Tune Kaa La Aqane Tro Sa Catre Eatrën La Nyipi Aliene La Mel
Ita Ne Thup göi 11 NOFEBA
Nyima 21 me 22 Qene Drehu
Tune Kaa La Aqane Tro Sa Catre Eatrën La Nyipi Aliene La Mel
“ATRUNYI IA jë nöjei ka mano asëjëihë.”—SALAMO 150:6.
1. Qeje pengöne jë la hna thele hnene la ketre thupëtresij matre troa hetre nyipi aliene la mele i angeic.
“KOLA qaja hmaca hnei Seung Jin, ketre atr ne Korea, ka hape: Eni a inine me thele troa droketre elany, ke ame la ajang, tre, tro ni a nue la meleng matre troa xatuane la itre atr. Eni fe a mekune laka, ame la troa droketre memine la troa kapa elanyi la itre trenge manie, tre, celë hi ka troa hamë madrine koi ni. a Ame hë la eni a öhne laka, hnepe ixatua hi la hna hamëne ngöne la kola droketre, ene pe lapa kötre ju hi lo lai aja ka eje theng. Eni a tupathe ju pena troa inine troa peidrë iatr, ngo ketre co catre pala hi la thangane la itre hnenge hna kuca thene la itre xan, nge kösë ketre sipu eni kö a madrine la itre huliwang. Eni pena a thele jë troa hamë ini, nge eni a wanga atrehmekune laka itre ithuemacany me itre ewekë hna melën la hnenge hna hamën, ngo thaa itre ini kö ka troa hamëne la nyipi manathith.” Ceitui Seung memine la itre atr ka nyimutre, laka, angeic a thele troa hetre nyipi aliene la mele i angeic.
2. (a) Nemene la aliene la hna hape: troa hetre hna mekune troa traqa kow ngöne la mel (troa hetre aliene la mel)? (b) Easa atre tune kaa, ka hape, ka hetre aliene la mel?
2 Ame la troa hetre nyipi aliene la mel, tre, ene la troa hetre kepine la mele së, me hetre hna ajane troa traqa kow ngöne la mel, me troa hetre hna catre thele troa amë panëne ngöne la mele së. Hapeue la itre atr, hetrenyi kö thei angatre la itre aja cili? Eje hi! Hnene laka hna xupi së cememine la wangatrehmekun, memine la mekuthethew, memine la atreine troa thele ewekë, tre, nyine tro hi lai a amamane ka hape, hetre hnene la Atre Xupi së hna ajane koi së ngöne la Nyidrëti a ami së e celë fen. Qa ngöne lai, ijije hi tro sa öhne me eatrëne la nyipi nyipi aliene la mel, e hne së hna mele thenge la aja ne la Atre Xupi së.
3. Nemene la aja i Akötresie göne la itre atr?
3 Kola amamane hnei Tusi Hmitrötr ka hape, nyimutre la itre ewekë ka ce tro memine la aja i Akötresieti koi së itre atr. Hanawange la ketre ceitun: Ame la elolone la aqane xupi së, tre, celë hi hatrene la ihnimi gufa i Akötresieti koi së. (Salamo 40:5; 139:14) Haawe, ame la troa mele thenge la aja i Akötresie, tre, kolo lai a hape, troa hnime la itre xane tune la aqane hnimi së hnei Nyidrë. (1 Ioane 4:7-11) Kolo mina fe a hape, troa drengethenge la itre ini qaathei Akötresie, ka troa xatua së troa mele hmekune la itre aja i Nyidrë ka hetre hni ne ihnimi ngön.—Ate Cainöj 12:13; 1 Ioane 5:3.
4. (a) Nemene la ka nyipi ewekë koi së matre troa hetre nyipi aliene la mele së? (b) Nemene la aja ka tru hna atreine troa traqa kow hnene la nöjei atr asë?
