Mga Pangutana Gikan sa mga Magbabasa

Unsay buot ipasabot ni Jesus sa dihang miingon siya nga ang iyang matinumanong ulipon ‘maalamon’?

Si Jesus nangutana: “Kinsa ba gayod ang matinumanon ug maalamong ulipon nga gitudlo sa iyang agalon ibabaw sa iyang mga sulugoon sa panimalay, sa paghatag kanila sa ilang pagkaon sa hustong panahon?” (Mateo 24:45) Ang “ulipon” nga nagtagana ug espirituwal nga “pagkaon” mao ang kongregasyon sa dinihogan-sa-espiritu nga mga Kristohanon. Nganong gitawag man sila ni Jesus ug maalamon?

Mas masabtan nato gikan sa pagpanudlo ni Jesus kon unsay lagmit nga gipasabot niya sa pulong ‘maalamon.’ Pananglitan, sa dihang si Jesus naghisgot bahin sa “matinumanon ug maalamong ulipon,” iyang giasoy ang sambingay bahin sa napulo ka ulay nga nagpaabot sa pamanhonon. Magpahinumdom kini kanato sa dinihogang mga Kristohanon sa wala pa ang 1914 nga mahinamong nagpaabot sa dakong Pamanhonon, si Jesu-Kristo. Sa napulo ka ulay, ang lima halos mahutdan na sa lana sa dihang miabot ang pamanhonon, ug sila wala makatambong sa kombira sa kasal. Ang laing lima napamatud-ang maalamon. Sila nagdala ug igong lana, busa sila nakapadayon sa pagpasidlak ug kahayag sa dihang miabot ang pamanhonon ug sila gipasulod ngadto sa kombira.—Mateo 25:10-12.

Sa dihang misugod si Jesus sa pagmando niadtong 1914, daghan sa dinihogang mga Kristohanon ang nagdahom nga moduyog dayon kaniya sa langit. Apan, daghan pang buluhaton ang angay nilang himoon dinhi sa yuta, ug ang uban dili andam sa pagbuhat niana. Sama sa dili-maalamong mga ulay, wala nila palig-onang daan ang ilang espirituwalidad, busa wala sila makapadayon sa pagpasidlak sa ilang kahayag. Apan, ang uban milihok nga maalamon—uban ang abanteng panglantaw—ug sila lig-on sa espirituwal. Sa dihang ilang nahibaloan nga daghan pa silag angayng buhaton, sila malipayong mibuhat niana. Busa, ilang napamatud-an nga sila “ang matinumanon ug maalamong ulipon.”

Tagda usab ang paggamit ni Jesus sa pulong ‘maalamon’ diha sa Mateo 7:24. Si Jesus miingon: “Ang matag usa nga magapatalinghog niining akong mga pulong ug magabuhat niini mahisama sa usa ka tawong maalamon, nga nagtukod sa iyang balay ibabaw sa dakong-bato.” Ang tawong maalamon nagtukod ug balay diha sa lig-on nga pundasyon, agig panagana kon moabot ang bagyo. Sa kasukwahi, ang tawong buangbuang nagtukod sa iyang balay ibabaw sa balas ug kini nahugno pag-abot sa bagyo. Busa, ang maalamong sumusunod ni Jesus makapanglantawng daan sa daotang mga sangpotanan sa pagsunod sa tawhanong kaalam. Ang iyang katakos sa pagsabot ug maayong panghukom motabang kaniya sa pagpasukad sa iyang pagtuo, mga gawi, ug pagtulon-an diha sa gitudlo ni Jesus. “Ang matinumanon ug maalamong ulipon” milihok nga sama niana.

Matikdi usab ang paggamit sa pulong nga gihubad ug ‘maalamon’ ug ang kaamgid nga mga kahulogan niini diha sa Hebreohanong Kasulatan. Pananglitan, gitudlo ni Paraon si Jose ingong tagdumala sa suplay sa pagkaon sa Ehipto. Bahin kini sa kahikayan ni Jehova nga tagan-an ug pagkaon ang iyang katawhan. Nganong napili man si Jose? Si Paraon miingon kaniya: “Walay usa nga ingon kanimo nga maayog pagsabot ug maalamon.” (Genesis 41:33-39; 45:5) Sa susama, ang Bibliya nag-ingon nga si Abigail “masinaboton.” Siya nagtaganag pagkaon alang sa dinihogan ni Jehova nga si David, ug sa iyang mga tawo. (1 Samuel 25:3, 11, 18) Si Jose ug si Abigail matawag nga maalamon tungod kay ilang nasabtan kon unsay kabubut-on sa Diyos ug sila milihok uban ang abanteng panglantaw ug maayong panghukom.

Busa, sa dihang gihubit ni Jesus ang matinumanong ulipon ingong maalamon, iyang gipaila nga kadtong gihawasan sa maong ulipon adunay katakos sa pagsabot, abanteng panglantaw, ug maayong panghukom tungod kay ilang gipasukad ang ilang pagtuo, mga gawi, ug pagtulon-an diha sa Pulong sa Diyos sa kamatuoran.