“ဣသရေလအမျိုးကိုတည်ထောင်သော” စိတ်သောကရောက်ခဲ့သည့်ညီအစ်မများ

အရုဏ်တက်ချိန်နီးလာသည်နှင့် အဖြစ်မှန်ပေါ်တော့မည်ကို လေအာသိနေသည်။ ယာကုပ်၏ရင်ခွင်ထဲတွင်အိပ်နေသော မိမိသည် ညီမဖြစ်သူ ရာခေလမဟုတ်ကြောင်း ယာကုပ်သိတော့မည်။ လေအာသည် ဖခင်၏တောင်းဆိုမှုကြောင့် မျက်နှာတွင်ဇာပဝါထူထူခြုံပြီး ယာကုပ်နှင့်ရာခေလတို့အတွက် ပြင်ဆင်ထားသော မင်္ဂလာအိပ်ရာတွင် အိပ်စက်ခြင်းဖြစ်နိုင်သည်။

မိုးသောက်သောအခါ အဖြစ်မှန်ကို ယာကုပ်သိလိုက်ချိန်တွင် မည်သို့ခံစားရမည်ကို မြင်ယောင်ကြည့်ပါ။ သူသည် လေအာ၏ဖခင် လာဗန်ကို ဒေါသတကြီးပြစ်တင်ပြောဆိုလေသည်။ ထိုအချိန်တွင် လေအာသည် ထိုလှည့်စားမှု၌ မိမိမည်သို့ပါဝင်ပတ်သက်နေကြောင်းနှင့် ဖြစ်လာနိုင်မည့် ရေရှည်အကျိုးဆက်များကို စဉ်းစားနေမည်ဖြစ်သည်။ လေအာနှင့်ရာခေလတို့၏ဇာတ်လမ်းသည် ကျမ်းစာသမိုင်းတွင် အရေးပါ၏။ ထို့ပြင် တစ်လင်တစ်မယားစနစ်ကျင့်သုံးခြင်းနှင့် အိမ်ထောင်တွင်သစ္စာရှိခြင်းသည် ပညာရှိလမ်းစဉ်ဖြစ်ကြောင်းကိုလည်း သိရှိစေသည်။

ရေတွင်း၌ဆုံတွေ့ရသော သူစိမ်းတစ်ဦး

ယင်းမတိုင်မီခုနစ်နှစ်ခန့်တွင် ရာခေလသည် ရေတွင်း၌ သူစိမ်းတစ်ဦးနှင့်ဆုံခဲ့၏။ ထိုသူက ဆွေမျိုးတော်သည်ဟုဆိုသောကြောင့် ဖခင်ထံသွား၍ ပြောလေသည်။ ထိုအခါ သူသည် မိမိ၏ဝမ်းကွဲအစ်ကိုယာကုပ်ဖြစ်ပြီး မိမိဖခင်၏ညီမမှမွေးသောသားဖြစ်ကြောင်း၊ ယေဟောဝါကို ဝတ်ပြုသူတစ်ဦးဖြစ်ကြောင်း သိလိုက်ရသည်။ တစ်လကြာပြီးနောက် ယာကုပ်သည် ရာခေလကိုလက်ထပ်ရန် ခုနစ်နှစ်အစေခံပါမည်ဟု လာဗန်ထံတောင်းဆိုလေ၏။ မိမိ၏တူသည် အလုပ်ကြိုးစားသူဖြစ်ပြီး မိမိတို့တွင် ဆွေမျိုးချင်းအိမ်ထောင်ပြုသည့် ထုံးစံရှိသောကြောင့် ထိုတောင်းဆိုချက်ကို လာဗန်လက်ခံခဲ့သည်။—⁠ကမ္ဘာဦး ၂၉:၁-၁၉။