4 Hnei Akötresieti fe hna kuca matre tro la itre atr a mele madrine me ce mele tingeting, angatr itre atr memine la itre xaa hna xupe pë hë. (Genese 1:26; 2:15) Matre, nemene la nyine tro sa kuca matre tro sa mele madrin, me lapa xetietë, me tingetinge la itre mekuna së? Tune la nekönatr laka nyipi ewekë koi nyën troa ce memine pala hi la keme me thine i nyën matre troa madrin me lapa xetietë, haawe, easë fe nyipi ewekë koi së troa imelekeu hnyawa memine la Tretretro së e koho hnengödrai, matre troa öhne la nyipi alien me nyipi aja hna thele troa traqa kow ngöne la mel. (Heberu 12:9) Kola aijijën hnei Akötresie troa eköthe la aqane imelekeu cili, ngöne laka, kola aijijë së troa easenyi koi Nyidrë, nge kola drenge la itre thithi së hnei Nyidrë. (Iakobo 4:8; 1 Ioane 5:14, 15) Maine tro sa ‘ce tro me Akötresie’ ngöne la lapaun, me thele tro sa itre enehmu i Nyidrë, haawe, ijije hi tro sa amadrinëne la hni Iehova me hane atrunyi Nyidrë. (Genese 6:9; Ite Edomë 23:15, 16; Iakobo 2:23) Ame la aja celë, tre, ka sisitria catre kö eje hune la itre xaa aja, ijije hi tro sa traqa kow. Hna cinyihane hnene la atre cinyihane la Salamo, ka hape: “ATRUNYI IA jë nöjei ka mano asëjëihë.”—Salamo 150:6.
Nemene La Aja Hnei Epuni Hna Mekune Troa Eatrën Ngöne La Mel?
5. Pine nemene matre tha aqane ujë ka inamacane kö la troa amë panëne la itre aja ngöne la götrane la ngönetrei?
5 Ame la ketre götranene la aja i Akötresie thatraqa së, tre, ene la tro sa isa thupëne hnyawa la mele së memine la hnepe lapa së. Kolo lai a hape, tro sa thupëne hnyawa la mele së ngöne la götrane la ngönetrei me ngöne la götrane la ua. Maine nyipici laka tro sa tuluthe la aqane ce melëne la lue götrane cili, ngo thaa tro pi kö la huliwa së memine la itre ewekë hna hnehengazon ngöne la ngönetrei, a he la itre aja ka nyipi ewekë, ene la itre aja ngöne la götrane la ua. (Mataio 4:4; 6:33) Ngazo pe enehila, tre, tru catre la itre atr ka nuaxöj la mele i angatre matre troa thele la itre mo ne ngönetrei. Ngo eje hi lai laka, maine tro sa thele troa aejëne la nöjei aja së hnene la itre mo ne ngönetrei, tre, thaa aqane ujë ne ka inamacane kö lai. Hna pane qaja la pengöne la itre ka trene manie e Asia, kola hape, nyimutre angatr itre ka “lapa xou nge gomegome catre la mele i angatr, ngacama kola mama laka thaa ketre atre menu kö angatr, nge kösë hetre eloine la mele i angatr hnene laka trene mo angatr.”—Ate Cainöj 5:11.
