Bao-y n maan-y bũmb sẽn na n kɩt tɩ y vɩɩmã tall võore
Bao-y n maan-y bũmb sẽn na n kɩt tɩ y vɩɩmã tall võore
“Bɩ bũmb nins fãa sẽn vʋʋsd ne yõorã pẽg Zusoabã.”—YƖƖL SÕAMYÃ 150:6.
1. Bõe la bi-bɩɩg a ye sẽn da rat t’a vɩɩmã tall yõod la kõ-a sũ-noog maan-yã?
“MAM da karemdame n na n wa yɩ logtore, m sẽn da rat n wa sõng neb wʋsg m vɩɩmã pʋgẽ wã yĩnga. M da tagsdame me tɩ tʋʋm-kãng sẽn kẽesd ned ligd la a tõe tɩ f paam yʋʋrã yĩnga, a na n kõ-m-la sũ-noogo.” Yaa bi-bɩɩg sẽn bɩ Koore soolmẽ wã n yeel woto. A paasa woto: “La mam wa n bãngame tɩ logtor sẽn tõe n maan bũmb ning n sõng ãdem-biisã paooda wʋsgo, tɩ m yam yi logtoeemdã. Rẽ kɩtame tɩ m bas n tɩ zãms te-neeb gʋlbo. La m da baas n ket n neeme tɩ tʋʋm-kãng nafda maam la a pa nafd nebã wʋsg ye. Woto yĩnga, m lebga karen-saamba. La pa yã n zãag la m bãng tɩ bũmb nins m sẽn karemd nebã pa tõe n sõng-b tɩ b paam sũ-noog hakɩk ye.” Bi-bɩ-kãngã maana wa neb wʋsgo. A ra baooda tʋʋmd sẽn na kɩt t’a vɩɩmã tall yõod la kõ-a sũ-noogo.
2. a) Bũmb sẽn kɩtd tɩ ned vɩɩm tar võor yaa bõe? b) Bõe n kɩt tɩ d miẽ tɩ pa zaalem yĩng la b sẽn naan tõndã?
2 Bũmb f sẽn tõe n maan tɩ f vɩɩmã tall yõod yaa bũmb sẽn kɩtd tɩ f ne f vɩɩmã võore. Rat n yet tɩ f vɩɩ rẽ yĩnga, tɩ yaa rẽ n pak-f n yɩɩd sẽn ketã fãa. La rẽ yĩnga, bũmb bee ãdem-biisã sẽn tõe n maan tɩ kɩt tɩ b vɩɩmã sɩd tall võor la kõ-b sũ-noog bɩ? Beeme! Bala, d sã n ges Wẽnnaam sẽn naan tõnd n kõ-d yam tɩ d tõe n tags la a kõ-d sũur kasetã, d nee vẽeneg tɩ pa zaalem yĩng la a sẽn naan tõnd tɩ d vɩ tẽng zug ka wã ye. Rẽnd d tõe n yeelame tɩ d sã n dat n bãng bũmb ning d sẽn tõe n maan tɩ kɩt tɩ d vɩɩmã tall võore, yaa tɩlae tɩ d bao n bãng Wẽnnaam sẽn naan tõnd bũmb ning yĩngã, la d vɩɩmd tɩ zems ne rẽ.
3. Yɛl kẽer Wẽnnaam sẽn dat tɩ ãdem-biisã maan la bʋse?
3 Biiblã wilgdame tɩ Wẽnnaam sẽn naan tõnd n dat tɩ d maan bũmb ninsã waoogame. Wala makre, a sẽn naan-d to-to tɩ be rasãndã wilgdame t’a sɩd nong-d-la wʋsgo. (Yɩɩl Sõamyã 40:6; 139:14) Rẽnd Wẽnnaam datame tɩ d nong nebã fãa wa yẽ sẽn nong-d to-to wã. Yaa d sã n maand woto la d vɩ tɩ zemsd ne a raabã. (1 Zã 4:7-11) A leb n datame tɩ d sak a noyã sẽn sõngd-d tɩ d tõe n vɩɩmd tɩ zemsã.—Koɛɛg Soaba 12:13; 1 Zã 5:3.
4. a) Ned sã n dat t’a vɩɩm tall võore, pipi bõe la a segd n maane? b) Bõe la ãdem-biig fãa tõe n maan t’a yõodã ka to?
