Paghanap nin Makahulogan na Katuyohan sa Buhay
Paghanap nin Makahulogan na Katuyohan sa Buhay
“An lambang bagay na naghahangos—mag-omaw iyan ki Jah.”—SALMO 150:6.
1. Iladawan an paghanap nin sarong hoben na lalaki nin katuyohan sa buhay.
“NAG-ADAL ako nin medisina huli ta gusto kong gamiton an sakong buhay sa pagtabang sa mga tawo. Naniniwala man ako na an prestihio asin dakulang ginaganar nin pagigin doktor magpapaogma sa sako,” an nagigirumdoman ni Seung Jin, na nagdakula sa Korea. * “Kan masabotan ko kun gurano kadikit kan talagang magigibo nin sarong doktor tanganing makatabang, nadisganar ako. Dangan nag-adal ako nin pagigin pintor, alagad an artistikong mga ginigibo ko dikiton an ikinakataong pakinabang sa iba, asin nakamate ako nin pagigin maimot. Nagin maestro ako asin dai nahaloy narealisar ko na an ikakatao ko sana mga impormasyon alagad bako an paggiya na puedeng magbunga nin tunay na kaogmahan.” Kapareho nin dakol, naghahanap si Seung Jin nin makahulogan na katuyohan sa buhay.
2. (a) Ano an boot sabihon kan pagkaigwa nin katuyohan sa buhay? (b) Paano niato naaaraman na an Kaglalang igwa nin katuyohan sa pagbugtak nia sa sato digdi sa daga?
2 Tanganing magkaigwa nin tunay na katuyohan sa buhay kaipuhan na igwa nin dahelan para mabuhay, sarong malinaw na pasohan, asin pangenot na katuyohan para sa satong mga paghihingoa. Puede daw talagang magkaigwa an mga tawo nin siring na katuyohan? Iyo! An katunayan na tinawan kita nin intelihensia, konsensia, asin nin kakayahan na mangatanosan nagpaparisa na an Kaglalang igwa nin marahay na katuyohan sa pagbugtak nia sa sato digdi sa daga. Kun siring, rasonable sana na satong manonompongan asin maootob an tunay na katuyohan niato solamente paagi sa pamumuhay kaoyon kan katuyohan kan Kaglalang.
3. Ano an kalabot sa katuyohan nin Dios para sa mga tawo?
3 Ihinahayag kan Biblia na an katuyohan nin Dios para sa sato kalabot an dakol na bagay. Halimbawa, an makangangalas na paagi kan pagkagibo sa sato talagang kapahayagan nin bakong maimot na pagkamoot nin Dios. (Salmo 40:5; 139:14) Sa siring, an pamumuhay oyon sa katuyohan nin Dios nangangahulogan nin daing kaimotan na pagkamoot sa iba kapareho kan ginibo nin Dios. (1 Juan 4:7-11) Nangangahulogan man iyan nin pagkuyog sa mga instruksion nin Dios, na nagtatabang sa sato na mamuhay kaoyon kan saiyang mamomoton na katuyohan.—Eclesiastes 12:13; 1 Juan 5:3.
4. (a) Ano an kaipuhan tanganing magkaigwa nin tunay na katuyohan sa buhay? (b) Ano an pinakahalangkaw na katuyohan na puedeng pagmaigotan na magibo nin siisay man?