6. Nemene la eamo hnei Iesu hna hamën kowe la itre ka nyinyape thele la itre trenga mo ne fen?
6 Hnei Iesu hna qaja la “iaö ne la tenga mo.” (Mareko 4:19) Tune kaa la aqane iaö së hnene la itre trenga mo? Kola mekune hnene la itre atr ka hape ka hamë madrine la itre trenga mo, ngo thaa nyipici kö lai. Öni Solomona Joxu, ka hape “ame la atr ka aja manie, tre, thaa meji kö angeic.” (Ate Cainöj 5:10) Ngo tune kaa, ijije kö tro sa catre thele la itre aja ngöne la ngönetrei, nge ame ngöne la ketre götran, tre, easa nyihlue i Akötresie hnene la hni ka pexej? Ohea. Hnei Iesu hna qaja ka hape: “Pëkö ate ateine troa nyi hlue ne la lue joxu ; ke tro angeic’ a xelene la kete, me hanyine la kete ; nge troa fede kowe la kete, me jakalane la kete. Tha ‘teine kö nyipunie troa nyi hlue i Akötesieti me mamona.” Hnei Iesu hna ithuecatre kowe la itretre drei nyidrë troa amë la itre trenga mo thatraqai angatr, thaa e celë kö fen, ngo “e koho hnengödrai”, matre troa hlemu lo la itre ëje i angatr xajawa i Iehova, Nyidrë lo ka “atengëtine la ewekë ka ijiji angatr, e thaa ase pete kö sipo anganyidrë.”—Mataio 6:8, 19-25.
7. Tro sa xölehuje tune kaa la “nyipi mel”?
7 Ame ngöne la Paulo aposetolo a cinyanyi kowe la sine huliwa i nyidrë, ene Timoteo, hnei nyidrëti hna hamëne la ketre eamo ka catrehnin ngöne la götrane cili. Öni Timoteo ka hape: “Ahnithe jë fe kowe la ite tena mo . . . nge the kete mejiune kö la tenge mo ka tha cile huti kö, loi pe koi Akötesie ka shewengönie . . . , me loi qanathane la ite ewekë i angat; me troa amë thatraqai angate kö la tepene ka loi nyine thatraqan’ epin, mate tro angat’ a xölehuje la nyipi mel.”—1 Timoteo 6:17-19.
Nemene la “nyipi mel”?
8. (a) Pine nemen matre nyimutre la itre atr ka thele troa trene manie me troa hlemu? (b) Nemene la hna thaa atrehmekune hnene la itre atr cili?
8 Ala nyimu la itre atr ka mekune ka hape, ame la xötrehnëewekë hna hape “nyipi mel,” tre, kola qaja la ketre mele ka tiqa hnei mo me madrine ngön. Kola qaja hnene la ketre zonal ne Asia, ka hape: “Ame itre xan ka goeëne la itre film maine televizio pena, tre, angatr a piine la itre hnei angatre hna goeën, me ajane troa hetrenyi itre ej.” Ame kowe la itre atr ka nyimutre, tre, nyipi mele hi lai, la troa hetrenyi la itre ewekë cili; nge angatr a ajane troa trena mo me thele troa traqa kowe la aja cili ngöne la mele i angatr. Nyimutre la itre atr ka huujëne la mele i angatr ngöne la angatr a thöth, thaa wanga atrune hë angatr la fami i angatr, nge angatre fe hë a wanga acone la itre ewekë ngöne la götrane la ua; kola ujë tune lai hnene laka, tru hë koi angatre la itre mo, nge angatr a nyinyape thele itre ej. Ame itre xan, tre, thaa mekune hë angatre ka hape ame lai itre hnei angatr hna goeën ngöne televizio, ke, celë hi ketre iahnuene la itre “[ua] ne la fen,” ene la trepene mekune ka löthe la itre atr ka nyimutre catr e celë fen, me upi angatr troa icilekeu memine la aja i Akötresieti koi së. (1 Korinito 2:12; Efeso 2:2) Thaa sesëkötre kö së la kola tru catre hnei atr ka hleuhleu enehila!—Ite Edomë 18:11; 23:4, 5.
9. Nemene la hnene la itre atr hna thatreine troa kuca, nge pine nemen?
9 Nge tune kaa lo itre xan ka nue la mele i angatr matre troa xatuane la itre xaa atr troa mele hnyawa, me thele troa apaatrene la mecijin, memine la itre mec, memine fe la thiina ka thaa meköti kö? Ijije tro sa qaja aloine la itre atr ka ujë tune lai, memine la trenge catre hnei angatr hna kuca, ke, tru catre la thangane kowe la itre atr la ixatua hnei angatr hna hamën. Ngo ngacama ka lolo catre la itre hnei angatre hna kuca, eje hi lai laka, thatreine jë kö tro angatr a saze la fene ka ngazo celë matre ketre fene pena ha ka meköti me ka pë ethan. Pine nemen? Pine laka kola mama hnyawa ka hape, “fene hnengödrai asëjëihë a meköle thene la ate ka ngazo,” ene Satan, nge thaa aja i angeice kö troa saze la fene cili.—1 Ioane 5:19.
