‘E aroha to outou Metua’
‘E aroha to outou Metua’
“E aroha [noa] atoa hoi outou mai to outou Metua e aroha maira.”—LUKA 6:36; MN.
1, 2. E nafea ta Iesu mau parau i te mau papai parau e Pharisea e i ta ˈna mau pǐpǐ e faaite ai e e huru maitai hinaarohia te aroha?
FATATA e 600 titauraa e faatureraa i roto i te Ture i horoahia na roto ia Mose. Noa ˈtu e ua titauhia ia haapao i te mau titauraa o te Ture a Mose, mea faufaa roa atoa ia faaite i te aroha. A hiˈo na i ta Iesu i parau i te mau Pharisea o tei ore i aroha ia vetahi ê. E piti taime to Iesu faahaparaa ia ratou, ma te faaite e ua faaue te Atua e: “O te aroha ta ˈu i hinaaro, eiaha te tusia.” (Mataio 9:10-13; 12:1-7; Hosea 6:6) I te pae hopea o ta ˈna taviniraa, ua parau Iesu e: “Auê outou, e te mau papai parau e te mau Pharisea, e haavare outou! te horoa na hoi outou i te ahuru o te mineta, e te aneto, e te kumina, e te haapae nei i te mau mea rarahi o te ture ra, i te parau-tia, e te aroha, e te haapao mau ra.”—Mataio 23:23.
2 Ua haafaufaa roa iho â Iesu i te aroha. Ua parau oia i ta ˈna mau pǐpǐ e: “E aroha [noa] atoa hoi outou mai to outou Metua e aroha maira.” (Luka 6:36; MN) No te ‘pee râ i te Atua’ i roto i teie tuhaa, mea tia ia ite tatou eaha te aroha mau. (Ephesia 5:1) Hau atu â, e turai te maramaramaraa i te mau maitai o te aroha ia tatou ia faaite roa ˈtu â i teie huru maitai i roto i to tatou oraraa.
Aroha i te feia hinaaro i te tauturu
3. No te aha ia fariu tatou ia Iehova no te haapii eaha te aroha mau e tia ˈi?
3 Ua himene te fatu salamo: “E hamani maitai e te aroha to Iehova; e ore e riri vave, e te faaherehere rahi. Hamani maitai to Iehova i te taata atoa; e te vai ra to ˈna aroha faaherehere rahi i nia i to ˈna atoa ra mau ohipa.” (Salamo 145:8, 9) O Iehova “te tumu o te aroha [piri] e te Atua no ˈna anaˈe te mahanahana.” (Korinetia 2, 1:3; MN) E haa te hoê taata o te aroha ma te aumihi i nia ia vetahi ê. Teie te hoê tuhaa faufaa roa o te huru o te Atua. E nehenehe to ˈna hiˈoraa e ta ˈna mau faaueraa e haapii mai eaha te aroha mau.
4. E nafea te Isaia 49:15 e haapii mai ai i te aroha?
4 Mai tei papaihia i roto i te Isaia 49:15, te na ô ra Iehova e: “E moe anei te aiû i te metua vahine mau iho; e aitâ ˈtura e ite i te aroha i te tamaiti no to ˈna iho opu?” Te faaohipahia ra te mau taˈo Hebera o tei piri roa i te hoê i hurihia i ǒ nei ei “aroha” ma te taaihia i te aroha i roto i te Salamo 145:8, 9, i faahitihia i nia nei. Te faaauhia ra te huru aau e turai ia Iehova ia aroha i te huru aau mahanahana ta te hoê metua vahine e faaite no ta ˈna tamarii. Ua poia paha te aiû aore ra te hinaaro ra oia i te tahi mea. Ma te turaihia e te mau huru aau aumihi aore ra aumauiui ta te reira e faatupu i roto ia ˈna, e haapao te metua vahine i te hinaaro o ta ˈna tamarii. Te vai ra to Iehova teie mau huru aau piri no te feia ta ˈna e aroha.
