Ku Peta Mulelo Luli wa Bupilo
Ku Peta Mulelo Luli wa Bupilo
“Se si buyela kaufela, si lumbeke [Muñ’a] Bupilo.”—SAMU 150:6.
1. Mu taluse mutangana yo muñwi mwa n’a batela ku peta mulelo wa bupilo.
SEUNG JIN, ya n’a hulezi mwa Korea * n’a bulezi kuli: “Ne ni itutile bualafi kuli ni tuse ba bañwi mwa bupilo bwa ka. Hape ne ni nahana kuli ku ba ni libubo ni mali a mañata ka ku ba mualafi, ne ku ka ni tahiseza tabo. Ha ne ni til’o lemuha kuli kanti baalafi ha ba koni ku tusa hahulu batu, ne ni zwafile. Hamulaho n’a ituta ku swanisa, kono ne ni si ka ba ni tabo bakeñisa kuli maswaniso a ka n’a sa tusi hahulu batu. Kiha ni ba muluti kono eshe na lemuha kuli ne ni kona fela ku fa batu zibo, ne ni sa koni ku ba tusa ku ba ni tabo.” Seung Jin ka ku swana ni batu ba bañata n’a bata ku peta mulelo luli wa bupilo.
2. (a) Ku ba ni mulelo mwa bupilo ku talusañi? (b) Lu ziba cwañi kuli Mubupi u na ni mulelo wa lu bupezi?
2 Ku ba ni mulelo luli wa bupilo ki ku ziba lika ze lu swanela ku peta mwa bupilo ni ku iseza hahulu pilu ku zona lika zeo. Kana batu luli ba kona ku ba ni mulelo mwa bupilo? Eni ba kona. Mubupi u lu file butali, lizwalo, ni ngana ili nto ye bonisa kuli ku na ni mulelo o munde wa lu bupezi. Kacwalo lu kona fela ku ba ni mulelo o munde ni ku u peta haiba lu pila ka ku lumelelana ni mulelo wa Mubupi.
3. Mulelo wa lu bupezi Mulimu u ama lika mañi?
3 Bibele i patulula kuli mulelo wa lu bupezi Mulimu u ama lika ze ñata. Ka mutala, nzila ye komokisa ye lu bupilwe ka yona i bonisa kuli Mulimu u lu lata hahulu. (Samu 40:5; 139:14) Kacwalo, ku pila ka ku lumelelana ni mulelo wa Mulimu ku talusa ku lata luli ba bañwi sina mwa lu latela Mulimu. (1 Joani 4:7-11) Hape ku talusa ku latelela litaelo za Mulimu, ze lu tusa ku pila ka ku lumelelana ni mulelo wa hae o munde.—Muekelesia 12:13; 1 Joani 5:3.
4. (a) Lu tokwa ku ezañi kuli lu pete mulelo luli o lu bupezwi? (b) Ki ufi mulelo wa butokwa hahulu wa swanela ku peta mutu mwa bupilo?
4 Mulimu hape n’a lelile kuli batu ba pile ka tabo ni ku pilisana ka kozo ni ba bañwi hamoho ni libupiwa kaufela. (Genese 1:26; 2:15) Kono lu swanela ku ezañi kuli lu be ni tabo, buiketo, ni kozo? Sina mwana ha banga ni tabo ni buiketo ha inzi ni bashemi ba hae, ni luna lu swanela ku ba ni silikani ni Ndat’a luna wa kwa lihalimu kuli lu kone ku ba ni tabo ni buiketo mwa bupilo. (Maheberu 12:9) Mulimu u lu konisa ku ba ni silikani ni yena ka ku lu lumeleza ku sutelela ku yena ni ka ku utwa litapelo za luna. (Jakobo 4:8; 1 Joani 5:14, 15) Haiba lu “zamaya ni Mulimu” ka tumelo mi lu ba balikani ba hae, lu ka tabisa Ndat’a luna wa kwa lihalimu mi lu ka mu lumbeka. (Genese 6:9; Liproverbia 23:15, 16; Jakobo 2:23) Wo ki wona mulelo wa butokwa hahulu wa swanela ku peta mutu mwa bupilo. Walisamu n’a ñozi kuli: “Se si buyela kaufela, si lumbeke [Muñ’a] Bupilo.”—Samu 150:6.
Ki Ufi Mulelo wa Mina mwa Bupilo?