10. Eu la kola troa kapa madrine hnene la itre hlue i Akötresie ka mele nyipici la “nyipi mel”?
10 Drei la hleuhleu ka tru, e pëkö hne së hna mejiune kow ngöne la fene celë! Hnei Paulo hna cinyihane ka hape: “Maine eësha mejiu Keriso ngöne la mele celë hmekuje hi, hawe, ngazo shë hune la nöjei ate asë.” Maine ame la mele celë, tre eje hë la, öni Paulo ka hape: “Tro sha xeni me iji, ke elanyi la tro sha mec.” (1 Korinito 15:19, 32) Ngo hetre ketre mele kö elany; kolo “hnei [Akötesie] hna thinge hnaean, la hnengödrai ka hnyipixe memine la fene hnengödrai ka hnyipixe, nge eje la thina ka meköti e cili.” (2 Peteru 3:13) Ame ngöne la ijine cili, tro la itre Keresiano a kapa madrine la “nyipi mel,” kolo “mele ka epine palua,” ene lo mele ka pexej koho hnengödrai, maine pena fene la musi ne la Baselaia i Akötresie!—1 Timoteo 6:12.
11. Pine nemene matre ame la troa huliwa troa sajuëne la itre aja ne la Baselaia i Akötresie, tre, celë hi aja lai nyine tro sa thele troa eatrën?
11 Baselaia i Akötresieti hmekuje hi la ka troa hun me senge la itre jole ne la itre atr asë. Qa ngöne lai, ame la troa catre sajuëne la itre aja ne la Baselaia i Akötresie, tre, celë hi aja lai nyine tro sa catre thele troa eatrën. (Ioane 4:34) Ame ngöne la easa xome la huliwa cili, tre, kola acatrene hnyawa la aqane imelekeu së memine la Tretretro së e koho hnengödrai. Hetrenyi mina fe së la madrine troa nyihlue i Nyidrë cememine la itre trejine me easë trahmanyi me föe ngöne la götrane la ua, itre milio la etrun, itre ka catre thele tu së la nyipi aliene la mel.
Loi e Tro Sa Hamëne La Itre Huuj Ka Lolo
12. Qaja jë la eisapengönene la fene celë memine la “nyipi mel.”
12 Kola qaja hnei Tusi Hmitrötr ka hape, ame la fene celë, tre, ej a “pate, memine la hna aja kow.” Pëkö ketre götran ne la fene i Satana hna troa nue pe kö, kolo asë hi a troa apaatren; tune mina fe la itre ewekë ka ahlemunyi angeic me itre trenga mo i angeic, “ngo troa cile huti epine palua la ate kuca la aja i Akötesie.” (1 Ioane 2:15-17) Ame la itre trenga mo ka thaa cile huti kö, memine la hlemu ka gufa, me itre nyine madrine hna sa tulun ne la fene celë, tre, thaa ceitune kö itre ej memine la “nyipi mel”, ene la mele ka thaa ase palua kö fene la Baselaia i Akötresie, laka, ka cile huti ej nge tro sa hane kapa la mele cili, e hne së hna catre kuca la itre huuj ka lolo.