ရာခေလအပေါ်ထားရှိသော ယာကုပ်၏အချစ်သည် အရူးအမူးအချစ်မဟုတ်ပေ။ သူသည် “ရာခေလကို ချစ်သောကြောင့်” စေ့စပ်ထားသောခုနစ်နှစ်ကို “နည်းသောနေ့ရက်ကဲ့သို့ထင်မှတ်” လေသည်။ (ကမ္ဘာဦး ၂၉:၂၀) ရာခေလကွယ်လွန်ချိန်အထိ သူ့ကို ယာကုပ်ချစ်နေသောကြောင့် ရာခေလတွင် အရည်အသွေးကောင်းများစွာရှိရမည်ဟု ယူဆရသည်။

လေအာသည်လည်း ယေဟောဝါကို သစ္စာရှိရှိဝတ်ပြုသူတစ်ဦးနှင့် လက်ထပ်ရန် မျှော်လင့်ခဲ့သလော။ သမ္မာကျမ်းစာတွင် မဖော်ပြထားပါ။ သူအိမ်ထောင်ပြုခြင်းသည် လာဗန်၏အကြံအစည်ဖြစ်ကြောင်းကိုသာ ရှင်းလင်းစွာဖော်ပြသည်။ ရာခေလနှင့်စေ့စပ်ထားသော ခုနစ်နှစ်ပြည့်သောအခါ လာဗန်သည် မင်္ဂလာပွဲကြီး ကျင်းပပေးခဲ့သည်။ သို့သော် ညဦးအချိန်ရောက်သောအခါ လာဗန်သည် လေအာကို ယာကုပ်ထံဆောင်သွင်း၍ ယာကုပ်သည် “သူနှင့်ဆက်ဆံလေ၏” ဟုကျမ်းစာမှတ်တမ်းကဆိုသည်။—⁠ကမ္ဘာဦး ၂၉:၂၄။

ယာကုပ်ကိုလှည့်စားရန် လေအာ ပူးပေါင်းကြံစည်ခဲ့ခြင်းလော။ သို့မဟုတ် ဖခင်၏စကားကို နာခံခဲ့ခြင်းသာ ဖြစ်သလော။ ထိုအချိန်တွင် ရာခေလ အဘယ်တွင်ရှိနေသနည်း။ ဖြစ်ပျက်နေသောအရာများကို သူသိသလော။ သိလျှင် သူမည်သို့ခံစားခဲ့ရသနည်း။ ဖခင်၏အမိန့်ကို မလွန်ဆန်နိုင်၍လော။ ထိုမေးခွန်းများကို ကျမ်းစာက မဖြေဆိုထားပါ။ ထိုကိစ္စနှင့်ပတ်သက်၍ ရာခေလနှင့်လေအာ မည်သို့ပင်ခံစားခဲ့ရပါစေ ထိုကြံစည်မှုကြောင့် ယာကုပ် အလွန်အမျက်ထွက်ခဲ့သည်။ သို့သော် သူတို့ကိုမဟုတ်ဘဲ လာဗန်ကိုသာ အမျက်ထွက်သဖြင့် “ကျွန်ုပ်သည် ရာခေလကိုရခြင်းငှာ အစေခံရပြီမဟုတ်လော။ ကျွန်ုပ်ကိုအဘယ်ကြောင့် လှည့်စားရသနည်း” ဟုဆိုလေ၏။ လာဗန် မည်သို့တုံ့ပြန် ခဲ့သနည်း။ “ငါတို့ပြည်၌ သမီးအကြီးကိုမပေးစားမီ အငယ်ကိုမပေးစားရ။ ခုနစ်ရက်စေ့အောင် ငံ့ဦးလော့။ နောက်တစ်ဖန် ခုနစ်နှစ်အစေခံရသည်အတွက် ရာခေလကိုလည်း သင့်အား ပေးစားဦးမည်” ဟုဆိုသည်။ (ကမ္ဘာဦး ၂၉:၂၅-၂၇) ထို့ကြောင့် နောက်ပိုင်းတွင် မနာလိုမှုများ အကြီးအကျယ်ဖြစ်ပေါ်ခဲ့သော မယားအများယူသည့်အိမ်ထောင်ရေးထဲသို့ ယာကုပ်ကျရောက်ခဲ့ရသည်။