4 Wẽnnaam da ratame me tɩ ãdem-biisã la bõn-naands a taabã fãa vɩɩmd ne taab laafɩ la sũ-noog pʋgẽ. (Sɩngre 1:26; 2:15) La bõe la d segd n maan n paam sũ-noog la bãane? Biig sã n mi t’a roagdb pẽe yambẽ, a pɛlg keemame t’a sũur noomẽ. Woto me, sẽn na yɩl tɩ d vɩɩmã yɩ-d noog la a tall võore, d segd n deng n bao n pẽnega d saasẽ Ba wã, rat n yeel tɩ d yɩ a zoa. (Hebre dãmba 12:9) Wẽnnaam kõ-d-la sor tɩ d tõe n gom ne-a ne pʋʋsgã maasem, la a kelgda d pʋʋsgã me. Woto fãa kɩtame tɩ d tõe n sɩd yɩ a zoa. (Zak 4:8; 1 Zã 5:14, 15) D sã n ‘tũud Wẽnnaam’ sẽn yaa d saasẽ Ba wã, n tẽed-a n lebg a zoa, d na n nooga a sũuri, la rẽ leb n pẽgd-a lame. (Sɩngre 6:9; Yelbũna 23:15, 16; Zak 2:23) Bũmb kae ãdem-biig sẽn tõe n maan t’a yõodã ta a sẽn na n noogd Wẽnnaam sũur la a pẽgd-a ye. Yɩɩl gʋlsdã gʋlsa woto: “Bɩ bũmb nins fãa sẽn vʋʋsd ne yõorã pẽg Zusoabã.”—Yɩɩl Sõamyã 150:6.
Yãmb vɩɩmã yõod yaa bõe?
5. Bõe yĩng tɩ d sã n bas tɩ arzɛgsã baoob pak-d tɩ looge, yaa tudgri?
5 Bũmb a to me Wẽnnaam sẽn dat tɩ d maan yaa ges d mens la d zagsã rãmb yelle. Wala makre, d segd n gesame tɩ b paam sẽn yaa tɩlae ne-bã. La sẽn tar yõod n yɩɩda, tõnd ne d zagsã rãmb segd n mao n kogla zood ning d sẽn tar ne Wẽndã. Sẽn na yɩl n tõog n maan dẽ tɩ zemse, d segd n gũusame tɩ d tʋʋmã ra wa rɩ sẽk ning d sẽn segd n dɩk n sõng-b tɩ b paam zood ne Wẽndã ye. (Matɩe 4:4; 6:33) Bʋko, neb wʋsg rɩkda b sẽkã fãa la bal n baood arzɛgse. La d sã n tẽed tɩ arzɛk n tõe n kɩt tɩ d vɩɩmã tall võore, d tudga wʋsgo. Sẽn nan pa zãage, rapoor sẽn yit Aazi soolmẽ wã wilgame tɩ rakãag rãmb wʋsg b sẽn sok yeelame tɩ baa ne bãmb “sẽn tar wʋsg tɩ nebã waoogd-bã, b baas n pa tar sũ-noog la bãane, la b pa ne b vɩɩmã yõod me ye.”—Koɛɛg Soaba 5:11.
6. Sagl-bʋg la a Zezi kõ-d arzɛgsã wɛɛngẽ?
6 A Zezi yeelame tɩ arzɛk belgda neda. (Mark 4:19) Wãn to la arzɛk tõe n belg neda? A tõe n kɩtame tɩ wõnd f tara sũ-noogo, tɩ sũ-noog yaool n ka-f ye. Rĩm a Salomo sẽn yɩ yam soabã yeelame tɩ “ned sã n nong arzegse, paoong paoosg ka sekd-a ye.” (Koɛɛg Soaba 5:9) La rẽ yĩnga ned pʋd n tõe n baooda arzɛk la a ket n maand Wẽnnaam daabã me ne a sũur fãa bɩ? Ayo. Yaa vẽeneg tɩ boto pa tõe ye. A Zezi bilga rẽ n yeel woto: “Ned ka be sẽn tõe n sak zu-soben-dãmb a yiib ye. Yẽ na n kisga a yembre la a nong a yembre, wala yẽ na nonga a yembre n paoog a yembre. Yãmb ka tõe n sak Wẽnnaam la arzɛgs yiib fãa ye.” A Zezi sagla a karen-biisã tɩ b ra bĩng arzɛgs dũni ka ye. A yeel-b lame tɩ b ‘bĩng b paoongã saasẽ.’ Sẽn dat n yeel tɩ b bao yʋ-noog Wẽnnaam taoore, bala ‘Wẽnnaam mii b sẽn datã meng tɩ b nan pa kos-a ye.’—Matɩe 6:8, 19-25.