13. Nemene la aqane kuca hnene la lue trefën la itre huuj ka lolo?
13 Tro sa pane ce wange la pengö i Hari me Suuzan. Atraqatre la mejiune nyidro kowe la hna thingehnaeane hnei Akötresie, laka, ame asë hi la itre atr ka amë panëne la Baselaia i Akötresie ngöne la mele i angatr, tre, tro hë Nyidrëti a xatua angatr. (Mataio 6:33) Qa ngöne lai, nyidroti a iëne la ketre uma ka co thupen, göne hi matre thaa tro kö nyidroti a ce huliwa i maseta, ngo tro pe a tru la traeme i nyidroti troa cainöj me kuca la itre xaa huliwa i Akötresie cememine la lue nekö i nyidro jajiny. (Heberu 13:15, 16) Thaa hna trotrohnine kö la aqane axecië mekune i nyidro hnene la ketre enehmu i nyidro. Öni angeice koi Suuzan, ka hape: “Suuzan, maine eö a ajane troa mele ngöne la ketre uma ka sisitria catre kö, ketre tro fe a tru catre elanyi la itre nyine tro eö a kuca.” Ngo atre hi Hari me Suuzan, ka hape, ame la troa amë panë Iehova, tre, hnene hi laka “hete hna thinge hnaeane thatraqane la mele enehila, memine la mel epin.” (1 Timoteo 4:8; Tito 2:12) Ame lue jajiny, ke, tru hë nyidro, nge nyidroti fe hë a hane xome la huliwa ne pionie hut. Angatr asë haa trenekön, madrine asë hi angatr la mekune hnei angatr hna axeciën; hnei angatr hna kepe thangane ka loi la ketre mekune ka tru hnei angatr hna ketre axeciën, ene la troa catre thele troa eatrëne la ketre aja ka sisitria, ene la troa xöle huje la “nyipi mel”.—Filipi 3:8; 1 Timoteo 6:6-8.
The ‘Truune Kö La Mele Ne Fen’
14. Maine tro sa thëthëhmine la nyipi aja nyine tro sa huliwa kow, nemene elanyi la pune lai?
14 Ngo hetrenyi la ketre ewekë ka ngazo catr nyine tro sa thupëne hnyawa: ene la troa thëthëhmine la nyipi aja hne së hna thele troa traqa kow, memine la troa aluuzin lo “nyipi mel.” Canga tro hi a “thahe [la aja cili] hnene la itre jol, me ite mo, me aciacin la mele celë.” (Luka 8:14) Ame la itre aja hne së hna thatreine troa xomehnöth, memine la troa “kuke hnine kowe la mele celë,” tre, lue ewekë lai ka troa huli së troa hane lö hnine la fene celë. (Luka 21:34, ithuemacany) Ngo ngazo pe, hetrenyi la itre xaa atr hna thapa hnene la aja ka haöthe enehila la fen, ene la troa trena mo; ketre, hna “menupi angate qa ngöne la lapaun, me umajo angate hnei angate kö hnene la ite aköte ka kösau,” uti fe hë la aluuzin angatr la aqane imelekeu i angatr me Iehova. Drei la pune qa ngöne la hna thaa ‘cila xome hnyawa la mele ka thaa ase palua kö’!—1 Timoteo 6:9, 10; Ite Edomë 28:20.
