Fwilenu Kwila Chuma Chachiwahi Muwumi

‘Yuma yejima yikweti muuya yimuhameki Yehova.’—MASAMU 150:6.

1. Lumbululenu chuma chakeñeleñayi mukwenzi wumu muwumi.

 IYALA wumu wejina daSeung Jin wakulilili mwituña daKorea wahosheli nindi: “Nadizili mudimu wawundotolu muloña nakeñeleña kuzatisha wumi wami kulonda kukwasha antu. Natoñojokeleña cheñi nami mpuhu nikwikala namali amavulu ekala mumudimu wawundotolu akunletela muzañalu. Chinelukili nami ndotolu nateli kukwasha antu chantesha hohu, natiyili kutama. Kufumahu natachikili kudiza jakuleñaleña nyevulu niyuma yikwawu, ilaña mudimu weniwu hiwakwashileña antu chikupuku, natiyili kutama hakuzata mudimu wadiña nakunletela muzañalu nkawami. Dichi nekalili ntañishi nawa chakubula kunata mpinji, nelukili nami nateli kuleja hohu yikuma bayi nshimbi yinateli kulombola kumuzañalu wawenuku.” * Kufwana antu amavulu, Seung Jin wadiña nakukeña chuma chachiwahi muwumi.

2. (a) Chalumbulukadi kwikala nankeñelu muwumi? (b) Tweluka ñahi netu Nleñi wadiñi nankeñelu hakutwinka ahanu hamaseki?

² Kwikala nankeñelu yalala muwumi chalumbuluka kwiluka muloña wutwekalila amomi, kwikala nachikonkwanyi chalema chatwileñelaña kuzata nañovu. Komana chalala antu anateli kwikala nankeñelu yamuchidiwu? Eña! Hamuloña wakwila nawu atwileña namaana, chinleji, niwuswa wakutoñojoka chamwekeshaña nawu Nleñi wukweti nkeñelu hakutwinka hanu heseki. Dichi chakubula nikujinooka, tunateli kuwana nikushikija nkeñelu yetu yalala kuhitila hohu mukushakama kwesekeja nankeñelu yaNleñi.

3. Indi nkeñelu yaNzambi kudi antu yabombelamu chumanyi?

³ Bayibolu yalumbululaña nawu nkeñelu yaNzambi hadi etu yabombelamu yuma yayivulu. Chakutalilahu, munjila mwatwileñawu chiwahi hichinjikijilu chamwekeshaña kukeña kwaNzambi kwakadi ichima. (Masamu 40:5; 139:14) Dichi, kushakama kwesekeja nankeñelu yaNzambi chalumbulula kukeña antu amakwawu chakadi ichima neyi chatukeñayi Nzambi. (1 Yowanu 4:7-11) Chalumbuluka cheñi kwovwahilaña nshimbi jaNzambi jatukwashaña kushakama mwaya nkeñelu yindi yayiwahi.—Mukwakutaŋisha 12:13; 1 Yowanu 5:3.

4. (a) Chumanyi chakeñekaña hakwila nawu twikali nankeñelu yalala muwumi? (b) Nkeñelwinyi yabadika yinateli kwilayi muntu wudi wejima?

 ⁴ Nzambi wafuukwili cheñi nindi antu ashakameña amuzañalu nikuwunda wumu namukwawu hamu nayileñaleña yejima. (Kutachika 1:26; 2:15) Hela chochu, chumanyi chitwatela kwila hakwila nawu twikali amuzañalu, akiñewa nikuwunda? Kufwana mwana wakeñaña kwiluka nindi anvwali jindi adi hakamwihi kulonda kutiya kuwaha nawa wakiñewa, anetu twatela kwikala nawubwambu wawuwahi naTata yetu wamwiwulu hakwila nawu tuwani nkeñelu yalala muwumi. (Aheberu 12:9) Nzambi wachilisha kwikala chaswayi kwikala nawulunda wudi neyi watata yawantu namwana kuhitila mukutwiteja kukundama kudi yena nikutiyilila kulomba kwetu. (Yakoba 4:8; 1 Yowanu 5:14, 15) Neyi ‘twenda naNzambi’ muchikuhwelelu nikwikala alunda nindi, tunateli kumutiyisha kuwaha nikumuhameka Tata yetu wamwiwulu. (Kutachika 6:9; Yishimu 23:15, 16; Yakoba 2:23) Iyi diyi nkeñelu yabadika yinateli kwilayi muntu wudi wejima. Ñimbi yamasamu wasonekeli nindi: “Yuma yejima yikweti muuya yimuhameki Yehova.”—Masamu 150:6.

