“Zot Papa I Annan Mizerikord”
“Zot Papa I Annan Mizerikord”
“Kontinyen demontre mizerikord, zis parey zot Papa i annan mizerikord.” —LIK 6:36, NW.
1, 2. Ki mannyer parol ki Zezi ti dir avek bann profeser lalwa, bann Farizyen ek son bann disip i demontre ki mizerikord i en kalite ki presye?
TI ANNAN apepre 600 diferan komannman ek regilasyon dan Lalwa ki ti ganny donnen par lentermedyer Moiz. Menm si bann Izraelit ti oblize aplik Lalwa Moiz, i ti osi tre enportan pour zot demontre mizerikord. Annou egzamin sa ki Zezi ti dir avek bann Farizyen ki pa ti abitye demontre mizerikord anver lezot. De fwa Zezi ti reprimann zot, par fer resorti lord ki Bondye ti’n donnen: “Se [“mizerikord,” NW] ki mon oule, e pa sakrifis zannimo.” (Matye 9:10-13; 12:1-7; Osea 6:6) Ver lafen son minister, Zezi ti dir: “Maler! Profeser Lalwa ek Farizyen, ipokrit! Zot donn Bondye en dizyenm parti lanmant, lannet ek kimen, me zot negliz sa ki pli enportan dan Lalwa, tel ki lazistis, konpasyon [oubyen “mizerikord,” NW], ek fidelite: pourtan sanmenm sa ki zot devre pratike, san negliz leres.”—Matye 23:23.
2 I kler ki Zezi ti konsider mizerikord konman en kalite tre enportan. I ti dir avek son bann disip: “Kontinyen demontre mizerikord, zis parey zot Papa i annan mizerikord.” (Lik 6:36, NW) Me, pour kapab “fer tou parey [Bondye]” dan sa domenn, nou bezwen konn vre definisyon mizerikord. (Efezyen 5:1) Deplis, letan nou konpran byenfe ki mizerikord i anmennen sa pou pous nou pour demontre sa kalite ankor pli plennman dan nou lavi.
Mizerikord anver bann ki dan bezwen
3. Akoz nou bezwen tourn ver Zeova pour aprann ki si sa vre mizerikord?
3 En psalmis ti sante: “Zeova i annan konpasyon ek mizerikord, i pa ankoler vitman e i annan en gran labonte leker. Zeova i bon avek tou dimoun, e son mizerikord i dan tou sa ki i fer.” (Psonm 145:8, 9) Zeova i en “Papa ki ranpli avek [“mizerikord,” NW], Bondye ki touzour donn konsolasyon.” (2 Korentyen 1:3) Nou demontre mizerikord ler nou tret lezot avek konpasyon. Sa i en laspe vreman enportan dan personnalite Bondye. Son legzanp ek son lenstriksyon i kapab ansenny nou ki si sa vre mizerikord.
4. Ki Izai 49:15 i ansenny nou konsernan mizerikord?
4 Parey i’n ganny rikorde dan Izai 49:15, Zeova i dir: “Eski en madanm i kapab oubliy son pti baba, i pa ava pran pitye pour garson sorti dan son vant?” Sa mo Ebre ki’n ganny tradwir isi konman “pitye” i relye avek sa mo mizerikord dan Psonm 145:8, 9, ki’n ganny site pli o. Sa santiman ki pous Zeova pour demontre mizerikord i ganny konpare avek sa gran lafeksyon ki en manman i normalman resanti pour son pti baba ki i pe donn tete. Petet sa pti baba i lafen oubyen i bezwen lezot keksoz. Sa santiman ranpli avek konpasyon oubyen konpreansyon ki sa manman i santi pou pous li pour pran swen avek son pti baba. Zeova i santi sa menm santiman ranpli avek tandres pour bann anver ki i demontre mizerikord.
