Bann pwen enteresan dan liv Yoel ek Amos
Parol Zeova i vivan
Bann pwen enteresan dan liv Yoel ek Amos
TOU sa ki ganny dir lo li se ki: “Yoel ti garson Petouel.” (Yoel 1:1) Dan liv ki port son non, Yoel pa koz lo lezot keksoz apard ki lo son mesaz ki menm dat son profesi pa ganny mansyonnen. I’n ganny estimen ki sa liv ti ganny ekrir apepre lannen 820 A.N.L, nef an apre ki Ouziya ti vin lerwa Zida. Akoz Yoel pa ti koz lo son lekor? Tre probab, rezon pour sa se ki i ti anvi met plis lanfaz lo sa mesaz ki i ti pe pase e non pa lo sa enn ki pe anmenn sa mesaz.
Osi pandan letan Ouziya, Amos sorti Zida ki ti ‘en gardyen zannimo e ki ti osi pik fig Sikomor lo pye,’ ti ganny ordonnen pour vin en profet. (Amos 7:14) Kontrerman avek Yoel ki ti profetiz an Zida, Amos ti ganny anvoye dan nor kot sa dis tribi rwayonm Izrael. Liv Amos ti konplete an 804 A.N.L., apre ki i ti retourn Zida e son liv li menm in ganny ekrir dan en langaz ki ti senp me vreman vivan.
“AR WI, SA ZOUR PE VINI”—AKOZ?
Dan son vizyon Yoel ti vwar seniy, sotrel ek kankrela pe anvair en landrwa. Sa bann anvaiser i ganny refer konman “en pep ki bokou e ki for” e konman “bann zonm pwisan”. (Yoel 1:4; 2:2-7) Yoel ti dir: “Ar wi sa zour, parski zour Zeova i pros, i pou vini parey en ravaz sorti kot sa Enn Tou Pwisan!” (Yoel 1:15) Zeova ti konsey bann zabitan Siyon an dizan: “Retourn kot mwan avek tou zot leker.” Si zot ti fer li, Zeova ti pou “montre konpasyon anver son pep” e i ti pou kit byen lwen “sa enn ki sorti dan nor,” setadir sa latak zensek. Avan ki son gran zour i arive, Zeova pou “devid son lespri sen lo tou kalite dimoun” e i pou “fer tou sort bann siny dan lesyel ek lo later.”—Yoel 2:12, 18-20, 28-31.
Sa nasyon ti ganny prezante avek en defi, zot ti bezwen: “Forz zot pyos an lepe e zot sizay an lans” e prepar zot pour lager. Zot ti osi ganny ordonnen pour zot “mont lo laplenn Yeosafat” kot zot pou ganny zize e detrir. “Tandis ki Zida, i pou reste abandonnen pour en letan endefini.”—Yoel 3:10, 12, 20.
Larepons pour bann kestyon lo Labib:
1:15; 2:1, 11, 31; 3:14—Ki si sa “zour Zeova”? Zour Zeova i sa letan kot Zeova pou egzekit zizman lo son bann lennmi, sa i vedir en destriksyon pour zot e en delivrans pour son bann vre adorater. Par egzanp, en zour parey ti ariv lo ansyen Babilonn an 539 A.N.L. kan i ti ganny konkerir par bann Med ek Pers. (Izai 13:1, 6) En lot “zour Zeova” i pros kot i pou egzekit son zizman lo “Gran Babilonn,” setadir tou bann fo larelizyon.—Revelasyon 18:1-4, 21.
2:1-10, 28—Ki mannyer sa profesi lo sa bann zensek ki pe anvair ti ganny akonplir? Napa okenn par dan Labib ki montre ki bann zensek ti anvair pei Kanaan lo sa degre parey liv Yoel i dekrir. Alor, sa latak zensek ki Yoel ti dekrir i profetik e sa ti arive an 33 N.L. kan Zeova ti konmans devid son lespri sen lo bann premye disip Kris e zot ti konmans pres sa mesaz ki ti tourmant bann sef relizye. (Akt 2:1, 14-21; 5:27-33). Sa i en privilez pour nou osi ozordi pour partisip dan sa travay.