5. Mea nafea to Iehova faaiteraa e e “aroha rahi” to ˈna ia Iseraela?
5 O te hoê mea ia aumihi o te tahi atu râ ia ohipa ma te aumihi no te maitai o te feia e hinaaro i te tauturu. A hiˈo na ua aha Iehova i to to ˈna mau taata haamori riroraa ei tîtî i Aiphiti fatata a 3 500 matahiti aˈenei. Ua parau oia ia Mose e: “Ua hiˈo papu vau i te pohe o to ˈu ra mau taata i Aiphiti, e ua faaroo vau i to ratou auê i ta ratou mau faaau ohipa; e ua ite hoi au i to ratou oto; e i haere mai nei au i raro nei e faaora ia ratou i te rima o to Aiphiti; e e aratai ê mai hoi ia ratou i taua fenua ra i te hoê fenua maitai, e te atea; e fenua e pihaa noa mai te û e te meli.” (Exodo 3:7, 8) Fatata e 500 matahiti i muri aˈe i to te mau Iseraela faaoraraahia mai Aiphiti mai, ua haamanaˈo Iehova ia ratou: “I aratai mai au i te tamarii a Iseraela mai Aiphiti mai, e ua faaora vau ia outou i te rima o to Aiphiti, e i te rima atoa o te mau arii i hamani ino mai ia outou na.” (Samuela 1, 10:18) No te faarueraa i te mau ture aveia tia a te Atua, mea pinepine te mau Iseraela i te roohia i te mau tupuraa ahoaho. Ua aumihi râ Iehova ia ratou e ua tamau i te faaora ˈtu. (Te mau tavana 2:11-16; Paraleipomeno 2, 36:15) Te faahohoˈa ra te reira e nafea te Atua î i te here e pahono ai i te feia e hinaaro i te tauturu, e atihia ra, aore ra e fifihia ra. E “aroha rahi” to Iehova.—Ephesia 2:4.
6. Mea nafea to Iesu Mesia peeraa i to ˈna Metua i te faaiteraa i te aroha?
6 Ia ˈna i parahi i te fenua nei, ua pee Iesu Mesia i to ˈna Metua ma te tia roa i te faaiteraa i te aroha. Ua aha Iesu i te taparuparuraa e piti matapo ia ˈna e: “E te Fatu, e te Tamaiti a Davida, e aroha mai ia mâua nei”? Ua taparuparu raua ia Iesu ia faaaraara semeio i to raua mata. Ua na reira Iesu, aita râ oia i faatupu i te semeio ma te huru aau ore. Te na ô ra te Bibilia e: “Aroha ˈtura Iesu ia raua, faatiaia ˈtura i to raua mata; araara aˈera to raua mata i reira ra.” (Mataio 20:30-34) Na te aroha i turai ia Iesu ia faatupu e rave rahi semeio o tei faaora i te matapo, te feia i uruhia e te demoni, te lepera, e te mau metua i maˈihia te tamarii.—Mataio 9:27; 15:22; 17:15; Mareko 5:18, 19; Luka 17:12, 13.
7. Te haapii maira na hiˈoraa o te Atua ra o Iehova e o ta ˈna Tamaiti i te aha no nia i te aroha?
7 Te faaite ra na hiˈoraa o te Atua ra o Iehova e o Iesu Mesia e e piti tuhaa to te aroha—te huru aau aumihi, te aumauiui, aore ra te aroha i te feia e hinaaro i te tauturu e te ohipa o te tamahanahana ia ratou. No te aroha-noa-raa, e titauhia ïa na tuhaa e piti. I roto i te mau Papai, i te rahiraa o te taime, te faataa ra te aroha i te hoê faaiteraa faaitoito o te ohipa hamani maitai i te feia e hinaaro i te tauturu. E nafea râ te aroha e faaitehia ˈi i roto i te hoê haavaraa? Ua taaihia atoa anei i tei hiˈohia mai te oreraa e rave i te tahi mea, mai te oreraa e faautua?
Aroha i te feia rave hara
8, 9. Ua titau te aroha i faaitehia ia Davida i muri aˈe i ta ˈna hara ia Bate-seba i te aha?
