kengkawh thei ang hrimin, mipui rorêlna sawrkâr a ang tûr a ni lo. Jehova chuan chhûngkaw Lû ber a nih angin, nu leh pate chu an fate hmangaih taka zirtîr tûr leh thunun tûrin thuneihna a pe zâwk a ni. (1 Korinth 11:3; Ephesi 3:14-19; 6:1-4) Dik tak chuan, thununna chu Paula’n a dawta hmangaihna hmêlhmang a sawi nên chuan a inkûngkaih hnai hle a ni.
Hmangaihnaa Thunun Dân
7. Engvângin nge nu leh pa ngilnei takte chuan an fate chu an thunun ang a, chutiang thununnaah chuan eng nge tel?
7 Paula chuan “hmangaihnain . . . ngil a nei,” tih a ziak a. (1 Korinth 13:4) Nu leh pa ngilnei tak takte chuan an fate chu englai pawhin ngilnei takin an thunun reng ang. Chutianga tiin, Jehova chu an entawn a ni. “Lalpa chuan a hmangaih chu a thunun ṭhîn,” tiin Paula chuan a ziak a. Bible-a thununna tih hian hremna mai a kâwk lo tih khawngaih takin chhinchhiah ang che. Chu chuan sâwizawina leh zirtîrna lam a kâwk zâwk a ni. Chutiang thununnain a tum ber chu eng nge ni? “Chu mia sawizawia awmte tân chuan rah thlamuanawm tak, felna chu a chhuahsak ṭhîn,” tiin Paula’n a sawi a ni. (Hebrai 12:6, 11) Nu leh pate chuan Pathian duhzâwng mila an fate ngilnei taka an zirtîr hian, an fate chu mi puitling thlamuanawm tak, a nih loh leh remna siamtu leh mi fel tak nih theihna hun remchâng an pe a ni. Naupangte chuan “LALPA thununna” an pawm chuan finna, hriatna, leh hriatthiamna—tangkarua emaw, rangkachak emaw neih aia hlu zâwk chu an nei thei a ni.—Thufingte 3:11-18.
8. Nu leh pate’n an fate an thunun loh hunah eng nge a thlen tlângpui ṭhin?
8 Kawng leh lamah chuan, nu leh pate’n an fate an thunun lo hi ngilneihna a ni lo. Jehova chuan Solomona chu: “Tiang hmang duh lo chuan a fa a hua a ni, a hmangaihtu erawh chuan a thunun chawt ṭhîn,” tia ziak tûrin a thâwk khum a ni. (Thufingte 13:24) Thunun reng loh naupangte chu mahni hmasial tak an ni duh a, an hlim lo ṭhîn. Chu mi nêna inkalh takin, khawngaihna nei reng sia thil a tâwk chin nghet taka vawngtu nu leh pa nei naupangte chuan zirna lamah an ti ṭha zâwk a, mi dangte nên an inngeih zâwkin, a tlângpui thuin an hlim zâwk bawk. Chutiang a nih chuan, an fate thununtu nu leh pate chuan ngil an nei tihna a ni.
9. Kristian nu leh pate chuan an fate hnênah eng nge an zirtîr a, hêng thil tih ngaite hi eng anga thlîr tûr nge?
9 Fate ngilnei tak leh hmangaih taka thununnaah chuan eng nge tel? Nu leh pate chuan an fate laka an thil beisei chiah chu an hrilh chian a ngai a. Entîr nân, Kristian nu leh pa nei fate chu an naupan aṭangin Bible thu bul pawimawhte zirtîr an ni a, biakna dik thiltih chi hrang hranga an tel a ngaihzia zirtîr an ni bawk. (Exodus 20:12-17; Matthaia 22:37-40; 28:19; Hebrai 10:24, 25) Naupangte chuan hêng thil tih ngaite hi sawirem theih thil a ni lo tih an hriat a ngai a ni.
10, 11. Engvângin nge nu leh pate chuan in chhûng dân an zam hunah an fate dîlna chu an ngaihtuah tel theih?
10 Mahse, a châng chuan nu leh pate chuan chhûngkaw dân an zam hunah an fate râwn chu an duh mai thei a. Ṭhalaite chuan chûng dân siam chungchânga sawi ve theih an neih chuan dân zamte chu an zâwm duh zâwk thei a ni. Entîr nân, nu leh pate’n an fate ina an haw hun tûr bituk chungchângah ina an thlen hun tûr chu an thlang thei a. A nih loh leh, kawng dangah chuan an fate chu a hun tûr rawtna siamtîrin, chutiang hun an thlan chhante an sawitîr thei a ni. Chutah chuan nu leh pate chuan anmahni duh hun chu sawiin, chu chu inâwm an tih chhan an hrilhfiah thei a. Thil awm thei a nih angin, ngaih dân a inan loh chuan eng nge nu leh pate’n an tih tâk ang? Kawng ṭhenkhatah chuan, an fate duhzâwng chu Bible thu bulte nêna a inkalh a nih loh chuan nu leh pate chuan an phalsak mai thei a ni. Chutianga tih chu nu leh pate chuan an thuneihna an kengkawh lo tihna a ni em?
