Qanoq ililluta nallittuisinnaasugut
Qanoq ililluta nallittuisinnaasugut
„Tamanut ajunngitsuliorniarta, pingaartumik uppeqatitsinnut.“ — GALATIAMIUT 6:10.
1, 2. Samariamiumik tullerminik asannittumik assersuusiaq nallittuineq pillugu sumik ilinniarfigaarput?
INATSISINIK ilisimasup Jiisusi oqaloqatigitillugu taanna ima aperaa: „Kinami tulleraara?“ Jiisusi apeqqummut tamatumunnga akissutitut ima assersuusiorpoq: „Angut Jerusalemimit Jerikomukartoq piiaasut tigusaraat. Atisaajarpaat persuttarlugulu, toqungajattorlu qimaannarlugu ingerlaqqipput. Nalaatsortumik aamma palasi tamaanaqquppoq. Angut taanna takugaluarpaa qaangiinnarluguli. Aammattaaq Levikkuusup tassuunaqquttup takugaluarlugu qaangiinnarpaa. Samariamiulli angalalluni tassuunaqquttup ornippaa, takugamiullu nalligitsaappaa. Tikikkamiuk ikii uuliamik viinnimillu kuerarpai mattuserlugillu, kivillugulu qimusserfigisaminut qaqitippaa, akunnittarfimmukaallugulu pisariaqagaanik isumagaa. Aqaguani denarit marluk tiguai, akunnittarfiullu piginnittuanut tunniuppai oqarlunilu: ’Pisariaqagaanik isumagiuk annerusumillu atortitaqaruit uteruma akilerumaarpakkit.’“ Taava Jiisusip inatsisinik ilisimasoq ima aperaa: „Taakkua pingasut arlaat kina piiaasunit tiguneqartup tulleraa?“ Angut taanna ima akivoq: „Taassuminnga naakkinnittoq [nallittuisoq, NV].“ — Lukasi 10:25, 29-37a.
2 Samariamiup angummik ikilerneqarsimasumik isumassuinera nallittuinerup qanorpiaq paasisariaqarneranut takussutissaavoq asseqanngitsoq! Naakkinninnini, imaluunniit misiginneqatiginninnini, kajumississutigalugu Samariamiup ikilerneqarsimasoq — ilisarisimanngilluinnakkani — ikiorpaa. Inuiaqatigiissutsikkut, upperisarsiornikkut kulturikkulluunniit assigiinngissutit nallittuinissamut akornutaaneq ajorput. Jiisusip Samariamiumik tullerminik asannittumik assersuusioreerluni inatsisinik ilisimasoq oqaloqatigisani ima kajumissaarpaa: „Illittaaq taamaalioriartorit.“ (Lukasi 10:37b) Uaguttaaq kajumissaarut taanna malillugu iliortariaqarpugut allanillu nallittuiniarluta ilungersortariaqarluta. Qanorli ililluta taamaaliorsinnaavugut? Ulluinnarni qanoq ililluta nallittuisinnaavugut?
’Qatanngummik atisassaqanngitsoqarpat’
3, 4. Sooq ingammik ilagiit kristumiut iluanni nallittuisariaqarpugut?
3 Apustili Paulusi ima allappoq: „Piffissaqarallartilluta tamanut ajunngitsuliorniarta, pingaartumik uppeqatitsinnut.“ (Galatiamiut 6:10) Siullermik misissussavarput uppeqatitsinnut nallittuinermut tunngatillugu qanoq ililluta pisuujusinnaasugut.
4 Ajoqersukkap Jaakup kristumiut ilumoortut nallittoqatigeeqqullugit kajumissaaramigit ima allappoq: „Eqqartuussut . . . naakkittaatsuuvoq naakkittartuunngitsunut.“ (Jaaku 2:13) Oqaatsit isumassarsiarititaasut taakku ataqatigiinnerini erserpoq ilaatigut qanoq nallittuisinnaanersugut. Assersuutigalugu Jaaku 1:27-mi ima allassimavoq: „Guutisiorneq minguitsoq piviusorlu Guutimut Ataatatsinnut tassaavoq iliarsunnik uillarnernillu atugarliuutilinnik isumaginninneq imminillu mingutsinneqatsaalineq silarsuarmit.“ Aamma Jaaku 2:15, 16-imi ima allassimavoq: „Qatanngummik angummik arnamilluunniit atisassaqanngitsoqarpat nerisassaqanngitsoqarlunilu arlassilu oqarfigippagit: ’Eqqissillusi aallarniaritsi, aamma oqortunik atisiniarisi naammatsillusilu nerillusi,’ uffalu timikkut pisariaqagaannik tuninagit — taava tamanna sumut iluaqutaassava?“
5, 6. Ilagiinni najukkatsinniittunik assigiinngitsorpassuartigut nallittuiniarluta qanoq iliorsinnaavugut?