8 A hiˈo na i tei tupu i muri aˈe i to Natana te peropheta aˈoraa i te arii Davida o Iseraela i tahito ra no to ˈna faaturiraa ia Bate-seba. Ua tatarahapa Davida e ua pure: “E aroha mai oe ia ˈu, e te Atua e, i taua hamani maitai no oe ra, e no te rahi o to oe ra hamani maitai: e parai oe i ta ˈu nei mau hara. E horoi hua mai oe ia ˈu i to ˈu nei ino, tamâ hua mai ia ˈu i ta ˈu nei hara. Te faˈi nei hoi au i ta ˈu nei hara, e te vai noa nei â to ˈu ino i pihai iho ia ˈu. I mua i to aro, to oe anaˈe ra, i hara ˈi au nei, e i mua i to mata i rave ai au i teie nei ino.”—Salamo 51:1-4.
9 Ua tatarahapa roa Davida. Ua faaore Iehova i ta ˈna hara e ua haavî oia ia ˈna i roto i te faautuaraa ia raua Bate-seba. Ia au i te Ture a Mose, mea tia ia haapohehia Davida raua Bate-seba. (Deuteronomi 22:22) Noa ˈtu e aita raua i ape i te mau faahopearaa atoa o ta raua hara, ua vaiihohia raua ia ora noa. (Samuela 2, 12:13) E titau te faaohiparaa te Atua i te aroha i te faaoreraa i te hara. Eita râ oia e tapea ia ˈna eiaha e horoa i te faautuaraa e tano.
10. Noa ˈtu e e aroha Iehova ia haava oia ia tatou, no te aha eiaha ˈi tatou e haafaufaa ore i to ˈna aroha?
10 I te mea e ‘no te taata hoê ra o Adamu i ô mai ai te [hara] i te ao nei’ e “e utua te pohe no te hara,” e au ia pohe pauroa te taata. (Roma 5:12; MN; 6:23) E nehenehe mau â tatou e mauruuru e e faaite Iehova i te aroha ia haava oia ia tatou! Mea tia râ ia haapao maitai tatou eiaha e haafaufaa ore i to te Atua aroha. Te na ô ra te Deuteronomi 32:4 (MN) e: “E parau-tia [to Iehova] mau haerea atoa.” Ia maiti oia i te aroha, eita te Atua e tâuˈa ore i ta ˈna mau ture aveia tia roa o te parau-tia.
11. Mea nafea to Iehova haafaufaaraa ma te tano i te parau-tia i to ˈna haaraa i nia ia Davida no ta ˈna hara e o Bate-seba?
11 I roto i te tupuraa o Davida raua Bate-seba, hou e nehenehe ai e tamǎrû te utua pohe, ua titauhia ia faaorehia ta raua hara. Aita i faatiahia i te mau haava Iseraela ia na reira. Ahiri i faatiahia, aita ˈtu ta ratou e ravea maori râ te faahitiraa i te utua pohe. Teie ta te Ture i titau. No ta ˈna râ faufaa e o Davida, ua hinaaro Iehova e ite e e tumu anei e faaore ai i ta Davida hara. (Samuela 2, 7:12-16) Ua maiti ïa te Atua ra o Iehova, ‘te Haava o te ao atoa,’ o te ‘hiˈo i te aau,’ i te hiˈopoa i te tupuraa. (Genese 18:25; Paraleipomeno 1, 29:17) Ua nehenehe te Atua e hiˈo ma te tano i to Davida aau, e faito i te huru mau o to ˈna tatarahapa, a faaore atu ai i te hara.
12. E nafea te mau taata hara e fanaˈo ai paha i to te Atua aroha?
12 E au maite te aroha ta Iehova e faaite mai e nehenehe atu ai tatou e faaorahia i te utua pohe no te hara i tutuuhia mai, i ta ˈna parau-tia. Ia nehenehe te hara e faaorehia ma te ore e ofati i te parau-tia, ua horoa Iehova i te tusia taraehara o ta ˈna Tamaiti o Iesu Mesia—te faaiteraa rahi roa ˈˈe o te aroha i ore i faaitehia aˈenei. (Mataio 20:28; Roma 6:22, 23) No te fanaˈo i to te Atua aroha, o te nehenehe hoi e faaora ia tatou i te utua pohe no te hara i tutuuhia mai, mea tia ia ‘[faaohipa] i te faaroo i te Tamaiti.’—Ioane 3:16, 36; MN.
