Au Uianga a te Aronga Tatau
Au Uianga a te Aronga Tatau
Eaa ra te aiteanga i ta Iesu tuatua i tona karanga anga e ka akaari tona tavini akono meitaki i te tu “pakari”?
Kua ui a Iesu i te uianga e: “Koai te tavini akono meitaki e te pakari, i ta tona pu i akaaere i tona ngutuare, ei tua i te kai na ratou i te ora mou ra?” (Mataio 24:45) Ko te “tavini” e oronga ra i te “kai” pae vaerua koia oki ko te putuputuanga o te au Kerititiano akatainuia i te vaerua. Eaa a Iesu i kapiki ei ia ratou e e pakari? *
Ka marama meitaki atu tatou mei ta Iesu uaorai apiianga e eaa te aiteanga i tana tuatua no te kupu, “pakari.” Ei akaraanga, i tona tuatua anga no runga i “te tavini akono meitaki e te pakari,” kua oronga a Iesu i te parapore o te au paretenia tino ngauru e tiaki ra i te taenga mai o te tane akaipoipo ou. Te akamaara maira te au paretenia tino ngauru ia tatou no runga i te au Kerititiano akatainuia i mua ake i te mataiti 1914 e tatari marie ra i te taenga mai o te Tane Akaipoipo ou maata, ko Iesu Karaiti. E rima o te au paretenia tino ngauru, kare i rava ta ratou inu i te tae anga mai te tane akaipoipo ou, e kare atura ratou i tae ki te oroa akaipoipo. Ko tetai toko rima, kua tau ia ratou te pakari. Kua akapapa rai ratou kia rava ta ratou uaorai inu kia marama ua rai ta ratou turama me tae mai te tane akaipoipo ou e kua akatikaia atura ratou ki roto i te oroa akaipoipo.—Matthew 25:10-12.
I te aere mai anga a Iesu i roto i tona mana Patireia i te mataiti 1914, e manganui te aronga o te au Kerititiano akatainuia te tapapa ra kia piri vave atu kiaia i te rangi. Inara, e maata ta ratou angaanga ka rave i te enua nei, e kare tetai papaki i papa no te reira. Mei te au paretenia neneva, kare ratou i akamatutu ana ia ratou uaorai i te pae vaerua i mua ake, no reira kare ratou i papa kia angaanga atu rai ei aronga apai marama. Kareka te maataanga, kua akaari ratou i te pakari—ma te karape e te matakite—e kua akamatutuia i te pae vaerua. I te kite anga ratou e e maata te angaanga ka raveia, kua ngakoikoi atura ratou i te rave i te reira ma te rekareka maata. No reira, kua riro tikai ratou ei “tavini akono meitaki e te pakari.”
E akamanako katoa ana i te tu i taangaanga ai a Iesu i te kupu “pakari” i roto ia Mataio 7:24. Kua tuatua a Iesu e: “Ko tei akarongo mai i taku nei tuatua, e akono atura, e arite au iaia i tetai tangata pakari, ko tei akatu i tona are ki runga i te papa.” Ko te tangata pakari ka patu aia kia ngaueue kore, i te akamanako anga me tupu ake tetai uriia. I tetai tua ra, ka patu te tangata neneva ki runga i te one e ngere iora i tona are. No reira ko te tangata pakari tei aru ia Iesu, koia ia ko te kite atura i te au openga kino o te aru anga i te pakari o te tangata. Ka riro tona tu marama e tana ikianga tau i te arataki iaia kia akatumu ngaueue kore i tona akarongo, tana au angaanga, e te au apiianga ki runga i ta Iesu i apii. Mei koia katoa te tu o “te tavini akono meitaki e te pakari.”
E akara katoa ana, i te taangaanga angaia te kupu tei uriia ei “pakari” i roto i te au urianga e manganui o te au Tuatua Tapu Epera. Ei akaraanga, kua akamana a Pharao ia Iosepha ei akono i te kai o Aiphiti. E tuanga teia no ta Iehova akanoonooanga i te oronga anga i te kai na tona iti tangata. Eaa ra a Iosepha i ikiia ai? Kua tuatua atura Pharao kiaia e: “Kare atu e tangata i kite, e te karape, mei ia koe na.” (Genese 41:33-39; 45:5) Te karanga katoa ra rai te Pipiria e e “kite meitaki [to Abigaila i] te tuatua.” Kua oronga aia i te kai na tei akatainuia e Iehova, koia oki a Davida, e no tona au tangata. (1 Samuela 25:3, 11, 18) Ka tau rai kia kapikiia a Iosepha raua ko Abigaila e e pakari no te mea kua marama raua i to te Atua anoano e kua akaari i te tu matakite e kua rave i te ikianga tau.
No reira, i te akataka mai anga a Iesu i te tu pakari to te tavini akono meitaki, te akakite maira aia e ko te aronga tei akatutuia mai e taua tavini ra, ka akaari mai ratou i te tu marama, te tu matakite, e te ikianga tau no te mea te akatumu ra ratou i to ratou akarongo, ta ratou au angaanga, e te au apiianga ki runga i te tuatua mou a te Tuatua a te Atua.
[Tataanga Rikiriki i Raro]
^ para. 3 Te uri ra te “pakari” i te tuatua Ereni e phroʹni·mos. Te akakite ra te tataanga, Word Studies in the New Testament, na M. R. Vincent, e i te maataanga o te taime te tou ra teia kupu ki te tu pakari tau e te matakite.