5 Allanik isumassuineq annikilliortunillu ikiuineq upperisarsiornermut ilumoortumut ilisarnaataapput. Allanik misiginneqatiginninnerarneq ajunngitsunillu tamanik kissaassinerarneq naammanngillat. Qamanngali pisumik misiginneqatiginninneq ikiorneqartariaqartunut iliuuseqarnissamut kajumississutigaarput. (1 Johannesi 3:17, 18) Napparsimasunik nerisassiuussineq, qatanngummik utoqqarmik illumi suliassanut tunngatillugu ikiuineq, pisariaqaraangat kristumiut ataatsimiinnerinut ingerlassineq uppeqatinullu pisariaqartitsisunut tukkortuuneq nallittuiniarluta iliuuserisariaqagarpassuatsinnut ilaapput. — 5 Mosesi 15:7-10.
6 Pigisatigut ikiuinermit suli pingaaruteqarnerusoq tassaavoq anersaakkut ikiuineq, ilagiinnut kristumiunut ilaasortaasunut amerliartortunut nakussatsissutaasinnaasoq. Biibilimi kajumissaarneqarpugut ’ernumasunik tuppallersaaqqulluta sanngiitsunillu isumaginneqqulluta’. (1 Thessalonikamiut 5:14) „Arnat utoqqaat“ kajumissaarneqarput ’ajunngitsuliornermik ajoqersuussisooqqullugit’. (Titusi 2:3) Nakkutilliisullu kristumiut „assigissavaat anorersuarmut oqquiffik sialussuarmullu oqqiffik“. — Esaja 32:2.
7. Ajoqersukkat Syriami Antiokiamiittut nallittuinermut tunngatillugu sumik ilinniarfigisinnaavavut?
7 Ukiuni hundredelinni siullerni kristumiut najukkaminni ilagiinniittunik uillarnernik, iliarsunnik ikiorneqarnissaminnillu qiimmassarneqarnissaminnillu pisariaqartitsisunik allanik isumassuinermik saniatigut ilaannikkut uppeqatiminnik allaniittunik ikiuiniarnermik aaqqissuussisarput. Assersuutigalugu pruffiiti Agabosi siulittuimmat „silarsuarmi tamarmi kaannersuaqalissasoq“, ajoqersukkat Syriami Antiokiamiittut aalajangerput ’tamarmik pisinnaasartik naapertorlugu nassitsissallutik qatanngutinut Judæamiittunut ikiuutissanik’. Ikiuutissat utoqqaanertanut Judæamiittunut nassiunneqarput ’Barnabamut Saulusimullu nassartillugit’. (Apustilit Suliaat 11:28-30) Ullumikkummi? „Kiffaq ilumoortoq silatoorlu“ ikiuiniaqatigiinnik pilersitsisimavoq qatanngutit pinngortitami ajunaarnersuarnit, assersuutigalugu ulussaarsuarnit, nunap sajunnerinit tsunaminillu, eqqugaasut isumassorniarlugit. (Matthæusi 24:45) Piffissatsinnik, nukitsinnik aningaasaatitsinnillu atuinitsigut aaqqissuussamik tamatuminnga kajumilluta tapersersuigutta tamanna nallittuinermut ersiutaalluassaaq.
„Kinaassusersiorussi“
8. Kinaassusersiorneq nallittuinermut qanoq akornutaava?
8 Asanninnermut ’inatsimmut akimasumut’ nallittuisuunermullu akornutaasoq Jaakup mianersoqqussutigaa. Ima allappoq: „Kinaassusersiorussi ajortuliorpusi inatsisillu namminneq unioqqutitsisutut qulaassavaasi.“ (Jaaku 2:8, 9) Pisuut nuimasulluunniit iluaqutissaannik kinaassusersiorutta ’piitsut nillianerannut’ misikkarinnginnerulersinnaavugut. (Ussatit 21:13) Kinaassusersiorneq nallittuinermut akornutaasarpoq. Kinaassusersiunnginnitsigut nallittuisarpugut.