Atua aroha e te parau-tia
13, 14. E tamǎrû anei to te Atua aroha i ta ˈna parau-tia? A faataa.
13 Noa ˈtu e eita to Iehova aroha e ofati i ta ˈna ture aveia o te parau-tia, e taui anei te reira i ta ˈna parau-tia? E faaiti anei te aroha i te ohiparaa o te parau-tia a te Atua ma te tamǎrû i te reira? Eita ïa.
14 Na roto i te peropheta Hosea, ua parau Iehova i te mau Iseraela e: “E faaau atu vau ia oe na ˈu e a muri noa ˈtu; oia mau, e faaau atu vau ia oe na ˈu ma te parau-tia e te parau au, e ma te hamani maitai rahi, e ma te aroha rahi.” (Hosea 2:19) Te faaite maitai ra teie mau parau e e au maite noa te faaohiparaa Iehova i te aroha i te tahi atu o to ˈna mau ateriputi, tae noa ˈtu te parau-tia. “E Atua aroha noa [Iehova], e te hamani maitai rahi, . . . te faaore i te parau-tia ore, e te hara, e te ino; [“eita roa ˈtu râ oia e haapae i te utua,” MN].” (Exodo 34:6, 7) E Atua aroha e te parau-tia o Iehova. Te parau ra te Bibilia no ˈna e: “Oia te Mato, o tei tia roa ta ˈna ohipa ra; [e parau-tia] to ˈna ra mau haerea [atoa].” (Deuteronomi 32:4; MN) Mea tia roa ta te Atua parau-tia, oia atoa to ˈna aroha. Aita te hoê i hau ê i te tahi atu, eita atoa te hoê e titau i te tahi atu no te tamǎrû i ta ˈna ohiparaa. E ohipa râ na huru maitatai e piti atoa ma te au maite roa te tahi i te tahi.
15, 16. (a) Eaha te faaite ra e e ere i te mea etaeta te parau-tia a te Atua? (b) Ia faatupu Iehova i ta ˈna haavaraa i nia i teie faanahoraa ino o te mau mea, e papu i to ˈna mau taata haamori i te aha?
15 E ere i te mea etaeta ta Iehova parau-tia. Fatata i te mau taime atoa, ua taaihia te parau-tia i te ture, e pinepine e titau te haavaraa i te faautuaraa e au i te feia rave hara. E nehenehe atoa râ te parau-tia a te Atua e faaora i te feia e au. Ei hiˈoraa, i te haamouraahia te feia iino o na oire o Sodoma e Gomora, ua faaorahia te patereareha o Lota e ta ˈna na tamahine e piti.—Genese 19:12-26.
16 E nehenehe tatou e tiaturi e ia faatupu Iehova i ta ˈna haavaraa i nia i teie nei faanahoraa ino o te mau mea, e faaorahia te “feia rahi roa” haamori mau, o tei “horoi i to ratou ahu, e ua teatea, i te toto o te Arenio.” No reira, ‘e haere mai ratou mai roto mai i te ati rahi.’—Apokalupo 7:9-14.
No te aha e aroha ˈi?
17. Eaha te hoê tumu faufaa roa e aroha ˈi?
17 Te haapii mau maira na hiˈoraa o Iehova e o Iesu Mesia eaha te aroha mau. Ma te horoa mai i te hoê tumu faufaa roa e aroha ˈi tatou, te na ô ra te Maseli 19:17 e: “O tei hamani maitai i te taata rii ra, ua horoa oia i te taoˈa na Iehova; e na ˈna e hopoi mai i ta ˈna utua.” Mea au na Iehova ia pee tatou ia ˈna e ta ˈna Tamaiti ma te aroha ia haa tatou i nia te tahi e te tahi. (Korinetia 1, 11:1) E e faaitoitohia vetahi ê ia aroha, e faatupu hoi te aroha i te aroha.—Luka 6:38.