2:32—Ki savedir ‘kriy non Zeova’? Kriy non Zeova i vedir ki nou konn son non, annan profon respe pour son non, e pour annan konfyans dan sa enn ki port sa non.—Romen 10:13, 14.
3:14—Ki si sa “laplenn desizyon”? I en landrwa senbolik kot egzekisyon zizman Bondye pou arive. Pandan letan renny lerwa Zida, Yeosafat, ki son non i vedir “Zeova i en Ziz,” Bondye ti delivre Zida kont bann nasyon dan zalantour par konfiz zot bann lafors militer. E se pour sa ki sa landrwa ti osi ganny apele “laplenn Yeosafat”. (Yoel 3:2, 12) Dan nou letan, i reprezant dan en fason senbolik landrwa kot bann nasyon pou ganny kraze parey rezen dan en preswar diven.—Revelasyon 19:15.
Leson pour nou:
1:13, 14. Vre repantans e rekonnet ki Zeova i sa vre Bondye i esansyel pour nou delivrans.
2:12, 13. Vre repantans i sorti dan leker. I enplik en santiman anndan konmsi ou pe ‘desir ou leker,’ ki diferan avek selman ‘desir en lenz’ ki ti kapab ganny fer zis pour dimoun vwar.
2:28-32. Zis bann ki “kriy non Zeova ki pou ganny sove” “sa gran zour efreyan Zeova.” Nou vreman rekonesan ki Zeova i devid son lespri sen lo tou dimoun zenn konman vye e ki zonm konman fanm, i partisip dan sa travay profetize ansanm, setadir anons “bann mervey ki Bondye in fer.”! (Akt 2:11) Anmezir ki zour Zeova i aprose, eski pa nou devret fer zefor pour “anmenn en lavi sen e annan respe pour Bondye”?—2 Pyer 3:10-12.
3:4-8, 19. Yoel ti profetize ki sa bann nasyon toultour Zida ti pou ganny zize pour lapenn zot ti mal azir anver pep swazir Bondye. An rapor avek sa bann parol profetik, nou vwar ki vreman lavil Tir ti ganny detrir par Lerwa Babilonn Neboukadnetsar. Plitar, ler lavil Tir ki ti lo zil ti ganny konkerir par Aleksann Legran, bokou bann solda ek bann zonm enportan ti ganny touye e 30,000 zabitan ti ganny vann konman lesklav. Bann Filisten osi ti ganny menm tretman dan lanmen Aleksann Legran ek son bann sikseser. Ver katriyenm syek A.N.L., Edonm ti reste abandonnen. (Malaki 1:3) Sa bann profesi ki’n ganny akonplir i fortifye nou lafwa dan Zeova konman sa enn ki akonplir son bann promes. I osi montre konman Zeova pou azir anver bann nasyon ki persekit son bann vre adorater ozordi.
3:16-21. “Vreman lesyel ek later pou tranble,” e bann nasyon pou eksperyans zizman Zeova. “Me Zeova pou en refiz pour son pep,” i pou donn zot en bon kondisyon lavi dan paradi. Eski pa nou devre pli determinen pour reste pros avek li pandan ki zour son zizman lo bann mesan i aprose?
“MET PARE POUR ZWENN OU BONDYE”
Amos i annan en mesaz pour bann lennmi toultour Izrael, pour Zida e pour Izrael. Destriksyon ti pe vini pour Siri, Filisti, Tir, Edom ek Moab akoz zot ti vreman kriyel anver pep Bondye. Bann zabitan Zida pe esper destriksyon “lefet ki zot in rezet bann lalwa Zeova.” (Amos 2:4) Me ki nou pour dir konsernan sa dis tribi rwayonm Izrael? Son bann pese ti enkli son move fason azir anver bann pov, son limoralite, ek tretman san respe pour bann profet Bondye. Amos ti averti zot ki Zeova pou fer zot “rann kont pour bann lotel Betel” e i pou “kraz lakaz liver e osi lakaz lete.”—Amos 3:14, 15.
