Tlwaela go Bontšha Kgaugelo—Bjang?

“Anke re direleng bohle botse, eupša kudu-kudu re bo direleng bao ba tswalanego le rena tumelong.”—BAGALATIA 6:10.

1, 2. Papišo ya Mosamaria wa kgaugelo e re ruta’ng mabapi le kgaugelo?

MONNA yo a tsebago molao o ile a botšiša Jesu ge a be a boledišana le yena gore: “Ge e le gabotse, ke mang yo e lego moagišani wa-ka?” Ge Jesu a araba, o ile a laodiša papišo e latelago: “Motho yo mongwe o be a fologa a e-tšwa Jerusalema a e-ya Jeriko gomme a wela gare ga bahlakodi bao ba ilego ba mo hlakola dilo tšohle le go mo otla, ba ikela ba mo tlogela a le makgatheng. Bjale gwa direga gore moperisita yo mongwe a fologe ka tsela yeo, eupša ge a mmona, a phamogela ka thoko e nngwe ya tsela. Molefi le yena ge a fologela lefelong leo a mmona, fela a phamogela ka thoko e nngwe. Eupša Mosamaria yo mongwe ge a sepela tseleng yeo a fihla go yena gomme ge a mmona, a mo hlomogela pelo. Ke moka a mmatamela a mo tlema dintho tša gagwe gomme a di tšhela ka makhura le beine. Bjale a mo nametša phoofolo ya gagwe a mo tliša ntlong ya baeti, a mo hlokomela. Ke moka letšatšing le le latelago a tšea ditenariase tše pedi a di nea mohlokomedi wa ntlo ya baeti, a re: ‘Hle mo oke, gomme tšohle tše o tlago go di diriša ka ntle le se, ke tla go bušetša tšona ge ke boa.’” Ke moka Jesu a botšiša motheetši wa gagwe gore: “Ke mang wa ba bararo ba yo go wena a bonagalago a itirile moagišani go monna yo a wetšego bahlakoding?” Monna yoo a araba ka gore: “Ke yo a mo gaugetšego.”—Luka 10:25, 29-37a.

² Ruri tlhokomelo yeo Mosamaria yo a e filego monna yo a gobetšego e bontšha gabotse seo kgaugelo ya kgonthe e lego sona! A tutueditšwe ke lešoko, goba kwelobohloko, Mosamaria yo o ile a dira dilo ka tsela yeo e ilego ya imolla monna yo a bego a gobetše. Go oketša moo, monna yo a hlokago thušo e be e le motho o šele go Mosamaria. Go bontšha kgaugelo ga go thibelwe ke gore motho ke wa setšhaba sefe, bodumedi bofe goba setšo sefe. Ka morago ga go bolela papišo ya mabapi le Mosamaria wa kgaugelo, Jesu o boditše motheetši wa gagwe gore: “Sepela gomme le wena o dire sona seo.” (Luka 10:37b) Re ka kwa keletšo yeo gomme ra katanela go gaugela ba bangwe. Eupša bjang? Re ka ba bao ba gaugelago bjang maphelong a rena a letšatši le letšatši?

“Ge e ba Ngwanabo Rena . . . a Hloboletše”

3, 4. Ke ka baka la’ng re swanetše go tshwenyega kudu ka go ba bao ba gaugelago ka phuthegong ya Bokriste?

³ Moapostola Paulo o itše: “Ge feela re sa na le  nako e loketšego, anke re direleng bohle botse, eupša kudu-kudu re bo direleng bao ba tswalanego le rena tumelong.” (Bagalatia 6:10) Ka gona, anke sa pele re boneng kamoo re ka atišago ditiro tša rena tša kgaugelo go bao ba tswalanago le rena tumelong.

⁴ Ge morutiwa Jakobo a kgothaletša Bakriste ba therešo gore ba gaugelane, o ngwadile gore: “Yo a sa tlwaelego go bontšha kgaugelo o tla ahlolwa ka ntle le kgaugelo.” (Jakobo 2:13) Taba e dikologilego mantšu a ao a buduletšwego e re bontšha ditsela tše dingwe tšeo ka tšona re ka bontšhago kgaugelo. Ka mohlala, re bala go Jakobo 1:27 gore: “Mohuta wa borapedi bjo bo hlwekilego le bjo bo sa šilafalago ponong ya Modimo wa rena le Tate ke wo: go babalela ditšhiwana le bahlologadi ditlaišegong tša bona le go itota ga motho a se na sepatso go tšwa lefaseng.” Jakobo 2:15, 16 e re: “Ge e ba ngwanabo rena goba kgaetšedi a hloboletše gomme a hloka dijo tše di lekanego tša letšatši, lega go le bjalo, yo mongwe wa lena a re go bona: ‘Sepelang ka khutšo, le ruthele gomme le khore,’ eupša le sa ba nee dinyakwa tša mebele ya bona, go hola’ng?”

