Kestyon lekter

Ki Zezi ti oule dir ler i ti dir ki son lesklav fidel pou “pridan”?

Zezi ti poz sa kestyon: “Lekel sa [“lesklav fidel e pridan,” NW] ki son met in plas ansarz tou lezot serviter pour donn zot zot manze kan i ler?” (Matye 24:45) Kongregasyon bann Kretyen swazir i sa “lesklav” ki prodwir “manze” spirityel. Akoz ki Zezi ti dir ki zot pridan? *

Nou kapab pli byen konpran kwa ki Zezi ti oule dir par sa mo “pridan” atraver son prop parol. Par egzanp, kan i ti pe koz lo sa “lesklav fidel e pridan,” Zezi ti koz lo en parabol konsernan dis vyerz ki ti pe esper larive zot nouvo marye. Sa bann zenn vyerz i fer nou mazin sa bann Kretyen swazir avan 1914 ki avek enpasyans ti pe esper larive zot Nouvo Marye, Zezi Kri. Parmi sa dis vyerz, senk ti napa ase delwil ler zot nouvo marye ti arive, e zot pa ti asiste festen maryaz. Sa lezot senk ti pridan. Zot ti rod sifizaman delwil pour ki zot ti kapab klere kan zot nouvo marye ti arive e zot ti ganny sans asiste festen maryaz.—Matye 25:10-12.

Kan Zezi ti ganny lotorite dan Rwayonm Bondye an 1914, bokou parmi sa bann Kretyen swazir ti ekspekte zwenn li deswit dan lesyel. Me ti annan plis travay pour zot fer lo later, e serten pa ti ankor pare pour sa. Parey sa bann vyerz fol, zot pa ti’n batir zot spirityelman, alors zot pa ti pare pour kontinyen konman bann ki annan lalimyer. Laplipar pourtan ti pridan, zot ti annan lasazes e zot ti kapab vwar pli lwen ki zot bout nennen, zot ti ganny fortifye spirityelman. Kan zot ti konnen ki bokou travay ti pe esper zot, deswit zot ti met zot pare pour akonplir li. Alors, zot ti prouve ki zot ti “sa lesklav fidel e pridan.”

Annou konsider osi lafason ki Zezi ti servi sa mo “pridan” dan Matye 7:24. Zezi ti dir: “Tou sa ki ekout mon bann parol e met zot an pratik i parey en zonm [“pridan,” NW] ki konstri son lakaz lo ros.” Sa zonm pridan ti konstri son lakaz byen solid avek nide antet ki ti kapab annan en tanpet. Me sa zonm enbesil li, i ti konstri son lakaz lo disab e i ti perdi son lakaz. Alors, en disip Zezi ki pridan i enn ki vwar byen davans move konsekans ki i kapab gannyen ler i swiv lasazes zonm. Son disernman ek bon zizman pou kapab diriz li pour baz son lafwa, aksyon ek lansennyman lo sa ki Zezi ti ansennyen. “Lesklav fidel e pridan” osi i reazir parey.

Remarke dan ki fason sa mo “pridan” i osi ganny servi dan bokou bann versyon Lekritir Ebre. Par egzanp, Faraon ti apwent Zozef pour okip bann zafer manze Lezip. Sa ti form parti laranzman Zeova pour donn manze son pep. Akoz ki Zozef ti ganny swazir? Faraon ti dir li: “Napa personn ki pli pridan e saz parey ou.” (Zenez 41:33-39; 45:5) Pareyman, Labib i dir ki Abigail ti “byen pridan.” I ti anmenn manze pour David, sa enn ki Zeova ti’n swazir e pour son bann zonm. (1 Samyel 25:3, 11, 18) Nou kapab dir ki Zozef ek Abigail ti pridan akoz zot ti kapab disern byen lavolonte Bondye, zot ti vwar lwen e zot ti annan bon zizman.

Anfet, kan Zezi ti dir ki sa lesklav fidel ti pou pridan, i ti pe endike ki sa bann ki pe ganny reprezante konman sa lesklav ti pou demontre disernman, vwar lwen, e annan bon zizman akoz zot ti pou baz zot lafwa, aksyon ek lansennyman lo Parol Bondye ki laverite.

[Not anba lo paz]