သာယာပျော်ရွှင်မှုမဲ့သော မိသားစု

ယာကုပ်သည် ရာခေလကို ချစ်မြတ်နိုးသည်။ လေအာမူကား “အမုန်းခံရသည်ကို” ဘုရားသခင်သိမြင်၍ သားဖွားရသောအခွင့်ကို ပေးတော်မူ၏။ ရာခေလမူကား မြုံနေ၏။ သို့သော် လေအာသည် ကလေးရလိုသည်ထက် ယာကုပ်၏မေတ္တာကို သာ၍ရလိုသည်။ ယာကုပ်သည် ရာခေလကိုသာချစ်ကြောင်း တွေ့ရသည့်အခါ သူ့ခမျာ စိတ်သောကရောက်နေရှာသည်။ သို့တိုင် သားဦးလေးကိုဖွားမြင်ပေးသည့်အတွက် ယာကုပ်၏အချစ်ကိုရရှိမည်ဟု သူမျှော်လင့်နေဆဲပင်။ ထိုသားဦး ရုဗင်၏အဓိပ္ပာယ်မှာ “ကြည့်လော့၊ သားတစ်ဦးမွေးပြီ” ဖြစ်၏။ ထိုသို့အမည်ပေးရခြင်းမှာ ‘ထာဝရဘုရားသခင်သည် ငါ၏ဆင်းရဲခံခြင်းကို အမှန်ကြည့်မြင်တော်မူပြီ။ သို့ဖြစ်၍ ယခု ငါ့လင်သည် ငါ့ကိုချစ်လိမ့်မည်’ ဟုသူယူဆသောကြောင့်ဖြစ်သည်။ သို့သော် ယာကုပ်မူကား လေအာကို မချစ်၊ နောက်သားတစ်ဦးမွေးလာချိန်တွင်လည်း မချစ်ခဲ့ပေ။ ထို့ကြောင့် ထိုသားကို “ကြားပြီ” ဟုအဓိပ္ပာယ်ရသောရှိမောင်ဟု အမည်ပေးခဲ့သည်။ အကြောင်းမှာ ‘ငါသည် အမုန်းခံရကြောင်းကို ထာဝရဘုရားသခင်ကြားသောကြောင့် ဤသားကိုလည်း ပေးသနားတော်မူပြီ’ ဟုယူဆသောကြောင့်ဖြစ်၏။—⁠ကမ္ဘာဦး ၂၉:၃၀-၃၃။

ဘုရားသခင်ကြားသည်ဟုဆိုသောကြောင့် လေအာသည် မိမိအခြေအနေကို ဆုတောင်းခဲ့ကြောင်း ထင်ရှားသည်။ ထို့ကြောင့် သူသည် ယုံကြည်ခြင်းရှိသောအမျိုးသမီးဖြစ်ပုံရသည်။ သို့တိုင် တတိယသားလေဝိကို မွေးဖွားပြီးနောက်၌ပင် စိတ်သောကရောက်နေဆဲဖြစ်သည်။ လေဝိ၏အမည်မှာ “စွဲလမ်းသည်” သို့မဟုတ် “ပေါင်းဖော်သည်” ဟုအဓိပ္ပာယ်ရပြီး “ငါ့လင်အား သားသုံးယောက်ကို ငါဖွားမြင်သောကြောင့် ယခုတစ်ခါ သူသည် ငါနှင့်ပေါင်းဖော်လိမ့်မည်” ဟုလေအာဆိုသည်။ သို့သော် ယာကုပ်၏အချစ်ကို လေအာမရရှိခဲ့ပေ။ ထိုအဖြစ်မှန်ကို လေအာလက်ခံလိုက်ပုံရသောကြောင့် လေးယောက်မြောက်သားကို အမည်မှည့်ရာတွင် ယာကုပ်၏မေတ္တာကိုရရှိလိုသော မျှော်လင့်ချက်မတွေ့ရပေ။ ယင်းအစား “ချီးမွမ်းခြင်း” သို့မဟုတ် “ချီးမွမ်းရာအကြောင်း” ဟုအဓိပ္ပာယ်ရသော ယုဒဟုအမည်ပေးပြီး ဘုရားသခင်ကို ကျေးဇူးတင်ကြောင်း ဖော်ပြခဲ့သည်။ ‘ထာဝရဘုရားသခင်ကို ယခုငါချီးမွမ်းမည်’ ဟုသာ လေအာဆိုလေတော့သည်။—⁠ကမ္ဘာဦး ၂၉:၃၄၊ ၃၅။

