A Taataʼexeʼ «ku chʼaʼik óotsilil»
A Taataʼexeʼ «ku chʼaʼik óotsilil»
«Chʼaʼex óotsilil jeʼel bix a Taataʼex ku chʼaʼik óotsilileʼ.» (LUCAS 6:36.)
1, 2. Le baʼax tu yaʼalaj Jesús tiʼ le fariseoʼoboʼ, ¿bix tu yeʼesil jach kʼaʼabéet u chʼaʼabal óotsilil?
JÉEOBAEʼ tu tsʼáaj maas tiʼ seiscientos leyoʼob tiʼ le israelitaʼob utiaʼal ka u nuʼukt u kuxtaloʼob. Kex Jéeoba tu kʼáatajtiʼob ka u láaj tsʼoʼokbesoʼobeʼ, baʼaleʼ tu yaʼalaj xan tiʼob kʼaʼabéet u chʼaʼikoʼob óotsilil. Bey xan úuchik u yaʼalik Jesús tiʼ le fariseoʼob maʼatech u yeʼeskoʼob chʼaʼa óotsililoʼ. Kaʼatéen anchaj u kʼaʼajsiktiʼob le baʼax ku kʼáatik Diosaʼ: «In kʼáat ka chʼaʼex óotsilil, maʼ ka kʼubeʼex kíimsbil baʼalcheʼobiʼ» (Mateo 9:10-13; 12:1-7; Oseas 6:6). Le maʼ yaʼab u bin utiaʼal u kíimsaʼaleʼ, Jesuseʼ tu yaʼalaj: «¡Óotsileʼex u j-kaʼambesajileʼex aʼalmaj tʼaan yéetel fariseoʼex, j-kaʼapʼéel icheʼex! Teʼexeʼ ka tsʼáaikeʼex tiʼ Jajal Dios u diezmoil menta, u neekʼ ánis yéetel comino, baʼaleʼ ka pʼatikeʼex juntséelil le kaʼansajoʼob [maas kʼaʼabéetoʼob] tiʼ le aʼalmaj tʼaanoʼ, jeʼel bix le toj kuxtaloʼ, le chʼaʼa óotsililoʼ yéetel le oksaj óolaloʼ» (Mateo 23:23).
2 Le baʼax ku yaʼalik le tekstoaʼ ku yeʼesikeʼ Jesuseʼ jach nojoch baʼal u yilik kaʼach u chʼaʼabal óotsilil. Letiʼeʼ tu yaʼalaj tiʼ u disipuloʼob: «Chʼaʼex óotsilil jeʼel bix a Taataʼex ku chʼaʼik óotsilileʼ» (Lucas 6:36). Le oʼolaleʼ, wa toʼon k-kʼáat «béeytaleʼex jeʼel bix» Dioseʼ, táanil kʼaʼabéet k-ojéeltik baʼax u kʼáat u yaʼal u chʼaʼabal óotsilil (Efesoiloʼob 5:1). Tsʼoʼoleʼ, wa k-ilik baʼax utsiloʼob ku taasik u chʼaʼabal óotsilileʼ, leloʼ yaan u túulchʼinkoʼon k-eʼes mantatsʼ ichil k-kuxtal.
U chʼaʼabal óotsilil tiʼ le máaxoʼob kʼaʼabéet áantajtiʼoboʼ
3. Utiaʼal k-naʼatik baʼax u kʼáat u yaʼal u chʼaʼabal óotsilileʼ, ¿baʼaxten kʼaʼabéet k-ojéeltik bix tsʼoʼok u yeʼesik Jéeoba le jatsʼuts modosaʼ?
3 Le salmistaoʼ tu tsʼíibtaj: «Le Yuumtsiloʼ muun yóol yéetel ku chʼaʼa óotsilil; [maʼ] tu náakal yóol, letiʼeʼ tuláakal yaakunaj. Le Yuumtsiloʼ uts yéetel máak, yéetel muumun yaakunaj ku kanáantik u meyajoʼob» (Salmo 145:8, 9). Jéeoba xaneʼ letiʼe «Taata ku chʼaʼik tiʼ toʼon óotsililoʼ yéetel le Jajal Dios ku kiʼimakkúuntik k-óol mantatsʼoʼ» (2 Corintoiloʼob 1:3). Le chʼaʼa óotsililoʼ, upʼéel tiʼ le jatsʼuts modos ku yeʼesik Diosoʼ. Le oʼolaleʼ, utiaʼal k-naʼatik baʼax u kʼáat u yaʼal u chʼaʼabal óotsilileʼ, táanil kʼaʼabéet k-ojéeltik bix tsʼoʼok u yeʼesik Jéeoba, yéetel baʼax u kʼáat ka k-beete.