5, 6. Re ka atiša bjang ditiro tša kgaugelo ge re dirišana le phuthego yeo re kopanelago go yona?

⁵ Go hlokomela ba bangwe le go thuša bao ba hlokago thušo ke seka sa bodumedi bja therešo. Tsela ya rena ya borapedi ga e re dumelele gore re tshwenyege ka ba bangwe ka molomo feela, re bolela gore re duma eka dilo di ka ba sepelela gabotse. Go e na le moo, maikwelo a lerato le nago le kwelobohloko a re tutueletša go direla batho bao ba tlogago ba hloka thušo selo se itšego. (1 Johane 3:17, 18) Ee, go apeela motho yo a babjago, go thuša motšofadi ka mediro ya ka gae, go sepela le yena ka senamelwa go ya dibokeng tša Bokriste ge go nyakega le go se be dingame ge ba bangwe ba hloka thušo ke tše dingwe tša ditiro tša kgaugelo tšeo re swanetšego go di dira.—Doiteronomio 15:7-10.

⁶ Selo se bohlokwa kudu go feta go nea dilo tše di bonagalago ke go nea dilo tša moya tšeo di tlago go thuša ditho tša phuthego e golago ya Bokriste. Re kgothaletšwa go ‘bolela ka mo go homotšago le meoya e nyamilego le go thekga ba fokolago.’ (1 Bathesalonika 5:14) “Basadi ba godilego” ba kgothaletšwa gore e be “bao ba rutago se sebotse.” (Tito 2:3) Beibele e bolela ka balebeledi ba Bakriste gore: “E tlo ba monna mo-ka-seêʹma-phefong, maôbô-puleng.”—Jesaya 32:2.

7. Ke’ng seo re ithutago sona go barutiwa ba tšwago Antiokia ya Siria mabapi le go bontšha kgaugelo?

⁷ Go oketša tabeng ya go hlokomela bahlologadi, ditšhiwana le bao ba hlokago thušo le kgothatšo lefelong la gabo bona, ka dinako tše dingwe diphuthego tša lekgolong la pele la nywaga di be di rulaganya mekgwa ya go hlakodiša badumedi-gotee bao ba lego mafelong a mangwe. Ka mohlala, ge moporofeta Agabuse a be a bolela e sa le pele gore “tlala e kgolo e tla tloga e wela lefase ka moka leo go agilwego go lona,” barutiwa ba kua Antiokia ya Siria ba ile “ba ikemišetša, yo mongwe le yo mongwe wa bona go ya kamoo a bego a ka kgona ka gona, go romela tirelo ya thušo go bana babo bona bao ba dulago Judea.” Thušo ye e ile ya romelwa go bagolo ba gona moo “ka seatla sa Baranaba le Saulo.” (Ditiro 11:28-30) Go thwe’ng ka lehono? “Mohlanka yo a botegago le wa temogo” o rulagantše dikomiti tša tlhakodišo bakeng sa go hlokomela bana babo rena bao ba ka welwago ke dikotsi tša tlhago, tše bjalo ka madimo, ditšhišinyego  tša lefase, goba ditsunami. (Mateo 24:45) Go neela nako ya rena ka go rata, maiteko le dilo tša rena tše bohlokwa ka go thekga tokišetšo ye ke tsela e botse yeo re ka bontšhago kgaugelo ka yona.

“Ge e ba le Tšwela Pele le Beba Sefahlego”

8. Kgethollo e lwantšhana le kgaugelo ka tsela efe?

⁸ Ge Jakobo a lemoša malebana le seka seo se lego kgahlanong le kgaugelo le “molao wa bogoši” wa lerato, o ngwadile gore: “Ge e ba le tšwela pele le beba sefahlego, le dira sebe, gobane le solwa ke molao le le batshedi ba wona.” (Jakobo 2:8, 9) Go bontšha lerato le le sa swanelago go bao ba humilego ka dilo tše di bonagalago goba bao ba tumilego go ka dira gore re se ke ra lemoga “sellô sa mmôtlana.” (Diema 21:13) Kgethollo e thibela moya wa kgaugelo. Re bontšha kgaugelo ge re swara ba bangwe ka tsela e se nago kgethollo.