လေအာတစ်ဦးတည်း စိတ်ဆင်းရဲရသည်မဟုတ်၊ ရာခေလလည်း ထပ်တူပင်ခံစားခဲ့ရသည်။ ရာခေလက “ငါ့အားသားကိုပေးပါ။ သို့မဟုတ် ငါသေတော့အံ့” ဟု ယာကုပ်ကိုဆိုလေ သည်။ (ကမ္ဘာဦး ၃၀:⁠၁) ယာကုပ်၏မေတ္တာကိုရရှိထားသော ရာခေလသည် သားသမီးအလွန်လိုချင်၏။ သားသမီးရရှိထားသော လေအာမူကား မေတ္တာငတ်နေရှာ၏။ တစ်ဦးပိုင်ဆိုင်ထားရာကို နောက်တစ်ဦးက လိုလားတောင့်တနေပြီး နှစ်ဦးစလုံး မပျော်ရွှင်ကြပေ။ သူတို့နှစ်ဦးစလုံး ယာကုပ်ကိုချစ်မြတ်နိုးပြီး သူ့အတွက် သားသမီးမွေးပေးလိုသည်။ တစ်ဦးကိုတစ်ဦး မနာလိုဝန်တိုဖြစ်နေကြသည်။ ထိုမိသားစု၏အခြေအနေမှာ အလွန်ဝမ်းနည်းဖွယ်ပါတကား!

ရာခေလ၏သားသမီးများ

ထိုခေတ်တွင် သားမဖွားဘဲမြုံနေခြင်းကို ရောဂါဝေဒနာတစ်ခုအဖြစ် ရှုမြင်ကြသည်။ လူမျိုးအပေါင်းကောင်းချီးခံစားရမည့် “အမျိုးအနွယ်” သည် အာဗြဟံ၊ ဣဇာက်၊ ယာကုပ်တို့၏မိသားစုမှ ပေါ်ထွန်းမည်ဟု ဘုရားသခင်ကတိပြုခဲ့သည်။ (ကမ္ဘာဦး ၂၆:၄; ၂၈:၁၄) သို့သော် ရာခေလသည် မြုံနေ၏။ ရာခေလ သားသမီးရနိုင်ရန်၊ ထိုကောင်းချီးတွင် ပါဝင်ခွင့်ရနိုင်ရန် ဘုရားသခင်သာတတ်နိုင်ကြောင်း ယာကုပ်သိသည်။ သို့တိုင် ရာခေလ စိတ်မရှည်နိုင်ပေ။ “အကျွန်ုပ်၌ ကျွန်မဗိလဟာရှိပါ၏။ သူ့ထံသို့ဝင်ပါ၊ သူသည် အကျွန်ုပ်ဒူးပေါ်မှာ သားဖွား၍ သူ့အားဖြင့် အကျွန်ုပ်သည် တည်ဆောက်ခြင်းရှိပါလိမ့်မည်” ဟုရာခေလဆို၏။—⁠ကမ္ဘာဦး ၃၀:၂၊ ၃။