5. Ki mannyer Zeova ti montre ki i “annan en kantite mizerikord” anver Izrael?
5 I byen pour santi konpasyon me i pli enportan pour azir dan en fason pratik pour ed sa ki dan bezwen. Annou vwar ki mannyer Zeova ti reazir kan son bann adorater ti vin lesklav Lezip, apepre 3,500-z-an pase. I ti dir avek Moiz: “Mon’n vreman vwar soufrans ki mon pep i ladan Lezip, e mon’n tann zot pe kriye akoz bann ki fors zot travay, parski mon konn tre byen sa douler ki lo zot. Mon pe desann pour al delivre zot dan lanmen bann Ezipsyen e mon pou tir zot laba e anmenn zot dan en bon pei ki gran. En pei kot i koul dile ek dimyel.” (Egzod 3:7, 8) Apepre 500-z-an apre ki bann Izraelit ti’n ganny libere sorti Lezip, Zeova ti rapel zot: “Mwan ki ti fer Izrael sorti Lezip e ki ti delivre zot dan lanmen Lezip e dan lanmen tou bann rwayonm ki ti pe abiz zot.” (1 Samyel 10:18) Lefet ki zot ti rezet bann standar zis Bondye, bann Izraelit ti souvan trouv zot dan bann sitiasyon difisil. Me, Zeova ti annan konpasyon pour zot e ti kontinyelman vin sekour zot. (Ziz 2:11-16; 2 Kronik 36:15) Sa i montre ki mannyer sa Bondye lanmour i azir anver bann ki dan bezwen, dan danze, oubyen dan difikilte. Zeova i “annan en kantite mizerikord.”—Efezyen 2:4, NW.
6. Ki mannyer Zezi Kri ti imit son Papa ler pe demontre mizerikord?
6 Kan i ti lo later, Zezi Kri ti imit son Papa dan en fason parfe ler pe demonte mizerikord. Ki mannyer Zezi ti azir ler de zonm aveg ti sipliy li, an dizan: “Met, Garson David pran pitye pour nou!” Zot ti pe sipliy Zezi pour fer en mirak pour ki zot vwar kler. Zezi ti fer li, me i pa ti zis fer sa mirak koumsa, san okenn santiman. Labib i dir ki “Zezi ti pran pitye pour zot e tous zot lizye. Deswit zot ti kapab war.” (Matye 20:30-34) Sa santiman pitye ti pous Zezi pour fer en kantite mirak ki ti soulaz bann aveg, bann ki posede par demon, bann lepre, e paran bann zanfan ki ti pe soufer.—Matye 9:27; 15:22; 17:15; Mark 5:18, 19; Lik 17:12, 13.
7. Ki legzanp Zeova ek son Garson i ansenny nou lo mizerikord?
7 Legzanp Zeova ek Zezi Kri i demontre ki mizerikord i annan de laspe: resanti konpasyon, senpati, oubyen pitye anver sa enn ki dan bezwen e aksyon ki ganny fer pour soulaz sa enn. Sa de eleman i neseser si en dimoun i oule demontre mizerikord. Dan Labib, mizerikord i pli souvan pe refer avek en akt labonte ki ganny demontre anver sa bann ki dan bezwen. Me, ki mannyer mizerikord i ganny demontre ler en fot in komet? Eski sa i osi enplik pa fer en aksyon ki kapab ganny konsidere konman negatif, tel parey evite donn pinisyon?
Mizerikord anver bann peser
8, 9. Kwa ki ti enplike dan mizerikord ki ti ganny demontre anver David apre ki i ti’n fer pese avek Batseba?
8 Annou vwar ki ti arive apre ki profet Natann ti’n diskit avek David ki ti en Lerwa Izrael, konsernan son relasyon adilter ki i ti’n annan avek Batseba. David ki ti’n repantir ti priye: “Demontre faver anver mwan, O Bondye, selon ou labonte leker. Selon labondans ou mizerikord, efas mon bann pese. Lav mwan konpletman pour tir mon bann fot, e pirifye mwan avek mon pese. Parski mon konn mon bann lofans, e mon pese i devan mwan konstaman. Kont ou, zis ou menm, ki mon’n fer pese, e mon’n fer sa ki mal dan ou lizye.”—Psonm 51:1-4.
9 David ti santi en profon regre. Zeova ti pardonn son pese e pa ti donn li ek Batseba sa pinisyon ki zot ti ekspekte gannyen. Dapre Lalwa Moiz, David ensi ki Batseba ti’n devret ganny met a mor. (Deterononm 22:22) Menm si zot pa ti ganny eparnyen kont tou bann konsekans zot pese, me selman zot pa ti ganny met a mor. (2 Samyel 12:13) Ler Bondye i demontre mizerikord sa i enplik osi pardonn fot ki ganny komet. Kantmenm sa, i pa ezite pour pini dan en fason ki apropriye.
10. Menm si Zeova i demontre mizerikord ler i ziz nou, akoz nou pa merit pran son mizerikord alalezer?
10 Vi ki “pese in antre dan lemonn par en sel zonm [Adan]” e “rekonpans pour pese i lanmor,” tou dimoun i merit lanmor. (Romen 5:12; 6:23) Pa nou merit montre nou rekonesan ki Zeova i demontre mizerikord ler i ziz nou! Me, nou bezwen fer atansyon pour pa pran alalezer mizerikord Bondye. Deterononm 32:4 i dir: “Tou bann semen [Zeova] i lazistis.” Kan Bondye i swazir pour demontre mizerikord, i pa inyor son standar parfe lazistis.
