Mga Pamangkot Gikan sa mga Bumalasa

Ano ang buot silingon ni Jesus sang nagsiling sia nga ang iya matutom nga ulipon mangin “mainandamon”?

Si Jesus nagpamangkot: “Sin-o bala nian ang ulipon nga matutum kag mainandamon, nga ginpadumala sang iya agalon sa iya panimalay, sa paghatag sa ila sing pagkaon sa nagakaigo nga tion?” (Mateo 24:45) Ang “ulipon” nga nagaaman sing espirituwal nga “pagkaon” amo ang kongregasyon sang mga Cristiano nga hinaplas sang espiritu. Ngaa gintawag sila ni Jesus nga mainandamon? *

Mahangpan naton sing maayo gikan mismo sa panudlo ni Jesus kon ano ang buot niya silingon sang tinaga nga “mainandamon.” Halimbawa, sang naghambal sia tuhoy sa “matutum kag mainandamon nga ulipon,” naghatag si Jesus sing parabola tuhoy sa napulo ka ulay nga babayi nga nagahulat sa pag-abot sang nobyo. Ang mga ulay nagapananumdom sa aton sa hinaplas nga mga Cristiano antes sang 1914 nga malangkagon nga nagahulat sa pag-abot sang Nobyo nga si Jesucristo. Lima sa napulo ka ulay ang nawad-an sing lana sang nag-abot ang nobyo, amo nga wala sila makatambong sa sinalusalo sang kasal. Ang lima mga mainandamon. Nagdala sila sing dugang nga lana amo nga wala mapalong ang ila suga tubtob sa pag-abot sang nobyo, gani nakatambong sila sa sinalusalo sang kasal.—Mateo 25:10-12.

Sang naghari si Jesus sa Ginharian sang 1914, madamo nga hinaplas nga mga Cristiano ang naglaum nga makaupod sila gilayon ni Jesus sa langit. Apang, may madamo pa sila nga hilikuton sa duta, kag ang iban indi pa handa para sa sini. Kaangay sang indi mainandamon nga mga ulay, wala nila ginpalig-on ang ila espirituwalidad, amo nga wala sila makahanda sa pagpadayon subong mga manugdala sing kapawa. Apang ang kalabanan sa ila mainandamon—may kaalam kag paghantop—kag napalig-on sila sa espirituwal. Sang mahibaluan nila nga madamo pa sila sing hilikuton, malipayon sila sa pagtuman sini. Gani, napamatud-an sila nga “ulipon nga matutum kag mainandamon.”

Binagbinaga man ang paggamit ni Jesus sang tinaga nga “mainandamon” sa Mateo 7:24. Si Jesus nagsiling: “Ang tagsatagsa nga nagapamati sining polong ko kag nagatuman sa ila ipaangay sa tawong mainandamon nga nagtukud sang iya balay sa ibabaw sang igang.” Ang mainandamon nga tawo nagtukod sa mapag-on nga pundasyon, kay basi mag-abot ang bagyo. Sa pihak nga bahin, ang buangbuang nga tawo nagtukod sa balas amo nga sang nagbagyo, naguba ang iya balay. Busa, ang mainandamon nga sumulunod ni Jesus amo ang isa nga nakahantop sang malain nga mga epekto sang pagsunod sa tawhanon nga kaalam. Bangod may paghantop kag paghangop, ginpasad niya sing malig-on ang iya paglaum, buhat, kag panudlo sa gintudlo ni Jesus. Amo sini ang ginhimo sang “ulipon nga matutum kag mainandamon.”

Talupangda man ang pagbadbad sang madamo nga bersion sang Hebreo nga Kasulatan sa tinaga nga “mainandamon.” Halimbawa, gintangdo ni Paraon si Jose sa pagtipon sing pagkaon para sa Egipto. Bahin ini sang kahimusan ni Jehova sa pag-aman sing pagkaon sa iya katawhan. Ngaa si Jose ang napilian? Si Paraon nagsiling sa iya: “Wala sing bisan sin-o nga mahinalungon [“mainandamon,” NW] kag maalam subong sa imo.” (Genesis 41:33-39; 45:5) Subong man, ang Biblia nagasiling nga si Abigail “mahangpunon.” Nag-aman sia sing pagkaon para sa hinaplas ni Jehova nga si David kag sa iya mga tinawo. (1 Samuel 25:3, 11, 18) Si Jose kag si Abigail matawag nga mainandamon bangod nahantop nila ang kabubut-on sang Dios kag nagpanghikot nga may kaalam kag paghangop.

Busa, sang ginlaragway ni Jesus nga mainandamon ang matutom nga ulipon, ginpahangop niya nga ang mga ginatiglawas sina nga ulipon mangin mahinantupon, maalamon, kag mahangpunon bangod ginapasad nila ang ila pagtuo, buhat, kag panudlo sa kamatuoran sang Pulong sang Dios.

[Footnote]