7. Wãn to la d tõe n bao “vɩɩm hakɩkã”?
7 Lɛtr ning tʋm-tʋmd a Poll sẽn gʋls a tʋmd-n-taag a Tɩmote wã pʋgẽ, a kõo sagls sẽn tar pãng wʋsg arzɛg-baoondã wɛɛngẽ. A yeela a Tɩmote woto: “Yeel neb nins sẽn tar arzɛgs dũni kãngã pʋgẽ wã tɩ b . . . teeg Wẽnnaam, [t’a] kõta bũmb fãa tɩ seke, tɩ tõnd tõe n tall n maan sũ-noog ne. . . . La b yɩ neb sẽn kõte, la sẽn nong n pʋɩ b sẽn tarã ne neb a taaba. Woto, bãmb na n bĩnga paoong wakat sẽn watã yĩnga, wa yẽbgr sẽn tar pãnga, tɩ b tõe n paam vɩɩm hakɩɩkã tɩ yɩ b pʋɩɩre.”—1 Tɩmote 6:17-19, Kãab-paalgã Koe-noogo.
Vɩɩm hakɩkã yaa bõe?
8. a) Bõe yĩng tɩ neb wʋsg maood n dat n paam arzɛk la yʋʋre? b) Bõe la nin-kãens pa mi?
8 Neb wʋsg sã n wʋm tɩ b gomd “vɩɩm hakɩkã” yelle, yaa naar vɩɩm la yõ-noogr yell la b tagsda. Zʋrnall a ye sẽn yit Aazi soolmẽ wã yeela woto: “Sẽn get-b filim dãmbã wall televiziõ wã nong n tʋlgda teed nins b sẽn wilgdã, n tagsdẽ tɩ b sã n dat tɩ b vɩɩmã yɩ noogo, b segd n paama bõn-kãense.” Yaa arzɛgsã baoob n pak neb wʋsg rũndã-rũndã. Kẽer sakd n basda b zags rãmba, la b sãamd zood ning b sẽn tar ne Wẽnnaamã, n dɩkd b keelmã fãa n baood te-kãense. Sẽn maand-b boto wã wʋsg pa mi tɩ vɩɩm buud ning b sẽn wilgd filim dãmbã la televiziõ wã pʋgã zemsa ne dũniyã rãmb yamã ye. Yaool n yaa yam kãng la sẽn so neb milyaar dãmb n kɩt tɩ b pa maand Wẽnnaam daabã. (1 Korẽnt dãmba 2:12; Efɛɛz rãmba 2:2) Sɩd pa zaalem tɩ neb wʋsg pa tar sũ-noog ye!—Yelbũna 18:11; 23:4, 5.
9. Bõe la ãdem-biisã pa na n tol n tõog n maane, la bõe yĩnga?
9 La neb nins yẽ sẽn sɩd rat b taabã neer tɩ kɩt tɩ b maood n dat n menes komã, bãasã la wẽgbã? Yaa sɩd tɩ naoor wʋsgo, b tʋʋmã sɩd nafda nebã. La baa b sẽn maand to-to fãa, b pa na n tol n tõog n toeem dũni kãngã t’a lebg sõma ye. Bõe yĩnga? Bala “dũniyã fãa bee wẽng soabã” sẽn yaa a Sʋɩtãanã “nugẽ.” La a pa rat dũniyã manegr ye.—1 Zã 5:19.
10. Yaa wakat bʋg la Wẽnnaam nin-buiidã na n paam “vɩɩm hakɩkã”?
10 D sã n pa tẽed tɩ vɩɩm sẽn são rũndã-rũndã vɩɩmã n wate, ad sɩd yaa kaeto! Tʋm-tʋmd a Poll gʋlsa woto: “A sã n yaa tɩ tõnd tẽeda Kirist vɩɩm kãngã yĩng bala, tõnd tara toog n yɩɩd nebã fãa.” Neb nins sẽn tagsd tɩ vɩɩm a to pa na n zĩndã yeta b yamẽ tɩ ‘d rɩ la d yũ tɩ bala, beoogo, d na n kiime.’ (1 Korẽnt dãmba 15:19, 32) Zu-noogo, ‘wa sẽn zems Wẽnnaam kãabgo, tõnd gũuda yĩngr paalg la tẽn-paalga, tɩrlem sẽn na n zĩnd b pʋsẽ.’ (2 Pɩɛɛr 3:13) Yaa wakat kãng la kiris-nebã na n paam “vɩɩm hakɩkã” sẽn yaa “vɩɩm sẽn ka sɛt” tɩ nebã pa na n tall yel-wẽnã. Wẽnnaam Rĩungã naam wakate, sẽn na n zĩnd-b saasẽ la sẽn na n vɩɩmd-b tẽng zug ka wã fãa na n paama vɩ-kãnga.—1 Tɩmote 6:12.
