Soemaot Sore—?Olsem Wanem?
Soemaot Sore—?Olsem Wanem?
“Yumi mas mekem i gud long olgeta man. Antap moa, yumi mas mekem olsem long olgeta ya we oli brata mo sista blong yumi from we olgeta tu oli bilif long Kraes.”—GALESIA 6:10.
1, 2. ?Parabol ya blong gudfala man Sameria i tijim yumi long wanem long saed blong sore?
TAEM wan tija blong Loa i stap toktok wetem Jisas, hem i askem long Jisas se: “?Hu ol man ya we oli stap raonabaot long mi, we Loa ya i tokbaot?” Jisas i yusum wan parabol blong ansarem kwestin blong man ya, hem i se: “I gat wan man i aot long Jerusalem, i stap godaon long Jeriko. Nao long rod, sam man blong stil oli kam holem hem. Ol man ya oli stilim olgeta samting blong hem, mo oli kilim hem long stik, nao oli livim hem i stap long rod, we i hafded, mo oli girap oli ronwe long hem. Nao i gat wan pris i stap folem rod ya i kam, be taem hem i luk man ya, hem i pas long narasaed rod, i wokbaot i go. Mo long sem fasin i gat wan Livaet i stap kam, wan long olgeta ya we oli stap givhan long ol pris. Mo taem hem i kam kasem ples ya, hem i luk man ya, nao hem tu i pas long narasaed rod, i wokbaot i go. Be i gat wan man Sameria tu we i stap folem rod ya, i kam kasem ples ya. Mo taem hem i luk man ya, hem i gat sore long hem, nao i go klosap long hem, i wasem ol soa blong hem long waen mo oel, mo i fasemgud olgeta. Nao hem i putum man ya i sidaon long dongki blong hem, mo i tekem hem i go long wan hotel, nao i stap lukaot long hem long ples ya. Mo long nekis dei, hem i tekem tu taosen vatu i givim long man blong hotel ya, mo i talem long hem se, ‘Yu lukaot gud long man ya. Mo sipos yu yusum sam mane blong yu antap long hemia, taem mi kambak, bambae mi jenisim mane blong yu bakegen.’ ” Nao Jisas i askem long man ya se: “?Long tingting blong yu, hu long trifala ya i mekem i gud long man ya we ol man blong stil oli kam kilim hem?” Ale, man ya i ansa se: “Man ya we i gat sore long hem.”—Luk 10:25, 29-37a.
2 !Yes fasin blong man Sameria blong kea long man ya we i kasem kil i soemaot trufala mining blong sore! Filing blong sore mo kea long narafala, i pusum man Sameria ya blong tekem aksen blong givhan long man ya we i kasem kil. Mo tu, man Sameria ya i no save nating man ya we i nidim help. Fasin sore i no wan samting we kantri, skul, no kalja i save blokem. Jes afta we Jisas i talem parabol ya blong gudfala man Sameria, hem i talem long man ya se: “Ale, yu go, yu mekem olsem we hem i mekem.” (Luk 10:37b) Yumi save folem advaes ya tu mo traehad blong soem sore long ol narafala. ?Be yumi soemaot sore olsem wanem? ?Wanem sam rod blong soemaot sore evri dei long laef blong yumi?
“Sipos i Gat Ol Brata . . . We Oli Trabol Long Klos”
3, 4. ?From wanem i impoten tumas we yumi soem sore insaed long Kristin kongregesen?
3 Aposol Pol i talem se: “Oltaem, sipos yumi gat janis, yumi mas mekem i gud long olgeta man. Antap moa, yumi mas mekem olsem long olgeta ya we oli brata mo sista blong yumi from we olgeta tu oli bilif long Kraes.” (Galesia 6:10) Taswe fastaem, bambae yumi tokbaot olsem wanem yumi save kam gud moa long fasin blong yumi blong soem sore long ol Kristin brata sista blong yumi.