4 Katuyohan man nin Dios na an mga tawo iribang mabuhay nin maogma asin matoninong kaiba an iba pang linalang. (Genesis 1:26; 2:15) Pero, ano an kaipuhan niatong gibohon tanganing magin maogma, magin tiwasay, asin magkaigwa nin katoninongan? Siring sa sarong aki na kaipuhan na mamatean an presensia kan saiyang mga magurang tanganing magin maogma asin tiwasay, kaipuhan niato an marahay na relasyon sa satong langitnon na Ama tanganing manompongan an tunay na kahulogan asin katuyohan sa buhay. (Hebreo 12:9) Ginigibong posible nin Dios an siring na relasyon sa saiya paagi sa pagtogot na dumayupot kita sa saiya asin pagdangog sa satong mga pamibi. (Santiago 4:8; 1 Juan 5:14, 15) Kun kita may pagtubod na ‘naglalakaw na kaibanan nin Dios’ asin magin mga katood nia, makakatao kita nin kagayagayahan asin kaomawan sa satong langitnon na Ama. (Genesis 6:9; Talinhaga 23:15, 16; Santiago 2:23) Iyan an pinakahalangkaw na katuyohan na puedeng pagmaigotan na magibo nin siisay man. An salmista nagsurat: “An lambang bagay na naghahangos—mag-omaw iyan ki Jah.”—Salmo 150:6.
Ano an Saimong Katuyohan sa Buhay?
5. Taano ta bakong madonong an pag-enot sa materyal na mga bagay?
5 Kabtang kan katuyohan nin Dios para sa sato an pag-asikaso niato sa satong sadiri asin sa satong pamilya. Kaiba digdi an pag-asikaso sa pisikal sagkod espirituwal na mga pangangaipo. Minsan siring, kaipuhan an pagigin timbang sa paggibo kaini, tanganing dai matahoban kan sekular na mga bagay an mas mahalagang espirituwal na mga bagay. (Mateo 4:4; 6:33) Makamomondo, isinesentro kan dakol na tawo an saindang buhay sa haros pagkaigwa sana nin materyal na mga bagay. Pero, bakong madonong na pagmaigotan na panigoan an gabos na pangangaipo niato paagi sana sa materyal na mga bagay. Ihinahayag kan dai pa sana nahahaloy na surbey sa mga milyonaryo sa Asia na dakol sa sainda an “bakong tiwasay asin purisaw, dawa ngani igwa sinda nin halangkaw na kamugtakan sa sosyedad asin pakamate na may nagibo huli sa saindang kayamanan.”—Eclesiastes 5:11.
6. Anong hatol an itinao ni Jesus sa mga nagmamaigot na magkamit nin kayamanan?
6 Si Jesus nagtaram manongod sa “mapandayang kapangyarihan nin kayamanan.” (Marcos 4:19) Paano nagigin mapandaya an kayamanan? Tibaad isipon nin mga tawo na an kayamanan nagpapaogma sa sainda, alagad dai man. “An namomoot sa kwarta, dai nanggad makokontento kaiyan,” an sabi kan madonong na si Hadeng Salomon. (Eclesiastes 5:10, Marahay na Bareta Biblia) Alagad posible daw na magmaigot na aboton an materyalistikong mga pasohan asin kadungan kaiyan maglingkod sa Dios nin bilog na kalag? Dai nanggad. Si Jesus nagpaliwanag: “Mayo nin siisay man na makakapaglingkod sa duwang kagurangnan; huli ta magsalang ikakaongis nia an saro asin mamomotan nia an ikaduwa, o magigin dayupot sia sa saro asin isisikwal nia an ikaduwa. Dai kamo makakapaglingkod sa Dios asin sa Kayamanan.” Sinadol ni Jesus an saiyang mga parasunod na magtipon, bakong nin materyal na kayamanan sa daga, kundi “kayamanan sa langit,” an boot sabihon, magkaigwa nin marahay na ngaran sa Dios, na ‘nakakaaram na kan mga kaipuhan nindo bago pa nindo iyan hagadon sa saiya.’—Mateo 6:8, 19-25.