ရာခေလ၏စိတ်ဓာတ်ကို ကျွန်ုပ်တို့ နားလည်ရခက်ပေမည်။ သို့သော် မြုံနေသောဇနီးတစ်ဦးသည် အမွေဆက်ခံသူရရှိရန် မိမိ၏ကျွန်မကို ခင်ပွန်းထံပေးအပ်သည့် ထုံးစံရှိကြောင်း အရှေ့ဖျားဒေသတစ်လျှောက်တွင် ရှာဖွေတွေ့ရှိခဲ့သော ရှေးခေတ်လက်ထပ်စာချုပ်များက ဖော်ပြသည်။ * (ကမ္ဘာဦး ၁၆:၁-၃) ထို့ကြောင့် အချို့အခြေအနေတွင် ကျွန်မ၏သားသမီးများကို ဇနီး၏သားသမီးများအဖြစ် ယူမှတ်ကြပေမည်။

ဗိလဟာသည် သားဖွားမြင်သောအခါ ရာခေလက “ဘုရားသခင်သည် ငါ့ဘက်၌တရားစီရင်တော်မူပြီ။ ငါ့စကားကိုကြား၍ သားကိုပေးသနားတော်မူပြီ” ဟု ဝမ်းမြောက်ဝမ်းသာ ကြွေးကြော်လေသည်။ ထိုသားကို “တရားသူကြီး” ဟုအဓိပ္ပာယ်ရသော ဒန်ဟုမှည့်လေ၏။ ရာခေလသည်လည်း မိမိ၏အခြေအနေဆိုးအကြောင်း ဆုတောင်းခဲ့သည်။ ဗိလဟာမွေးဖွားသော ဒုတိယသားကို “ငါ၏နပန်းပွဲ” ဟုအဓိပ္ပာယ်ရသည့် နဿလိဟုအမည်ပေးကာ “ငါသည် ငါ့အစ်မနှင့်ကျပ်ကျပ်လုံးထွေး၍ နိုင်ခဲ့ပြီ” ဟုဆိုလေ၏။ ထိုအမည်က သူတို့နှစ်ဦးကြား အကြီးအကျယ်ပြိုင်ဆိုင်မှုကို ဖော်ပြသည်။—⁠ကမ္ဘာဦး ၃၀:၅-၈။

ဗိလဟာကို ယာကုပ်ထံပေးအပ်ခြင်းသည် ဆုတောင်းချက်နှင့်အညီလုပ်ဆောင်ခြင်းဖြစ်သည်ဟု ရာခေလယူဆနိုင်သော်လည်း ဘုရားသခင်သည် ထိုနည်းဖြင့် သူ့အားသားသမီးပေးခဲ့ခြင်းမဟုတ်ပေ။ ဤတွင် သင်ခန်းစာတစ်ခုရရှိပါသည်။ ကျွန်ုပ်တို့သည် ယေဟောဝါထံ အသနားခံဆုတောင်းသည့်အခါ စိတ်မရှည်သော သဘော မရှိသင့်ပေ။ ကိုယ်တော်သည် ဆုတောင်းချက်များကို ကျွန်ုပ်တို့ မမျှော်လင့်ထားသည့်အချိန်တွင် မမျှော်လင့်သည့်နည်းများဖြင့် ဖြေကြားပေးနိုင်သည်။

လေအာလည်း အားကျမခံဘဲ မိမိကျွန်မဇိလပကို ယာကုပ်အား ပေးအပ်လေသည်။ သို့နှင့် ဇိလပသည် ဂဒ်နှင့်အာရှာကို မွေးဖွားလေ၏။—⁠ကမ္ဘာဦး ၃၀:၉-၁၃။

