Mga Hapot Hale sa mga Parabasa

Ano an boot sabihon ni Jesus kan sinabi nia na an saiyang maimbod na oripon magigin “mapagmansay”?

Si Jesus naghapot: “Siisay man nanggad an maimbod asin mapagmansay na oripon na ninombrahan kan saiyang kagurangnan na mamahala sa saiyang mga domestiko, tanganing magtao sa sainda kan saindang kakanon sa tamang panahon?” (Mateo 24:45) An “oripon” na nagtatao nin espirituwal na “kakanon” iyo an kongregasyon nin mga Kristianong linahidan nin espiritu. Taano ta inapod sinda ni Jesus na mapagmansay? *

Lubos niatong masasabotan sa katokdoan mismo ni Jesus kun ano an posibleng boot niang sabihon kan terminong “mapagmansay.” Halimbawa, kan sia magtaram dapit sa “maimbod asin mapagmansay na oripon,” isinaysay ni Jesus an parabola dapit sa sampulong daraga na nagbabantay sa pagdatong kan nobyo. An mga daraga nagpapagirumdom sa sato dapit sa linahidan na mga Kristiano bago 1914 na entusiastikong naghahalat sa pagdatong kan dakulang Nobyo, si Jesu-Cristo. Sa sampulong daraga, lima an mayo nin igong lana kan magdatong an nobyo, asin dai sinda nakaatender sa punsion sa kasal. An lima pa nagin mapagmansay. Nagdara sinda nin igong lana tanganing padagos sindang makatao nin liwanag kun dumatong an nobyo asin tinogotan sindang lumaog sa punsion.—Mateo 25:10-12.

Kan si Jesus dumatong na igwa kan saiyang autoridad sa Kahadean kan 1914, dakol sa linahidan na mga Kristiano an naglalaom na makaibanan sia tolos sa langit. Minsan siring, dakol pa an dapat nindang gibohon digdi sa daga, asin an nagkapira bakong andam para dian. Arog kan bakong mapagmansay na mga daraga, dai ninda patienot na pinakosog an saindang sadiri sa espirituwal na paagi, kaya bako sindang andam na magpadagos bilang mga paradara nin liwanag. Pero, an kadaklan sa mga linahidan naghiro na may pakamansay—na may kadonongan asin pananaw sa ngapit—asin napakosog sa espirituwal na paagi. Kan maaraman ninda na dakol pa an gibohon sa ngapit, magayagaya nindang pinonan na gibohon iyan. Huli kaini, sinda nagin “an maimbod asin mapagmansay na oripon.”

Isip-isipa man an paggamit ni Jesus kan terminong “mapagmansay” sa Mateo 7:24. Si Jesus nagsabi: “An gabos na nagdadangog sa mga tataramon kong ini asin naggigibo kaiyan ibabaing sa sarong tawong mapagmansay, na nagtogdok kan saiyang harong sa ibabaw kan dakulang gapo.” Huli sa posibilidad na bumagyo, an tawong mapagmansay nagtotogdok sa masarig na pundasyon. Sa kabaliktaran, an tawong lolong nagtotogdok sa baybay asin nawawaran kan saiyang harong. Sa siring, an sarong mapagmansay na parasunod ni Jesus naheheling antes pa an maraot na mga resulta nin pagsunod sa kadonongan nin tawo. An saiyang pakabatid asin marahay na paghusgar naggigiya sa saiya na marigon na ibasar an saiyang pagtubod, mga gibo, asin pagtotokdo sa kun ano an itinokdo ni Jesus. “An maimbod asin mapagmansay na oripon” minahiro man sa kaagid na paagi.

Mangnohon man an paggamit kan terminong itrinadusir na “mapagmansay” sa dakol na bersion kan Hebreong Kasuratan. Halimbawa, ninombrahan ni Faraon si Jose na mamahala sa suplay nin kakanon sa Egipto. Ini kabtang kan areglo ni Jehova tanganing magtao nin kakanon sa saiyang banwaan. Taano ta si Jose an pinili? Si Faraon nagsabi sa saiya: “Mayo nin siisay man na mapagmansay asin madonong na arog sa saimo.” (Genesis 41:33-39; 45:5) Kaagid kaiyan, an Biblia nagsasabi na “marahay an pagmansay” ni Abigail. Sia nagtao nin kakanon para sa saro na linahidan ni Jehova, si David, asin para sa mga tawohan kaini. (1 Samuel 25:3, 11, 18) Si Jose asin si Abigail puedeng apodon na mapagmansay huli ta nabatid ninda an kabotan nin Dios asin naghiro sinda na may pananaw sa ngapit asin marahay na paghusgar.

Huli kaini, kan ilinadawan ni Jesus an maimbod na oripon bilang mapagmansay, ipinarisa nia na an mga irinerepresentar kan oripon na iyan magpapaheling nin pakabatid, pananaw sa ngapit, asin marahay na paghusgar huli ta an saindang pagtubod, mga gibo, asin pagtotokdo ibinabasar ninda sa Tataramon nin katotoohan nin Dios.

[Nota sa Ibaba]