7. Paano kita puedeng “makapangapot nin marigon sa tunay na buhay”?
7 Sa pagsurat sa saiyang kapwa trabahador na si Timoteo, nagtao si apostol Pablo nin nagkapirang mapuersang hatol mapadapit digdi. Sinabihan nia si Timoteo: ‘Pagbotan mo an mga mayaman na ibugtak an saindang paglaom, bakong sa kayamanan na bakong segurado, kundi sa Dios, na abundang nagtatao sa sato kan gabos na bagay para sa satong ikakaogma, na magin matinao, andam na manhiras, na nagririmpos para sa sainda man sana nin marahay na pundasyon para sa ngapit, tangani sindang makapangapot nin marigon sa tunay na buhay.’—1 Timoteo 6:17-19.
Ano an “Tunay na Buhay”?
8. (a) Taano ta dakol an nagmamaigot na magkamit nin kayamanan asin prestihio? (b) Ano an dai nasasabotan kan siring na mga tawo?
8 Para sa kadaklan na tawo, an pananaram na “tunay na buhay” nangangahulogan nin pamumuhay na maluho asin may kasingawan. An sarong magasin nin mga bareta sa Asia nagsabi: “An mga nagheheling nin pelikula o TV nakakanood na mawoton an naheheling ninda, mangarap kun ano an puedeng mapasainda.” An katuyohan sa buhay nin dakol na tawo iyo an pagkamit nin kayamanan asin prestihio. Isinasakripisyo nin dakol an saindang pagkahoben, salud, buhay pampamilya, asin pagpapahalaga sa espirituwal na mga bagay sa pagmamaigot na kamtan an mga bagay na ini. Pira sana an nag-iisip na an siring na mga naheheling sa media ladawan sana kan “espiritu kan kinaban”—an nangingibabaw na kaisipan na nag-iimpluwensia sa mayoriya kan binilyon na tawo sa daga asin nagpapahiro sa sainda na gumawe tumang sa katuyohan nin Dios para sa sato. (1 Corinto 2:12; Efeso 2:2) Bakong makangangalas na kadakol na tawo ngonyan an bakong maogma!—Talinhaga 18:11; 23:4, 5.
9. Ano an dai noarin man magigibo nin mga tawo, asin taano ta dai?
9 Kumusta man an mga daing kaimotan na nagtatrabaho para sa ikakarahay nin iba, na nagmamaigot na biyong haleon an pagkagutom, helang, asin inhustisya? An saindang kaomaw-omaw asin mapagsakripisyong mga paghihingoa sa parate nagtatao nin dakol na pakinabang sa mga tawo. Pero, sa ibong kan pinakamarahay na paghihingoa ninda, dai ninda noarin man mababago an sistemang ini nin mga bagay na magin makatanosan asin kapakipakinabang. Taano ta dai? Huli ta sa katunayan “an bilog na kinaban namumugtak sa kapangyarihan kan saro na marigsok”—si Satanas—asin habo niang mabago iyan.—1 Juan 5:19.
10. Noarin makakamtan kan mga maimbod an “tunay na buhay”?
10 Makamomondo nanggad kun sa buhay sana sa presenteng kinaban na ini naglalaom an saro! “Kun sa buhay sanang ini kita naglaom ki Cristo, kita an pinakakaherakherak sa gabos na tawo,” an isinurat ni Pablo. An saboot kan mga tawo na naniniwalang iyo sana ini an buhay iyo na “magkarakan asin mag-irinom kita, huli ta sa aga magagadan kita.” (1 Corinto 15:19, 32) Alagad igwa nin ngapit, sarong ‘bagong kalangitan asin sarong bagong daga na satong hinahalat segun sa panuga nin Dios, asin sa mga ini magdadanay an katanosan.’ (2 Pedro 3:13) Sa panahon na iyan, makakamtan kan mga Kristiano an “tunay na buhay,” an boot sabihon, “buhay na daing katapusan” na may pagkasangkap, magsalang sa langit o sa irarom kan mamomoton na pamamahala kan Kahadean na gobyerno nin Dios!—1 Timoteo 6:12.