4. ¿Baʼax ku kaʼansiktoʼon Isaías 49:15 yoʼolal le chʼaʼa óotsililoʼ?
4 Tu libroi Isaías 49:15 Jéeobaeʼ tu beetaj le kʼáatchiʼaʼ: «¿Jeʼel wa u tuʼubsaj juntúul maamatsileʼ[,] jeʼel wa u táabal u xúumpʼat juntúul u paaleʼ?». Le baʼax ku yaʼalik Isaíasaʼ, ku tsʼáaik naʼatbileʼ le koʼolelaʼ ku chʼaʼik óotsilil tiʼ u paal, jeʼex le chʼaʼa óotsilil ku yeʼesik Jéeoba ku yaʼalaʼal teʼ Salmo 145:8, 9. Isaías túuneʼ ku ketik le yaabilaj ku yuʼubik utúul maamatsil yoʼolal u chaambal yéetel le yaabilaj ku yuʼubik Jéeobaoʼ. Wa utúul chaambal ku yokʼol tumen wiʼij wa tumen yaan baʼax kʼaʼabéettiʼeʼ, le maamatsiloʼ ku chʼaʼik óotsilil tiʼ, le oʼolal ku yilik u tsʼáaik baʼax kʼaʼabéettiʼ. Jéeoba xaneʼ ku tsʼáaik baʼax kʼaʼabéet tiʼ le máaxoʼob ku chʼaʼik óotsililoʼ.
5. Le baʼax úuch yéetel u kaajil Israeloʼ, ¿bix u yeʼesiktoʼon «jach nojoch u chʼaʼa óotsilil» Jéeoba?
5 U chʼaʼabal óotsilileʼ maʼ chéen u kʼáat u yaʼal u yaatal u yóol máak yoʼolal baʼax ku yúuchul tiʼ wa máaxiʼ, baʼaxeʼ kʼaʼabéet xan u yáantik. Koʼox ilik baʼax tu beetaj Jéeoba óoliʼ tres mil quinientos jaʼaboʼob bejlaʼeʼ, le palitsiltaʼan kaʼach u kaajal tu luʼumil Egiptooʼ. Letiʼeʼ tu yaʼalaj tiʼ Moisés: «Tsʼoʼok in maʼalob ilik bix u mukʼyaj in kaajal yaan tu luʼumil Egiptooʼ. Tsʼoʼok in wuʼuyik u jajakʼ iikʼoʼob ikil u loobiltaʼaloʼob tumen u j-mayoloʼob, jach maʼalob in wojelil baʼax ku mukʼyajtikoʼob. Le oʼolaleʼ tsʼoʼok in wéemel in tokoʼob tiʼ u páajtalil le j-egipcioʼoboʼ; bin in kaaj in jóokʼesoʼob tiʼ le múuchʼ kaajoʼ, utiaʼal ka in bisoʼob tiʼ jumpʼéel nojoch yéetel maʼalob luʼum tuʼux ku yáalkab leche yéetel kaab, bey u yáalkab jaʼeʼ» (Éxodo 3:7, 8). Quinientos jaʼaboʼob u jóoʼs le israelitaʼob tu kaajil Egiptooʼ, Jéeobaeʼ tu kʼaʼajsajtiʼob: «Teen tin jóokʼeseʼex Egipto, le ka tin tokajeʼex tu kʼab le j-egipcioʼob yéetel tu kʼab tuláakal le múuchʼ kaajoʼob yetsʼmaileʼexoʼ» (1 Samuel 10:18). Le israelitaʼoboʼ yaʼab utéenel tu yoksubaʼob ich talmil. Kex tumen ku muʼyajoʼob kaʼach tumen maʼ tu yuʼubkoʼob tʼaaneʼ, Jéeobaeʼ tu chʼaʼaj óotsilil tiʼob yéetel tu yáantoʼob (Jueces 2:11-16; 2 Crónicas 36:15). Le úuchik u yáantaʼal le israelitaʼob tumen Jéeoba, ku yeʼesiktoʼoneʼ letiʼeʼ ku yáantik le máaxoʼob meyajtik ku aktáantkoʼob talamil wa taak u beetaʼal loob tiʼoboʼ. Jeʼex túun k-ilkoʼ, Jéeobaeʼ «jach nojoch u chʼaʼa óotsilil» (Efesoiloʼob 2:4).