4 Disaepol Jemes i givim advaes long yumi ol trufala Kristin se yumi mas soemaot sore long yumi, hem i raetem se: “Sipos [God] i jajem ol man we oli no gat sore, bambae hem i no gat sore long olgeta.” (Jemes 2:13) Ol narafala vas raonabaot long vas ya oli talem sam rod we yumi save folem blong soemaot sore. Tingbaot Jemes 1:27 we i talem se: “God i Papa blong yumi, mo prapa fasin blong ona long hem, we hem i luk se i klin gud mo i stret gud i olsem. Man i mas givhan long ol pikinini we oli no gat papa blong olgeta, mo long ol widowoman, long ol trabol we i kasem olgeta. Mo hem i mas lukaot gud long laef blong hem, blong i stap klin oltaem, we bambae ol rabis fasin blong wol i no spolem hem.” Jemes 2:15, 16 i talem se: “?Sipos i gat ol brata mo ol sista blong yufala we oli trabol long klos mo kakae, nao wan long yufala i no givhan long olgeta, bambae olsem wanem nao? Sipos wan long yufala i talem long olgeta se, ‘God i blesem yufala. Yufala i go putum klos blong yufala i wom, mo yufala i kakae,’ be hem i no givim klos mo kakae long olgeta, tok ya i no save givhan nating long olgeta.”
5, 6. ?Olsem wanem yumi save kam gud moa long fasin ya blong soem sore insaed long kongregesen blong yumi?
5 Fasin ya blong kea long narafala mo givhan long olgeta we oli nidim help i wan impoten fasin we i makemaot trufala skul long ol narafala skul. Sipos yumi talem nomo long narafala se yumi hop se ol trabol blong hem i kamgud, be yumi no mekem wan samting, hemia i no laenap nating wetem wosip blong yumi. Fasin kea we yumi gat long narafala, no blong kasem save filing blong narafala, i mas pusum yumi blong mekem sam samting blong givhan long olgeta we oli rili nidim help. (1 Jon 3:17, 18) Yes, maet yumi save rerem kakae blong wan man we i sik, no yumi save givhan long wan olfala blong mekem sam wok raonabaot long haos blong hem, no yumi save yusum trak blong yumi blong karem samfala i kam long ol Kristin miting taem oli nidim, mo yumi save glad nomo blong givim samting long olgeta we oli rili gat nid. Hemia nao sam long ol samting we yumi save mekem blong kam gud moa long fasin ya blong soem sore long narafala.—Dutronome 15:7-10.
6 Olgeta memba blong Kristin kongregesen blong yumi, we i stap gru oltaem, oli nidim we yumi givhan long olgeta long saed blong bodi. Be samting we i moa impoten hemia se yumi givhan long olgeta long saed blong spirit. Yumi kasem advaes ya se: “Yufala i mas leftemap tingting blong ol man ya we oli stap fraet, blong oli no moa fraet. Mo yufala i mas givhan long olgeta we oli no strong.” (1 Tesalonaeka 5:14) Mo “ol olfala woman” oli kasem advaes ya se i gud oli ‘tijim ol fasin we i stret.’ (Taetas 2:3) Long saed blong ol Kristin brata we oli lukaot long kongregesen, Baebol i talem se: “Bambae oli olsem strong sefples we man i save go haed long hem blong ronwe long hariken, no gudfala ples we i drae, we man i save go haed long hem blong ronwe long big ren.”—Aesea 32:2.
7. ?Wanem samting we yumi lanem from ol disaepol blong Antiok long Siria we i save givhan long yumi blong soemaot sore?