11 Chu zawhna chhâng tûr chuan, Jehova’n Lota leh a chhûngte a dâwrnaa hmangaihna nêna a thuneihna a hman dân hi han ngaihtuah teh. Vântirhkohte’n Lota, a nupui, leh a fanute chu Sodom khaw pâwna an hruaichhuah hnu chuan, an hnênah: ‘Tlângah sawn tlân rawh u, chutilochuan in boral dah ang e,’ an ti a. Nimahsela, Lota chuan: “Ka pu, chûng ang chu ni suh se,” a ti a. Lota chuan a duhzâwng chu a rawt a: “Ngai teh, saw khua saw tlân nân a hnai ber a, khaw tê tak tê a ni bawk si a: aw, chutah chuan . . . mi tlântîr zâwk rawh,” tiin. Engtin nge Jehova’n a chhân? “Ngai teh, chu thil khawngah pawh chuan ka zâwm che a ni,” a ti a ni. (Genesis 19:17-22) Jehova chuan a thuneihna a kengkawh lo tihna a ni em? Ni lo ve! Mahse, he mi chungchângah hian Lota dîlna chu ngaihtuahin, ngilneihna lantîr belhchhah chu a thlang a ni. Nu leh pa in nih chuan, chhûngkaw dân inzam hunah hian in fate dîlna ngaihtuah tel châng in nei em?
12. Engin nge naupang chu him nia inhre tûrin ṭanpui ang?
12 Naupangte chuan dân chu an hre mai ni lovin, an zawm loh huna a hremna pawh an hre tûr a ni. A hremnate chu sawiho a nih a, hriat thiam a nih tawh chuan, dânte chu kenkawh a ngai ta a ni. Nu leh pate chuan an fate hnênah a hremna an hrilh fo hnua an hrem si loh chuan chu chu ngilneihna a ni lo. Bible chuan: “Thiltih sual chungah hremna hlen nghâl mai a nih ṭhin loh avângin, mihring fate thinlung chu thil sual ti tûrin a lo ngampa tawh ṭhîn a ni,” tiin a sawi. (Thuhriltu 8:11) Nu leh pa chuan an fa chu a zah loh nân mi hmaah emaw, a rualpuite hmaah emaw an hrem lo vang. Mahse, naupangte’n an nu leh pate “A ni” tih chu a ni tih leh “Ni lo” tih chu a ni lo tih an hriat hunah—chu mi atân hremna pawh ngai hial mah se—him nia inhriatna an nei zâwkin, an nu leh pate chu an zahthiamin, an hmangaih zual a ni.—Matthaia 5:37.
13, 14. Engtin nge nu leh pate’n an fate an zirtîr hunah Jehova an entawn theih?
13 Hremna chu ngilnei taka pêk ni tûr chuan, a hremna leh a pêk dân chu naupang nêna inmila siamrem tûr a ni. Pam-i chuan: “Thununna chungchângah chuan kan fate pahnih mamawh zâwng chu a inang lo va. Pakhat tâna hman tlâk chu a dang tân a hman theih ve lo,” a ti. A pasal Larry-a chuan: “Kan fanu upa zâwk chu a luhlul deuh va, thununna khauh tak chauh a chhâng lêt niin a lang. Mahse, kan fanu naupang zâwk chuan ṭawngkam khauh leh mitmei hmuh ringawt pawh a chhâng lêt vat ṭhîn a ni,” tiin a sawi a ni. Ni e, nu leh pa ngilnei takte chuan an fa tinte tâna thununna ṭangkai ber tûr chu hriat an tum tlat a ni.
14 Jehova chuan a chhiahhlawh tinte chakna leh chak lohna hriatnaah chuan nu leh pate tân entawn tûr a siam a. (Hebrai 4:13) Chu bâkah, Jehova chuan hremna a pêk hunah pawh a uchuak lutukin a pe lo va, a thlahthlam lutuk bawk hek lo. A mite chu eng lai pawhin “a tâwk lekin” a hrem ṭhîn zâwk a ni. (Jeremia 30:11) Nu leh pate u, in fate chakna lai leh chak lohna lai in hria em? Chu in thil hriat chu anmahni tâna ṭangkai tûr leh ngilnei taka zirtîr nân in hmang em? Chutianga in ti a nih chuan, in fate in hmangaihzia in lantîr tihna a ni.