11. Ki mannyer Zeova ti demontre en lazistis apropriye ler i ti tret sa problenm konsernan pese David avek Batseba?
11 Dan ka David ek Batseba avan ki sa zizman santans lanmor ti kapab ganny diminyen, zot pese ti pou bezwen ganny pardonnen. Bann ziz Izraelit pa ti ganny drwa fer sa. Si zot ti ganny permisyon pour ziz sa ka, zot ti pou oblize pronons en santans lanmor. I sanmenm ki Lalwa ti demande. Me, akoz son lalyans ki i ti’n fer avek David, Zeova ti oule vwar si ti annan en bon rezon pour pardonn pese David. (2 Samyel 7:12-16) Alors, Zeova, “sa Ziz lo later antye” sa enn “ki egzamin leker” ti swazir pour ziz sa ka li menm. (Zenez 18:25; 1 Kronik 29:17) Bondye ti kapab lir egzakteman sa ki ti annan dan leker David, vwar son repantans senser, e pardonn li.
12. Ki mannyer bann imen peser i kapab retir byenfe atraver mizerikord Bondye?
12 Sa mizerikord ki Zeova i demontre anver nou e ki fer li posib pour nou sorti anba sa santans lanmor ki nou’n erite akoz pese, i annakor avek son lazistis. Pour ki nou pese i ganny pardonnen san ki sa i kas son standar lazistis, Zeova in fourni sakrifis oubyen ranson son Garson, Zezi Kri. Sa i sa pli gran akt mizerikord ki’n zanmen deza ganny demontre. (Matye 20:28; Romen 6:22, 23) Si nou oule retir byenfe atraver mizerikord Bondye, ki kapab anpes nou ganny sa pinisyon lanmor akoz pese ki nou’n erite, nou bezwen “demontre lafwa dan son Garson.”—Zan 3:16, 36, NW.
En Bondye ki annan mizerikord ek lazistis
13, 14. Eski mizerikord Bondye i kontrol lefe son lazistis? Eksplike.
13 Parey nou’n vwar pli o, mizerikord Zeova pa kas son standar lazistis, me eski i annan en lefe lo son lazistis lo en serten degre? Eski mizerikord i diminyen lefe lazistis Bondye par annan kontrol lo la? Sa i pa ditou leka.
14 Atraver profet Osea, Zeova ti dir avek bann Izraelit: “Mon pou fer zot fiyanse avek mwan pour en letan endefini, mon pou fer zot fiyanse avek mwan avek ladrwatir e avek lazistis, avek labonte leker e avek mizerikord.” (Osea 2:19) Sa bann parol i klerman montre, ki lafason Zeova i demontre mizerikord i touzour annakor avek son bann kalite, sa i enkli lazistis. Zeova i “en Bondye ki annan mizerikord ek konpasyon, . . . pardonn fot, lofans ek pese, me dan okenn ka i pa pou akord gras pour pinisyon.” (Egzod 34:6, 7) Zeova i en Bondye ki annan mizerikord ek lazistis. Lo son size, Labib i dir: “Sa Ros, tou sa ki i fer i parfe, parski tou son bann semen i lazistis.” (Deterononm 32:4) Parey son mizerikord, lazistis Bondye i parfe. Napa enn ki pli siperyer ki lot, e osi napa ni enn ki bezwen lot pour kontrol son lefe. Plito, tou le de kalite i travay ansanm dan en larmoni parfe.
15, 16. (a) Kwa ki montre ki lazistis Bondye pa dir? (b) Kan Zeova pou anmenn son zizman lo sa move lemonn ki lasirans son bann adorater i kapab annan?
15 Lazistis Zeova pa dir. Lazistis i souvan relye avek en zizman e zizman i souvan demande ki bann ki’n komet sa ki mal i ganny sa pinisyon ki zot merite. Me, ler Bondye i aplik son lazistis sa i kapab vedir lavi pour bann ki merite. Par egzanp, ler lavil Sodonm ek Gomor ti ganny detrir, patrias Lot ek son de fiy ti ganny sove.—Zenez 19:12-26.
16 Nou kapab annan konfyans ki ler Zeova pou egzekit son zizman lo sa move lemonn, sa “gran lafoul” bann vre adorater, ki’n “lav zot rob e blansi li dan disan Lanyo,” pou ganny eparnyen. Alors, zot pou ‘sorti dan sa gran ladetres.’—Revelasyon 7:9-14.