6. Jesuseʼ, ¿bix úuchik u jach eʼesik u chʼaʼa óotsilil Jéeoba?
6 Le ka taal way Luʼumeʼ, Jesucristoeʼ jach tu yeʼesaj bix u chʼaʼik óotsilil Jéeoba. Koʼox ilik baʼax tu beetaj le ka kʼáataʼabtiʼ tumen kaʼatúul máakoʼob chʼóopoʼob: «¡Yuumtsil, u Paal David, chʼaʼatoʼon óotsilil!». Le wíinikoʼobaʼ táan kaʼach u kʼáatkoʼobtiʼ ka tsʼakaʼakoʼob. Jesuseʼ yéetel yaabilaj tu beetaj le baʼax kʼáataʼabtiʼoʼ, «tu chʼaʼaj óotsil tiʼobeʼ ka tu péetsʼkʼabtaj u yichoʼob. Tiʼ le junsúutukoʼ le chʼóopoʼoboʼ yanji u sáasilil yichoʼob» (Mateo 20:30-34). Jeʼex k-ilkoʼ, letiʼe chʼaʼa óotsilil péeks Jesús u tsʼak le chʼóopoʼoboʼ, le máaxoʼob okaʼan kʼaakʼas pixan tiʼoboʼ yéetel letiʼ xan péeks u yáant le taatatsiloʼob kʼojaʼan u paalaloʼoboʼ (Mateo 9:27; 15:22; 17:15; Marcos 5:18, 19; Lucas 17:12, 13).
7. ¿Baʼax k-kanik tiʼ Jéeoba yéetel Jesús yoʼolal le chʼaʼa óotsililoʼ?
7 Le baʼaxoʼob tu beetaj Jéeoba yéetel Jesuseʼ ku yeʼeskoʼobtoʼon kaʼapʼéel bix u yeʼesaʼal chʼaʼa óotsilil. Yáaxeʼ u kʼáat u yaʼal u yaatal u yóol máak, u yeʼesaʼal yaabilaj yéetel u naʼatik máak bix u yuʼubikuba le máaxoʼob kʼaʼabéet áantajtiʼoboʼ. U kaʼapʼéeleʼ, u kaxtik máak bix jeʼel u yáantik le máax ku muʼyajoʼ. Le kaʼapʼéel baʼaloʼobaʼ maʼatech u jatskubaʼob, tu kaʼapʼéelal unaj u yeʼesaʼal. Ken tʼaanak le Biblia yoʼolal le chʼaʼa óotsililoʼ, maases táan u tʼaan tiʼ u tsʼaʼabal áantaj tiʼ le máaxoʼob kʼaʼabéettiʼoboʼ. Baʼaleʼ, wa táan u juzgartaʼal utúul wa máaxeʼ, ¿jeʼel wa u yaʼalaʼal ku chʼaʼabal óotsilil tiʼ tumen maʼ tu castigartaʼal kex tsʼoʼok u beetik upʼéel baʼax maʼ maʼalobeʼ?
U chʼaʼabal óotsilil tiʼ le tsʼoʼok u kʼebantaloʼoboʼ
8, 9. Jéeobaeʼ, ¿bix tu chʼaʼaj óotsilil tiʼ David le ka kʼebanchaj yéetel Betsabé?
8 Koʼox ilik baʼax tu beetaj rey David, le ka kʼeyaʼab tumen profeta Natán úuchik u núupkʼebankúunskuba yéetel Betsabé wa Bat-seba. Tumen jach yaachajaʼan u yóoleʼ, Davideʼ tu kʼáataj tiʼ Jéeoba: «Chʼaʼa teen óotsilil, tu yoʼolal a nojoch muumun óolaleʼ, lukʼes in siʼipiloʼob. ¡Pʼoʼo in kʼasaʼanil! ¡[L]ukʼes in kʼeban! Kin kʼaj óoltik j-maʼ uʼuyaj tʼaanen; in kʼebaneʼ maʼ tu páajtal in tuʼubsik. J-kʼebanchajen tiʼ teech, chéen tiʼ teech, tin beetaj le baʼax ka xotʼkʼiintikoʼ» (Salmo 51:1-4).