Malgre diferan pinisyon ki ti’n deza ganny donnen, bann Izraelit ki ti ador bann zidol ti kontinyen reste antete. Amos ti dir zot: “Met pare pour zwenn ou Bondye.” (Amos 4:12) Pour bann Izraelit, zour Zeova i sa zour ki zot ti pou “al an egzil pli lwen ki Damas,” setadir ver Lasiri. (Amos 5:27) Amos ti fer fas avek lopozisyon sorti kot en pret Betel me sa pa ti fer li per. Zeova ti dir Amos: “Lafen in arive pour mon pep Izrael. Mon pa pou kontinyen pardonn zot.” (Amos 8:2) Ni Seol ni bann montanny pa ti kapab kasyet zot zour zizman Bondye. (Amos 9:2, 3) Me pourtan, i ti annan en promes restorasyon. Zeova ti dir: “Wi, mon pou rasanble Izrael mon pep ki an egzil, e vreman zot pou batir bann lavil abandonnen e reste ladan, zot pou plant bann pye rezen e zot pou bwar son diven, zot pou fer bann zarden e zot pou manz son bann fri.”—Amos 9:14.
Larepons pour bann kestyon lo Labib:
4:1—Lekel ki ganny reprezante konman “bann bef Basann”? Plato Basann ti en landrwa les avek Lanmer Galile ki ti renonmen pour son bann elevaz diferan bon kalite zannimo enkli bef. En fakter pour sa se ki later ti byen prodiktif e byen fertil laba. Amos ti konpar sa bann madanm Samari ki ti kontan bann keksoz deliks avek bann bef Basann. San dout sa bann madanm ti pe met presyon lo “zot met,” ouswa mari, pour trik bann dimoun senp pour zot kapab satisfer zot dezir pour ganny larises.
4:6—Ki savedir sa lekspresyon “lapropte ledan”? Sa mo i relye avek “lanvi dipen,” e sa fraz in ganny servi pour refer avek en letan kot ti pou annan lafamin e kot ledan bann Izraelit ti pou reste prop akoz napa manze.
5:5—Dan ki fason Izrael‘ pa ti devret rod Betel’? Yarobam 1 ti’n met an plas ladorasyon pti bef dan Betel. Depi sa, sa lavil ti vin sant fo ladorasyon. Gilgal ek Ber-Seba osi ti bezwen parmi bann landrwa kot bann aposta ti al fer zot ladorasyon. Pour sov sa bann maler ki ti’n ganny predir pour zot, pep Izrael ti bezwen aret al pelerinaz dan sa bann landrwa pour ador pti bef e konmans rod Zeova.
7:1—Ki savedir “zerb lerwa ki’n ganny koupe”? I probab ki i ti pe refer avek taks ki ti’n ganny enpoze par lerwa pour li pran swen avek son bann kavalye ek son bann zannimo. Sa taks ti bezwen ganny peye ‘sa letan kot lagrenn ki’n ganny senmen tar ti konmans pouse.’ Apre sa, sa bann dimoun ti kapab rekolte zot bann prodwi. Avan ki zot ti kapab fer sa, en kantite sotrel ti vini e devor tou zot rekolt ansanm avek tou zot bann lezot vezetasyon.
8:1, 2—Ki savedir sa “pannyen fri lete”? I ti montre ki zour Zeova ti pe aprose. Bann fri lete ti ganny rekolte pandan lafen lasezon rekolt, savedir ver lafen lannen agrikol. Kan Zeova ti fer Amos vwar “en pannyen fri lete,”sa ti vedir ki lafen ti pros pour Izrael. Alors, Zeova ti dir Amos: “Lafen in arive pour mon pep Izrael. Mon pa pou kontinyen pardonn zot.”