9. Ke ka baka la’ng e se phošo go ela hloko ka mo go kgethegilego bao ba swanelegago?

⁹ Na go ba bao ba sa bebego sefahlego go bolela gore ga se ra swanela go tšeela godimo motho le ge e le ofe ka mo go kgethegilego? Ga go bjalo le gatee. Moapostola Paulo o ngwaletše Bakriste ba kua Filipi mabapi le mošomi-gotee le yena e lego Epaforodito gore: “Le dule le swara batho ba mohuta woo ka tlhompho.” Ka baka la’ng? “Gobane o ile a gomela lehu ka baka la modiro wa Morena, a bea moya wa gagwe kotsing, gore a thibe ka botlalo sekgoba sa ge le se gona mo gore le ntirele.” (Bafilipi 2:25, 29, 30) Tirelo ya potego yeo e bego e dirwa ke Epaforodito e be e swanetše go elwa hloko ka mo go kgethegilego. Go oketša moo, re bala go 1 Timotheo 5:17 gore: “Anke bagolo bao ba okamelago gabotse ba tšewe ba swanelwa ke kgodišo yeo e lego gabedi, kudu-kudu bao ba šomago ka thata go boleleng le go ruteng.” Dika tše dibotse tša moya le tšona di swanetše go tšeelwa godimo. Go ela hloko dilo ka tsela e bjalo ga se kgethollo.

“Bohlale bjo bo Tšwago Godimo . . . bo Tletše Kgaugelo”

10. Ke ka baka la’ng re swanetše go laola maleme a rena?

¹⁰ Jakobo o boletše mabapi le leleme gore: “Ke selo se sa laolegego se gobatšago, le tletše mpholo o bolayago. Ka lona re tumiša Jehofa, yena Tate, gomme ka lona re roga batho bao ba bilego gona ‘ka seswantšho sa Modimo.’ Molomong o tee go tšwa tšhegofatšo le thogako.” Jakobo o okeditše tabeng ye ka gore: “Ge e ba le e-na le lehufa le le galakago le tshele dipelong tša lena, le se ke la ikgantšha gomme la aketša kgahlanong le therešo. Bjo ga se bohlale bjo bo theogago bo e-tšwa godimo, eupša ke bja lefase, bja bophoofolo le bja botemona. Gobane moo lehufa le tshele di lego gona, go na le tlhakatlhakano le selo se sengwe le se sengwe se sebe. Eupša bohlale bjo bo tšwago godimo, sa pele-pele bo sekile, gape bo na le khutšo, bo leka-lekane, bo ikemišeditše go kwa, bo tletše kgaugelo le dienywa tše botse, ga bo kgetholle ka go beba sefahlego, ga bo na boikaketši.”—Jakobo 3:8-10a, 14-17.

11. Re ka ba bao ba gaugelago bjang ge re diriša maleme a rena?

¹¹ Ka baka leo, tsela yeo re dirišago maleme a rena ka yona e bontšha ge e ba re e-na le bohlale bjo bo ‘tletšego kgaugelo.’ Go thwe’ng ge e ba ka baka la lehufa goba go duma tša ba bangwe re be re ka ikgantšha, ra bolela maaka goba go phatlalatša lesebo le le gobatšago? Psalme 94:4 e re: “Ba-dira-bobe bohle ba a ikxanthša.” Le gona polelo e gobatšago ruri e ka gobatša botumo bjo bobotse bja motho ka go akgofa! (Psalme 64:2-4) Go oketša moo, nagana ka kgobalo e ka bakwago ke “mofereka-taba . . . hlatse ya xo fora.” (Diema 14:5; 1 Dikxoši 21:7-13) Ka morago ga go bolela ka go dirišwa ga leleme gampe, Jakobo o re: “Ga go a swanela, bana bešo, gore dilo tše di tšwele pele di direga ka tsela ye.” (Jakobo 3:10b) Kgaugelo ya kgonthe e nyaka gore re diriše maleme a rena ka tsela e sekilego, e nago le khutšo le e kwagalago. Jesu o itše: “Ruri ke a le botša, polelo e nngwe le e nngwe yeo e se nago mohola ye batho ba e bolelago, ba tla ikarabela mabapi le yona Letšatšing la Kahlolo.” (Mateo 12:36) Ruri go bohlokwa gore re be bao ba gaugelago ge re diriša maleme a rena!

 “Lebalela Batho Dikarogo tša Bona”

12, 13. (a) Re ithuta’ng mabapi le kgaugelo papišong ya mohlanka yo a bego a kolota mong wa gagwe tšhelete e ntši kudu? (b) Go lebalela ngwanabo rena “go fihla ga masome-šupa-šupa” go ra go re’ng?