ရာခေလနှင့်လေအာတို့၏ပြိုင်ဆိုင်မှုကို ဖော်ပြသောအဖြစ်အပျက်တစ်ခုသည် လေအာ၏သားရုဗင်တွေ့သော အနုဆေးသီးအချို့နှင့်ပတ်သက်၏။ ထိုအသီးသည် သားသမီးရစေသည်ဟု ယူဆကြ၏။ ယင်းကို ရာခေလတောင်းသောအခါ လေအာက “သင်သည် ငါ့လင်ကိုယူ၍ အတွက်မရှိထင်သလော။ ငါ့သား၏အနုဆေးသီးကိုလည်း ယူချင်သေးသည်တကား” ဟုခါးခါးသီးသီး တုံ့ပြန်လေသည်။ ထိုစကားအရ ယာကုပ်သည် လေအာထက် ရာခေလနှင့်ပို၍ ပေါင်းသင်းနေထိုင်သည်ဟု အချို့ကယူဆကြ၏။ လေအာ၏ဝမ်းနည်းကြေကွဲမှုကို ရာခေလသိပုံရသောကြောင့် “သို့ဖြစ်လျှင် သင့်သား၏အနုဆေးသီးအတွက် လင်သည် ယနေ့ညတွင် သင်နှင့်အိပ်ရမည်” ဟုဆိုလေ၏။ ညဦးအချိန်၌ ယာကုပ်အိမ်ပြန်လာသောအခါ လေအာက “သင်သည် အကျွန်ုပ်ထံသို့ဝင်ရမည်။ အကျွန်ုပ်၏သားရခဲ့သော အနုဆေးသီးနှင့် သင့်ကိုအကျွန်ုပ်ငှားသည်” ဟုပြောသည်။—⁠ကမ္ဘာဦး ၃၀:၁၅၊ ၁၆။

လေအာသည် ပဉ္စမသားဣသခါနှင့် ဆဋ္ဌမသားဇာဗုလုန်ကို ထပ်မံဖွားမြင်ပြီးနောက် ဤသို့ကြွေးကြော်လေ၏– “ငါ့လင်အား သားခြောက်ယောက်ကို ဖွားမြင်သောကြောင့် ယခုငါနှင့်အမြဲနေလိမ့်မည်။” *—⁠ကမ္ဘာဦး ၃၀:၁၇-၂၀။

အနုဆေးသီးသည် ရာခေလအတွက် အသုံးမဝင်ခဲ့ပေ။ နောက်ဆုံး အိမ်ထောင်သက်ခြောက်နှစ်ပြည့်ပြီးနောက် ရာခေလတွင် ပဋိသန္ဓေစွဲ၍ ယောသပ်ကိုမွေးဖွားလေသည်။ အကြောင်းမှာ ယေဟောဝါသည် သူ့ကို “အောက်မေ့” ပြီး သူ့ဆုတောင်းချက်ကို အဖြေပေးခဲ့၍ဖြစ်၏။ “ငါခံရသောကဲ့ရဲ့ခြင်းအကြောင်းကို ဘုရားသခင်သည် ပယ်တော်မူပြီ” ဟု ရာခေလဆိုနိုင်လေပြီ။—⁠ကမ္ဘာဦး ၃၀:၂၂-၂၄။

သေဆုံးခြင်းနှင့်အမွေဆက်ခံခြင်း

ဒုတိယသားဗင်ယာမိန်ကို မွေးဖွားစဉ် ရာခေလကွယ်လွန်သွားသည်။ ယာကုပ်သည် ရာခေလနှင့် ရာခေလမွေးသောသားနှစ်ဦးကိုလည်း အလွန်ချစ်မြတ်နိုးခဲ့သည်။ နှစ်များစွာကြာပြီးနောက် သူကွယ်လွန်ခါနီးတွင် အချိန်မတန်ဘဲသေဆုံးသွားသော ချစ်ဇနီးရာခေလကို အမှတ်ရတမ်းတခဲ့သည်။ (ကမ္ဘာဦး ၃၀:၁; ၃၅:၁၆-၁၉; ၄၈:၇) လေအာသေဆုံးခြင်းနှင့်ပတ်သက်၍မူ ယာကုပ်သည် မိမိကိုသင်္ဂြိုဟ်စေလိုသည့်မြေတွင်း၌ပင် လေအာကိုသင်္ဂြိုဟ်ခဲ့ကြောင်းကိုသာ သိရသည်။—⁠ကမ္ဘာဦး ၄၉:၂၉-၃၂။