7 Ol brata blong Kristin kongregesen long faswan handred yia, oli no lukaot nomo long olgeta we oli stap long ples blong olgeta, olsem ol wido, ol pikinini we oli no gat papa mama, no olgeta we oli nidim help mo oli nidim narafala blong leftemap tingting blong olgeta. Be, sam samtaem oli sanem olting i go long ol brata sista long ol narafala ples from we olgeta oli kasem hadtaem. Tingbaot taem ya we profet Agabus i bin talemaot se bambae “olgeta man long wol oli gat hadtaem blong kasem kakae.” Long taem ya, ol disaepol blong taon ya Antiok long Siria “oli tingbaot se bambae olgeta evriwan oli mas sanem sam mane olsem we oli save mekem, blong givhan long ol brata blong [olgeta], we oli stap long Judia.” Oli putum mane ya “long han blong Banabas mo Sol” blong sanem i go long ol elda long Judia. (Ol Wok 11:28-30) ?Olsem wanem long taem blong yumi? “Slef ya we i stret mo waes” i stanemap ol komiti blong lukaot long ol brata we oli kasem trabol from ol disasta i kasem olgeta, olsem hariken, graon i seksek, no taetel wef. (Matiu 24:45, NW) Wan nambawan rod blong soemaot sore hemia taem yumi joen long program ya mo long gladhat blong yumi, yumi givim taem, paoa, mo olting blong yumi.
“Sipos Yufala i Stap Ona Long Ol Rijman” Nomo
8. ?Olsem wanem fasin ya blong mekem i gud moa long sam man bitim ol narafala i wok agensem sore?
8 Jemes i givim woning long saed blong wan fasin we i wok agensem sore mo loa ya blong lav we i “stamba blong ol narafala loa,” hem i se: “Sipos yufala i stap ona long ol rijman mo yufala i stap luk ol puaman olsem rabis nomo, yufala i mekem sin ya, mo loa ya bambae i jajem yufala. Yufala i man blong brekem Loa.” (Jemes 2:8, 9) Sipos yumi mekem i gud moa long wan man from we hem i rij no from we hem i gat posisen, samting ya i save mekem se yumi no sore long “puaman we i stap krae.” (Ol Proveb 21:13) Fasin ya blong mekem i gud moa long samfala i bitim ol narafala, i no givhan nating long man blong gat tingting ya blong soemaot sore oltaem. Yumi soemaot sore taem yumi mekem i sem mak long olgeta man.
9. ?From wanem i gat samfala we i stret blong yumi tinghae long olgeta?
9 ?From we yumi mekem i sem mak long olgeta man, hemia i min se i no stret blong tinghae no mekem wan spesel samting blong givhan long wan man we i mekem wan gudfala wok? No, i no minim olsem. Aposol Pol i tokbaot Epafrodaetas wan brata we i wok wetem hem taem hem i raet long ol Kristin blong Filipae, i se: “Yufala i mas ona gud long ol man olsem.” ?From wanem? From we “klosap hem i ded long wok blong Kraes, be hem i no fraet blong lusum laef blong hem, nao i gohed blong finisim ol wok blong givhan long mi, we yufala i no gat rod blong mekem.” (Filipae 2:25, 29, 30) I stret nomo we ol brata oli ona gud, no oli tinghae, long Epafrodaetas from gudfala wok we hem i mekem. Long 1 Timoti 5:17 yumi ridim se: “Ol elda we oli stap wok strong long wok blong lidim ol man, [“i stret nomo we oli kasem dabol ona,” NW]. Tok ya i stret long olgeta we oli stap hadwok blong prij mo blong tijim ol man.” Sipos wan brata no sista i gat ol gudfala fasin long saed blong spirit, i stret nomo we yumi tinghae long hem from. Fasin blong yumi blong tinghae long wan brata no sista olsem, i no min se yumi stap laekem mo mekem i gud moa long hem i bitim ol narafala.
“Man We i Kasem Waes We i Kam Long Heven . . . i Gat Sore Long Man”
10. ?From wanem yumi mas bos long tang blong yumi?