Nkeñelwinyi Yiwukweti muWumi?

5. Muloñadi kutwamijaku yuma yakumujimba chikwekalila kwabula kushikilamu?

⁵ Nkeñelu yaNzambi kudi etu yakwila nawu tudihembi chiwahi niyisaka yetu. Ichi chabombelamu kwakamena yuma yakumujimba niyakuspiritu. Hela chochu, hakwila twili mwenimu, chakeñekaña kwesekeja kulonda yuma yakumujimba yibuli kujikilila yuma yasweja kulema yakuspiritu. (Matewu 4:4; 6:33) Kuhalwa kwakweni, antu amavulu asweja kushindamesha wumi wawu hakwikala namaheta akumujimba. Ilaña kweseka kuditiyisha kuwaha nayuma yakumujimba hohu hichashikilamuku. Kwihujola kwakatataka kwawantu aheta muAsia kunakumwekesha nawu antu amavulu “atiyaña neyi hiyakiñewaku, hela chakwila akweti mpuhu niyuma yejima yahetawu.”—Mukwakutaŋisha 5:11.

6. Kufumbanyi kwahanayi Yesu kutalisha kudi antu afwilaña maheta?

⁶ Yesu wahosheli ‘hakudimbana kwamaheta.’ (Maku 4:19) Indi maheta adimbanaña ñahi? Maheta amwekanaña neyi anateli kuleñela muntu kwikala namuzañalu, ilaña hidimuku. Mwanta wamaana Solomoni wahosheli nindi, ‘Muntu wakeña mali hakela nindi ananwaninuku.’ (Mukwakutaŋisha 5:10) Komana chaswayi kwimika yikonkwanyi yakufwila yuma yakumujimba nawa hampinji yoyimu kuzatila Nzambi namuchima wejima? Nehi. Yesu walumbulwili nindi: “Kwosi muntu natweshi kukalakela anyanta ayeduku; chiña yohelahu wumu, akeñahu mukwawu; hela [yokakelahu] wumu, mukwawu amudiwula. Himukutwesha kukalakela niNzambi nimahetaku.” Yesu wakonkomweneni atumbanji twindi kubula kulumbikila maheta hamaseki, ilaña ‘kulumbikila maheta mwiwulu,’ dikwila nawu kwikala nejina dadiwahi naNzambi ‘weluka yuma yimunakankili himuchidi kanda mulombi kudi yena.’—Matewu 6:8, 19-25.

7. Tunateli kukwata ñahi ‘kuwumi walala chikupu’?

⁷ Hakusonekela Timotewu muyazatilileña, kapostolu Pawulu waheni kufumba kwatiyakana kutalisha haniyi nsañu. Wamulejeli Timotewu nindi: “Yileji akwakuheta . . . bayi mukuhwelela maheta abulaña kushakamaku; chiña kusha muchima kudi Nzambi wasweja kutwinka yuma yejima nindi tuluñi nachu . . . , ikalenu nanyichima yakuhana; nakudilumbikila yakutuña nachu kunyaka yakenza, kulonda mwakakwati kuwumi, wowu wumi walala chikupu.”—1 Timotewu 6:17-19.

Indi “Wumi Walala Chikupu” hiChumanyi?

8. (a) Muloñadi antu amavulu chafwilañawu kwikala namaheta nimpuhu? (b) Indi antu amuchidiwu akañanyaña kumona chumanyi?

⁸ Kudi antu amavulu, nhoshelu yakwila nawu “wumi walala chikupu” yayanukishaña kwikala nachihandilu chachiseki. Magazini yakuAsia yahoshaña hansañu yamwekanaña yahosheli nawu: ‘Antu atalaña jifwilimu hela chisanji chanyivwimbimbi akomokaña yuma yamonañawu nikutoñojoka hayuma yatela kuhetawu.’ Antu amavulu elishaña kuheta maheta nimpuhu kwikala nkeñelu yawu muwumi. Amavulu ahanaña wukwenzi wawu, wumi wawu, chisaka chawu niwuspiritu wawu kulonda kufwila  kuheta yumiyi. Antu antesha ajimbalañaku nawu nyevulu yahachisanji chanyivwimbimbi yamuchidiwu hiyamwekeshaña “spiritu yamunu mwishina[ku]”—yitoñojoka yeniyi yinasweji kuluwañesha mabiliyoni awantu ahamaseki nikuyileñela kukoña yuma yabula kwesekana nankeñelu yaNzambi. (1 Akorinda 2:12; Aefwesesa 2:2) Dimuloña waweni antu amavulu chabulilañawu kwikala namuzañalu makonu.—Yishimu 18:11; 23:4, 5.