11. Taano ta may katuyohan an paghihingoa na paoswagon an intereses kan Kahadean nin Dios?
11 Solamenteng an Kahadean nin Dios an magkakaigwa nin lubos na kapangganahan sa pagresolber sa mga problema nin katawohan. Sa siring, an paghihingoa na paoswagon an intereses kan Kahadean nin Dios iyo an pinakamakatuyohan na paghihingoa na magigibo nin siisay man. (Juan 4:34) Mantang nakikikabtang kita sa gibohon na iyan, magkakaigwa kita nin mahalagang marhay na relasyon sa satong langitnon na Ama. Yaon man sa sato an kagayagayahan na makaibanan sa paglilingkod an minilyon na espirituwal na mga tugang, na nagmamaigot na magkaigwa kan kaparehong katuyohan sa buhay.
Paggibo nin Tamang mga Pagsasakripisyo
12. Ikomparar an kalaenan kan buhay sa presenteng sistema asin kan “tunay na buhay.”
12 An presenteng kinaban “malihis sana asin siring man an mawot kaiyan,” an sabi kan Biblia. Mayong kabtang kan kinaban ni Satanas, kaiba an kabantogan asin kayamanan kaiyan, an makakalibre sa pagkalaglag, “alagad an naggigibo kan kabotan nin Dios magdadanay sagkod lamang.” (1 Juan 2:15-17) Kun ikokomparar sa daing kasegurohan na kayamanan, sa madaling mawara na kamurawayan, asin sa hababaw na kasingawan kan presenteng sistema, an “tunay na buhay”—an buhay na daing katapusan sa irarom kan Kahadean nin Dios—permanente asin maninigo sa satong mga pagsasakripisyo, basta ginigibo niato an tamang mga pagsasakripisyo.
13. Paano ginibo nin sarong mag-agom an tamang mga pagsasakripisyo?
13 Isip-isipon an halimbawa ni Henry asin Suzanne. Lubos sindang nagtutubod sa panuga nin Dios na an gabos na tawo na ineenot sa saindang buhay an Kahadean mag-aako nin tabang nin Dios. (Mateo 6:33) Huli kaini, pinili nindang mag-istar sa simpleng harong tanganing imbes na duwa sindang magtrabaho nin sekular, mas dakol na panahon an magagamit ninda sa espirituwal na mga aktibidad kaiba kan saindang duwang aking babae. (Hebreo 13:15, 16) Dai nasasabotan nin sarong katood na may marahay na intension an pinili ninda. Sinabihan nia si Suzanne: “Suzanne, kun gusto mong mag-istar sa mas magayon na harong, may isasakripisyo ka talaga.” Pero, aram ni Henry asin Suzanne na an pag-enot ki Jehova “may panuga sa buhay ngonyan asin sa madatong.” (1 Timoteo 4:8; Tito 2:12) An saindang mga aking babae nagdakula asin nagin maigot na bilog na panahon na mga ebanghelisador. Bilang sarong pamilya, naniniwala sinda na mayo sindang nalipasan; imbes, nakinabang sindang marhay paagi sa pagmamaigot na aboton an “tunay na buhay” bilang saindang katuyohan.—Filipos 3:8; 1 Timoteo 6:6-8.
Dai ‘Paggamiton an Kinaban nin Lubos’
14. An pakalingaw sa tunay na katuyohan niato puedeng sumagkod sa anong mamondo nanggad na mga pangyayari?
14 Minsan siring, igwa nin totoong peligro kun malingawan niato an satong tunay na katuyohan asin bako nang higot an pangangapot niato sa “tunay na buhay.” Namemeligro kitang ‘madara kan mga kahaditan asin kayamanan patin kaalingan kan buhay na ini.’ (Lucas 8:14) An daing kontrol na kamawotan asin “mga kahaditan sa buhay” puedeng sumagkod sa sobrang pagkasangkot sa sistemang ini nin mga bagay. (Lucas 21:34, nota sa ibaba) Makamomondo nanggad, may mga nabangkag ngonyan sa pagmawot na magin mayaman asin “nagkaralagalag parayo sa pagtubod asin sinaksak an bilog nindang sadiri nin dakol na kakologan,” na iwinara pa ngani an saindang mahalagang marhay na relasyon ki Jehova. Kanigoan kamakamomondong resulta huli sa dai ‘pangangapot nin marigon sa buhay na daing katapusan’!—1 Timoteo 6:9, 10, 12; Talinhaga 28:20.