9 Davideʼ jach tu jaajil yaachaj u yóol yoʼolal le baʼax tu beetoʼ. Jéeoba túuneʼ tu perdonartaj u kʼeban David yéetel maʼ tu beetaj u kíimsaʼal yéetel Betsabé jeʼex u yaʼalik u Ley Moisés unaj u beetaʼaloʼ (Deuteronomio 22:22). Baʼaleʼ, kex tu chaʼaj u kuxtaloʼobeʼ, maʼ tu luʼsajtiʼob le muʼyajil anchajtiʼob úuchik u kʼebantaloʼoboʼ (2 Samuel 12:13). Uláakʼ baʼax táakaʼan ichil u yeʼesaʼal chʼaʼa óotsilileʼ, letiʼe u perdonartaʼal le kʼebanoʼoboʼ. Baʼaleʼ, kex beyoʼ Jéeobaeʼ maʼatech u pʼatik maʼ castigoi le máax náajmatikoʼ.
10. Kex tumen Jéeoba ku chʼaʼik óotsilileʼ, ¿baʼaxten maʼ unaj k-tuklik yaan u chʼaʼiktoʼon óotsilil tiʼ jeʼel baʼaxak ka k-beeteʼ?
10 Le Bibliaoʼ ku yaʼalik yoʼolal Adán: «Tu yoʼolal juntúuliliʼ máak j-ook le kʼeban tiʼ le yóokʼol kaabaʼ». Ku yaʼalik xaneʼ «u boʼolil le kʼebanoʼ kíimil». Le oʼolal tuláakal máak ku náajaltik u kíimil (Romailoʼob 5:12; 6:23). Tumen k-ojel baʼax k-náajmatikeʼ ¿máasaʼ jach ku kiʼimakkúuntik k-óol k-ojéeltik Jéeobaeʼ ku chʼaʼik óotsilil ken u juzgart wíinikoʼob? Baʼaleʼ, kex beyoʼ maʼ unaj k-tuklik wa yaan u chʼaʼiktoʼon óotsilil tiʼ jeʼel baʼaxak ka k-beeteʼ. Deuteronomio 32:4 ku yaʼalik tu yoʼolal Jéeoba: «Baʼaxoʼob ku beetikeʼ tojtak». Le oʼolal ken u chʼaʼa óotsilileʼ ku beetik jeʼex u yaʼalik u leyoʼobeʼ.
11. Jéeobaeʼ, ¿bix úuchik u yeʼesik jach justo le ka tu juzgartaj u kʼeban David yéetel Betsabeoʼ?
11 Koʼox kaʼa tʼaan tiʼ David yéetel Betsabé. Utiaʼal maʼ u kíimsaʼaloʼob yéetel utiaʼal ka tsʼaʼabaktiʼob upʼéel castigo maas maʼ nojcheʼ, táanil unaj u perdonartaʼal u kʼebanoʼob. Baʼaleʼ, tiʼ le juesoʼob israelitaʼoboʼ maʼ tsʼaʼan páajtalil tiʼob utiaʼal u perdonaroʼobiʼ. Wa ka u chaʼa kaʼach Jéeoba u juzgartaʼal David yéetel Betsabé tumen le juesoʼoboʼ, tsʼoʼok kaʼach u beetkoʼob u kíimsaʼaloʼobeʼ, tumen bey u yaʼalik le Leyoʼ. Baʼaleʼ, yoʼolal le pacto u beetmaj tu yéeteloʼ, Jéeobaeʼ tu yilaj wa jeʼel u páajtal u perdonartik Davideʼ (2 Samuel 7:12-16). Le oʼolal Jéeoba, le Nojoch Juez ku «xakʼal ilik tuláakal tuukuloʼob[eʼ]» tu chʼaʼatuklaj u juzgartik u kʼeban David (Génesis 18:25; 1 Crónicas 29:17). Chéen Jéeoba jeʼel u páajtal kaʼach u xakʼaltik u puksiʼikʼal David, utiaʼal u yilik wa jach tu jaajil yaachajaʼan u yóol yoʼolal baʼax tu beetaj yéetel ka u perdonarteʼ.
