Maʼerãpa jaiko ko yvy ape ári

“Mayma oikovéva tomombaʼeguasu Ñandejárape.” (SALMO 150:6.)

1. Mbaʼépa ojapo peteĩ kuimbaʼe oikuaaségui maʼerãpa oikove?

 “ASTUDIA medisína aipytyvõségui che rapichakuérape”, heʼi Seung Jin, okakuaavaʼekue Coréape. * “Apensa avei ajekuaataha opárupi ha agana porãtaha, ha upéva chembovyʼataha. Péro aheja rei ahechakuaa rire saʼieterei ikatuha aipytyvõ che rapichakuérape. Upéi ajededika pe ártepe, péro nachembovyʼáinte avei, ndaikatúi rupi upéicha ambovyʼa che rapichakuérape. Upéicha rupi ajedesidi amboʼe, péro ahechakuaa saʼieterei amboʼetaha che alumnokuérape; ndaikatumoʼãiha aipytyvõ chupekuéra ovyʼa añetete hag̃ua.” Ojehuháicha heta tapichakuérape, Seung Jin oikuaase avei maʼerãpa oikove.

2. a) Mbaʼépa heʼise jaikuaa maʼerãpa jaikove? b) Mbaʼe rehépa jahechakuaa maʼerãpa ñanemoĩ ko Yvy ape ári ñande Apohare?

² Jaikuaa maʼerãpa jaikove heʼise ñañehaʼã jahupyty oĩ porãva ñandéve g̃uarã. Ikatúpa jajapo upéva? Katuete. Ñandejára ñanemoarandu ha ñandeapo jahechakuaa hag̃uáicha iporãva ha ivaíva. Upévare jahechakuaa ñande Apohare ñanemoĩhague ko Yvy ape ári peteĩ mbaʼerã. Ha umi oikóva Ñandejára oipotaháicha añoite oikuaa maʼerãpa oikove ha ovyʼa.

3. Mbaʼépa jajapovaʼerã jaikosérõ Ñandejára oipotaháicha?

³ La Biblia omombeʼu ñandéve Ñandejára oipotaha heta mbaʼe yvyporakuérape g̃uarã. Jahechávo mbaʼeichaitépa ñandeapo porã vaʼekue, jaikuaa Ñandejára ñanderayhuetereiha (Salmo 40:5; 139:14). Upévare, jaikoséramo Ñandejára oipotaháicha, jahayhuvaʼerã ñande rapichakuérape Haʼe ñanderayhuháicha (1 Juan 4:​7-11). Ha ñaneñeʼẽrenduvaʼerã avei chupe (Eclesiastés 12:13; 1 Juan 5:3).

4. a) Mbaʼépa ñanepytyvõta jaikuaa hag̃ua maʼerãpa jaikove? b) Mbaʼépa pe iporãvéva ikatúva jajapo?

⁴ Ñandejára avei oipota yvyporakuéra ovyʼa ha oiko pyʼaguapýpe, ha oiko porã opa mbaʼe haʼe ojapovaʼekuéndi (Génesis 1:26; 2:15). Péro mbaʼépa ñaikotevẽ javyʼa ha jaiko hag̃ua pyʼaguapýpe? Peteĩ mitã oikotevẽháicha ituvakuérare ovyʼa ha ipyʼaguapy hag̃ua, ñande avei ñaikotevẽ ñaime porã ñande Ru yvagapegua ndive. Upéicha jajapóramo javyʼáta ha jaikuaáta maʼerãpa jaikove (Hebreos 12:9). Ha Jehová voi oipota ñaime porã hendive, upévare oheja ñañemoag̃ui hese ha ohendu ñane ñemboʼe (Santiago 4:8; 1 Juan 5:​14, 15). Jajapóramo Ñandejára oipotáva ha jaiko iñamígoramo, ñamombaʼeguasu ha ñambovyʼáta chupe (Génesis 6:9;  Proverbios 23:​15, 16; Santiago 2:23). Ndaiporichéne mbaʼe iporãvéva upévagui. Pe salmísta heʼivaʼekue: “Mayma oikovéva tomombaʼeguasu Ñandejárape” (Salmo 150:6).

Mbaʼépa rejapose nde rekovépe?