¹² Papišo ya Jesu ya mohlanka yo a bego a kolota mong wa gagwe, kgoši, ditenariase tše 60 000 000 e bontšha tsela e nngwe yeo re ka bago bao ba gaugelago ka yona. Ka ge mohlanka yo a be a se na seo a ka lefelelago sekoloto ka sona, o ile a kgopela go gaugelwa. Mong wa mohlanka yo o ile a phumola molato wa gagwe ka ge “a be a hlomogile pelo ka se.” Eupša ge mohlanka a e-tšwa o ile a hwetša mohlanka-gotee le yena yo a bego a mo kolota ditenariase tše lekgolo feela gomme ka go hloka kgaugelo a dira gore a lahlelwe kgolegong. Ge mong a be a e-kwa seo se diregilego, o ile a bitša mohlanka yo a lebaletšwego gomme a re go yena: “Mohlanka yo kgopo, ke go phumoletše molato wola ka moka, ge o be o ntopa. Na le wena o be o sa swanela go gaugela mohlanka-gotee le wena, bjalo ka ge le nna ke go gaugetše?” Ka baka leo, mong o ile a mo gafela go balebeledi ba kgolego. Jesu o phethile papišo ye ka gore: “Tate wa legodimong le yena o tla le swara bjalo, ge e ba yo mongwe le yo mongwe wa lena a sa lebalele ngwanabo go tšwa pelong.”—Mateo 18:23-35.

¹³ Ruri papišo ye e bontšhitšwego ka mo godimo e bontšha gore kgaugelo e akaretša go ikemišetša go lebalela! Jehofa o re lebaletše sekoloto se segolo sa sebe. Na le rena ga se ra swanela go “lebalela batho dikarogo tša bona”? (Mateo 6:14, 15) Pele ga ge Jesu a ka laodiša papišo ya mohlanka yo a se nago kgaugelo, Petro o ile a mmotšiša gore: “Morena, ngwanešo o swanetše go ntshenyetša gakae gomme nna ke mo lebalele gakae? Go fihla ga šupa?” Jesu a araba ka gore: “Ke re go wena, e sego go fihla ga šupa, eupša go fihla ga masome-šupa-šupa.” (Mateo 18:21, 22) Ee, motho yo a gaugelago o ikemišeditše go lebalela “go fihla ga masome-šupa-šupa,” ke gore, a sa bale.

14. Go ya ka Mateo 7:1-4, ke bjang re ka bago bao ba gaugelago letšatši le letšatši?

¹⁴ Ge Jesu a bontšha tsela e nngwe gape ya go bontšha kgaugelo, o boletše Thutong ya Thabeng gore: “Tlogelang go ahlola gore le se ahlolwe; gobane kahlolo ye le ahlolago ka yona, le tla ahlolwa ka yona . . . Ka gona, ke ka baka la’ng o lebelela lehlokwa le le lego ka leihlong la ngwaneno, eupša o sa šetše kota ye e lego ka leihlong la gago? Goba o ka ra ngwaneno bjang wa re, ‘Anke ke ntšhe lehlokwa ka leihlong la gago’; gomme, bona! kota e ka leihlong la gago?” (Mateo 7:1-4) Ka baka leo, re ka ba bao ba gaugelago letšatši le letšatši ka go kgotlelela mafokodi a ba bangwe ka ntle le go ba ahlola goba go ba swaya diphošo ka mo go feteletšego.

‘Direla Bohle Botse’

15. Ke ka baka la’ng e se badumedi-gotee le rena feela bao ba swanetšego go bontšhwa kgaugelo?

¹⁵ Gaešita le ge puku ya Jakobo e gatelela gore re gaugele badumedi, se ga se bolele gore re swanetše go swara ka kgaugelo bao ba lego ka phuthegong ya Bokriste feela. Psalme 145:9 e re: “Morêna ké mo-setša-bohle, kxauxêlô ya xaxwe e ukametše tšohle tše a di dirilexo.” Re kgothaletšwa go “[ba] baekiši ba Modimo” le go ‘direla bohle botse.’ (Baefeso 5:1; Bagalatia 6:10) Gaešita le ge re sa rate “lefase goba dilo tše di lego lefaseng,” ga re hlokomologe dinyakwa tša bao ba lego lefaseng.—1 Johane 2:15.