10 Jemes i tokbaot tang blong yumi, hem i se: “Tok we i kamaot long hem [tang] i nogud tumas, mo yumi no save blokem. Hem i olsem posen we i save kilim man i ded. Yumi stap yusum tang blong yumi blong presem Hae God ya we i Papa blong yumi, mo yumi stap yusum tu blong tok nogud long ol narafala man we God i mekem olgeta long pija blong hem. Long sem maot nomo, yumi stap toktok gud, mo yumi stap toktok nogud.” Taem Jemes i stap tokbaot samting ya hem i gohed i se: “Sipos long tingting blong yufala, yufala i stap jalus tumas, mo oltaem yufala i wantem kam hae moa long narafala man, yufala i no mas tok flas from waes blong yufala, from we fasin ya blong yufala i soemaot we yufala i stap giaman nomo, yufala i no talem trutok nating. Fasin ya i no fasin blong waes we i kamaot long heven. Hem i fasin blong waes we i kamaot long wol ya, we i blong man nomo, mo we i kamaot long Setan. Taem ol man oli jalus, mo oli wantem kam hae moa long narafala man, evri samting i go olbaot, nao olgeta fasin nogud oli stap kamtru. Be fasin blong man we i kasem waes we i kam long heven, hem i narafala. Nambawan samting blong hem, laef blong hem i klin gud, mo hem i man blong pis, i kwaet man, i man blong joen gud long narafala man, mo i man we i gat sore long man. Waes blong man ya i gat plante gudfala frut long laef blong hem. Hem i no save jajem man long fasin we i no stret, mo hem i no save giaman.”—Jemes 3:8-10a, 14-17.
11. ?Olsem wanem yumi save gat sore taem yumi yusum tang blong yumi?
11 Taswe, taem yumi yusum tang blong yumi blong toktok yumi stap soemaot sipos yumi gat waes ya we “i gat sore long man.” ?Olsem wanem sipos yumi tokflas blong leftemap yumi wan, no yumi giaman, no yumi toktok smol long saed blong wan narafala from we yumi jalus long hem no yumi bin rao wetem hem? Ol Sam 94:4 (NW) i talem se: “Oltaem ol man we oli stap wokem samting blong spolem narafala, oli tokflas long saed blong olgeta.” !Mo kwiktaem nomo, fasin ya blong tok nogud long saed blong wan man i save spolem gudnem blong man ya we i no mekem wan rong nating! (Ol Sam 64:2-4) Mo, tingbaot trabol we i save kamaot taem wan witnes “i man blong giaman [we] i talemaot giaman tok nomo.” (Ol Proveb 14:5; 1 King 21:7-13) Afta we Jemes i tokbaot man we i yusum tang blong hem long wan nogud fasin, hem i se: “Samting ya i krangke olgeta.” (Jemes 3:10b) Sipos yumi gat trufala sore, bambae yumi yusum tang blong yumi blong talem ol toktok we oli klin, we oli mekem pis, mo we oli stret. Jisas i talem se: “Mi mi talem long yufala. Long [“Dei,” NW] ya we God bambae i jajem olgeta man long hem, ol man oli mas talemaot long hem, from wanem oli bin talem ol tok olbaot.” (Matiu 12:36) !I impoten tumas we yumi gat sore taem yumi yusum tang blong yumi!
“Fogivim Ol Man We Oli Stap Mekem i Nogud Long Yufala”
12, 13. (a) ?Parabol ya blong slef we i gat bigfala kaon long masta blong hem i tijim long yumi wanem long saed blong sore? (b) ?I minim wanem blong fogivim brata blong yu go “kasem seventi seven taem”?