11. Bõe yĩng tɩ Wẽnnaam Rĩungã teelg kɩtdẽ tɩ ned vɩɩm tar yõodo?
11 Yaa Wẽnnaam Rĩungã bal n na n tõog n welg ãdem-biisã zu-loees fãa zãnga. Woto yĩnga, ned sã n dat t’a vɩɩm sɩd tall yõodo, a segd n teela Wẽnnaam Rĩungã. (Zã 4:34) D sã n maand boto, d paamda d saasẽ Ba wã zoodo, la d sẽn naagd saam-biis milyõ rãmb n tʋmd tʋʋm-kãngã me kõt-d-la sũ-noogo.
D bao bũmb nins sẽn paad wakat fãa wã
12. Wilg-y bũmb ning sẽn kɩt tɩ “vɩɩm hakɩkã” pa wõnd dũni kãngã pʋgẽ vɩɩmã?
12 Biiblã yeelame tɩ dũni kãngã “ne a ratem wẽngã loogdame.” A Sʋɩtãan dũniyã pa tar bũmb sẽn pa na n sãam ye. A yʋʋrã la a arzɛkã fãa na n loogame. ‘La ned ninga sẽn maand Wẽnnaam daabã paada wakat sẽn ka sɛta.’ (1 Zã 2:15-17) Dũniyã arzɛg-satmã, a ziirã la sũ-noog ning a sẽn kõtã fãa na n loogame. La “vɩɩm hakɩkã” Wẽnnaam Rĩungã sẽn na n wa ne wã yẽ yaa vɩɩm sẽn pa sate, sẽn na n pa wakat fãa. Yaa vɩ-kãng bal la d segd n bao, la yaa d sã n modg la d na n paam-a.
13. Wãn to la pag a ye ne a sɩd wilgẽ tɩ b baooda bũmb nins sẽn paad wakat fãa wã?
13 Ges-y saam-biig a ye ne a pag makre. B tẽeda ne b sũy fãa tɩ Wẽnnaam sẽn yeel t’a na n teela neb nins sẽn lʋɩɩsd a Rĩungã taoorã yaa sɩda. (Matɩe 6:33) Rẽ kɩtame tɩ b sẽn dat n moon koɛɛgã wʋsg ne b kom-pugli a yiibã n noog Wẽnnaam sũurã, b yãk yam n luaas zak ligd sẽn pa toe, sẽn na yɩl tɩ ra yɩ tɩlae tɩ b yiibã fãa tʋm ye. (Hebre dãmba 13:15, 16) Saam-bi-poakã zoa a yembr sẽn da pa wʋmd b sẽn maanã võor yeel-a lame t’a bãng tɩ b sã n dat zak sẽn são, rẽnda b modg n maan bũmbu. Saam-biigã ne a pagã yẽ ra miime tɩ b sã n lʋɩɩs a Zeova raabã taoore, “bee yõod ne vɩɩm ninga sẽn be masã wã, la vɩɩm ninga sẽn watã.” (1 Tɩmote 4:8; Tɩt 2:12) B kom-pugli a yiibã me wa n bɩɩme n lebg wakat fãa so-pakdb sẽn tar yẽesem. B zakã neb fãa kɩsa sɩd tɩ bũmb nins b sẽn paamã yõod yɩɩda b sẽn basã. B leb n kɩsa sɩd tɩ b sẽn lʋɩɩs “vɩɩm hakɩkã” baoob taoorã nafa b fãa hal wʋsgo.—Filip rãmba 3:8; 1 Tɩmote 6:6-8.
