Amepusho Ukufuma ku Babelenga

Ni mwi Yesu aloseshe ilyo atile umusha wakwe uwa cishinka ‘alishilimuka’?

Yesu aipwishe ukuti: “Nga kanshi nani umusha wa cishinka kabili uwashilimuka uo shikulu wakwe alaashike pa ba mu ng’anda yakwe ku kubapeela ifya kulya fyabo pa nshita yalinga?” (Mateo 24:45) “Umusha,” uupekanya “ifya kulya,” nangu ukusambilisha ifya kwa Lesa, cilonganino ca Bena Kristu basubwa no mupashi. Mulandu nshi Yesu alandile ukuti Abena Kristu basubwa balishilimuka? *

Ifyo Yesu alesambilisha pali iyi nshita kuti fyatwafwa ukwishiba bwino umo ishiwi lya kuti “uwashilimuka” lyalola. Ku ca kumwenako fye, ilyo Yesu alandile pa “musha wa cishinka kabili uwashilimuka,” alandile ne cilangililo ca banacisungu 10 abalelolela ukwisa kwa kwa shibwinga. Aba banacisungu batwibukisha Abena Kristu basubwa abalelolela mu kuswatuka ukwisa kwa kwa Shibwinga mukalamba Yesu Kristu ilyo umwaka wa 1914 ushilafika. Pali banacisungu 10, basano tabakwete amafuta ayengi ilyo shibwinga afikile, e co tabasangilwe ku mutebeto wa bwinga. Aba bambi basano bali abashilimuka. Balisendele amafuta ayengi ica kuti inyali shabo tashashimine mpaka na shibwinga aisa kabili balibasuminishe ukwingila mu mutebeto wa bwinga.—Mateo 25:10-12.

Ilyo Yesu atendeke ukuteka mu muulu mu 1914, Abena Kristu basubwa abengi baleenekela ukuti lilya line bali no kuya ku muulu ku kuba pamo nankwe. Lelo, baali bacili nabakwata umulimo uukalamba uwa kubomba pano isonde, kabili bamo tabaipekenye ukubomba. Nga banacisungu ifiwelewele, tabakosele mu kupepa, kanshi tabaipekenye ukutwalilila ukulashimikila abantu icebo ca kwa Lesa. Lelo abengi bali abashilimuka, pantu bali na mano, balilwike ifyo cali no kuba ku ntanshi, kabili bali abakosa mu kupepa. Ilyo baishibe ukuti kwali umulimo ukalamba uwa kubomba, balitemenwe kabili batendeke ukubomba uyo mulimo. Kanshi aba e bali “umusha wa cishinka kabili uwashilimuka.”

Moneni na kabili ifyo Yesu abomfeshe ishiwi lya kuti “uwashilimuka” pali Mateo 7:24. Yesu atile: “Onse uumfwa no kucita ifyebo fyandi ifi akapashanishiwa ku muntu uwashilimuka, uwakuulile ing’anda yakwe pa mwalaala.” Uwashilimuka akuula ing’anda apakosa, pantu alishiba ukuti kwaliba imfula. Lelo umuwelewele akuula ing’anda yakwe pa musensenga kabili imfula nga yaisa ing’anda yakwe ilabongoloka. E ico, umukonshi wa kwa Yesu uwashilimuka untu amwena libeela ifyabipa ififuma mu kukonka amano ya bantu. Ukushilimuka no kupingula bwino ifintu kulalenga ukuti icitetekelo ca muntu, imicitile yakwe ne fyo asambilisha filingane ne fyo Yesu asambilishe. Ifi fine e fyo no “musha wa cishinka kabili uwashilimuka” acita.

Moneni na kabili ifyo ishiwi lya kuti “uwashilimuka” lyabomfiwa mu Malembo ya ciHebere ayengi. Ku ca kumwenako, Farao asalile Yosefe ukuba kangalila wa fya kulya fya mu Egupti. Uku kwali kupekanya kwa kwa Yehova pa kuti abantu bakwe bakakwate ifya kulya. Mulandu nshi Farao asalile Yosefe? Farao aebele Yosefe ukuti: “Takuli uwailuka [nelyo uwashilimuka] kabili uwa mano nga iwe.” (Ukutendeka 41:33-39; 45:5) Na kabili, Baibolo ilando kuti Abigaili “ali musuma, uwashilimuka.” Apeele Davidi na baume bakwe ifya kulya, kabili Davidi aali uwasubwa wa kwa Yehova. (1 Samwele 25:3, 11, 18) Yosefe na Abigaili bali abashilimuka pantu balilwike ukufwaya kwa kwa Lesa kabili ifyo bacitile fyalangile ukuti balilwike ifyo cikaba ku ntanshi kabili balipingwile bwino.

Kanshi, ilyo Yesu atile umusha wa cishinka alishilimuka, alelangilila ukuti ababa mwi bumba lya musha baba no mucetekanya, baleluka ifyo cikaba ku ntanshi, kabili balapingula bwino pantu icitetekelo cabo, imicitile yabo, ne fyo basambilisha fyalilingana ne filanda Icebo ca kwa Lesa ica cine.

[Futunoti]