5. Ki kabakalañi ku mbindana ku bata fela maluo ha ku si ko ku butali?
5 Mulelo o muñwi wa Mulimu ki wa kuli lu ipabalele ni ku babalela mabasi a luna kwa mubili ni kwa moya. Kono lu swanela ku tokomela kuli ha lu isezi hahulu pilu kwa misebezi ya kwa mubili kuli mane lu palelwa ni ku eza lika za kwa moya za butokwa. (Mateu 4:4; 6:33) Ka bumai, batu ba bañata ba isezanga hahulu pilu kwa ku ikubukanyeza fela maluo. Kono ku mbindana ku bata fela maluo ki kutokwa butali. Patisiso ye ne ezizwe cwanoñu fa kwa Asia ne i bonisize kuli buñata bwa bafumi ba batuna kwa Asia “ba pila mwa sabo mi ba na ni lipilaelo ku si na taba ni sifumu se ba na ni sona ni lika ze ba petile.”—Muekelesia 5:11.
6. Ki ifi kelezo ya n’a file Jesu kwa batu ba ba ndongwama sifumu?
6 Jesu n’a kile a bulela za “ku pumwa ki bufumu.” (Mareka 4:19) Bufumu bu puma cwañi? Bu puma ka ku bonahalisa mutu kuli u na ni tabo kanti ha na. Mulena ya butali Salumoni n’a ñozi kuli: “Ya lata silivera h’a na ku kuliswa ki silivera.” (Muekelesia 5:10) Kono kana mutu wa kona ku ndongwama sifumu ni ku sebeleza Mulimu ka moyo wa hae kaufela? Batili, ha koni. Jesu n’a bulezi kuli: “Ha ku na mutu ya kona ku sebeleza malena a mabeli; kakuli u ka toya yo muñwi, a late yo muñwi; kamba u ka kumalela yo muñwi, a shwaule yo muñwi. Ha ku konahali kuli mu sebeleze ni Mulimu, ni Mamona, (kikuli Bufumu).” Jesu n’a elelize balateleli ba hae kuli ba si ke ba ikubukanyeza bufumu mwa lifasi kono ba ikubukanyeze “bufumu kwa lihalimu,” mi fo n’a talusa kuli ba ikezeze libizo le linde ku Mulimu ya ‘ziba se ba tokwile, ba si ka si kupa kale.’—Mateu 6:8, 19-25.
7. Lu kona ku fumana cwañi “bupilo sakata”?
7 Mwa liñolo la n’a ñolezi Timotea ya n’a beleka ni yena, muapositola Paulusi n’a file kelezo ye tiile ku ba ba ndongwama sifumu. N’a bulelezi Timotea kuli: “Laela ba ba fumile . . . kuli ba si ke ba bea sepo ya bona fa lika ze sina niti, sina bufumu, kono ba bee sepo ya bona ku Mulimu ya lu fa ka buñata lika kamukana kuli lu li tabele. . . . Ba be ni sishemo, mi ba itukiseze ku abelana ni ba bañwi. Ka mukwa wo, ba ta ikubukanyeza liluo le linde, le li ta ba mutomo o tiile wa mazazi a taha. Mi ba ta fumana bupilo sakata.”—1 Timotea 6:17-19, Bibele ye Kenile, hatiso ya 1984.
“Bupilo Sakata” Kiñi?
8. (a) Ki kabakalañi batu ba bañata ha ba ndongwama sifumu ni libubo? (b) Batu ba ba cwalo ha ba lemuhangi nto mañi?
8 Batu ba bañata ba nga kuli “bupilo sakata” ki ku pila bupilo bwa mbombolelwa ni ku ikola minyaka. Magazini ye ñwi ya kwa Asia ne i bulezi kuli: “Ba ba buhanga mafilimu kamba TV ba lakazanga ze ba buhanga kuli ni bona ba be ni zona.” Batu ba bañata ba ndongwami ku bata sifumu ni libubo. Kabakala ku ndongwama lika zeo, ba bañwi ba itusisa bunca bwa bona, ba bañwi ha ba isi pilu kwa buikangulo bwa bona, ba bañwi bona ba yubeka mabasi a bona mi ba bañwi ha ba isezi pilu ku za kwa moya. Ba bañata ha ba lemuhangi kuli lika ze boniswanga mwa mafilimu ni fa TV li bonisa fela “moya wa lifasi,” ili moya o kukueza batu ba bañata ni ku ba susueza ku eza lika ze sa lumelelani ni mulelo wa Mulimu. (1 Makorinte 2:12; Maefese 2:2) Kona libaka batu ba bañata kacenu ha ba si na tabo.—Liproverbia 18:11; 23:4, 5.