အိမ်ထောင်ရေးအပါအဝင် မိမိအသက်တာသည် စိတ်ပျက်ဖွယ်ကောင်းကြောင်း သက်ကြီးရွယ်အိုယာကုပ် ဝန်ခံခဲ့သည်။ (ကမ္ဘာဦး ၄၇:၉) လေအာနှင့်ရာခေလ၏အသက်တာလည်း စိတ်ပျက်ဖွယ်ကောင်းသည်မှာ သေချာသည်။ သူတို့၏ဖြစ်ရပ်က မယားအများယူခြင်း၏ ဝမ်းနည်းဖွယ်အကျိုးဆက်များနှင့် တစ်လင်တစ်မယားစနစ်ကို ယေဟောဝါ အဘယ်ကြောင့်အစပြုခဲ့ကြောင်း ဖော်ပြသည်။ (မဿဲ ၁၉:၄-၈; ၁ တိမောသေ ၃:၂၊ ၁၂) လင်ယောက်ျား သို့မဟုတ် ဇနီးတစ်ဦးသည် မိမိအိမ်ထောင်ဖက်တစ်ဦးတည်းကိုသာ လိင်စိတ်၊ အချစ်စိတ်မပြပါက မနာလိုဝန်တိုမှု ဖြစ်ပေါ်လာသည်။ ယင်းသည် မတရားမေထုန်နှင့် အိမ်ထောင်ရေးဖောက်ပြန်ခြင်းကို ဘုရားသခင်တားမြစ်ရသည့် အကြောင်းရင်းတစ်ခုဖြစ်၏။—⁠၁ ကောရိန္သု ၆:၁၈; ဟေဗြဲ ၁၃:၄။

မည်သို့ပင်ဖြစ်စေ ဘုရားသခင်သည် မိမိရည်ရွယ်ချက်ပြည့်စုံစေရန် မစုံလင်သော်လည်း သစ္စာရှိသောအမျိုးသား၊ အမျိုးသမီးများကို အသုံးပြုနေဆဲပင်ဖြစ်သည်။ လေအာနှင့်ရာခေလနှစ်ဦးစလုံးသည် ကျွန်ုပ်တို့ကဲ့သို့ပင် အားနည်းချက်များရှိ၏။ သို့သော် ယေဟောဝါသည် အာဗြဟံအားပေးခဲ့သော ကတိတော်ကို ပြည့်စုံစေရန် ထိုအမျိုးသမီးများကို အသုံးပြုခဲ့၏။ ထို့ကြောင့် သူတို့သည် “ဣသရေလအမျိုးကိုတည်ထောင်” ခဲ့သည်ဟု ဆိုနိုင်ပေသည်။—⁠ရုသ ၄:၁၁။

[အောက်ခြေမှတ်ချက်များ]

[စာမျက်နှာ ၉ ရုပ်ပုံ]

လေအာနှင့်ရာခေလသည် တစ်ဦးပိုင်ဆိုင်ထားရာကို တစ်ဦးက လိုလားတောင့်တနေပြီး နှစ်ဦးစလုံး မပျော်ရွှင်ကြပေ

[စာမျက်နှာ ၁၀ ရုပ်ပုံ]

ယာကုပ်သား ၁၂ ဦးမှ ဣသရေလအမျိုး ဖြစ်ပေါ်လာခဲ့