12. Tumen kʼeban máakoʼoneʼ, ¿baʼax unaj k-beetik utiaʼal u chʼaʼiktoʼon óotsilil Dios?
12 Teʼ kʼiinoʼob xanaʼ, Jéeobaeʼ tsʼoʼok u chʼaʼiktoʼon óotsilil tumen tsʼoʼok u mankoʼon tiʼ le kíimil ku taal yoʼolal le kʼebanoʼ. Jéeobaeʼ tu beetaj justicia le ka tu chʼaʼajtoʼon óotsililoʼ. Utiaʼal ka u perdonart k-kʼebanoʼobeʼ tu túuxtaj u hijo Jesucristo kíimil t-oʼolal. Lelaʼ, letiʼe maas nojoch chʼaʼa óotsilil tsʼoʼok u yeʼesik tiʼ wíinikoʼoboʼ (Mateo 20:28; Romailoʼob 6:22, 23). Le oʼolaleʼ, wa k-kʼáat ka u chʼaʼatoʼon óotsilil Jéeoba utiaʼal maʼ k-kíimileʼ, unaj k-tsʼáaik fe tiʼ Cristo (Juan 3:16, 36).
Dioseʼ ku chʼaʼik óotsilil yéetel ku beetik justicia
13, 14. Ken u chʼaʼa óotsilil Jéeobaeʼ, ¿yaan wa kʼiin ku pʼáatal maʼ u beetik justicia? Tsole.
13 Kex Jéeoba maʼ tu bin tu contra u justicia le ken u yeʼes chʼaʼa óotsilileʼ, ¿yaan wa kʼiin maʼatech u jach eʼesik u justicia le ken u chʼaʼa óotsilil tiʼ wa máax? Maʼatech.
14 Jéeobaeʼ tu yaʼalaj tiʼ u kaajil Israel: «Bíin tsʼoʼokok in beel ta wéetel utiaʼal ka in watantech, utiaʼal jaʼaboʼob minaʼan u xuul, jach jumpʼéelech watan in tiaʼal, jeʼel bix u náajmaleʼ, tumen in yaabilmajech yéetel tuláakal in puksiʼikʼal» (Oseas 2:19). Le tʼaanoʼobaʼ ku yeʼesiktoʼoneʼ, Jéeobaeʼ ken u chʼaʼa óotsilileʼ ku yeʼesik uláakʼ jatsʼuts modos, jeʼex le justiciaoʼ. Letiʼeʼ utúul Dios «muun u puksiʼikʼal ku chʼaʼa óotsilil, [...] ku saʼatsik le loobiloʼ, le kʼoʼox óolaloʼ bey le kʼebanoʼ; baʼaleʼ maʼ bíin u pʼat x-maʼ jaatsʼil le máax [kʼebanchajaʼanoʼ]» (Éxodo 34:6, 7). Jéeoba túuneʼ ku chʼaʼik óotsilil yéetel ku beetik justicia. Le Bibliaoʼ ku yaʼalik tu yoʼolal: «U meyajoʼobeʼ sen maʼalobtak, baʼaxoʼob ku beetikeʼ tojtak» (Deuteronomio 32:4). Dioseʼ jach maʼalob bix u yeʼesik chʼaʼa óotsilil yéetel u beetik justicia. Ken u chʼaʼa óotsilileʼ maʼ tu pʼáatal maʼ u beetik justicia.
15, 16. 1) ¿Baʼaxten k-aʼalik Jéeobaeʼ ku beetik justicia tiʼ máak jeʼel bix u náajmatikeʼ? 2) ¿Baʼax ken u beet Jéeoba yoʼolal máaxoʼob meyajtik le ken u xuʼuls tiʼ le kʼasaʼan yóokʼol kaabaʼ?
15 Jéeobaeʼ ku beetik justicia tiʼ máak jeʼel bix u náajmatikeʼ. U beetaʼal justiciaeʼ maases yaan yil yéetel u juzgartaʼal wa máax, yéetel u beetaʼal upʼéel juicioeʼ yaan yil yéetel le castigo ku tsʼaʼabal tiʼ le máak ku beetik baʼax maʼ maʼaloboʼ. Baʼaleʼ ichil le justicia ku beetik Diosoʼ táakaʼan xan u salvartik le máaxoʼob náajmatikoʼ. Jeʼex úuchjeakileʼ, Jéeobaeʼ tu xuʼulsaj tiʼ le kʼasaʼan máakoʼob yanoʼob Sodoma yéetel Gomorraoʼ, utiaʼal u salvartik Lot yéetel u hijaʼob (Génesis 19:12-26).