5. Mbaʼérepa naiporãi ñamotenonde umi mbaʼereta?

⁵ Jahechami koʼág̃a mbaʼépa Ñandejára oipotave yvyporakuérape g̃uarã. Haʼe oipota ñañangareko porã ñandejehe ha ñane famíliare. Upearã, ñaneakãguapyvaʼerã ani hag̃ua ñamotenonde umi mbaʼereta, jajaporangue Ñandejára oipotáva (Mateo 4:4; 6:33). Ñambyasýramo jepe, hetaiterei ñande rapicha oiko umi mbaʼereta rapykuéri añónte. Tuichaiterei jajavýta ñapensáramo umi mbaʼereta omeʼẽtaha ñandéve opa mbaʼe ñaikotevẽva. Ndaʼareiete oñeñeʼẽhague umi ipláta hetáva ndive oĩva Ásiape, ojehecha haʼekuéra ‘ojepyʼapyha ha okyhyje ipláta heta ha orekóramo jepe heta mbaʼe’ (Eclesiastés 5:11).

6. Mbaʼépa heʼi Jesús pe mbaʼereta ñembyatýre?

⁶ Jesús heʼi umi ‘mbaʼeta rerekose ñanembotavyha’ (Marcos 4:19). Mbaʼéichapa umi mbaʼe ñanembotavy? Haʼete ningo umíva ikatúva ñanembovyʼa, péro ndaupéichai. Rréi Salomón heʼivaʼekue: ‘Pe pláta ohayhuetéva arakaʼeve voi noimoʼãi oguereko hetamaha’ (Eclesiastés 5:9 [5:​10, NM]). Péro ikatúpa jaiko mbaʼereta rapykuéri ha jaservi avei Ñandejárape ñande pyʼaite guive? Ndaikatumoʼãi. Jesús heʼi: “Avave ndaikatúi ombojerovia mokõi karaípe. Ndaijaʼéine peteĩre ha ohayhúne pe ambuépe, térã ombojeroviáne peteĩme ha ojahéine pe ambuére. Ndaikatúi pembojerovia [Ñandejára] ha viru oñondive”. Upévare heʼi ñambyatyrangue mbaʼeta ko Yvy ape ári, ñambyatyvaʼerãha “mbaʼeta yvágape”. Upéva heʼise ñañemoĩ porã vaʼerãha Ñandejára ndive. Jesús heʼi ñandéve: “Pende Ru niko oikuaáma voi pene remikotevẽ, peẽ pejerure mboyve chupe” (Mateo 6:​8, 19-25).

7. Mbaʼéichapa ikatu ñañakarama hatã pe ‘jeikove añeteguáre’?

⁷ Apóstol Pablo oñeʼẽ avei ko mbaʼére ohaírõ guare Timotéope: “Umi oguerekóvape mbaʼeta [...] ere ani hag̃ua [...] ojerovia imbaʼeta rehe, ndahaʼéi rehe jeroviaha umíva. Tojerovia uvei pe [...] Ñandejára oikovéva rehe, upe omeʼẽmbáva ñandéve opa mbaʼeta javyʼa hag̃ua. [...] tomeʼẽ ha tombojaʼo pe oguerekóva. Upéicharamo imbaʼeta vaʼerã kyhyjeʼỹ rehe pe tenondeve g̃uarã ikatu hag̃ua ohupyty pe tekovete”, térã pe “jeikove añeteguáva” (1 Timoteo 6:​17-19, BNP).

Mbaʼépa pe “jeikove añeteguáva”?

8. a) Mbaʼérepa oĩ hetaite oñehaʼãva oñemoĩ porã ha ombyaty heta mbaʼe? b) Mbaʼépa ndohechakuaái hikuái?

⁸ Ikatu oĩ oimoʼãva pe “jeikove añeteguáva” heʼiseha jaiko porã heta mbaʼe porã apytépe. Peteĩ rrevísta Asiapegua heʼi: “Umi ohecháva pelíkula ha téle oñepyrũ oipota umi mbaʼe ohecháva, ha opensa umi ikatuvaʼerãre oreko”. Heta tapicha oikove ombyaty hag̃uánte heta mbaʼe ha oñemoĩ porã hag̃ua. Umichagua sapyʼánte hasy, oheja rei ifamília ha ijerovia Ñandejárare oiko hag̃ua umi mbaʼe rapykuéri. Ndahetái opensáva umíva ouha ko “yvy arigua espíritu[gui]”. Ha upéva omomyiha chupekuéra omboyke hag̃ua Ñandejára oipotáva (1 Corintios 2:12; Efesios 2:2). Ajeve ningo hetaite oĩ ñande rapicha ndovyʼáiva! (Proverbios 18:11; 23:​4, 5.)