12 Jisas i talem wan parabol we i soemaot wan narafala rod blong gat sore. Parabol ya hem i long saed blong wan slef we i gat kaon long masta blong hem we i wan king. Kaon blong slef ya i kasem 60 milian denarias (plante milian vatu). Slef ya i krae long masta blong hem blong i sore long hem from we hem i no gat rod blong pem kaon ya. Ale, masta blong hem “i sore long hem,” i fogivim hem from kaon blong hem. Be slef ya i aot long masta blong hem, i go luk wan narafala man blong wok we i gat kaon long hem blong 100 denarias nomo (ten taosen vatu), mo hem i no soem sore nating long narafala man ya. Hem i putum man ya long kalabus. Taem masta i harem nius blong samting ya, hem i singaot slef ya we hem i bin fogivim hem mo i talem long hem se: “!Yu yu wan rabis man! Mi mi fogivim yu long bigfala kaon ya blong yu, from we yu krae long mi. ?From wanem yu no sore long man ya, stret olsem we mi mi sore long yu?” Ale, masta ya i sakem hem i go stap long kalabus. Long en blong parabol ya Jisas i talem se: “Sipos yufala evriwan i no fogivim ol brata blong yufala long olgeta tingting blong yufala, bambae Papa blong mi long heven i save mekem sem fasin ya tu long yufala.”—Matiu 18:23-35.
13 !Yes, parabol ya i soemaot klia se man we i gat sore i mas rere blong fogivim narafala! Jeova i fogivim yumi finis from ol sin blong yumi we oli olsem wan bigfala kaon. Taswe yumi tu yumi mas “fogivim ol man we oli stap mekem i nogud” long yumi. (Matiu 6:14, 15) Bifo we Jisas i talem parabol ya blong slef we i no gat sore, Pita i bin askem long hem se: “?Masta, sipos wan brata blong mi i stap mekem i no stret long mi, mi mi mas fogivim hem hamas taem? ?Seven taem?” Jisas i ansa se: “Yu no save fogivim hem seven taem nomo. Yu mas fogivim hem olwe gogo i no save finis [“kasem seventi seven taem,” NW].” (Matiu 18:21, 22) Yes, wan man we i gat sore i rere blong fogivim man go “kasem seventi seven taem,” i min se hem i fogivim hem olwe gogo i no save finis.
14. ?Folem Matiu 7:1-4, olsem wanem yumi save soem sore evridei?
14 Jisas i tokbaot wan narafala rod bakegen blong soemaot sore. Long Bigfala Toktok blong hem antap long Hil, hem i talem se: “Bambae yufala i no jajem narafala man, i nogud God i jajem yufala. Fasin we yufala i folem blong jajem man, hemia sem fasin nomo we God bambae i folem blong jajem yufala. . . . ?From wanem yu stap tokbaot smol doti ya we i stap long ae blong brata blong yu, be yu no save luk bigfala wud ya we i stap long ae blong yu? ?Sipos bigfala wud ya i stap yet long ae blong yu, olsem wanem yu save talem long brata blong yu se, ‘Ei, yu kam. Mi tekemaot smol doti ya we i stap long ae blong yu’?” (Matiu 7:1-4) Taswe yumi save soem sore evridei, taem yumi gat longfala tingting long narafala from ol slak fasin blong hem, mo taem yumi no jajem hem mo ting nogud long hem from ol slak fasin blong hem.
“Mekem i Gud Long Olgeta Man”
15. ?From wanem yumi no soem sore long ol Kristin brata sista nomo?
15 I tru se buk blong Jemes long Baebol i tokbaot sore we yumi soem long ol Kristin brata sista, be i no min se yumi soemaot sore long olgeta ya nomo we oli stap long Kristin kongregesen. Ol Sam 145:9 (NW) i talem se: “Jeova i mekem i gud long evriwan, mo sore blong hem i stap long olgeta samting we hem i bin wokem.” Yumi kasem advaes blong kam ol man we oli “folem fasin blong [God]” mo blong “mekem i gud long olgeta man.” (Efesas 5:1; Galesia 6:10) Yumi no lavem “ol fasin blong wol mo ol samting we oli stap long hem.” Be, hemia i no min se yumi no kea nating long ol man blong wol.—1 Jon 2:15.
16. ?Wanem sam samting we i save afektem fasin blong yumi blong soem sore?