9. Chumanyi chikakañanyawu antu kwila, nawa muloñanyi?

⁹ Indochu antu azataña chikupu kulonda kukwasha amakwawu nakufwila kumanisha nzala, yikatu nikutama? Ñovu jawu nikudihana kwawu kakavulu yakwashaña antu amavulu. Ilaña hichikweti muloña nañovu jawuku, hiyamba kahimpa kaayi kamakonu kwikala kakawahuku. Muloñadi? Muloña chalala “mpata yamunu mwishina yashakamaña mudi owu watama”—Satana nawa hakeñaña nindi yihimpuku.—1 Yowanu 5:19.

10. Mpinjinyi yamba kadiluñishawu akwakuloña “wumi walala chikupu”?

¹⁰ Chawushona neyi muntu wukukuhwelela chikupu hawumi wakanu kaayi kamakonu. Pawulu wasonekeli nindi, “Neyi tunakuhweleli Kristu muwumi hohu bweñi, komana yetu tunabadiki antu ejima wushona.” Antu akuhwelela nawu iwu diwu wumi wekalaku hohu ahoshaña nawu, “Komana tukumini dakudya nakunwa, muloña kumadiki tukufwa.” (1 Akorinda 15:19, 32) Ilaña kwekala mbidi, “hakwila etu twatalilaña mawulu amaha niiseki dadiha, mwakekala kuloña neyi chakaniniyi [Nzambi].” (2 Petulu 3:13) Hayina mpinji eniKristu akadiluñisha “wumi walala chikupu,” diwu, “wumi wahaya nyaka” mukuloña, chili mwiwulu chili mukuyulewa kwanfulumendi yikweti kukeña yaWanta waNzambi.—1 Timotewu 6:12.

11. Muloñadi kukalakala nakutwala hambidi Wanta waNzambi chikwekalila nkeñelu yayiwahi?

¹¹ Wanta waNzambi diwu hohu wukatwesha kumanisha kukala kwamuchidi wamuntu chikupu. Kwila nkeñelu yaNzambi kuhitila mukuzata nakukwasha Wanta windi diyi nkeñelu yasweja kulema yatela kwilayi muntu wudi wejima. (Yowanu 4:34) Hampinji yitunakuzata iwu mudimu, tunateli kwikala nawulunda wawuwahi naTata yetu wamwiwulu. Tukweti cheñi muzañalu wakuzatila hamu nayihita yawamana kwetu niahela muchipompelu chawiniKristu, elaña nkeñelu yoyimu muwumi.

 Kudihana muNjila Yayiwahi

12. Ambulenu wumi wamakonu ‘nawumi walala chikupu.’

¹² Bayibolu yahosha nawu, mpata yamunu mwishina yamakonu ‘yinakuhita nikufwila kwayu kwatama.’ Kwosi yuma yaSatana nimpuhu niyuma yayiwahi yikabula kujilumunawu, ‘hakwinza muntu welaña nkeñelu yaNzambi washakamaña haya nyaka.’ (1 Yowanu 2:15-17) Kwambukaku namaheta abulaña kushakama, mpuhu yakapinji kantesha, nichiseki chamukunkulwayi chamakonu, “wumi walala chikupu”—wumi wahaya nyaka muchiyulu chaWanta waNzambi, wahaya nyaka nawa twatelela kudihanaku, chakala tudihana munjila yayiwahi.

13. Indi adisumbula adihanini chachiwahi munjilanyi?

¹³ Shinshikenu hadi aHenry naSuzanne. Akuhwelela chikupu muchikaninu chaNzambi nawu antu ejima atwamijañaku Wanta muwumi wawu akatambwila wukwashu waNzambi. (Matewu 6:33) Dichi, chatela wejima wawu azateña mudimu wakumujimba kulonda kufwetela itala dakola wuseya, atondeluhu kushakama mwitala dakufwetela mali antesha hakwila nawu azateña mpinji yeneni hakushimwina Wanta ninyidimu yikwawu yamuzañaleshaña Nzambi hamu nawanyanawu awambanda ayedi. (Aheberu 13:15, 16) Ibwambu dawu wumu walemeshawu hatiyishishili kufuukulahu kwawuku. Mumbanda yeniwu wamulejeli Suzanne nindi: “Eyi mukwetu, neyi wunakukeña kushakama mwitala dadiwahi watela kudiwulahu chuma chimu.” Hela chochu, Henry niSuzanne elukili nawu kutwamijaku Yehova “kukweti kukana kwawumi wakatataka nikwawumi wakenza.” (1 Timotewu 4:8; Titusa 2:12) Anyanawu awambanda akulili nakwikala apayiniya ampinji yejima akola. Hamu neyi chisaka, hiyatiyiluhu nawu anabuleni chuma chalema chikupuku; ilaña ahetelelumu nankashi hakufwila “wumi walala chikupu” hamu neyi nkeñelu yawu.—Afwilipi 3:8; 1 Timotewu 6:6-8.