9. Mbaʼépa ndaikatumoʼãi ojapo yvyporakuéra arakaʼeve ha mbaʼérepa?

⁹ Ha mbaʼépa ikatu jaʼe umi ojepyʼapývare hapicháre, ha oñehaʼãva oipeʼa ñembyahýi, mbaʼasy ha inhustísia? Heta mbaʼe porã ohupyty jepi koʼã mbaʼe ojapóva. Péro oñehaʼãvéramo jepe hikuái, ndaikatumoʼãi okambia ko múndo ha omoĩ tekojoja ha mbaʼe porã. Mbaʼérepa? Jaikuaáningo “ko múndo oĩmbaha aña poguýpe”. Ha Satanás ndoipotái ko múndo okambia (1 Juan 5:19).

10. Mbaʼéichapa ohupytýta pe “jeikove añeteguáva” umi oservíva Ñandejárape?

 ¹⁰ Ñambyasyeténepa ñahaʼarõramo jaikove koʼág̃a g̃uarãnte Satanás múndope! Apóstol Pablo ohaivaʼekue: “Pe ñane esperánsa Cristo rehe ko Yvy ári g̃uarã añónte ramo, jajeporiahuverekovehánte opavave yvyporakuéra apytépe”. Umi heʼíva ‘jakaru ha ñamboyʼu, koʼẽramoite ñamanóne’ opensa ñamano rire ndaiporiha esperánsa (1 Corintios 15:​19, 32, BNP). Péro oĩve peteĩ mbaʼe: ‘Ñande ñahaʼarõ heʼihaguéicha Ñandejára “yvága pyahu ha yvy pyahu” peteĩ múndo oĩtahápe tekojoja’ (2 Pedro 3:13). Upe ára og̃uahẽ vove, umi oservíva Ñandejárape ohupytýta “jeikove añeteguáva”, “pe jeikove opaʼỹva”. Oĩta ohóva yvágape ha oikóva ko Yvy ape ári Ñandejára goviérno poguýpe (1 Timoteo 6:12).

11. Mbaʼérepa iporãiteve ñamotenonde ñande rekovépe Ñandejára Goviérno?

¹¹ Ñandejára Goviérno añoite ikatúta omyatyrõ umi provlemaita oĩva. Upévare iporãiteve jaiporu ñande rekove jajapo hag̃ua Ñandejára oipotáva (Juan 4:34). Upéicha jajapóramo, ñaime porã ñande Ru yvagapegua ndive. Ha javyʼa ñambaʼapóvo ñane ermanokuéra ndive, oñehaʼãva avei ojapo Ñandejára oipotáva.

Umi mbaʼe iporãvéva jajapo

12. Mbaʼépepa ojoavy pe jeikove koʼag̃agua pe ‘jeikove añeteguávagui’?

¹² Ñandejára Ñeʼẽ heʼi : “Yvypóra reko katu opa ohóvo opa hembipota vai reheve”. Upéva heʼise oñehundipaitetaha Satanás múndo oikuaveʼẽva guive, umíva apytépe ñemombaʼeguasu ha heta mbaʼerepy. Péro Ñandejára Ñeʼẽme heʼi avei: ‘Upe Ñandejára rembipota ojapóva katu oikovéta opa ára g̃uarã’ (1 Juan 2:​15-17). Ko múndo oikuaveʼẽva vyʼarã, mbaʼerepy ha ñemombaʼeguasu sapyʼami g̃uarãnte. Pe “jeikove añeteguáva”, Ñandejára goviérno poguýpe katu opa ára g̃uarã. Iporãiteve ñañehaʼã jahupyty upéva.

13. Mbaʼépa ojapo Henry ha Suzanne oservi porãve hag̃ua Ñandejárape?

¹³ Jahechamína Henry ha Suzanne ojapovaʼekue. Ojerovia hikuái Jehová katuete oipytyvõtaha chupekuéra omotenondéma guive Igoviérno (Mateo 6:33). Upévare odesidi oiko hikuái peteĩ óga isensillomívape. Upéicharõ natekotevẽmoʼãi mokõivéva osẽ ombaʼapo, ha osẽvéta hikuái predikasiónpe umi mokõi mitãkuñaʼi orekóvandi (Hebreos 13:​15, 16). Peteĩ iñamíga ojepyʼapýva hesekuéra, nontendéi mbaʼérepa ojapo hikuái upéicha. Heʼi Suzánnepe péicha: “Suzanne, ág̃a reikoséramo peteĩ óga iporãvévape, rehejamantevaʼerã peteĩ mbaʼe rejaposevéva”. Péro Henry ha Suzanne oikuaa iporãveha omotenonde hekovépe Ñandejára rembipota, “omeʼẽgui jeikove koʼág̃a ha upe rire g̃uarã” (1 Timoteo 4:8; Tito 2:12). Upe rire ifamiliakuéra, umi mokõi mitãkuñágui oiko precursora regular. Omañávo ko família umi mbaʼe ohasavaʼekuére, ohechakuaa iporãveha ojapovaʼekue ha ndojavyihague mbaʼeve iporãva upévare. Upéva rangue heta mbaʼe porã ohupyty hikuái omaña rupi pe ‘jeikove añeteguáre’ (Filipenses 3:8; 1 Timoteo 6:​6-8).