16 Le oʼolal jach k-ojel Jéeobaeʼ yaan u salvartik le «yaʼabkach máakoʼob» meyajtik ken u xuʼuls tiʼ le kʼasaʼan yóokʼol kaabaʼ. Le máaxoʼob «u pʼoʼomaj u nookʼoʼob yéetel u sakkuntmajoʼob xan yéetel u kʼiʼikʼel le j-Tamanoʼ» maʼ kun kíimloʼob le ken máankoʼob teʼ «nojoch yaayaj óolaloʼ» (Apocalipsis 7:9-14).
¿Baʼaxten kʼaʼabéet k-chʼaʼik óotsilil?
17. ¿Baʼaxten jach kʼaʼabéet k-eʼesik chʼaʼa óotsilil?
17 Le baʼax tu beetaj Jéeoba yéetel Jesucristooʼ ku yeʼesiktoʼon bix unaj u jach chʼaʼabal óotsilil. Koʼox ilik baʼaxten kʼaʼabéet k-kanik chʼaʼa óotsilil. Proverbios 19:17 ku yaʼalik: «Tsʼáa majnil tiʼ óotsileʼ, tiʼ Yuumtsil ku tsʼaʼabal. Yuumtsil xan bíin u boʼote». Jach beyoʼ, Jéeobaeʼ ku kiʼimaktal u yóol ken u yil k-eʼesik chʼaʼa óotsilil jeʼex u beetik letiʼ yéetel u Hijoeʼ (1 Corintoiloʼob 11:1). Wa k-beetik beyaʼ, yaan xan k-péeksik uláakʼoʼob u yeʼesoʼob chʼaʼa óotsilil, tumen le chʼaʼa óotsililoʼ ku beetik xan u yeʼesaʼal chʼaʼa óotsilil (Lucas 6:38).
18. ¿Baʼaxten jach kʼaʼabéet k-tsʼáaik óol k-eʼes chʼaʼa óotsilil mantatsʼ?
18 Ichil le chʼaʼa óotsililoʼ ku táakpajal uláakʼ jatsʼuts modosoʼob jeʼex le yaabilaj yéetel le utsiloʼ. Maʼ u tuʼubultoʼoneʼ le u yaatal u yóol máakoʼ, u yeʼesaʼal yaabilaj yéetel u naʼatik máak bix u yuʼubkuba le máaxoʼob kʼaʼabéet áantajtiʼoboʼ, letiʼeʼ baʼaxoʼob péeksik máak u chʼaʼa óotsililoʼ. Jéeobaeʼ ku yeʼesik chʼaʼa óotsilil tumen maʼ tu séeb pʼuʼujul yéetel maʼ tu jáan xuʼulsik tiʼ le máaxoʼob tsʼoʼok u kʼebantaloʼoboʼ, baʼaxeʼ ku tsʼáaik tiempo tiʼob utiaʼal u pʼatkoʼob le baʼax kʼaasoʼ, kex bey u beetkoʼ maʼ tu pʼáatal maʼ u yeʼesik justicia (2 Pedro 3:9, 10). Jeʼex tsʼoʼok ilkoʼ, utiaʼal u chʼaʼabal óotsilileʼ kʼaʼabéet xan u yeʼesaʼal chúukaʼan óolal yéetel uláakʼ jatsʼuts modosoʼob; utiaʼal túun k-maas eʼesik le jatsʼuts modosoʼobaʼ kʼaʼabéet k-chʼaʼik óotsilil (Galaciailoʼob 5:22, 23). Le oʼolal jach kʼaʼabéet k-tsʼáaik óol k-eʼes chʼaʼa óotsilil mantatsʼ.
«Kiʼ u yóoloʼob le máaxoʼob ku chʼaʼikoʼob óotsilil[oʼ]»
19, 20. ¿Bix u jóoʼloʼob yéetel uts tu kʼiinil le pʼis óol le máaxoʼob ku chʼaʼikoʼob óotsililoʼ?