Bayi ‘Muzatisha Yuma Yamunu Mwishina Chikupu’

14. Kuvulamena nkeñelu yetu yalala chinateli kutwala kuwubanjinyi?

¹⁴ Hela chochu, kudi wubanji weneni neyi tuvulamena nkeñelu yetu yalala nakubula kukwatisha ‘kuwumi walala chikupu.’ Keña tuholokela muwubanji ‘wakwakama nimaheta, nikutiya kuwaha nayuma yawumi wunu.’ (Luka 8:14) Kusweja kufwila yuma yakumujimba ‘nikwakama yuma yamuwumi kunateli kutwala mukusweja kudiñija muyuma yamukanu kaayi. (Luka 21:34) Chawushona, antu amakwawu adiñija chikupu nakwikala nampwila yakukeña kuheta makonu nawa ‘anasenuki mukwitiya kwakukuhwelela, anadipwiki yihuñu yayivulu, zwa nikwishinadi,’ nikujimbesha wulunda wawu wawuwahi naYehova. Chawushona nankashi kubula ‘kukwata kuwumi wahaya nyaka’!—1 Timotewu 6:9, 10, 12; Yishimu 28:20.

15. Indi chisaka chimu chahetelelumu ñahi ‘hakubula kuzatisha yuma yamunu mwishina chikupu’?

¹⁵ Pawulu wafumbili ‘azatishaña yuma yamunu mwishina kwikala neyi abulaña kuyizatisha chikupu.’ (1 Akorinda 7:31) Keith niBonnie azatishili iku kufumba. Keith wahosheli nindi, “Nekalili Chinsahu chaYehova hampinji yinamashileña shikola yakuuka antu akata mazewu. Nateleli kufuukulahu chuma chimu. Nateleleli kwiteja ayeji amavulu kulonda kwikala namali amavulu, ilaña kwila mwenimu kwadi kukañesha nyidimu yakuspiritu. Nafuukwiluhu kukehesha ayeji kulonda kwikala nampinji yakwila yuma yakuspiritu nikutala chihandilu chachisaka chami, chabombelelumu anyana awambanda atanu. Hela chakwila hitwadiña namali ahambadi mpinji yejimaku, twadizili chakuhemba mali nawa mpinji yejima twadiña nayuma yitwakeñeleña. Chihandilu chachisaka chetu chadiña chakeñañana, chachiwahi nawa chenzala namuzañalu. Nkumininaku wejima wetu twatachikili wupayiniya wampinji yejima. Chayinu mpinji anyanetu asumbuka chiwahi, asatu akweti nyanawu. Yisaka yawu niyena yikweti muzañalu muloña anatwalekuhu kutwamijaku nkeñelu yaYehova.”

Kutwamijaku Nkeñelu yaNzambi muWumi Wenu

16, 17. Yakutalilahwinyi yawantu elukishili nyidimu yinamwekeshuwu muBayibolu, nawa ayanukaña ñahi?

¹⁶ Bayibolu yikweti yakutalilahu yawantu  adiña nakwila niabulileña kwila nkeñelu yaNzambi. Yuma yitwatela kudizilaku kuniyi yakutalilahu yakundama kudi antu ayaaka yejima, niyisemwa ninshakaminu. (Aroma 15:4; 1 Akorinda 10:6, 11) Nimirodi watuñili nyisumba yamaneni, ilaña welili mwenimu mukudikaña naYehova. (Kutachika 10:8, 9) Hela chochu, amavulu emikili yakutalilahu yayiwahi. Chakutalilahu, Mosi hatwalekeluhu kudimwekesha neyi kaEjipitu mukwamaana kwikala nkeñelu yindi muwumuku. Ilaña walemesheli mudimu watambwililiyi kudi Nzambi nindi “himaheta abadika yuma yalema yamuEjipitu yejima.” (Aheberu 11:26) Chakubula nikujinooka ndotolu Luka wakwashili antu amakwawu niPawulu hakuyuuka yikatu yawu. Ilaña Luka wakwashili antu chikupu hamu neyi mukwakushimwina nawa nsoneki yaBayibolu. Kutalisha hadi Pawulu, hiyamwiluka neyi nkuluñaña muNshimbuku, ilaña hamu neyi kamishonali, “kapostolu kawaJentili.”—Aroma 11:13.