9. Ki nto mañi ye ba sa koni ku peta batu, mi ki kabakalañi?
9 Ku cwañi ka za batu ba ba beleka ka t’ata ku tusa ba bañwi, ku ba fepa, ku ba fa likalafo, ni ku ba atulela hande? Lika ze ba eza li tusa ba bañwi luli. Kono niha ba ikataza ka t’ata cwalo, ha ba na ku kona ku cinca lifasi le kuli li be le linde. Ki kabakalañi? Kabakala kuli “lifasi kamukana li lapalezi mwatas’a ya maswe” yena Satani ya sa lati kuli lifasi li be le linde.—1 Joani 5:19.
10. Basepahali ba ka ikola lili “bupilo sakata”?
10 Ki bumai luli haiba mutu u sepile fela ku pila mwa lifasi le la kacenu! Paulusi n’a ñozi kuli: “Haiba lu sepile Kreste mwa bupilo bo fela, lu maibile ku fita batu kaufela.” Batu ba ba sepile ku pila bupilo bo fela ba bulela kuli: “A lu ceñi, a lu nweñi, kakuli kamuso lu ka shwa.” (1 Makorinte 15:19, 32) Kono “ka sepiso ya [Mulimu], lu talimezi lihalimu le linca, ni lifasi le linca, mo ku yahile Ku Luka.” (2 Pitrosi 3:13) Ka nako yeo, Bakreste ba ka ikola “bupilo sakata,” bona “bupilo bo bu sa feli” inze ba petehile, mwa lihalimu kamba mwa lifasi le li ka busiwa ki Mubuso o munde wa Mulimu!—1 Timotea 6:12.
11. Ki kabakalañi ku zwisezapili Mubuso wa Mulimu ha ku li nto ya butokwa ka ku fitisisa ye lu swanela ku eza?
11 Ki Mubuso wa Mulimu fela o ka felisa matata kaufela a batu. Kacwalo ku eza lika ze zwisezapili Mubuso wa Mulimu kona nto ya butokwa ka ku fitisisa ya swanela ku eza mutu. (Joani 4:34) Ha lu nze lu eza musebezi wo, lu ikola silikani ni Ndat’a luna wa kwa lihalimu. Hape lu ikola ku swalisana ni mizwale ni likaizeli ba kwa moya ba bañata ba ba na ni mulelo o swana mwa bupilo.
Ku Eza Buitomboli Bo Bu Swanela
12. Mu taluse shutano ye mwahal’a bupilo bwa mwa lifasi le ni “bupilo sakata.”
12 Bibele i bonisa kuli lifasi la kacenu “la fela, ni takazo ya lona.” Lifasi la Satani ku kopanyeleza cwalo ni libubo ni sifumu sa lona li ka sinyiwa, “kono ya eza tato ya Mulimu u [ka] ina ku ya ku ile.” (1 Joani 2:15-17) Ka ku sa swana ni sifumu se si sa tiyi, libubo la nakonyana, ni minyaka ya swalelele ya lifasi le, “bupilo sakata” ili bupilo bo bu sa feli mwa Mubuso wa Mulimu, bona bu ka inelela mi lwa swanela luli ku itombola kuli lu bu fumane, ibile fela kuli buitomboli bwa luna ki bo bu swanela.
13. Bo Henry ni bo Suzanne ne ba ezize cwañi buitomboli bo bu swanela?
13 Ha lu nyakisiseñi mutala wa bo Henry ni bo Suzanne. Ba na ni sepo luli ya kuli Mulimu u ka babalela ba ba bata pili Mubuso wa hae mwa bupilo bwa bona. (Mateu 6:33) Kacwalo ne ba ketile ku pila mwa ndu ye sa tuli ilikuli ba si ke ba beleka kaufel’a bona kono kuli ba itusise nako ya bona kwa ku eza lika za kwa moya hamoho cwalo ni bana ba bona ba babeli ba basizana. (Maheberu 13:15, 16) Mulikan’a bona yo mutuna n’a si ka utwisisa libaka ha ne ba ezize cwalo. N’a bulelezi bo Suzanne kuli: “Wahesu, haiba u bata ku ba ni ndu ye nde u swanela ku beleka ka t’ata.” Kono bo Henry ni bo Suzanne ne ba ziba kuli ku eza pili tato ya Jehova ku fumanisa mutu “sepiso ya bupilo bwa cwale, ni ya bo bu sa taha.” (1 Timotea 4:8; Tite 2:12) Bana ba bona ha ne ba hulile, ba ba bashaeli ba nako kaufela ba ba tukufalezwi. Kaufela bona mwa lubasi ba ikutwa kuli ha ku na ze ba yawile mwa bupilo bwa bona, kono ba fumani limbuyoti ze ñata ka ku bata “bupilo sakata.”—Mafilipi 3:8; 1 Timotea 6:6-8.