Ani jaiporueterei ko múndope oĩva

14. Mbaʼépa ikatu ojehu ñandéve ndajahechakuaáiramo maʼerãpa jaikove?

¹⁴ Ndajahechakuaáiramo mbaʼerãpa jaikove ha jaheja pe “jeikove añeteguáva”, upe rire ikatu ijetuʼuve ñanendive. Ikatu ‘mbegue katúpe ñamboyke Jehovápe jajepyʼapyetereígui, jaipotágui heta mbaʼe térã jaiko rupi vyʼa rapykuéri’ (Lucas 8:14). Jajepyʼapyetereíramo ñande rekovére ha jaipotáramo heta mbaʼe, umívarentema ñapensáta (Lucas 21:34). Ñambyasýramo jepe, oĩ ipláta hetase rupi “opiavaʼekue ijeroviágui ha heta ohasa asy”, ha opyta vai Ñandejára renondépe. Ajépa ningo ijetuʼuete koʼãvape ‘oheja rupi pe jeikove opaʼỹva’! (1 Timoteo 6:​9, 10, 12; Proverbios 28:20.)

15. Mbaʼe iporãvapa ohupyty peteĩ família oiko rupi ‘ndoiporuirõguáicha ko múndo’?

 ¹⁵ Apóstol Pablo omokyreʼỹ ‘umi oiporúva ko múndo oiko hag̃ua ndoiporuirõguáicha’ (1 Corintios 7:31). Keith ha Bonnie ojapo upéicha. Keith omombeʼu: “Oiko chehegui testígo de Jehová astudiapavoʼaína dentistarã. Ikatuvaʼekue agana heta pláta añatendéramo heta héntere. Péro upéicha ajapóramo ndaikatumoʼãi aservi porã Ñandejárape, upévare amoĩ mboýrentepa añatendéta. Upéicha ajapo rupi aipytyvõve che rembireko ha umi cinco che rajýpe, oñemoag̃uive hag̃ua Ñandejárare ha oñeñandu porã hag̃ua hikuái. Hembyʼimíramo jepe sapyʼánte oréve ore pláta, ndofaltái oréve umi mbaʼe roikotevẽva. Roiko joayhu, vyʼa ha pyʼaguapýpe ore rogapýpe. Upe rire enterovete rojapo ore prekursorádo regular. Che rajykuéra omendapáma (oĩ mbohapy imembýmava). Ifamiliakuéra ovyʼa avei, omotenonde rupi hikuái hekovépe Ñandejára Jehová oipotáva”.

Ñamotenondékena ñande rekovépe Ñandejára oipotáva

16, 17. Máva máva ehémplorepa oñeʼẽ la Biblia, ha mbaʼépa iñimportanteve vaʼekue chupekuéra g̃uarã?

¹⁶ La Bíbliape jatopa oĩhague ojapóva Ñandejára oipotáva ha ndojapóiva avei. Umi ehémplo ñanepytyvõ enterovépe. Tahaʼe imitãva térã itujávape, jaiko jaikohápe ha jaikoháicha avei (Romanos 15:4; 1 Corintios 10:​6, 11). Nemrod omopuʼãvaʼekue heta táva tuichaicháva, péro haʼe oñemoĩvaʼekue Jehováre (Génesis 10:​8-12). Upéicharõ jepe, heta oĩ ojapovaʼekue Ñandejára oipotáva. Pór ehémplo Moisés, oikóramo jepe umi Egipto ogovernáva ndive, upéva ndahaʼeivaʼekue iñimportantevéva chupe g̃uarã. Haʼe omombaʼeve Ñandejára oipotáva “ohasa porã rangue Egipto mbaʼeta reheve” (Hebreos 11:26). Lucas oiméne oipytyvõrakaʼe apóstol Páblope ha heta hasývape. Péro chupe g̃uarã iñimportantevevaʼekue opredika ha ohai Ñandejára Ñeʼẽ. Apóstol Pablo rehe nañanemanduʼái ikatupyryhaguére léipe, síno heta opredikahaguére (Romanos 11:13).