Akoz nou devret demontre mizerikord?
17. Ki sa rezon vreman enportan nou annan pour demontre mizerikord?
17 Legzanp Zeova ek Zezi i vreman ansenny nou ki si sa vre mizerikord. Proverb 19:17 i donn nou en rezon vreman enportan pour nou demontre mizerikord: “Sa ki rann faver bann dernyen dimoun pe pret Zeova, e I pou rekonpans li pour son aksyon.” Zeova i kontan ler nou imit li ek son Garson par demontre mizerikord dan lafason ki nou azir antre kanmarad. (1 Korentyen 11:1) E sa i ankouraz lezot pour demontre mizerikord an retour. Akoz kan nou demontre mizerikord anver lezot, sa i pous lezot pour azir parey anver nou.—Lik 6:38.
18. Akoz nou devret fer en gran zefor pour demontre mizerikord?
18 Nou kapab dir ki mizerikord i konpoze avek plizyer bon kalite. Sa i enkli konpasyon, lanmour, ek labonte. I sa santiman ranpli avek konpasyon oubyen senpati, ki motiv en dimoun pour demontre mizerikord. Menm si mizerikord ki Bondye i demontre pa diminyen lefe son lazistis, Zeova pa ankoler vitman e i donn bann ki komet lemal sifizaman letan pour repantir. (2 Pyer 3:9, 10) Alors, mizerikord i relye avek pasyans e pa ankoler vitman. Vi ki demontre mizerikord i relye plizyer tre ki atiran, enkli plizyer laspe fri lespri Bondye, alor demontre mizerikord i vin en loportinite pour devlop sa bann lezot kalite. (Galat 5:22, 23) Pa i vreman enportan ki nou fer en gran zefor pour demontre mizerikord anver lezot!
‘Byennere bann ki annan mizerikord’
19, 20. Dan ki fason mizerikord i ganny laviktwar lo zizman?
19 Disip Zak i dir akoz mizerikord i devret en kalite esansyel dan nou lavi. I ti ekrir: “Pitye [oubyen “mizerikord,” NW] i ganny laviktwar lo zizman.” (Zak 2:13b) Zak ti pe koz konsernan mizerikord ki en adorater Zeova i montre anver lezot. I ganny laviktwar lo zizman dan sa sans ki, kan i ariv lemoman pour en dimoun “rann kont devan Bondye pour son prop lekor,” Zeova i pran an konsiderasyon lafason ki i’n demontre mizerikord e i pardon li lo baz sakrifis oubyen ranson Son Garson Zezi. (Romen 14:12) San okenn dout, enn parmi bann rezon akoz Bondye ti demontre mizerikord anver David konsernan son pese avek Batseba ti akoz li menm i ti en zonm ki ti demontre mizerikord anver lezot. (1 Samyel 24:4-7) De lot kote, “Bondye pou ziz san mizerikord bann ki napa mizerikord pour lezot.” (Zak 2:13a, NW) I pa etonan alor ki bann dimoun “san pitye” oubyen mizerikord i ganny trouve lo lalis parmi sa bann ki Bondye in rezerve pour “lanmor”!—Romen 1:31, 32.
20 Dan son Sermon lo Montanny, Zezi ti dir: “Byennere bann ki [“annan mizerikord,” NW] pour lezot, akoz Bondye pou [annan mizerikord] pour zot.” (Matye 5:7) Pa sa bann mo i montre dan en fason pwisan, ki sa bann ki pe rod mizerikord Bondye i devret zot menm demontre mizerikord! Lartik swivan pou diskit lo ki mannyer nou kapab demontre mizerikord dan nou lavi toulezour.
Ki ou’n aprann?
• Ki si sa mizerikord?
• Dan ki fason nou kapab demontre mizerikord?
• Dan ki fason Zeova i demontre ki i en Bondye ki annan anmenmtan mizerikord ek lazistis?
• Akoz nou devret demontre mizerikord?
[Kestyon]
[Portre lo paz 4]
Lafeksyon ki Zeova i annan pour bann ki dan bezwen i parey lafeksyon en manman pour son pti baba
[Portre lo paz 6]
Ki nou aprann konsernan mizerikord atraver bann mirak Zezi?
[Portre lo paz 7]
Eski Zeova ti inyor son lazistis kan i ti demontre mizerikord anver David?
[Portre lo paz 8]
Mizerikord ki Bondye i demontre anver bann imen peser i annakor avek son lazistis