9. Sooq immikkut nersorneqartariaqartunik nersuineq kukkunerunngila?
9 Taava kinaassusersiortuunnginneq ima paasisariaqarpa allanik immikkut nersuinngisaannartariaqartugut? Naamerluinnaq. Apustilip Paulusip suleqatini Epafroditusi pillugu kristumiut Filippimiittut ima allaffigai: „Inuit taama ittut ataqqisarisigit.“ Sooq ataqqissavaat? Paulusi ima nangippoq: „Kristusi kiffartuutsillugu inuunini navianartorsiortippaa toqungajavillunilu ilissi uannut kiffartuussinissinni suli amigaataasut naammassiniartillugit.“ (Filippimiut 2:25, 29, 30) Epafroditusi aalajaalluni kiffartornini pillugu nersorneqartariaqarpoq. Aammattaaq Timotheusimut allakkani siullerni 5:17-imi ima allassimavoq: „Utoqqaanertat ilagiinnik paarsisuulluartuusut marloriaammik ataqqineqartussaapput, pingaartumik taakku qasusuillutik nalunaajaasartut ajoqersuisartullu.“ Anersaakkut ajunngitsunik pissuseqartut aamma nersorneqartariaqarput. Taamatut nersuineq kinaassusersiornerunngilaq.
’Ilisimassuseq pavannga pisoq nallittuingaartuuvoq’
10. Sooq oqqatsinnik aqutsisariaqarpugut?
10 Oqaq pillugu Jaaku ima allappoq: „Oqaq ajortumeeriniartuartuuvoq toqunartumillu toqussutaasartumik ulikkaarluni. Taassuminnga Naalagaq Ataatarlu unnersiutigisarpavut, taassuminngalu inuit Guuti assilillugu pinngortitaasut perloqqusarlugit. Qanermit ataatsimit pilluaqqusineq perloqqusinerlu aniasarput.“ Jaaku ima nangippoq: „Sinngatussusermik imminullu angisuutikkumassusermik uummammiugisaqarussi usorsitsaarniaqinasi salluliorniaqinasilu sallusuissummut akerliusumik. Ilisimassuseq taamaattoq pavannga pinngilaq, atasuullunili nunamut tarnimullu anersaapilummullu. Sinnganeqaraangat imminullu angisuutikkumaneqarluni tassaniittarputtaaq tavanneq ajortullu allat tamarmik. Ilisimassuserli pavannga pisoq pingaarnerpaamik minguitsuuvoq, tamatumalu saniatigut eqqissinermik nuannarisaqartuuvoq, saamasuulluni, ilakkuminartuullunilu, nallittuingaartuulluni, ajunngitsunik inerititaqarluni, kinaassusersiortuunani unneqqarissuullunilu.“ — Jaaku 3:8-10a, 14-17.
11. Qanoq ililluta oqaloriaatsitsigut nallittuisuusinnaavugut?
11 Tassa oqqatsinnik atueriaatsitsinni ersertarpoq ’nallittuingaartumik’ ilisimassuseqarnersugut. Taavami sinnganerput imminullu angisuutikkumanerput pissutigalugit usorsitsaarlutaluunniit sallullutaluunniit ajoqutaasumik oqaatissuaagutta? Tussiaat 94:4-mi ima allassimavoq: „Pinerluttut tamarmik pingaakujuutaannarnik oqalupput.“ Aamma ajoqutaasumik oqaatissuaanerup kingunerisaanik inuk pisuussuteqanngitsoq tusaamanerlugaalipallassinnaavoq! (Tussiaat 64:3-5) Aammattaaq eqqarsaatigeriaruk ’nalunaajaatitap ilumuunngitsup sallunik siammarterisarnerata’ qanoq ajoqutaatigisinnaanera. (Ussatit 14:5; 1 Kunngit 21:7-13) Oqqamik atornerluineq eqqartoreeramiuk Jaaku ima allappoq: „Qatanngutikka, taamaassanngilaq.“ (Jaaku 3:10b) Ilumoortumik nallittuisuussagutta minguitsumik, eqqisseqatigiissitsisumik ingasaassinngitsumillu oqaluttariaqarpugut. Jiisusi ima oqarpoq: „Uanga oqarfigaassi: Ullormi eqqartuussiffissami inuit oqaaserisimasatik piunngitsut tamaasa akisussaaffigissavaat.“ (Matthæusi 12:36) Taamaattumik oqaloriaatsitsiguttaaq nallittuisuunissarput pingaaruteqaqaaq!
’Inuit unioqqutitsinerinik isumakkeerfigisigit’
12, 13. (a) Kiffamik naalakkaminut aningaasarpassuarnik akiitsoqartumik assersuusiaq nallittuineq pillugu sumik ilinniarfigaarput? (b) Qatanngutsitsinnik ’77-eriarluta allaat’ isumakkeerfiginninnissarput qanoq paasisariaqarpa?