16. Ke dilo dife tšeo di kgomago tsela yeo ka yona re bontšhago ba bangwe kgaugelo?

¹⁶ Bjalo ka Bakriste, ga re dika-dike go dira seo re ka se kgonago go thuša bao ba wetšwego ke “ditiragalo tše di sa letelwago” goba bao ba lego maemong a thata. (Mmoledi 9:11, NW) Ee, maemo  ke ona a tla laolago seo re tlago go se dira le gore re tla kgona go se dira go fihla bokgoleng bofe. (Diema 3:27) Ge re thuša ba bangwe ka dilo tše di bonagalago, re nyaka go ela hloko gore tiro yeo e bonagalago e le e botse ga e kgothaletše bobodu. (Diema 20:1, 4; 2 Bathesalonika 3:10-12) Ka baka leo, motho yo a gaugelago e le ka kgonthe o bonagatša maikwelo a borutho a kwelobohloko goba lešoko gotee le go bea mabaka ka tsela e kwagalago.

17. Tsela e di phalago tšohle ya go bontšha kgaugelo go bao ba lego ka ntle ga phuthego ya Bokriste ke efe?

¹⁷ Tsela e botse kudu ya go bontšha kgaugelo go bao ba lego ka ntle ga phuthego ya Bokriste ke ka go boledišana le bona ka therešo ya Beibele. Ka baka la’ng? Ka gobane bontši bja batho lehono bo phopholetša lefsifsing la moya. Ka ge ba se na tsela yeo ka yona ba ka swaraganago le mathata ao a ba welago goba ba se na kholofelo le ge e le efe ya kgonthe ka bokamoso, batho ba bantši ba a “šokiša gomme ba gašane go swana le dinku tše di se nago modiši.” (Mateo 9:36) Molaetša wa Lentšu la Modimo e ka ba ‘lebone dinaong tša bona,’ wa ba thuša go swaragana le mathata a bophelo. O ka ba wa ba ‘seetša tseleng ya bona’ ka ge Beibele e bolela e sa le pele ka morero wa Modimo mabapi le bokamoso, o ba nea motheo wa go ba le kholofelo e phadimago. (Psalme 119:105) Ruri go tsebatša molaetša wo o mobotse wa therešo go bao ba tlogago ba o hloka ke tokelo! Ka baka la go batamela ka lebelo ga “masetlapelo a magolo,” ga bjale ke nako ya go tšea karolo ka mafolofolo modirong wa go bolela ka Mmušo le wa go dira barutiwa. (Mateo 24:3-8, 21, 22, 36-41; 28:19, 20) Ga go na tiro e nngwe ya go bontšha kgaugelo yeo e lego bohlokwa go feta ye.

Neang “Dilo tše di Lego ka Gare”

18, 19. Ke ka baka la’ng re swanetše go šomela tabeng ya go oketša tutuetšo yeo kgaugelo e nago le yona maphelong a rena?

¹⁸ Jesu o itše: “Neang dilo tše di lego ka gare e le dimpho tša kgaugelo.” (Luka 11:41) Gore selo se sebotse e be tiro ya kgaugelo ya kgonthe, se swanetše go ba mpho yeo e tšwago ka gare-gare ga rena—go tšwa pelong e lerato le e ikemišeditšego. (2 Bakorinthe 9:7) Kgaugelo e bjalo ke e lapološago kudu lefaseng le leo le lego makgwakgwa, leo le nago le boithati le leo le se nago taba goba go tshwenyega ka mathata a ba bangwe!

¹⁹ Ka gona, anke re kataneleng go oketša kgaugelo yeo re nago le yona maphelong a rena. Ge re tšwela pele re e-ba le kgaugelo, ke moo re tlago go tšwela pele re e-ba bjalo ka Modimo. Se se re thuša go phela maphelo ao a nago le morero le a kgotsofatšago.—Mateo 5:7.

O Ithutile’ng?

• Ke ka baka la’ng go le bohlokwa ka mo go kgethegilego go bontšha badumedi-gotee le rena kgaugelo?

• Re ka bontšha bjang kgaugelo ka phuthegong ya Bokriste?

• Re ka dira botse bjang go bao ba lego ka ntle ga phuthego?

[Dipotšišo tša Thuto]

[Seswantšho go letlakala 26]

Mosamaria o ile a bontšha kgaugelo

[Diswantšho go letlakala 27]

Bakriste ba dira mediro e mentši ya kgaugelo

[Seswantšho go letlakala 30]

Tsela e di phalago tšohle ya go bontšha kgaugelo go bao ba lego ka ntle ga phuthego ke ka go boledišana le bona ka therešo ya Beibele