15. Paano nakinabang an sarong pamilya paagi sa ‘dai paggamit kan kinaban nin lubos’?
15 Sinadol ni Pablo “an mga minagamit kan kinaban [na magin] siring sa mga dai naggagamit kaiyan nin lubos.” (1 Corinto 7:31) Isinapuso ini ni Keith asin Bonnie. “Ako nagin saro sa Mga Saksi ni Jehova kan patapos na ako sa pagdedentista,” an pag-estorya ni Keith. “May pagpipilian ako. Puede akong mag-ako nin dakol na pasyente asin magkaigwa nin dakol na kuarta, alagad an paggibo kaiyan makakaolang sa samong paglilingkod sa Dios. Pinili ko na limitaran an bilang kan sakong mga pasyente tanganing magkaigwa ako nin dakol na panahon para sa espirituwal asin emosyonal na ikakarahay kan samong pamilya, na pag-abot nin panahon kaiba na an limang aking babae. Minsan ngani bihira kaming magkaigwa nin ekstrang kuarta, nakanood kami na mag-ekonomiya, alagad pirme kaming igwa kan kinakaipuhan niamo. An samong buhay bilang pamilya dayupot, mamomoton, asin pano nin kagayagayahan. Pag-abot nin panahon, gabos kami naglaog sa bilog na panahon na ministeryo. Ngonyan an samong mga aking babae maogma bilang mga may agom, na tolo sa sainda an igwa naman nin mga aki. An sainda man na mga pamilya maogma mantang padagos nindang ineenot an katuyohan ni Jehova.”
Pag-enot sa Saindong Buhay kan Katuyohan nin Dios
16, 17. Anong mga halimbawa nin maabilidad na mga tawo an itinatao kan Biblia, asin paano sinda nagigirumdoman?
16 An Biblia nagtatao nin mga halimbawa kan mga namuhay asin dai namuhay sono sa katuyohan nin Dios. An mga leksion sa siring na mga halimbawa aplikado sa mga tawo na laen-laen an edad, kultura, asin kamugtakan. (Roma 15:4; 1 Corinto 10:6, 11) Si Nimrod nagtogdok nin darakulang siudad, alagad ginibo nia iyan bilang pagtumang ki Jehova. (Genesis 10:8, 9) Pero, dakol pang iba an nagin marahay na halimbawa. Halimbawa, dai ginibo ni Moises na katuyohan sa buhay an pagpapadanay kan saiyang prestihio bilang sarong nobleng Egipcio. Imbes, ibinilang nia an saiyang espirituwal na mga pribilehio bilang ‘orog pang kayamanan kisa sa natipon na kayamanan kan Egipto.’ (Hebreo 11:26) An doktor na si Lucas posibleng marhay na nagtabang ki Pablo asin sa iba pa na atubangon an mga kamatean kaini. Alagad ginibo ni Lucas an pinakadakulang kontribusyon nia bilang sarong ebanghelisador asin kagsurat sa Biblia. Mapadapit ki Pablo, midbid sia bakong bilang eksperto sa Ley, kundi bilang misyonero, sarong “apostol sa mga nasyon.”—Roma 11:13.