18. No te aha mea tia ˈi ai tutava tatou i te aroha?
18 Te aroha, o te hoê amuiraa ïa o te huru maitai e rave rahi. Te vai ra te aau maitai, te here, te hamani maitai, e te maitai. Te tumu o te mau ohipa o te aroha, o te huru aau ïa o te aumihi aore ra aumauiui. Noa ˈtu e eita te aroha o te Atua e ofati i ta ˈna parau-tia, eita Iehova e riri vave, e e horoa oia ma te faaoromai i te taime navai no te feia rave hara ia tatarahapa. (Petero 2, 3:9, 10) Ua taaihia ïa te aroha i te faaoromai e te faaoromairaa roa. Ei amuiraa o te huru e rave rahi e hinaarohia—to roto te mau tuhaa rau o te hotu a te varua o te Atua—e riro te aroha ei ravea no te atuatu i teie mau huru maitatai. (Galatia 5:22, 23) Mea faufaa roa ia tutava tatou i te aroha.
“E ao to tei aroha ia vetahi ê”
19, 20. E nafea te aroha e haavî ai i te faahapa i te taata e aroha ra?
19 Te faaite maira te pǐpǐ Iakobo i te tumu mea tia ˈi ia faariro tatou i te aroha ei huru maitai faufaa roa i roto i to tatou oraraa. Ua papai oia: “E haavi ra te aroha i te faahapa i te taata e aroha ra.” (Iakobo 2:13b) Te faahiti ra Iakobo i te aroha ta te hoê taata haamori o Iehova e faaite i nia ia vetahi ê. E haavî te reira i te faahapa i te taata e aroha ra i roto i te auraa e ia tae mai te taime ‘e hope ai te hoê taata i te faˈi i te parau ia ˈna iho i te Atua,’ e tâuˈa Iehova i ta ˈna mau haaraa aroha a faaore atu ai i ta ˈna hara maoti te tusia taraehara o ta ˈna Tamaiti. (Roma 14:12) Aita e feaaraa, hoê o te mau tumu i faaitehia ˈi te aroha i nia ia Davida no ta ˈna hara raua Bate-seba, oia ïa e taata aroha oia. (Samuela 1, 24:4-7) I te tahi aˈe pae, ‘o te faahapa anaˈe aore e aroha ta tei ore roa i aroha e noaa.’ (Iakobo 2:13a) E ere i te mea maere e hiˈo atoa ˈi te Atua i te feia “aroha ore” mai te “au ia ratou te pohe”!—Roma 1:31, 32.
20 I roto i ta ˈna Aˈoraa i nia i te mouˈa, ua parau Iesu e: “E ao to tei aroha ia vetahi ê ra; e aroha-atoa-hia mai ratou.” (Mataio 5:7) Te faaite puai ra teie mau parau e mea tia ia aroha te feia e imi ra i to te Atua aroha! E faataa mai to muri nei tumu parau e nafea tatou e nehenehe ai e faaohipa i te aroha i roto i to tatou oraraa o te mau mahana atoa.
Eaha ta outou i haapii?
• Eaha te aroha?
• E nafea te aroha e faaitehia ˈi?
• E nafea Iehova e riro ai ei Atua aroha e te parau-tia?
• No te aha mea tia ˈi ia aroha tatou?
[Uiraa haapiiraa]
[Hohoˈa i te api 3]
E au to Iehova aroha piri no te feia e hinaaro i te tauturu i to te hoê metua vahine no ta ˈna aiû
[Hohoˈa i te api 4]
Eaha ta te mau semeio a Iesu e haapii maira no nia i te aroha?
[Hohoˈa i te api 5]
Ua ofati anei Iehova i ta ˈna parau-tia ma te aroha ia Davida?
[Hohoˈa i te api 6]
E au maite to te Atua aroha i te mau taata hara i ta ˈna parau-tia