¹⁷ Davidi bayi neyi amwanukaña hamu neyi mukulumpi wawamashidika hela ñimbi nawa mukwakusoneka tuminaku, ilaña hamu neyi “muntu wakumuchima [waNzambi].” (1 Samweli 13:14) Twamwiluka Danyeli, bayi neyi hamuloña wamudimu windi neyi mukulumpi munfulumendi yamuBabilonuku, ilaña hamuloña wakumukalakela Yehova nakashinshi neyi kaprofwetu. Esita hitwamwiluka neyi mwadi wamuPeresuku, ilaña hamu neyi chakutalilahu chakubula woma nawa wachikuhwelelu. Hitwayiluka aPetulu, niAnderi niYakoba niYowanu neyi ayibinda anshi akuluka yitembuku, ilaña hamu neyi atumbanji twaYesu. Yesu diyi chakutalilahu chasweja kuwaha, hiyamwanukaña hamu neyi ‘mukwakusoñaku,’ ilaña “Kristu.” (Maku 6:3; Matewu 16:16) Wejima wawu elukili chikupu nawu hichikweti muloña nanyidimu, maheta hela mpuhu yadiñawu nayuku, wumi wawu hiwadi kushindamena hayuma yakumujimbaku, ilaña hakumukalakela Nzambi. Elukili nawu chuma chasweja kulema nimudimu wakusweja kutambula nkisu watela kuhetawu hikwikala iyala hela mumbanda wakamaña Nzambi.

18. Indi mukwenzi wumu wawiniKristu wafukwiluhu kuzatisha wumi windi munjilanyi, nawa chumanyi chelukiliyi?

¹⁸ Seung Jin, yatenawu hakusambila, nkumininaku niyena watiyishishili ichi chuma. Walumbulwili nindi, “Chatela kumanisha ñovu yami hamu neyi ndotolu, mukwakuleñaleña nyevulu, hela ntañishi, nafuukwiluhu kuyizatisha kwesekeja nakudihana kwami kudi Nzambi. Chayinu mpinji inakuzatila kwiluña kudi kukankila kwawantañishi aBayibolu, kulonda kukwasha antu kuwana njila yatwalaña kuwumi wahaya nyaka. Natoñojokeleña nami kwikala payiniya wampinji yejima hichuma chakala chikupuku. Ilaña ichi wumi wami wunekali wakala chikupu muloña inakufwila kuhimpa yililu niwuswa wami wakuzata nawantu ayisemwa yashiyashana. Neluki nami kwilisha nkeñelu yaYehova kwikala nkeñelu yetu, dichuma chasweja kulema muwumi.”

19. Tunateli kuwana ñahi nkeñelu yalala muwumi?

¹⁹ Hamu neyi eniKristu, atwinka maana atela kutwipulwisha nikuchiñeja kwakupuluka. (Yowanu 17:3) Bayi tubula ‘kwiteja luwi lwaNzambi lwasweja nakujimbesha nkeñelu yachuku.’ (2 Akorinda 6:1) Ilaña tuzatishenu mafuku niyaaka yetu yalema hakumuhameka Yehova. Tutandishenu kwiluka kunakuleta muzañalu waweni makonu nawa kwalombolaña kuwumi wahaya nyaka. Neyi twila mwenimu, tukumona walala wamazu aYesu akwila nawu: “Chikweti kukooleka yowu kuhana, kutambula chakuminamu.” (Yililu 20:35) Nawa twakawana nkeñelu yalala muwumi.

[Tumazu twaheshina]

Munateli Kulumbulula?

• Nkeñelwinyi yasweja kulema yitwatela kwikala nayu muwumi?

• Muloñanyi kuhanda chihandilu chakusweja kukeña yuma yakumujimba chichatamina?

• Indi “wumi walala chikupu” wakanayi Nzambi hichumanyi?

• Tunateli kuzatisha ñahi wumi wetu hakwila nkeñelu yaNzambi?

[Malwihu aKuzatisha haKudiza]

[Nyevulu yidi hefu 20]

EniKristu atela kudihana chikupu