17 Sa pangenot, nagigirumdoman si David bakong bilang sarong komandante militar ni bilang sarong musikero asin kompositor, kundi bilang ‘sarong lalaki na nasusunoan kan puso nin Dios.’ (1 Samuel 13:14) Midbid niato si Daniel, bakong huli sa saiyang trabaho bilang opisyal nin gobyerno sa Babilonya, kundi huli sa saiyang paglilingkod bilang maimbod na propeta ni Jehova; si Ester, bakong bilang reyna kan Persia, kundi bilang sarong halimbawa nin kosog nin boot asin pagtubod; si Pedro, Andres, Santiago, asin Juan, bakong bilang mapangganang mga parasira, kundi bilang mga apostol ni Jesus. Asin si Jesus mismo, an pinakamarahay na halimbawa, nagigirumdoman niato bakong bilang “panday,” kundi bilang “an Cristo.” (Marcos 6:3; Mateo 16:16) Malinaw na masasabotan sa gabos na ini na ano man na abilidad, rogaring, o prestihio na igwa sinda, an saindang buhay dapat na nakasentro, bakong sa sekular na mga karera ninda, kundi sa paglilingkod ninda sa Dios. Aram ninda na an pinakakaomaw-omaw asin pinakanakakakontentong katuyohan na puedeng mapasainda iyo an magin lingkod nin Dios.
18. Paano nagdesisyon an sarong hoben na Kristiano na gamiton an saiyang buhay, asin ano an narealisar nia?
18 Si Seung Jin, na nasambitan sa kapinonan, nasabotan man an bagay na ini. “Imbes na idusay an gabos kong kosog sa pagigin doktor, pintor, o maestro, nagdesisyon ako na gamiton an sakong buhay kaoyon kan sakong pagdusay sa Dios,” an paliwanag nia. “Naglilingkod na ako ngonyan kun saen dakula an pangangaipo para sa mga paratokdo sa Biblia, na tinatabangan an mga tawo na maglakaw sa dalan pasiring sa buhay na daing katapusan. Dati an paghona ko dai ko magagamit nin lubos an sakong kakayahan sa pagigin bilog na panahon na ministro. Ngonyan mas nakakaogma an sakong buhay kisa kasuarin man, mantang pinagmamaigotan ko na paoswagon an sakong personalidad asin an sakong abilidad na magtokdo sa mga tawo na laen-laen an kultura. Nasasabotan ko na an paggibo sa katuyohan ni Jehova na magin satong katuyohan iyo sana an pinakamakahulogan na paagi nin pamumuhay.”
19. Paano niato manonompongan an tunay na katuyohan sa buhay?
19 Bilang mga Kristiano, tinawan kita nin nagliligtas-buhay na kaaraman asin nin paglaom manongod sa kaligtasan. (Juan 17:3) Kun siring, logod na dai niato “akoon an dai na kutana maninigong kabootan nin Dios asin lipasan an katuyohan kaiyan.” (2 Corinto 6:1) Imbes, gamiton niato an mahalagang marhay na mga aldaw asin taon kan satong buhay tanganing omawon si Jehova. Ipalakop niato an kaaraman na nagtatao nin tunay na kaogmahan ngonyan asin naggigiya pasiring sa buhay na daing katapusan. Sa paggibo kaiyan, maeeksperyensiahan niato an katotoohan kan mga tataramon ni Jesus: “Igwang orog na kaogmahan sa pagtao kisa sa pag-ako.” (Gibo 20:35) Asin manonompongan niato an tunay na katuyohan sa buhay.
[Nota sa Ibaba]
^ par. 1 Sinalidahan an nagkapirang ngaran.
Ikakapaliwanag daw Nindo?
• Ano an pinakahalangkaw na katuyohan na puede niatong makamtan sa buhay?
• Taano ta bakong madonong an pamumuhay para sa materyal na mga bagay?
• Ano an “tunay na buhay” na ipinapanuga nin Dios?
• Paano niato magagamit an satong buhay para sa katuyohan nin Dios?
[Mga Hapot Para sa Pag-adal]
[Mga Ritrato sa pahina 18]
An mga Kristiano kaipuhan na gumibo nin tamang mga pagsasakripisyo