Inbiak Pawhnaa Thu Dik Sawi Tûrin Fuih Rawh
15, 16. Engtin nge nu leh pate chuan an fate chu thu dik tak sawi tûrin an fuih theih a, he mi chungchângah Kristian nu leh pate chuan eng tih dân nge ṭangkai an tih?
15 Hmangaihna pêng dang leh chu “fel lohnaah a lâwm lo va, thutak erawh chu a lâwmpui ṭhîn,” tih hi a ni. (1 Korinth 13:6) Engtin nge nu leh pate chuan an fate chu thil fel leh dik ngainatna an zirtîr theih? Rahbi pawimawh tak chu fate thusawi nu leh pate’n pawm harsa an tih hunah pawh, an rilru veizâwng dik tak sawi tûra fuih hi a ni. Fate’n felna tehnate mila an ngaihtuahna leh an rilru an sawi chhuah hunah nu leh pate chu an lâwm ang tih chu hriat sa a ni a. Mahse, ṭum dangah chuan naupangin a rilru tak tak a sawi chuan fel lohna lam a ngaihtuah tih a târ lang mai thei. (Genesis 8:21) Engtin nge nu leh pate chuan an tih ang? Chutiang ngaihtuahna a sawi chhuah avânga hrem nghâl mai chu an duh mai thei. Nu leh pate’n chutianga an tih chuan, naupangte chuan an nu leh pate hriat duhzâwng nia an rinte chauh sawi chhuah chu an tum mai dâwn a ni. Ṭawngkam chaltlai takte an hman erawh chuan zilh nghâl vat tûr zawng a ni ngei mai; mahse, naupangte chu hawihhâwm taka mite biak dân zirtîr leh an thusawi tûr hrilh chu a inang lo a ni.
16 Engtin nge nu leh pate chuan an fate chu inbiak pawhnaa thu dik sawi tûra an fuih theih? Atîra kan târ lan tâk, Aleah-i chuan: “Kan fate’n kan ngaihmawh zâwng thil an sawi hunah pawh a lutuka mak tihna lantîr loh tumin, inhawng taka inbiak pawhna boruak chu kan siam a ni,” a ti. Tom-a chuan heti hian a sawi a: “Kan fanu chu kan ngaih dân a pawm lohte thlenga a rilru sawi chhuak tûrin kan fuih a. A thusawi lai kan pawh chahsak a, kan duhzâwng kan sawi vak mai chuan, a lo lunghnual ang a, a rilru tak tak min hrilh tawh lo tûrah kan ngai a. Kawng leh lamah chuan, a thusawi kan ngaihtlâkna chuan kan thusawi ngaithla ve tûrin a fuih a ni,” a ti. Naupangte chuan an nu leh pate thu an âwih tûr zawng a ni ngei mai. (Thufingte 6:20) Mahse, inhawng taka inbiak pawhna chuan nu leh pate chu an fate thil chhût thiam tûra ṭanpui theihna hun remchâng a pe a ni. Fanu pali nei Vincent-a chuan: “Kan fate’n anmahni tâna thil ṭha ber an hmuh thiam theih nân, dinhmun pakhat a sâwtna leh sâwt lohnate chu kan sawipui fo va. Hei hian ngaihruat thiamna nei tûrin a ṭanpui a ni,” a ti.—Thufingte 1:1-4.
17. Nu leh pate chuan eng nge an chian theih?
17 Nu leh pa tumah hian an fate enkawlnaah Bible thurâwn ang zawng zawng chu kimchang takin an zâwm thei lo ngei ang. Chuti chung pawhin, in fate chuan anmahni chu dawhthei tak, ngilnei tak, leh hmangaih taka zirtîr tûra ṭan in lâkna chu an hlut hle dâwn tih in ring tlat thei a ni. Jehova chuan in thawh rimna chu mal a sâwm ngei ang. (Thufingte 3:33) Chutianga thawh rim chhan ber chu, Kristian nu leh pa zawng zawngte chuan anmahni anga an fate pawhin Jehova hmangaih dân an zir an duh vâng a ni. Engtin nge nu leh pate chuan chu thiltum ṭha tak chu an hlen theih ang? A dawta thuziakah chuan a tih dân ṭhenkhat sawiho a ni ang. (w07 9/1)
I Hre Chhuak Em?
• Engtin nge ngaihruat thiamna lantîrna chuan nu leh pate chu dawhthei tûrin a ṭanpui?
• Engtin nge ngilneihna leh thununna chu a inkûngkaih?
• Engvângin nge nu leh pate leh fate inkâra thu dik sawia inbiak pawhna neih a pawimawh?
[Zirlai Atâna Zawhnate]
[Phêk 24-naa milem]
Nu leh pate u, naupang nih laia in awm dân chu in la hre thei em?
[Phêk 25-naa milem]
In fate chu dik tak leh inhawng taka inbe pawp tûrin in fuih em?