12 Jiisusip kiffamik naalakkaminut, kunngimut, talentinik 10.000-inik akiitsulimmik assersuusiaani nallittueriaaseq suli alla erseqqissarneqarpoq. Kiffap, akiitsuminik akiliisinnaanngitsup, nallittoqqulluni kunngi kimigiiserfigaa. Naalagaata ’nalligilerpaa’ akiitsuinillu isumakkeerfigalugu. Kiffalli taassuma anigami kiffaqatini imminut denarinik 100-innarnik akiitsulik naapippaa naakkittaallunilu parnaarussaatillugu. Naalakkap qanoq pisoqarsimanera tusaramiuk kiffaq akiitsuinik isumakkeerfigisani aggeqquaa imalu oqarfigalugu: „Kiffaq ajortoq uumaa, akiitsunnik tamanik isumakkeerfigaakkit qinnuigigamma. Illittaaq kiffaqatit naakkigisariaqanngiliuk [nallittortariaqanngiliuk, NV], soorlu uanga illit naakkigigikkit [nallittorikkit, NV]?“ Taava naalagaata parnaarussanik paarsisunut pisippaa. Jiisusip assersuusiaq naggaserpaa ima oqarluni: „Taamatuttaaq Ataatama qilammiittup ilarsi kinaluunniit pissavaa qatanngutini uummatimigut isumakkeerfiginngippagu.“ — Matthæusi 18:23-35.
13 Assersuusiami tamatumani erseqqilluinnarpoq isumakkeerfiginneriaannaaneq nallittuinermut ilaasoq. Jehovap akiitsorpassuatsinnik, ajortuliatsinnik, isumakkeerfigaatigut. Taava uaguttaaq ’inuit unioqqutitsinerinik isumakkeerfigisariaqarpavut’, ilaa? (Matthæusi 6:14, 15) Jiisusip kiffamik naakkittaatsumik assersuusiaq suli oqaluttuarinngikkaa Petrusip ima aperaa: „Naalagaq, qatanngutiga uannut ajortuliortartoq qasseriarlugu isumakkeerfigissavara? Arfineq-marloriarlugu allaat?“ Jiisusillu ima akivaa: „Oqarfigaakkit: Arfineq-marloriaannarnagu, kisianni 77-eriarlugu allaat.“ (Matthæusi 18:21, 22) Aap, nallittuisoq isumakkeerfiginneriaannaavoq ’77-eriarluni allaat’, tassa imaappoq killeqanngitsumik.
14. Matthæusi 7:1-4 naapertorlugu qanoq ililluta ullut tamaasa nallittuisinnaavugut?
14 Jiisusi qaqqami oqaluutsimini nallittuinermut ilaasumik allamik eqqaasaqarpoq. Ima oqarpoq: „Eqqartuusseqinasi eqqartuunneqaqqunasi. Eqqartuussissutigisassinnimmi eqqartuunneqarumaarpusi . . . Sooq qatanngutivit issiutaa makiarninnguaq isiginiarpiuk, paakkarut illit isinniittoq maluginagu? Imaluunniit qatanngutinnut qanoq oqarsinnaavit: ’Issiutit peerallarlara’ uffa paakkarummik illit isinniittoqartoq?“ (Matthæusi 7:1-4) Taamaattumik ullut tamaasa nallittuisinnaavugut allat sanngiissutaat pillugit isumakkeerfiginerisigut aamma eqqartuussinaveersaarnitsigut isornartorsiuinaveersaarnitsigullu.
’Tamanut ajunngitsuliorit’
15. Sooq uppeqatitsinniinnaq nallittuisussaanngilagut?
15 Jaakup allagaani uppeqatigiit nallittoqatigiittarnissaat eqqartorneqarpoq, imaanngilarli ilagiinni kristumiuniittut kisimik nallittorneqartassasut. Tussiaat 145:9-mi ima allassimavoq: „Tamanut ajunngisaartarpoq [Jehova], pinngortitaminut tamanut naakkinnittuuvoq.“ Kajumissaarneqarpugut ’Guuti maligassareqqullugu’ ’tamanullu ajunngitsulioqqulluta’. (Efesosimiut 5:1; Galatiamiut 6:10) „Silarsuaq taassumaluunniit pii“ asanngikkaluarlutigit inuit silarsuarmiittut pisariaqartitaat soqutigaavut. — 1 Johannesi 2:15.