15. Tune kaa la aqane kepe thangane hnene la ketre hnepe lapa qa ngöne la ‘hna thaa truune la mele ne fen’?
15 Hnei Paulo hna hamë eamo kowe la “angete huliwane la ite ewekë ne fen, [ka hape,] thaa tro kö angatr a huliwan’ atrun.” (1 Korinito 7:31) Ame Keth me Bonie, tre, hnei nyidroti hna wanga atrune la eamo cili. Kola qaja hnei Keth, ka hape: “Eni a hane Atre Anyipici Iehova hmekune lo eni a umuthe lo itre ini i eni göi troa feke nyö. Hetre ewekë hnenge hna pane iën. Pine laka nyimutre la itre ka tro fë nyö, ijije hi tro ni a kapa la itre manie ka tru, ngo maine hnenge ju hna xome la aqane huliwa cili me kapa pala hi la nöjei ka traqa asë koi ni, eje hi lai laka, tro ha hetre ethane lai ngöne meleng ngöne la götrane la ua. Haawe, hnenge hna iëne troa nyifegone ju hi la itre ka tro fë nyö, göne hi matre troa tru catre hnei traemeng thatraqane la hming me thatraqane la hnepe lapa i eni, ene fe lo faifi lao nekönge jajiny. Ngacama hna satulune hi la hnepe manie hne huni hna kapa, ngo hne huni hna inine troa thupëne hnyawa la manie hun matre thaa tro kö a aluuzin, nge hetrenyi pala hi huni la itre ka nyipi ewekë thatraqane la mel. Lolo catre la aqane imelekeu huni e hnine la fami, nge tru catre la madrine hun. Nge hne huni asë hi hna cainöj ngöne la drai ka pexej. Ame hë enehila, faipoipo hë nge madrine catre la itre nekö i nyiho jajiny, nge ala köni angatr, itre ka trene kuku. Ketre tru mina fe la madrinene la itre fami i angatr, qa ngöne laka, angatr a catre troa amë panëne la aja i Iehova ngöne la mele i angatr.”
Loi e Tro Sa Amë Panëne La Aja i Akötresie Ngöne La Mele Së
16, 17. Drei la itre atr ka trene talan hna qaja hnei Tusi hmitrötr, nge kola atre angatre hnyawa hnei nemen?
16 Kola amamane hnei Tusi Hmitrötr la itre tulu, ene la itre ka thaa melëne kö la aja i Akötresie, nge ame itre xan, tre, ka trongëne angatr la aja i Iehova. Ame la itre ini hna troa kapa qa ngöne la itre tulu celë, tre, atreine hi troa trongëne hnene la nöjei atr asë, ngacama isapengöne ju hë la itre macatre i angatr, me isa aqane mele i angatr, nge ngacama isa nöje ju hë. (Roma 15:4; 1 Korinito 10:6, 11) Hnei Nimeroda hna xupe la ketre traone ka tru, ngo angeic a kuca la traone cili göi troa icilekeu me Iehova. (Genese 10:8, 9) Nyimutre la itre xan ka hamë tulu ka lolo. Easa öhne la pengö i Mose, laka, thaa hnei angeice kö hna nyi trepene la mele i angeic, me thele matre tro angeic a ketre atre Aigupito ka hlemu me ka cilëne la itre götrane qa ngöne la hna nyi joxu. Ngo angeice pe a mekune laka ame la itre hnëqa i angeic qaathei Akötresie, tre, celë hi la “nyipi mo hune la nöjei mo ne Aigupito.” (Heberu 11:26) Hnei Luka ketre droketre, hna xatua Paulo memine la itre xan troa cile kowe la itre sine meci angatr. Ngo ame pe, tru catre kö la ixatua hnei angeice hna hamën, ngöne la troa tro fë la evangelia me cinyihane la Tusi Hmitrötr. Ame pena Paulo, tre, ka hlemu angeic, a thaa hnene kö laka ka atre hnyawa angeic la trenge wathebo, ngo hnene laka angeic la ketre mesinare, ketre “aposetolo ne la nöjei ethen.”—Roma 11:13.