Mu Si ‘Itusisi Hahulu za Lifasi Le’
14. Haiba lu libala mulelo luli wa luna, ki kozi ifi ye kona ku lu wela?
14 Kono kozi ya kona ku ba teñi haiba lu libala mulelo luli wa luna mi lu sa swali ka m’ata “bupilo sakata.” Lwa kona ku “yoweliswa ki lipilaelo, ni liluwo, ni minyaka ya bupilo.” (Luka 8:14) Ku lakaza lika kaufela ze lu bona ni “ku bilaela za bupilo” ku kona ku tisa kuli lu yongobele hahulu mwa lika za lifasi le. (Luka 21:34) Ka bumai, ba bañwi ba swasehile mwa katwa ka ku bata sifumu, “ba keluhile tumelo, mi ba itabile ili bona ka manyando a mañata” kuli mane ha ba sa lapela Jehova. Batu bao ba wezwi ki bumai bo butuna luli kabakala ku sa “swala bupilo bo bu sa feli.”—1 Timotea 6:9, 10, 12; Liproverbia 28:20-22.
15. Lubasi lo luñwi ne lu fumani cwañi mbuyoti kabakala ku sa ‘itusisa hahulu za lifasi’?
15 Paulusi n’a lu elelize kuli “ba ba itusisa ka za lifasi le, ba be inge ha ba itusisi ka zona.” (1 Makorinte 7:31) Bo Keith ni bo Bonnie ne ba latelezi kelezo yeo. Bo Keith ba li: “Ne ni bile yo muñwi wa Lipaki za Jehova hamulaho fela wa ku feza kosi ya bualafi. Ne ni na ni ku eza keto. Ne ni kona ku alafa bakuli ba bañata ni ku ipumanela mali a mañata, kono ku eza cwalo ne ku ka lu palelwisa ku lapela hande Mulimu. Na ikatulela ku sa beleka hahulu ilikuli ni be ni nako ye ñata ya ku eza lika za kwa moya ni ya ku babalela musal’a ka ni bana baketalizoho be ne lu til’o ba ni bona. Nihaike ne lu sa bangi ni mali a mañata, ne lu itusisanga hande mali mi ne lu banga ni lika kaufela ze ne lu tokwa. Lubasi lwa luna ne lu utwana luli mi ne lu tabile hahulu. Mi hamulaho wa nako, kaufela luna ne lu keni mwa bukombwa bwa nako kaufela. Ha lu bulela cwana, bana ba luna ba nyezwi ki banna ba bande mi ba balalu ku bona se ba na ni bana. Mabasi a bona ni ona a tabile bakeñisa kuli a zwezipili ku beya mulelo wa Jehova mwa sibaka sa pili.”
Ku Beya Mulelo wa Mulimu Mwa Sibaka Sa Pili mwa Bupilo
16, 17. Ki ifi mitala ya batu ba mwa Bibele ba ne ba na ni buikoneli, mi ba hupulwa cwañi?
16 Mwa Bibele ku na ni mitala ya batu ba ne ba pilile ka ku lumelelana ni mulelo wa Mulimu ni ya ba ne ba si ka eza cwalo. Mitala yeo i tusa batu kaufela ku si na taba ni lizo ni lisimuluho za bona kamba miinelo ya bona. (Maroma 15:4; 1 Makorinte 10:6, 11) Nimrodi n’a yahile minzi ye mituna kono ka ku eza cwalo, n’a lwanisize mulelo wa Jehova. (Genese 10:8, 9) Kono ba bañwi ba bañata bona ne ba pilile ka ku lumelelana ni mulelo wa Mulimu. Ka mutala, mulelo wa Mushe ne si wa kuli a zwelepili ku ba mutu yo mutuna mwa Egepita. Kono n’a iselize hahulu pilu kwa musebezi wa n’a mu file Mulimu kakuli n’a u nga kuli ki “bufumu bo bu fita maluwo a Egepita.” (Maheberu 11:26) Luka ya n’a li mualafi mwendi n’a kile a alafa Paulusi ni ba bañwi cwalo. Kono musebezi o mutuna wa n’a ezize Luka ne li wa ku kutaza kwa batu ni ku ñola buka ya mwa Bibele. Paulusi ha zibahali kuli ne li caziba wa mulao, kono u zibahala kuli ne li mulumiwa, “muapositola wa bamacaba.”—Maroma 11:13.
