Malwihu Kufuma Kudi Antañi

Indi Yesu watalishili mudi hakuhosha nindi nduñu windi wakashinshi wukekala “wamaana”?

Yesu wehwili lwihu nindi: ‘Indi nduñu wamaana nikashinshi anenkuwu kudi nkaka yindi mudimu wakuhemba amwitala dindi, nakuyinka yakudya yawu hampinji yatelela hinyi?’ (Matewu 24:45) “Nduñu” wahanaña “yakudya” yakuspiritu hichipompelu chaweniKristu awayishewa naspiritu. Muloñadi Yesu chayiteneniyi nindi akweti maana? *

Twatela kutiyisha chiwahi kuntañishilu yaYesu hachuma chalumbulwileñayi kutalisha kwizu dakwila nawu “maana.” Chakutalilahu, chahosheliyi hadi ‘nduñu wamaana nikashinshi,’ Yesu waheni chishimu chawajiki ikumi awambanda adiña nakuhembelela kwinza kwansumbuli. Ajiki awambanda atwanukishaña eniKristu awayishewa adiña nakuhembelela chikupu kwinza kwaNsumbuli muneni, Yesu Kristu henohu 1914 kanda yishiki. Hakachi kanawa ajiki awambanda ikumi, atanu hiyadiña namanji ashikilaku hampinji yenjiliyi nsumbuli, nawa akañenyi kuwanika kuchawija chakusumbula. Atanu adiña namaana. Ahembeli manji amavulu kulonda manoñu awu atweshi kutwalekuhu kutoñeka hampinji yenjiliyi nsumbuli nawa ayitejeli kuwanika kuchawija.—Matewu 25:10-12.

Chenjili Yesu muñovu yaWanta windi mu 1914, amavulu hakachi kaweniKristu awayishewa akeñeleña kudibomba nindi mwiwulu hohenohu. Hela chochu, hamaseki hadiña mudimu weneni wuyateleleluwu kukalakala, nawa amakwawu hiyadiloñesheli kukalakala wuna mudimuku. Kufwana ajiki awambanda akadi maana, hiyadikolesheli chadimu lwakuspirituku, dichi hiyadiloñesheli kutwalekahu kwikala akwakutoñeka chejejuku. Ilaña amavulu, azatili mwamaana—nakashinshi nikubabala, nawa ayikolesheli lwakuspiritu. Chelukiluwu nawu mudimu weneni wudi kumbidi, adiloñesheli namuzañalu kuzata iwu mudimu. Dichi, adimwekesheli kwikala ‘nduñu wamaana nikashinshi.’

Talenu cheñi Yesu chazatishiliyi izu dakwila nawu ‘maana’ haMatewu 7:24. Yesu wahosheli nindi: “Antu ejima akutiya awa mazu amami hiyakuyila, akayifwikija neyi mukwamaana watuñilili itala dindi helola.” Mukwamaana watuñaña chakola, nakutoñojoka nindi kunateli kwinza nvula nimpepela yeneni. Kwambukaku, wabula maana watuñilaña hawusekulula nawa itala dindi dahumukaña. Dichi kambanji waYesu wamaana himuntu wamwenañahu dehi yuma yatama yafumaña hakulondela maana awuntu. Kashinshi kindi nikutoñojoka chiwahi kwamuleteshaña kushindamesha chikupu chikuhwelelu chindi, nzatilu, nintañishilu yindi hayuma yatañishiliyi Yesu. ‘Nduñu wamaana nikashinshi’ wakalakalaña muniyi njila.

Shinshikenu cheñi nzatishilu yezu dazatishawu nawu ‘maana’ munyikanda yayivulu yaNsona jachiHeberu. Chakutalilahu, Fwaro wamwinkeli Yosefu mudimu wakuhemba yakudya yamuEjipitu. Iyi yadiña ntanjikilu yaYehova yakuloñeshela antu jindi yakudya. Muloñanyi wamutondeleluwu Yosefu? Fwaro wahosheli nindi: ‘Kwosi muntu washinshika wukweti maana wakweseka naneyuku.’ (Kutachika 41:33-39; 45:5) Chochimu, Bayibolu yahosha nawu Abigayili wadiña “namaana.” Wamwinkeli yakudya wawayishewa waYehova, Davidi niantu jindi. (1 Samweli 25:3, 11, 18) Yosefu niAbigayili ayiteneni nawu akweti maana muloña elukili nkeñelu yaNzambi nakuzata nakashinshi nawa mukubabala.

Dichi neyi chamulumbulwili Yesu nduñu wakashinshi hamu neyi wukweti maana, wachimwekesheli nindi ana akwimenaku iwu nduñu akumwekesha maana, kashinshi, nikubabala muloña ashindamesha chikuhwelelu chawu, nzatilu nintañishilu yawu Hezu daNzambi dalala.

[Tumazu twaheshina]