‘Pende ru yvagapegua oporoporiahuvereko’

‘Peporoporiahuverekókena peẽ, pende Ru yvagapegua oporoporiahuverekoháicha avei.’ (LUCAS 6:36.)

1, 2. Mbaʼéichapa Jesús ohechauka iñimportanteha japoroporiahuvereko?

 MOISÉS rupive, Jehová omeʼẽ umi Israelguápe peteĩ léi orekóva seiscientos rupi umi mbaʼe ojapovaʼerã hikuái. Ñandejára heʼi chupekuéra ojapopaite hag̃ua upe léi heʼíva, péro avei oporoporiahuverekovaʼerãha hikuái. Upéicha Jesús heʼivaʼekue umi fariseópe, haʼekuéra ndoporoporiahuverekoihaguére. Dos vése omomanduʼa vaʼekue chupekuéra: “Che aipota peiporiahuvereko pende rapichápe, pemymbajuka rangue” (Mateo 9:​10-13; 12:​1-7; Oseas 6:6). Omohuʼãrõ guare hembiapo ko Yvy ape ári Jesús heʼi: ‘Pejererekóke peẽ mboʼehára ha Fariseokuéra rovamokõi! Peẽ pemeʼẽ Ñandejárape diézgui peteĩ pene ménta, anís ha komíno jepe. Pemboyke umi léi tuichave mbaʼe heʼíva: peporoporiahuverekovaʼerãha ha pejeroviavaʼerãha Ñandejárare’ (Mateo 23:23).

² Koʼã mbaʼe ohechauka Jesúspe g̃uarã iñimportanteve hague japoroporiahuvereko. Upévare heʼi hemimboʼekuérape: ‘Peporoporiahuverekókena peẽ, pende Ru yvagapegua oporoporiahuverekoháicha avei’ (Lucas 6:36). Jaikuaa raẽ vaʼerã mbaʼépa heʼise japoroporiahuvereko, ikatu hag̃uáicha jahechauka upéva Jehová ojapoháicha (Efesios 5:1). Avei jahecháramo umi mbaʼe porã oguerúva ñandéve, ñanemomýita jaiporiahuvereko hag̃ua ñande rapichakuérape.

Jaiporiahuverekókena umi oikotevẽvape

3. Mbaʼérepa ñamañavaʼerã Jehová rehe jaikuaa hag̃ua mbaʼépa heʼise jeporiahuvereko?

³ Pe Salmísta opurahéi péicha: ‘Ñandejára imbaʼeporã ha oporoporiahuvereko. Haʼe oporohayhu ha asýpe ipochy. Opavavépe haʼe ohechakuaa, ha iporiahuvereko oĩ opa hembiapokuéra ári’ (Salmo 145:​8, 9). Ñandejára rehe oje.’ He avei haʼeha ‘ñande Ru oporoporiahuverekóva ha  oporokonsoláva’ (2 Corintios 1:​3, BNP). Jahechamahaguéicha, Jehová oporoporiahuvereko térã otrata pyʼaporãme enterovépe. Jaikuaa hag̃ua mbaʼépa heʼise upéva, jahechavaʼerã pe ehémplo porã omoĩva ñandéve Jehová ha ñanemboʼéva iléi rupive.

4. Mbaʼépa ñanemboʼe Isaías 49:15?

⁴ Isaías 49:​15-pe Jehová oporandu: “Peteĩ kuña piko ikatu hesarái imemby kambúgui oiporiahuverekoʼỹre upe chugui osẽvaʼekuépe?”. Jaleemahaguéicha Salmo 145:​8, 9-pe ha pe evréo ñeʼẽme koʼápe ojeporúva, heʼise avei japoroporiahuvereko. Pe lívro hérava Isaías omombeʼu Jehová ñandeporiahuverekoha peteĩ kuña imembyraʼývaicha. Pe mitã hasẽrõ iñembyahýi térã oĩgui hasýva chupe, isy pyaʼe ohecha mbaʼépa oikotevẽ oiporiahuverekógui chupe. Upéicha avei, Jehová ñanderayhúgui ñandeporiahuvereko.