17 Davida ha zibahali kuli ne li muzamaisi wa mpi kamba muopeli, kono u zibahala kuli ne li ‘munna ya n’a kolisize pilu ya Mulimu.’ (1 Samuele 13:14) Daniele ha zibahali kuli ne li nduna wa mwa mubuso wa Babilona, kono u zibahala kuli ne li mupolofita wa Jehova ya sepahala; Estere ha zibahali kuli ne li muoli wa Peresia, kono u zibahala ka bundume ni tumelo ya hae; bo Pitrosi, Andreasi, Jakobo, ni Joani ha ba zibahali ka bundui bwa bona, kono ba zibahala ka ku ba baapositola ba Jesu. Mi Jesu yena mutala o mutuna ka ku fitisisa, ha zibahali kuli ne li “mupangi,” kono u zibahala kuli ki “Kreste.” (Mareka 6:3; Mateu 16:16) Batu bao kaufela ne ba izibela hande kuli niha ne ba na ni buikoneli, maluo, kamba libubo, zeo ne si za butokwa hahulu mwa bupilo bwa bona kono ne ba ziba kuli sa butokwa hahulu ne li ku sebeleza Mulimu. Ne ba ziba kuli nto ye tuna ka ku fitisisa ili ye fumanisa mupuzo ki ku ba mutu wa Mulimu.
18. Mukulwani yo muñwi wa Mukreste n’a ikatulezi ku ezañi mwa bupilo, mi n’a fitile fa ku lemuha nto mañi?
18 Seung Jin ya bulezwi kwa makalelo, ni yena n’a til’o lemuha nto ya butokwa hahulu mwa bupilo. U li: “Ku fita ku ndongwama za bualafi, za ku swanisa ni za buluti, na ikatulela ku pila ka ku lumelelana ni buineelo bwa ka ku Mulimu. Ka nako ya cwale se ni sebeleza kwa sibaka ko ku tokwahala baluti ba Bibele, inze ni tusa batu kuli ba t’o fumana bupilo bo bu sa feli. Ne ni nahananga kuli ku ba sikombwa sa nako kaufela kwa nyikwisa. Kono cwale bupilo bwa ka se bu tabisa hahulu, ha ni nze ni beleka ka t’ata kuli ni be ni mikwa ye minde ni ku tusa batu ba lizo ze fapahana-fapahana. Ni lemuhile kuli ku eza lika ka ku lumelelana ni mulelo wa Mulimu kona nto ye tuna ka ku fitisisa mwa bupilo.”
19. Lu kona ku pila cwañi ka ku lumelelana ni mulelo wa Mulimu?
19 Ka ku ba Bakreste, lu na ni zibo ye kona ku pilisa batu ni sepo ya ku piliswa. (Joani 17:3) Kacwalo he, lu si ke lwa “amuhela sishemo sa Mulimu ku sa tusi se siñwi.” (2 Makorinte 6:1) Kono lu itusise bupilo bwa luna ku lumbeka Jehova. Lu shaele zibo ye tisa tabo sakata kacenu ili ye isa kwa bupilo bwa kamita. Ha lu ka eza cwalo, lu ka iponela talelezo ya manzwi a Jesu a li: “Ku na ni mbuyoti mwa ku fana, ye fita ye mwa ku fiwa.” (Likezo 20:35) Mi wo ki wona mulelo luli wa bupilo.
[Litaluso za kwatasi]
^ para. 1 Mabizo a mañwi a cincizwe.
Kana Mwa Kona ku Talusa?
• Ki ufi mulelo wa butokwa ka ku fitisa o lu swanela ku peta mwa bupilo?
• Ki kabakalañi ku ndongwama sifumu ha ku si ko ku butali?
• “Bupilo sakata” bwa sepisize Mulimu ki bupilo bo bu cwañi?
• Lu kona ku pila cwañi ka ku lumelelana ni mulelo wa Mulimu?
[Lipuzo za Tuto]
[Maswaniso a fa likepe 18]
Bakreste ba swanela ku eza buitomboli bo bu swanela