19 Le disipulo Santiagooʼ ku tsolik baʼaxten jach kʼaʼabéet k-chʼaʼik óotsilil: «Le máaxoʼob ku chʼaʼikoʼob óotsililoʼ, bíin jóokʼokoʼob yéetel uts tu kʼiinil le pʼis óoloʼ» (Santiago 2:13 u tsʼook xéetʼ). Teʼ tekstoaʼ, Santiagoeʼ ku tʼaan tiʼ le chʼaʼa óotsilil unaj u yeʼesik le máaxoʼob meyajtik Diosoʼ. Baʼaleʼ ¿bix u jóoʼloʼob yéetel uts tu kʼiinil le pʼis óol le máaxoʼob ku chʼaʼikoʼob óotsililoʼ? Ku jóoʼloʼob yéetel utsil tumen le ken kʼuchuk u kʼiinil u pʼis óoltaʼaloʼobeʼ, Jéeobaeʼ yaan u kʼaʼajsik le chʼaʼa óotsilil tu yeʼesoʼoboʼ yéetel yaan u perdonartikoʼob yoʼolal le u kuxtal Jesús tu kʼubajoʼ (Romailoʼob 14:12). Upʼéel baʼax oʼolal perdonartaʼab u kʼeban Davideʼ, tumen letiʼeʼ tsʼokaʼaniliʼ xan u chʼaʼik óotsilileʼ (1 Samuel 24:4-7). Baʼaleʼ «le máaxoʼob maʼatech u chʼaʼikoʼob óotsililoʼ, x-maʼ chʼaʼa óotsilil bíin pʼis óoltaʼakoʼob» (Santiago 2:13 yáax xéetʼ). Le oʼolaleʼ, maʼ unaj u jaʼakʼal k-óol ojéeltik ichil le máaxoʼob «ku náajmatikoʼob kíimil» tu táan Jéeobaeʼ táakaʼan xan le máaxoʼob «maʼ tu chʼaʼikoʼob óotsilil tiʼ mix máak[oʼ]» (Romailoʼob 1:31, 32).
20 Teʼ kaʼansaj tu beetaj Jesús teʼ puʼukoʼ, tu yaʼalaj: «Kiʼ u yóoloʼob le máaxoʼob ku chʼaʼikoʼob óotsilil tiʼ uláakʼ máakoʼoboʼ, tumen bíin chʼaʼabak óotsilil tiʼob tumen Jajal Dios» (Mateo 5:7). Le baʼax tu yaʼaloʼ maʼ talam u naʼataʼaliʼ: le máax u kʼáat ka chʼaʼabak óotsilil tiʼ tumen Dioseʼ unaj xan u yeʼesik chʼaʼa óotsilil. Teʼ tuláakʼ xookoʼ yaan k-ilik bix jeʼel k-eʼesik chʼaʼa óotsilileʼ.
¿Baʼax tsʼoʼok k-kanik?
• ¿Baʼax u kʼáat u yaʼal u chʼaʼabal óotsilil?
• ¿Máakalmáak le kaʼapʼéel bix u yeʼesaʼal chʼaʼa óotsililoʼ?
• ¿Baʼaxten jeʼel u páajtal u yaʼalaʼal Jéeobaeʼ ku chʼaʼik óotsilil yéetel ku beetik justicia?
• ¿Baʼaxten jach kʼaʼabéet k-eʼesik chʼaʼa óotsilil?
[U kʼáatchiʼiloʼob le xookoʼ]
[U tsolajil le oochel teʼ táan juʼun 3]
Jeʼex le chʼaʼa óotsilil ku yuʼubik utúul maamatsil yoʼolal u chaambaleʼ bey xan le chʼaʼa óotsilil ku yuʼubik Jéeoba yoʼolal le máaxoʼob kʼaʼabéet áantajtiʼoboʼ
[U tsolajil le oochel teʼ táan juʼun 5]
Le milagroʼob tu beetaj Jesusoʼ, ¿baʼax ku kaʼansiktoʼon yoʼolal le chʼaʼa óotsililoʼ?
[U tsolajil le oochel teʼ táan juʼun 6]
¿Tu yeʼesaj wa justicia Jéeoba le úuchik u perdonartik Davidoʼ?
[U tsolajil le oochel teʼ táan juʼun 7]
Jéeobaeʼ ku yeʼesik justicia ken u chʼaʼa óotsilil tiʼ le j-kʼebanoʼoboʼ