16 Taem trabol “we yumi no tingbaot” i kasem man no man i rili nidim help, yumi ol Kristin yumi glad blong givhan long olgeta. (Prija 9:11, NW) Hamas yumi givhan long olgeta mo samting we yumi save mekem, i dipen long mane, taem mo paoa we yumi gat. (Ol Proveb 3:27) Taem yumi yusum olting blong yumi blong givhan long narafala, yumi wantem meksua se gudfala samting ya we yumi stap mekem i no leftemap fasin les. (Ol Proveb 20:1, 4; 2 Tesalonaeka 3:10-12) Taswe, wan man we i gat trufala sore i tekem aksen from we hem i gat filing ya we i kea long narafala, be long semtaem hem i yusum tingting blong hem.
17. ?Wanem beswan rod blong soem sore long olgeta we oli no stap long Kristin kongregesen?
17 Beswan rod blong soem sore long ol man we oli no joen wetem Kristin kongregesen, hemia blong serem trutok blong Baebol wetem olgeta. ?From wanem? From we bighaf blong ol man tede oli stap long tudak long saed blong spirit mo oli no save faenem stret rod blong folem. Oli no save rod blong winim ol problem we oli stap kasem mo oli no gat wan trufala hop long saed blong fiuja. Plante man oli “trabol tumas, oli no moa gat paoa, oli olsem ol sipsip we i no gat man blong lukaot long olgeta.” (Matiu 9:36) Save we i stap long Tok blong God i olsem wan ‘tos we i tosem ples we oli mas putum leg blong olgeta long hem,’ i save halpem olgeta blong fesem ol problem we i kamaot long laef. Mo Baebol i talemaot stamba tingting blong God long saed blong fiuja, taswe hem i olsem ‘wan laet we i saenem rod long fored blong olgeta.’ Baebol i givim wan gudfala risen long olgeta blong oli bilif se i gat wan nambawan hop i stap. (Ol Sam 119:105, NW) !Hem i rili wan nambawan blesing we yumi gat blong talemaot gudfala mesej blong trutok long olgeta we oli nidim tumas blong harem! I no longtaem “bigfala trabol” bambae i kamtru. Taswe, naoia i stret taem blong wok strong blong talemaot gud nius blong Kingdom mo blong pulum ol man oli kam disaepol blong Kraes. (Matiu 24:3-8, 21, 22, 36-41; 28:19, 20) I no gat narafala rod blong soem sore we i moa impoten bitim rod ya.
Givim “Ol Samting We Oli Stap Insaed”
18, 19. ?From wanem yumi mas wokhad blong soem moa sore long laef blong yumi?
18 Jisas i talem se: “Givim presen long ol puaman long ol samting we oli stap insaed long . . . yufala.” (Luk 11:41, Nyutesteman wetem Ol Sam long Bislama) Sipos yumi mekem wan gudfala samting blong soem sore, samting ya i mas wan presen we i kamaot long samting we i stap insaed long yumi, hemia i minim hat blong yumi. Hat we i fulap long lav mo we i glad blong givhan long narafala, hemia nao i mas pusum yumi. (2 Korin 9:7) Long wol ya, oltaem ol man oli stap mekem i strong long narafala, oli tingbaot olgeta wan nomo, mo oli no kea long narafala we i stap safa mo we i stap long trabol. !Yes, long wan wol olsem, fasin ya sore i save mekem yumi harem gud bakegen!
19 Taswe, yumi mas wokhad blong mekem we, long laef blong yumi, yumi soemaot moa fasin ya sore. Moa we yumi soemaot sore, moa we bambae yumi kam olsem God. Hemia i mekem laef blong yumi i rili gat mining mo i mekem we yumi harem gud long laef blong yumi.—Matiu 5:7.
?Yu Yu Lanem Wanem?
• ?From wanem i impoten tumas we yumi soem sore long ol Kristin brata sista?
• ?Olsem wanem yumi save soem sore insaed long Kristin kongregesen?
• ?Olsem wanem yumi save mekem i gud long olgeta we oli no stap long kongregesen?
[Kwestin]