¹⁷ David haʼevaʼekue mburuvicha, músiko ha ojapóva puraheirã. Péro ñanemanduʼave hese haʼe rupi ‘peteĩ kuimbaʼe jeroviaha’ ombovyʼavaʼekue Jehovápe (1 Samuel 13:14). Nañanemanduʼái Daniel rehe ombaʼapohaguére mburuvicha Babiloniaygua ndive, síno oservihaguére Jehovápe profétaramo. Ñanemanduʼa Estér rehe ijerovia ha ipyʼaguasúre, ndahaʼéi rréina Persiaygua haguére. Ñanemanduʼave Pedro, Andrés, Santiago ha Juan rehe, Jesús remimboʼéramo, ndahaʼéi opeskakuaahaguére. Pe ehémplo iporãvéva ñandéve g̃uarã katu Jesús, ndahaʼéiva “ku karpintéro” síno “pe Cristo” (Marcos 6:3; Mateo 16:16). Koʼã Ñandejára rembiguaikuérape ndahaʼeivaʼekue umi mbaʼe ojapokuaáva pe iñimportantevéva. Ohechakuaa hikuái omotenondevaʼerãha Ñandejára oipotáva. Haʼekuéra oikuaa jaservíramo Ñandejárape ñanembovyʼa ha iporãiteveha oimeraẽ mbaʼégui.

18. Mbaʼépa odesidi ojapo peteĩ kristiáno ha mbaʼépa ohechakuaavaʼekue?

¹⁸ Seung Jin pe karai ñañeʼẽhague, ohechakuaavaʼekue tekotevẽha omotenonde hekovépe Ñandejára oipotáva. Haʼe heʼi: “Aiporurangue che mbaretekue aiporopohãno hag̃ua, ártepe térã aporomboʼe hag̃ua, ahechakuaa aikovaʼerãha Ñandejára oipotaháicha. Che ningo añemeʼẽmavaʼekue chupe. Koʼág̃a aservi peteĩ lugár tekotevẽhápe oñemboʼe Ñandejára Ñeʼẽ heʼíva. Aipytyvõ che rapichápe ohecha hag̃ua mbaʼéichapa ikatu ohupyty jeikove opaveʼỹva. Haʼemivaʼerã ndahasymoʼãiha chéve g̃uarã oikóramo chehegui precursor regular. Upéicharamo jepe, koʼág̃a añehaʼãvevaʼerã chejehe ha avei amboʼe porãve hag̃ua Ñandejára Ñeʼẽ opaichagua tapichápe. Ahechakuaa  javyʼa ha jaikuaa hag̃ua mbaʼerãpa jaikove, jajapovaʼerãha Jehová oipotáva”.

19. Mbaʼe jajapóramopa javyʼáta ñande rekovépe?

¹⁹ Ñandéve ningo oñemeʼẽ heta mbaʼe iporãitereíva. Jaikuaa Ñandejára Ñeʼẽme oĩva ha ñahaʼarõ jaikove opa ára g̃uarã (Juan 17:3). Upéicharamo jepe, ‘aníkena ñambohasa rei upe pyʼaporã Ñandejára ohechaukáva ñandéve’ ha jajapo haʼe oipotáva (2 Corintios 6:1). Ñamombaʼeguasúkena Jehovápe jaikove aja pukukue. Ñamombeʼu memékena pe marandu porã koʼág̃ama voi ñanembovyʼáva, ha ohupytyukátava ñandéve jeikove opaveʼỹva. Upéicha jajapóramo jahechakuaáta añeteha Jesús heʼivaʼekue: “Javyʼave ñameʼẽvo, ñandéve oñemeʼẽrõguágui” (Hechos 20:35). Upéicha javyʼáta ha jaikuaáta maʼerãpa jaikove.

[Nóta]

Ñamyesakãmi

• Mbaʼépa iñimportantevevaʼerã ñande rekovépe?

• Mbaʼérepa naiporãi jaiko ñambyaty hag̃uánte mbaʼereta?

• Mbaʼépa “pe jeikove añeteguáva” Ñandejára oprometéva?

• Mbaʼéichapa ikatu jaiko Ñandejára oipotaháicha?

[Porandu ñahesaʼỹijóva]