17 Kola meku Davita hmaca hne së, thaa qa ngöne kö laka ketre hene ne la itre sooce angeic maine ketre ka sili nyima me elo miuzike pena, ngo hnene hi laka, ketre “ate tune la hni [Akötresie].” (1 Samuela 13:14) Easa atre Daniela, thaa hnene kö la huliwa i angeic e hnine la musi e Babulona, ngo hnene pe laka angeic la ketre perofeta ka nyihlue i Iehova hnyawa; ame Esetera, tre, kola atre nyiidro, thaa hnene kö laka ketre isola ne Peresi, ngo hnene pe la tulu ne aqane catre me lapaune i eahlo koi Akötresie; ame Anederea me Iakobo, me Ioane, tre, thaa kolo kö a hlemu hnei angatr qa ngöne laka itre ka atreine nyi ie angatr, ngo hnene pe laka, itre aposetolo i Iesu angatr. Nge ame la tulu ka sisitria, tre, Iesu; kola hlemu hnei nyidrë, thaa hnene kö laka, “ka tratrau sinöe” nyidrë, ngo hnene laka nyidrëti hi la “Keriso.” (Mareko 6:3; Mataio 16:16) Matre trotrohnine hnyawa asë hi hnene la itre atr celë, laka, ngacama hetrenyi angatre la itre hnei angatr hna atreine troa kuca, maine itre hnei angatr hna hetreny, maine itre hnëqa hnei angatr hna cilën, ngo ame pe, tre, ame la mele i angatr, tre, thaa hna eköthe kö hune la itre ewekë cili, ngo eje hune la huliwa i Akötresie. Angatr a atrehmekune laka ame la ka sisitria memine la mekune ka lolo nyine troa eatrën, tre, ene la troa ketre trahmanyi maine ketre föe ka xoue Akötresie.
18. Tune kaa la aqane axeciën hnene la ketre thöth Keresiano la aqane tro angeic a xome la mele i angeic, nge nemene hë la hnei angeice hna trotrohnin?
18 Ame mina fe Seung Jin, lo hna qaja e caha hun, tre, hnei angeice hna hane trotrohnine la ewekë cili. Öni angeic: “Thaa hnenge kö hna nue asë la trenge catreng troa droketre, maine peidrë iatr, maine troa hamë ini pena, ngo hnenge pe hna mekune hnyawa e kuhu hning troa nue la melenge troa nyihlue i Akötresie. Ame hë enehila, eni a nyihlue i Akötresie ngöne la ketre götrane gaa aja ka inine la Tusi Hmitrötr, me xatuane la itre atr troa xötrëne la gojenyi ne tro kowe la mele ka epine palua. Hnenge hna lapaa mekune ka hape, ame la troa cainöje ngöne la drai ka pexej, tre, thaa ketre huliwa ka jole menu kö. Ame hë enehila, kolo pala hi a tupathe la meleng, ngöne laka, eni a troa thele troa kökötre lolo la itre thinang, me thele troa inine la itre atr ne la nöjei qene hlapa. Eni a öhne laka, ame la troa amë la aja i Iehova ngöne la mele së ka pexej, tre, celë hnyawa hi sipu aliene la mele lai.”
19. Nemene la aqane tro sa öhne la nyipi aliene la mel?
19 Pine laka easë la itre Keresiano, hna hamë së la ketre atrehmekune jëne mele koi së, memine la mejiune ne iamele. (Ioane 17:3) Haawe, thaa tro pi kö sa “kapa gufane la ihnimi gufa i Akötesie.” (2 Korinito 6:1) Loi e tro pe sa nyipi ewekëne me xome la itre drai me itre macatre ne mele së matre troa atrunyi Iehova. Loi e tro sa tro fë la atrehmekune ka hamëne la nyipi manathithi enehila, nge ka nyi jë së kowe la mele ka thaa ase palua kö. Maine tro sa ujë tune lai, haawe, tro hë së a hane melëne la enyipicine la itre trenge ewekë i Iesu, hna hape: “Sisitia la manathithi e troa hame hune la troa kapa.” (Ite Huliwa 20:35) Nge tro hë së a öhne hnyawa la nyipi aliene la mel.
[Ithueamacany]
a Hna saze la itre xaa ëj.
Qeje Pengöne Jë?
• Nemene la aja ka sisitria nyine tro sa thele ngöne la mele së?
• Pine nemene matre ame la troa mele ne thele mo ne ngönetrei, tre, thaa jëne inamacane kö lai?
• Nemene la “nyipi mel” hnei Akötresieti hna thingehnaean?
• Tro sa xome tune kaa la mele së matre nyine thatraqane la itre aja i Akötresie?
[Thying]