Karemdbã sogsgo

A Zezi ra rat n yeelame tɩ bõe, a sẽn yeel tɩ yẽ tʋm-tʋmd sẽn tũud sɩdã na n talla “yamã”?

A Zezi sẽn wa n gomd ne a karen-biisã, a sok-b-la woto: “Ãnda n yaa tʋm-tʋmd sẽn tũud sɩd la sẽn tar yam, t’a Zusoabã kõ-a noor t’a ges a zak yell n moeneg a zakã wa sẽn zemse?” (Matɩe 24:45) Naoor wʋsgo, Gũusg Gasgã tika Biiblã zug n wilg vẽeneg tɩ “tʋm-tʋmd” ning sẽn kõt tẽebã rɩɩbã yaa kiris-neb nins sẽn paam vʋʋsem sõngã zaeebã sulli. Bõe yĩng t’a Zezi yeel tɩ b tara yam? *

D sã n ges a Zezi meng goamã pʋgẽ, d tõe n bãnga “yam” ning yell a sẽn gomdã võore. Wala makre, a Zezi sẽn wa n gomd “tʋm-tʋmd sẽn tũud sɩd la sẽn tar yamã” yellã, a goma pʋg-sadb piigã sẽn da gũud pʋg-paal sɩdã waangã yelle. Pʋg-sadbã kibarã tẽegda tõnd kiris-neb nins sẽn paam vʋʋsem sõngã zaeebã sẽn da gũud pʋg-paal sɩd a Zezi waangã ne b sũur fãa, sẽn deng yʋʋmd 1914 sasa wã. Pʋg-sadb piigã sʋka, a nu n pa tall fɩtl kaam sẽn sekd b na yaas n gũ pʋg-paal sɩdã waango. Bãmb rãmb pa paam n tũ n kẽ kãadmã kibsẽ ye. La a nu wã sẽn kellã wilgame tɩ b tara yam. B zãa kaam wʋsgo, n tõog n yaas n gũ pʋg-paal sɩdã waango, n paam n kẽ kibsẽ wã. (Matɩe 25:10-12) A Zezi sẽn paam naam saasẽ yʋʋmd 1914, kiris-neb nins sẽn paam vʋʋsem sõng zaeebã sʋk neb wʋsg ra tẽedame tɩ b na n tɩ bʋʋg-a-la saasẽ wã sasa kãng bala. La mikame tɩ tʋʋm wʋsg n ket b sẽn da segd n tʋm tẽng zugu, la sãnda ra pa segl b mens n na n tʋm tʋʋm-kãng ye. Wala pʋg-sadb nins sẽn yɩ yalembã, nin-kãensã ra pa reng segl b mens tẽebã wɛɛngẽ sõma, tɩ woto kɩt tɩ b pa tõog n kell n tall vẽenem ye. La wʋsg talla yam, n pĩnd n segl b mense, tɩ paas b tẽebã pãnga. B sẽn bãng tɩ tʋʋm wʋsg n ketã, yɩɩ ne sũ-noog la b kẽes b mens a pʋgẽ. Woto, b wilgame tɩ bãmb la “tʋm-tʋmd sẽn tũud sɩd la sẽn tar yamã.”

D ges a Zezi sẽn tũnug ne gom-bi-kãngã to-to, a sẽn wa n zãmsd nebã tãngã zugã. A yeelame yaa: ‘Ned ning fãa sẽn wʋmd goam nins mam sẽn togsã n sakd-ba, yẽ na n yɩɩ wa yam soab sẽn me a roog kugr zugu.’ (Matɩe 7:24) Ned sẽn tar yam meta a roog kegemd kãn-kãe, tɩ sebg ra wa tus n lub ye. La yalem meta a roog bĩisr zugu, tɩ wa siig n bas-a. Rẽnd a Zezi karen-biig sẽn tar yam yaa ned ning sẽn dengd n bãngd yel-beed nins sẽn wate, f sã n teeg ninsaalb yamã. A yamã sẽn vẽena yĩng kɩtame t’a tikd a tẽebã, a tʋʋmã la bũmb nins a sẽn zãmsd nebã a Zezi goamã zugu. “Tʋm-tʋmd sẽn tũud sɩd la sẽn tar yamã” me maanda woto.

D leb n ges b sẽn tũnug ne gom-bil ning sẽn yaa “yamã” to-to, Biiblã babg ning b sẽn gʋls ne hebre wã pʋgẽ. Wala makre, a Faraõ yaka a Zozɛf t’a yɩ Ezipt koodã yel-gɛta. Yaa a Zeova n da segl yɛlã woto sẽn na yɩl n dɩlg a nin-buiidã kom wakate. Bõe yĩng tɩ b yãk a Zozɛfe? A Faraõ yeel-a lame yaa: “Ned ka be t’a bãngr ne a yam le ta foom ye.” (Sɩngre 41:33-39; 45:5) D tõe n yeelame t’a Abigayill me yɩɩ pag sẽn tall yam. Baa ne a sɩdã sẽn tõdg t’a kõn kõ a Davɩɩd sẽn yaa a soab ning a Zeova sẽn yãkã ne a poorẽ dãmbã rɩɩbã, a Abigayill sak n kõ-b lame. (1 Sãmwɛll 25:3, 11, 18) D tõe n yeelame t’a Zozɛf ne a Abigayill yɩɩ yam dãmba, bala b bãnga a Zeova raabã sẽn yaa a soaba, n deng n beool yɛlã la b tʋm ne yam.

Woto, a Zezi sẽn wa n bilgd tʋm-tʋmd sẽn tũud sɩdã n yetẽ t’a yaa yam soabã, a wilgame tɩ tʋm-tʋmdã sẽn makd neb ninsã na n talla yam sẽn vẽen sõma. Sẽn paas me b na n dengd n wʋmda yɛlã võor sõma bala b tẽebã, b manesmã la bũmb nins b sẽn zãmsd nebã fãa tika Wẽnnaam Gomdã zugu.

[Tẽngr note]