5. Mbaʼéichapa jahechakuaa umi Israelgua ohasavaʼekuére Jehová ‘ñandeporiahuverekoitereiha’?

⁵ Oporoporiahuverekóva ndahaʼéi heʼínteva oipytyvõseha hapichápe. Jahechami mbaʼépa ojapovaʼekue Jehová isiervokuéra oĩramo guare Egipto poguýpe, upéva ojapóma tres mil quinientos áño. Heʼivaʼekue Moiséspe: ‘Ahecha oiko asyha che rembiguaikuéra Egíptope. Ahendu ipyahẽ hikuái omombaʼapo pohýi rupi chupekuéra, ahechapaite ohasa asyha. Péina aguejy aipeʼa hag̃ua Egiptoygua poguýgui Israelguápe, upégui araha hag̃ua chupekuéra peteĩ yvy tuicha ha iporãvape. Ýicha osyry kamby ha eíra upe yvýpe’ (Éxodo 3:​7, 8). Quinientos áño Jehová oguenohẽhaguépe hembiguaikuérape Egíptogui, omomanduʼa chupekuéra: ‘Che poguenohẽvaʼekue peẽ Israelguápe Egipto ha opa tetã poguýgui’ (1 Samuel 10:18). Pyʼỹinte umi Israelgua osẽ peteĩ provlémagui ha oike jey ótrope. Heta ohasa asy hikuái naiñeʼẽrendúi rupi Ñandejárape. Upéicharamo jepe, Jehová oiporiahuvereko ha oipytyvõ chupekuéra (Jueces 2:​11-16; 2 Crónicas 36:15). Umi Israelgua ohasavaʼekuére, jahechakuaa mbaʼéichapa Jehová oipytyvõ isiervokuéra oikotevẽva ha ohasa asývape. Koʼã mbaʼére jahechakuaa Jehová ‘ñandeporiahuverekoitereiha’ (Efesios 2:4).

6. Mbaʼéichapa Jesús ohechauka oporoporiahuverekoha Itúvaicha?

⁶ Jesucristo oĩrõ guare ko Yvy ape ári, oporoporiahuverekovaʼekue Itúvaicha. Jahechamína mbaʼépa ojaporakaʼe mokõi ohechaʼỹva heʼíramo guare chupe péicha: “David raʼy, oreporiahuverekomína!”. Umi kuimbaʼe ojerure Jesúspe ojapomi hag̃ua peteĩ milágro: haʼekuéra ohechase jey. ‘Jesús oiporiahuvereko chupekuéra ha opoko hesakuérare, ha upepete umi ohechaʼỹva, ohecha jey’ (Mateo 20:​30-34). Ohayhu ha oiporiahuverekógui Jesús oipytyvõ umi ohechaʼỹvape, endemoniádo, iléprava, ha tuvakuéra ifamília hasývape (Mateo 9:27; 15:22; 17:15; Marcos 5:​18, 19; Lucas 17:​12, 13).

7. Mbaʼépa ñanemboʼe Jehová ha Jesús?

⁷ Jehová ha Jesús ohechauka ñandéve japoroporiahuvereko heʼiseha japorohayhu ha ñaipytyvõseha umi oikotevẽvape. Avei heʼise ñaipytyvõha ñande rapichápe ohasa asy jave. Koʼã mbaʼe ndojeíri ojuehegui. Ñandejára Ñeʼẽme japoroporiahuvereko heʼise jajapo opa mbaʼe iporãva ñande rapicha oikotevẽva rehehápe. Upéicha avei ojehusgáta jave peteĩ ñande rapichápe, ikatúpa ojeporiahuverekógui ndojekastigái hembiapo vaikuére?

Ojeporiahuvereko hembiapo vaívape

8, 9. Mbaʼéichapa Jehová oiporiahuvereko Davídpe heko vaírõ guare Bat-seba ndive?

⁸ Jahechamína mbaʼépa ojaporakaʼe rréi David oñemoñeʼẽrõ guare chupe proféta Natán, heko vai haguére haʼe Bat-seba ndive. Rréi David oñembyasyeterei ha oñemboʼe Jehovápe péicha: ‘Ñandejára cheporiahuverekomína, nde ningo ndepyʼaporã. Cheporiahuvereko ha cheperdona che rembiapo vaikuére. Chejohéi porã teko vaígui, chemopotĩ che rembiapo vaikuégui’ (Salmo 51:​1-4).

 ⁹ Jehová operdona Davídpe hembiapo vaikuére, oñembyasyeterei rupi ha oheja chupe ha Bat-sébape oikove. Heʼíramo jepe pe léi Moiséspe omeʼẽvaʼekuépe ojejukavaʼerãha chupekuéra (Deuteronomio 22:22). Jehová oheja chupekuéra oikove, ndohekýiriramo jepe umi mbaʼe oguerúva hembiapo vaikue (2 Samuel 12:13). Jehová ohechauka avei ñandeporiahuverekoha ñaneperdona jave. Upéicharamo jepe Jehová ndohejareíri avavépe hembiapo vaikue.