16. Allanik nallittuinitsinnut suut aalajangiisuusarpat?
16 Kristumiuugatta ’piffissamit nalaatsornikkullu pisunit’ eqqugaasunik annikilliortunilluunniit pisinnaasarput tamaat ikiuerusuttuaannarpugut. (Oqaluussisartup oqaasii 9:11, NV) Soorunami pissutsit atukkavut sunik iliuuseqarsinnaanitsinnut qanorlu iliuuseqartigisinnaanitsinnut aalajangiisuupput. (Ussatit 3:27) Allanilli pigisatigut ikiuigaangatta asannittumik ikiuiniarluni iliuuserisat eqiasulersitsinnginnissaat mianersuutigisariaqarparput. (Ussatit 20:1, 4; 2 Thessalonikamiut 3:10-12) Taamaalilluni inuup ilumoorluni nallittuisup qamannga pisumik misiginneqataajutigaluni silaqassutsinni atortarpaa.
17. Ilagiit kristumiut avataanniittunut nallittueriaaseq pitsaanerpaaq suua?
17 Inunnut ilagiit kristumiut avataanniittunut nallittueriaaseq pitsaanerpaaq tassaavoq sallusuissut Biibilimeersoq taakkununnga oqaluttuaralugu. Sooq? Pissutigalugu ullumikkut inuit amerlanerpaartaat anersaakkut taartumi satsillutik ingerlammata. Inuit amerlanersaat ajornartorsiuterpassuarminnik aaqqiisinnaannginnamik aamma siunissamut piviusumik neriuuteqannginnamik „paarinerlugaallutillu [naakkinarsisimapput] savatut paarsisoqanngitsutut“. (Matthæusi 9:36) Tusarliussaq Guutip oqaasianiittoq taakkua ’isigaannut naneruaasinnaavoq’ inuunermi ajornartorsiutinik naammaginnillutik atuinissamut iluaqutigisaat. Aamma taakkua ’aqqutaanni qaammaqqutaasinnaavoq’, Biibilimimi siulittuutigineqarpoq Guutip siunissami sunissani siunertarineraa, tamannalu nuanningaartumik neriuuteqalissutigisinnaavaat. (Tussiaat 119:105) Sallusuissut pillugu tusarliussamik nuanningaartumik tamatuminnga pisariaqartitsersuataartunut tusarliussineq immikkut pisinnaatitaaffiuvoq angisooq, ilaa? ’Naalliunnartussarsuup’ qanoq qanitsiginera eqqarsaatigalugu maanna piffissaavoq aallussilluarluni Guutip naalagaaffianik oqaluussissutiginninnissamut ajoqersuganngortitsiortornissamullu. (Matthæusi 24:3-8, 21, 22, 36-41; 28:19, 20) Nallittuinermik allamik taamatut pingaaruteqartigisoqanngilaq.
’Iluaniittut tunissutigisarsigit’
18, 19. Sooq inuunitsinni nallittuinerunissarput sulissutigisariaqarparput?
18 Jiisusi ima oqarpoq: „Iluaniittut piitsunut tunissutigisarsigit [nallittuissutitut tunissutigisarsigit, NV].“ (Lukasi 11:41) Ajunngitsuliaq ilumoortumik nallittuinerussaguni qamanngarpiaq pisumik — uummammit asannittumit kajumittumillu pisumik — iliuuserineqartariaqarpoq. (2 Korinthimiut 9:7) Silarsuarmi soqutigittaaffioqisumi, namminissarsiorfioqisumi inuillu allat ajornartorsiutaannik naalliuutaannillu soqutigisaqanngiffioqisumi taamatut nallittuisoqartarnera assut eqqissiallannartarpoq.
19 Taamaattumik inuunitsinni nallittuinerunissarput sulissutigisariaqarparput. Nallittuinerujartortilluta Guuti assiginerujartuinnassavarput. Tamannalu siunertaqarluartumik nalerisimaarnavissumillu inuunissamut iluaqutigisarparput. — Matthæusi 5:7. (wE 9/15 07)
Suna ilikkarpiuk?
• Sooq ingammik uppeqatitsinnut nallittuisarnissarput pingaaruteqarpa?
• Ilagiinni kristumiuniittunik qanoq nallittuisinnaavugut?
• Qanoq ililluta ilagiit avataanniittunut ajunngitsuliorsinnaavugut?
[Atuaqqissaarnermi apeqqutit]
[Qupp. 28-mi assiliartaq]
Samariamiu nallittuivoq
[Qupp. 29-mi assiliartaq]
Kristumiut nallittuinissaq assut pingaartippaat
[Qupp. 32-mi assiliartaq]
Ilagiit kristumiut avataanniittunut nallittueriaaseq pitsaanerpaaq tassaavoq sallusuissut Biibilimeersoq taakkununnga oqaluttuaralugu