Leson pour nou:
1:3, 6, 9, 11, 13; 2:1, 4, 6. I ti pe koz lo son lakoler anver Izrael, Zida ek sa sis nasyon toultour li ler Zeova ti dir: “Mon pa pou fer li retournen.” Ti enposib pour zot sov zizman Zeova.—Amos 9:2-5.
2:12. Nou pa devret dekouraz bann pionye, bann sirveyan rezyonal, bann misyonner oubyen bann manm lafanmiy Betel ki travay dir par demann zot pour abandonn zot servis pour en lavi swadizan normal. O kontrer, nou bezwen ankouraz zot pour zot kontinyen fer sa bon travay.
3:8. Parey en dimoun i per ler i tann en lyon kriye, Amos ti santi li pouse pour prese apre ki i ti tann Zeova dir:“Ale, profetiz avek mon pep.” (Amos 7:15) Lakrent pour Bondye i devret pous nou pour annan plis devouman dan nou travay pour pres sa mesaz lo Rwayonm Bondye.
3:13-15; 5:11. Avek led Zeova, sa pov gardyen troupo Amos ti kapab “donn temwannyaz” avek bann dimoun ki ti ris e ki pa ti konsernen avek sa mesaz. Pareyman, Zeova i kapab ekip nou pour nou pres sa mesaz konsernan son Rwayonm san pran kont ki degre difisil en teritwar i kapab ete.
4:6-11; 5:4, 6, 14. Malgre zot lesey bann Izraelit pa ti reisi “retourn” kot Zeova, zot ti ganny lord pour: “rod Zeova, e kontinyen viv.” Osi lontan ki Zeova i kontinyen avek pasyans pour les sa move sistenm kontinyen, nou devret averti bann ki ladan pour tourn ver Bondye.
5:18, 19. “En gran lanvi pour zour Zeova” san vreman pare pour li i bet. Sitiasyon en tel zonm i kapab ganny konpare avek en dimoun ki sov en lyon zis pour li apre zwenn en lours, i tay sa lours e finalman apre tousala zis pour li ganny morde avek en serpan. Nou pou malen si nou kontinyen “veye” spirityelman e gard nou touzour pare.—Lik 21:36.
7:12-17. Nou pa bezwen per e nou annan lardyes pour pres mesaz Bondye.
9:7-10. Menm si zot ti bann desandans bann patrias fidel e ki zot ti ganny delivre Lezip konman pep swazir Bondye, sa pa ti anpes bann Izraelit enfidel perdi laprouvasyon Bondye parey bann Kousit. Pour ganny laprouvasyon sa Bondye ki pa fer lapliferans i pa depan lo ki desandans nou sorti ladan me lo nou ‘lakrent pour li e fer sa ki byen.’—Akt 10:34, 35.
Ki nou devret fer
Zour ki Zeova pou egzekit zizman lo sa lemonn Satan i pros. Bondye in devid son lespri lo son bann adorater, i byen ekip zot pour averti limanite konsernan son zour zizman ki pe vini. Eski pa nou devre partisip plennman dan sa travay pour ed lezot konn Zeova e pour ‘kriy son non’?—Yoel 2:31, 32.
Amos i dir nou: “Ay sa ki mal e kontan sa ki bon, e donn lazistis en plas kot baro.” (Amos 5:15) Anmezir ki zour Zeova i aprose, i en swa saz pour nou apros avek Bondye e pour reste separe avek sa lemonn mesan ek son bann lasosyasyon degradan. Pour atenn sa bi, pa liv Yoel ek Amos i en bon led pour nou!—Ebre 4:12.
[Portre lo paz 4]
Yoel ti profetize: “Zour Zeova i pros!”
[Portre lo paz 7]
Parey Amos, nou pa bezwen per e nou annan lardyes pour pres son mesaz