10. Mbaʼérepa naiporãi jajeroviaiterei ñandejehe ha Jehová ñandeporiahuverekotanteha voi?

¹⁰ Ñandejára Ñeʼẽme heʼi Adánre: ‘Peteĩ kuimbaʼe rupi oike pe pekádo ko Yvy ape ári’. “Pekádo apo repy niko ñemano” (Romanos 5:12; 6:​23, BNP). Upéicha rupi yvyporakuéra omano (Romanos 5:12; 6:23). Jahechakuaávo upéva, oiméne jaagradesete Jehovápe ñandeporiahuverekohaguére ñandehusgávo! Naiporãi jajeroviaiterei ñandejehe ha Jehová ñandeporiahuverekotanteha voi.” Deuteronomio 32:​4-pe heʼi Jehováre “hape hekojoja”. Jehová ñandeporiahuverekóramo jepe haʼe hekojoja.

11. Mbaʼépa ojapo Jehová David heko vaírõ guare Bat-seba ndive?

¹¹ David ha Bat-seba oikotevẽvaʼekue oñeperdona raẽ hembiapo vaikuére oñembovevúive hag̃ua chupekuéra ikastígo. Umi hués Israelgua pópe noĩri ojapo hag̃ua upéva. Jehová ohejárire ipopekuéra, haʼekuéra ojukaukavaʼerãmoʼã David ha Bat-sébape Léipe heʼiháicha. Jehová ohechakuaa rupi pe pákto ojapovaʼekue David ndive, ohecha ikatútapa oñeperdona chupekuéra (2 Samuel 7:​12-16). Upéicha rupi, pe Hués tuichavéva ha oikuaapáva ñande pyʼapýpe oĩva, ohusga pe oikovaʼekue (Génesis 18:25; 1 Crónicas 29:17). Ñandejára añoite oikuaa porã vaʼekue David pyʼapýpe oĩva, ohechakuaa oñembyasyha ikatu hag̃uáicha operdona chupe.

12. Mbaʼépa jajapovaʼerã Jehová ñandeporiahuvereko hag̃ua ñaneimperféktoramo jepe?

¹² Ñandeporiahuverekógui Jehová ohecha mbaʼéichapa ñandepeʼáta ñemano poguýgui. Jehová ñandeporiahuvereko jave ohechauka avei hekojojaha. Jehová ñaneperdona hag̃ua ombou Itaʼýra Jesucrístope omano hag̃ua ñanderehehápe. Péicha Jehová ohechauka ndaiporiha haʼéicha ñandeporiahuverekóva (Mateo 20:28; Romanos 6:​22, 23). Upévare, Jehová ñandeporiahuvereko ha ñaneperdona hag̃ua ñanerembiapo vaikuére ‘jajeroviavaʼerã Itaʼýra Jesucrístore’ (Juan 3:​16, 36).

Jehová ñandeporiahuvereko ha hekojoja

13, 14. Ikatúpa jaʼe Jehová oporoporiahuverekóramo omokangyha ihústisiape? Emyesakãmi

¹³ Jehová ñandeporiahuverekóramo jepe, hekojoja meme. Ikatúpa sapyʼánte ñandeporiahuvereko rupi, ñandehusga jave ombovevuive ñande kastígo? Mbaʼeveichavérõ.

¹⁴ Proféta Oseas rupive Jehová heʼi umi Israelguápe okomprometetaha chupekuéra hendive tekojojápe, mborayhúpe ha jeporiahuverekópe (Oseas  2:19). Koʼã mbaʼére jahechakuaa Jehová oporoporiahuverekóramo jepe hekojojaha avei. Ñandejára ‘oporoporiahuvereko, ipyʼaporã ha ñaneperdona, péro ndohejái avavépe okastigaʼỹre hembiapo vaikuére’ (Éxodo 34:​6, 7). Ñandejára ningo ñandeporiahuvereko ha hekojoja. La Bíbliape heʼi Jehováre haʼehína pe “Ita guasu ha pe hembiapo iporãitereíva, mayma hapekuéra hekoitepegua, hekojoja ha hekoitépe oiko” (Deuteronomio 32:​4, ÑÑM). Jahechaháicha ndaipóri Jehováicha hekojojáva ha ñandeporiahuverekóva. Koʼãva apytépe ndaipóri iñimportantevéva. Mokõive mbaʼe ombaʼapo porãiterei oñondive.

15, 16. a) Mbaʼérepa jahechakuaa Jehová hekojojáramo jepe, naipyʼahatãiha? b) Mbaʼépa ojapóta Jehová hembiguaikuéra rehehápe ohundívo ko múndo aña?

¹⁵ Jehová hekojojáramo jepe, naipyʼahatãi. Oñeñeʼẽ jave hustísia rehe, pyʼỹinte oñeñeʼẽ avei léi rehe ha mbaʼéichapa ojekastiga umi naiñeʼẽrendúivape. Jehová hustísia katu heʼise salvasión umi yvypóra iñeʼẽrendúvape g̃uarã. Pór ehémplo Jehová ohundírõ guare umi heko vaívape Sodoma ha Gomorrayguápe, osalva avei umi heko porãvape, Lot ha mokõi itajýrape (Génesis 19:​12-26).

