Bipangujo bya Batangi

Lelo i bika byādi bisaka kunena Yesu pa kunena’mba umpika wandi wādi wa kwikala wa “manwa”?

Yesu wāipangwile amba: “Lelo yewa umpika wa binebine, udi na manwa i ani? ukapebwa kipango kudi mfumwandi amba: Undamine, ulēlamo ne babidibwa pa kitungo kya mwaka po kitungilwe.” (Mateo 24:45) “Umpika” upāna ‘bidibwa’ bya ku mushipiditu i kipwilo kya Bene Kidishitu bashingwe māni a mushipiditu. Mwanda waka Yesu wēbetyile bu ba manwa? *

Tukokeja kwimvwanija senene kine kyādi kisaka kunena Yesu pa kutela kishima “manwa” mu bufundiji bwa Yesu mwine. Kimfwa, Yesu pa kunenena padi “umpika wa binebine, udi na manwa,” wāletele lukindi lwa bajike dikumi bādi batengele kwiya kwa musoñañani. Bajike betuvuluja Bene Kidishitu bashingwe māni ba kumeso kwa 1914 bādi batengele na kipyupyu kwiya kwa Musoñañani wabo mukatampe, ke Yesu Kidishitu kadi. Pa bano dikumi, bajike batano kebātenwepo na māni paile musoñañani, ne kubulwa bābulwa kutanwa ku butundaile. Aba bakwabo batano bēlombwele bu ba manwa nansha ba ñeni. Bēlamije māni mavule ebakweshe bendelele kumunika kitōkeji kufika ne byāile musoñañani wēbetabija kutwela mu masobo.—Mateo 25:10-12.

Paile Yesu mu lupusa lwa Bulopwe mu 1914, bashingwe māni bavule badi batengele amba tusa kwitana nandi mūlu na mu kukopa kwa diso. Inoko, badi bakidi na bivule bya kulonga pano pa ntanda, ino bamo kebadipo belongolole mwa kwingidila. Pamo enka bwa bajike bampikwa manwa nansha babivila, kebabadikilepo bidi kwikomeja ku mushipiditu, o mwanda kebadipo belongolole mwa kwikadila nyeke bantu bamunika kitōkeji. Ino bavule shabo balongele bya ñeni—baikele na tunangu ne bujinguludi—ne kushala bashala bakomo ku mushipiditu. Kitatyi kyobalombwelwe amba kudi mingilo mivule ibatengele kumeso, baikele kusangela kuvuija’yo. O mwanda belombwele bu “umpika wa binebine, udi na manwa.”

Tala kadi mwāingidijije Yesu kishima “manwa” mu Mateo 7:24. Wānene amba: “Kadi wakwivwana īno myanda yami walongelapo monka, nankyo nkamudingakenya pamo na muntu wañeni washimikile njibo yandi pa dibwe.” Muntu wa ñeni nansha wa manwa ūbakanga pantu pakomo nkē, uta mutyima ku kimpumpu. Ino, yewa mulembakane ūbaka njibo yandi pa musenga ku mfulo yapomoka. Nanshi mulondi wa Yesu udi na manwa umonanga kulampe bipa bibi bilupuka ku kulonda tunangu twa bantu. Kunañuna kwandi ne kusansanya kumulengeja ashimike lwitabijo lwandi, ne bilongwa, ne bufundiji pa byobya byāfundije Yesu. Mo monka mulongelanga ne “umpika wa binebine, udi na manwa.”

Tala monka, muswelo wingidijibwe kishima “manwa” mu malamuni mavule a Bisonekwa bya Kihebelu. Kimfwa, Felo wātongele Yosefa bu wa kupāna bya kudya mu Edipito. Kino kyādi kipindi kya mu mpango ya Yehova ya kupāna bidibwa ku bantu bandi. Mwanda waka Yosefa wātongelwe? Felo unenena padi Yosefa amba: “Kutupu mwivwanije wa ñeni pamo na abe.” (Ngalwilo 41:33-39; 45:5) Mo monka ne Bible unena Abikele amba, “wādi wa ñeni biyampe.” Mwanda wāpene bidibwa kudi Davida, mushingwe māni wa Yehova ne ku bantu bandi. (1 Samwele 25:3, 11, 18) Ba Yosefa ne Abikele bāityilwe bu ba ñeni nansha ba manwa mwanda bāikele kunañuna kyokya kisaka Leza ne kulonga bintu na kumona kulampe ne bujinguludi.

Nanshi pātelele Yesu umpika wa binebine amba udi na manwa, wādi usaka kulombola’mba boba bonso bakabunda uno umpika bakekala na kusansanya, bamona kulampe kadi ne na bujinguludi mwanda i bashimike lwitabijo lwabo, bilongwa byabo, ne bufundiji bwabo pa Kinenwa kya Leza kya bubinebine.

[Kunshi kwa dyani]