Mibuzyo Yabasikubala

Ino Jesu wakali kupandulula nzi naakaamba kuti muzike wakwe musyomesi unooli muzike “uucenjede”?

Jesu wakabuzya mubuzyo wakuti: “Nguni muzike musyomesi uucenjede ngwaakakazika mwami wakwe kuti abe mwami wabo basiŋanda bakwe, abaabile zilyo zyabo kuciindi ceelede?” (Matayo 24:45) “Muzike” waabila “zilyo” zyakumuuya nimbungano ya Banakristo bananikidwe amuuya. Ino nkaambo nzi Jesu ncaakabaamba kuti balicenjede? *

Tulakonzya kumvwisya ncaakapandulula Jesu naakaamba bbala lyakuti “uucenjede” kwiinda mukuyiisya kwakwe. Mucikozyanyo, naakali kwaamba zya “muzike musyomesi uucenjede,” Jesu wakaamba acikozyanyo cabasimbi bali kkumi ibakali kulindilila kuboola kwasibwiinga. Basimbi aabo batuyeezya Banakristo bananike ibakali kulindilila kusika kwa Sibwiinga mupati, Jesu Kristo, kuutanasika mwaka wa 1914. Akati kabasimbi bali kkumi, bosanwe wakabamanina mungwimba, alimwi ciindi sibwiinga naakasika taakwe nobakajanika kupobwe lyabwiinga. Bamwi bosanwe bakalicenjede. Bakalibambilila limwi mungwimba munji aboobo mumuni ngobakajisi wakazumanana kusikila ciindi sibwiinga naakasika alimwi bakazumizigwa kunjila mupobwe.—Matayo 25:10-12.

Jesu naakasika munguzu zya Bwami, nkokuti naakatalika kweendelezya mumwaka wa 1914, bunji bwa Banakristo bananikidwe bakajisi bulangizi bwakuba anguwe mpoona-mpoona kujulu. Nokuba boobo, bakacijisi mulimo mupati anyika, alimwi bamwi taakwe nobakalibambilide kuucita. Mbubonya mbuli basimbi bafwubafwuba, taakwe nibakaliyumya kumuuya kakucili ciindi, aboobo tiibakalibambilide kuzumanana kunyamuna mumuni. Pele bunji bwabo bakalicenjede—bakacita cabusongo akubona ziboola kumbele—alimwi bakayumizigwa kumuuya. Nibakaziba kuti kwakacili mulimo mupati kumbele, bakalibambila kuuzuzikizya calukkomano. Kwiinda mukucita boobo, bakalitondezya kuba “muzike musyomesi uucejende.”

Amulange-lange alimwi Jesu mbwaakabelesya bbala lyakuti “uucenjede” kulugwalo lwa Matayo 7:24. Jesu wakati: “Umwi aumwi uuswiilila majwi aangu aya akwaacita uzookozyanisigwa amuntu uucenjede iwakayaka iŋanda yakwe atala amwala.” Muntu uucenjede wakayaka ŋanda njumu, kazi kuti kulakonzya kuboola guwo. Mukwiimpana, muntu mufwubafwuba wakayaka ŋanda yakwe amuseenga. Aboobo, mutobeli wa Jesu uucenjede ngooyo uuwabonena limwi mapenzi aakonzya kuboola akaambo kakutobela busongo bwabantunsi. Bupampu bwakwe akuciziba kusala bweelede zipa kuti lusyomo lwakwe, micito alimwi anzyayiisya kazitomene anjiisyo zya Jesu. Awalo “muzike musyomesi uucenjede” mbwacita oobo.

Alimwi amubone bbala lyakuti “uucenjede” mbolibelesyedwe mu Magwalo aa Cihebrayo munzila zinji. Mucikozyanyo, Farao wakasala Josefa kweendelezya mulimo wakuyobola zilyo mumatala mu Egepita. Eeci cakaliswaangene abubambe bwa Jehova bwakusanina bantu bakwe. Ino nkaambo nzi Josefa ncaakasalwa? Farao wakamwaambila kuti: “Taakwe musongo uucenjede mbuli nduwe.” (Matalikilo 41:33-39; 45:5) Awalo Abigayeli, Bbaibbele limwaamba kuti ‘wakali musongo.’ Wakaabila Davida munanike wa Jehova abaalumi mbaakali abalo zyakulya. (1 Samuele 25:3, 11, 18) Josefa a Abigayeli balakonzya kwaambwa kuti bakalicenjede akaambo kakuti bakajisi bupampu bwakuziba luyando lwa Leza, bakazibonena limwi zyakali kuboola alimwi bakasala bweelede.

Aboobo, Jesu naakaamba kuti muzike musyomesi ulicenjede, wakali kutondezya kuti aabo bayiminina muzike banooli aabupampu, bayoobona ziboola kumbele akusala kabotu akaambo kakuti lusyomo lwabo, micito alimwi akuyiisya kwabo kunooyeeme aa Jwi lya Leza lyakasimpe.

Bupanduluzi buyungizidwe