¹⁶ Upévare jajeroviakuaa Jehová ohundíta vove ko múndo aña, osalvataha avei umi ‘aty guasúpe’. Koʼã Jehová rembiguaikuéra “heta ohasa asy vaʼekue, umi ojoheivaʼekue ijao pe Ovecha raʼy ruguýpe” (Apocalipsis [Revelación] 7:​9-14).

Mbaʼérepa japoroporiahuverekovaʼerã?

17. Mbaʼérepa japoroporiahuverekovaʼerã?

¹⁷ Jahechakuaa Jehová ha Jesucristo ehémplo rupive mbaʼépa heʼise japoroporiahuvereko. Koʼág̃a jahecháta mbaʼérepa jaiporiahuverekovaʼerã ñande rapichápe. Proverbios 19:​17-pe heʼi ‘oipytyvõva mboriahúpe Ñandejárape ojapo, haʼete voi omyengoviáta chupekuéra hembiapokue’. Upeichaite, Jehová ha Jesucrístope ombovyʼaiterei ñande jaiporiahuverekóramo ñande rapichakuérape (1 Corintios 11:1). Jajapóramo péicha ñamokyreʼỹta avei ñane ermanokuérape oporoporiahuvereko hag̃ua (Lucas 6:38).

18. Mbaʼérepa ñañehaʼãvaʼerã japoroporiahuvereko?

¹⁸ Jaiporiahuverekóramo ñande rapichápe japorohayhúta, ñandepojeráta ha ñandepyʼaporãta. Ñanemanduʼavaʼerã jahayhu ha jajepyʼapýramo ñande rapichakuérare, ñanemokyreʼỹta japoroporiahuvereko hag̃ua. Jehová katu ndaipochyreíri, omeʼẽ guei tiémpo opavavépe oñembyasy hag̃ua hembiapo vaikuégui. Upéicha ohechauka ñandeporiahuverekoha, péro hekojoja avei (2 Pedro 3:​9, 10). Jahechaháicha japoroporiahuverekóramo ñanepasiénsiata avei. Japoroporiahuverekóramo heta mbaʼe porã Ñandejára espíritu omoheñóita ñande rekovépe (Gálatas 5:​22, 23). Upéicha jahechakuaa mbaʼeichaitépa iñimportánte ñañehaʼã japoroporiahuvereko.

“Oporoporiahuverekóva katuete ovyʼáta”

19, 20. Mbaʼeicharõpa ñanembovyʼa jaiporiahuverekóramo ñande rapichápe?

¹⁹ Santiago, Jesús remimboʼe omombeʼu mbaʼérepa japoroporiahuverekovaʼerã. “Oporoporiahuverekovaʼekuépe katu ou porãta upe mbojovake árape” (Santiago 2:13b). Koʼápe Santiago heʼi jaiporiahuverekovaʼerãha ñande rapichápe. Mbaʼéicha javépa ñanembovyʼa jaiporiahuverekóramo ñande rapichápe? Jaikuaa rupi jajecha vove Jehovándi haʼe imanduʼataha japoroporiahuverekohague, ha ñaneperdonataha Itaʼýra Jesucristo rérape (Romanos 14:12). Jahechahaguéicha Ñandejára oiporiahuverekovaʼekue Davídpe heko vaírõ guare Bat-seba ndive, haʼe voi oiporiahuverekohaguére hapichápe (1 Samuel 24:​4-7). Upéicha avei ñande ndajaporiahuverekóiramo ñande rapichápe Jehová nañandeporiahuverekomoʼãi avei (Santiago 2:13a). Upévare ndajahecharamoivaʼerã  Jehová ohundi vove umi ‘ndoporoporiahuverekóivape’ (Romanos 1:​31, 32).

²⁰ Pe diskúrso Jesús ojapovaʼekue Mónte de los Olívospe heʼi: ‘Ovyʼavaʼerã umi oiporiahuverekóva hapichápe, Ñandejára oiporiahuverekóta chupekuéra avei’ (Mateo 5:7). Hesakã porãiterei ñandéve, oporoporiahuverekóvape Jehová oiporiahuverekotaha avei. Upe rire ñahesaʼỹijóta mbaʼéichapa ikatu jahechauka jaiporiahuverekoha ñande rapichápe.

Mbaʼépa ñaaprende?

• Mbaʼépa heʼise japoroporiahuvereko?

• Mbaʼéichapa ikatu jahechauka japoroporiahuverekoha?

• Mbaʼérepa ikatu jaʼe Jehová ñandeporiahuvereko ha hekojojaha?

• Mbaʼérepa japoroporiahuverekovaʼerã?

[Porandu ñahesaʼỹijóva]

[Nóta oĩva taʼanga ndive páhina 13]

Jehová oporoporiahuvereko peteĩ sy imembyraʼývaicha