Ra n dɩ-y dũniyã yõod tɩ pid ye
14. D sã n yĩm d vɩɩmã yõodo, tõe n waa ne yel-be-bʋse?
14 D sã n yĩm d vɩɩmã yõod tɩ kɩt tɩ d bas “vɩɩm hakɩkã” baoobo, sɩd yaa yell menga. D sã n maan boto, d na n basame tɩ “arzɛkã la dũni wã bõn-noodã tʋlsem” sãam zood ning d sẽn tar ne Wẽndã. (Luk 8:14, Sebr Sõngo) Ned sã n tʋlg bõn-kãensã tɩ loog nugu, pa rẽ bɩ a bas tɩ ‘vɩɩm kãnga yɛla pak-a,’ tõe n kɩtame t’a wa tʋll n dɩ dũniyã yõod tɩ pidi. (Luk 21:34) Bʋko, rũndã-rũndã, neb kẽer tʋlg n na n yɩɩ arzɛgs rãmba, tɩ kɩt tɩ ‘b bas b tẽebo, n kẽes b mens to-kãseng pʋgẽ,’ hal n sãam zood ning b sẽn da tar ne a Zeova wã menga. La ned sã n yaool n kong ‘vɩɩm sẽn pa satã,’ a soab sɩd bõna wʋsgo!—1 Tɩmote 6:9, 10, 12; Yelbũna 28:20.
15. Wilg-y zak rãmb sẽn naf to-to, b sẽn pa bao n na n dɩ dũniyã yõod tɩ pidã.
15 A Poll sagla ‘sẽn dɩt-b dũniyã yõodã’ tɩ b maan “wa b pa rɩt-a meng ye.” (1 Korẽnt dãmba 7:31, Sebr Sõngo) Saam-biig a ye ne a pag tũu sagl-kãngã ne b sũy fãa. Ad saam-biigã sẽn yeele: “Mam da karemdame n na n wa yɩ yẽn logtore. Yaa m karengã saab sẽnes la m lebg a Zeova Kaset soaba. Rẽ poore, m da segd n yãka m sẽn na n maanega. Mam da tõe n bao n tɩpa neb wʋsg tɩ kẽes-m ligdi, la m mikame tɩ m sã n na n maan boto, na n kɩtame tɩ d pa tõog n maan Wẽnnaam daabã neer ye. Woto yĩnga, m booga m bãad rãmbã sõor n zemse, sẽn na yɩl n paam n tũ Wẽnnaam sõma la m ges m pagã ne m kom-pugli a nu wã yell neere. Yaa sɩd tɩ tõnd ligdã mi n zemsa a bala, la d zãmsa kẽgsg tɩ bũmb nins sẽn yaa tɩlae ne-dã pa tol n kong-d ye. Tõnd da wʋmda taab sõma-sõma hal tɩ d zakã ra tar yamleoogo. D zakã neb gill wa n lebga so-pakdba. Kom-pugli wã kula sɩdb masã tɩ b tãab tar kamba. Bãmb ne b zagsã rãmb me sẽn ket n lʋɩɩsd a Zeova raabã taoorã, b tara sũ-noogo.”
D lʋɩɩs Wẽnnaam daabã taoore
16, 17. Biiblã gomda nin-bʋs sẽn tall tõog toɛy-toɛy yelle, la bõe n kɩt tɩ b tẽr-b yelle?
16 Biiblã tara kibay sẽn wilgd neb sẽn lʋɩɩs Wẽnnaam daabã maaneg taoor b vɩɩmã pʋgẽ, la neb sẽn pa maan boto. Baa ned yʋʋm sẽn zem to-to, a buud sẽn yaa a soab la a sẽn yitẽ wall a yɛlã sẽn yaa to-to me, sagls nins kiba-kãens sẽn tarã tõe n naf-a lame. (Rom dãmba 15:4; 1 Korẽnt dãmba 10:6, 11) Wala makre, a Nimrood kibarã pʋgẽ, b wilgame t’a tõog n mee galʋ tẽnse, la b wilgame t’a maana rẽ n kɩɩs a Zeova. (Sɩngre 10:8, 9) La neb a taab maana Wẽnnaam daabã n kõ mak-sõngo. Wala makre, a Moiiz pa bao n na n wa yɩ Ezipt nin-kãseng ye. A gesame tɩ tʋʋm nins Wẽnnaam sẽn bobl-a wã bark yɩɩda “Ezipt arzɛgsã” zĩig sẽn zãre. (Hebre dãmba 11:26) Wõnda logtor a Luk sõnga a Poll la neb a taaba, b sẽn da wa n ka laafɩ. La bũmb ning a sẽn maan tɩ sõng nebã n yɩɩg yaa a sẽn yɩ koe-moonda, la a gʋls Luk sebrã sẽn be Biiblã pʋgẽ wã. A Poll da mi a Moiiz tõogã hal sõma n da tõe n yɩ a karen-saamb menga. La bũmb ning sẽn kɩt tɩ d mi-a n yɩɩdã yaa a sẽn yɩ “bu-zẽms tʋm-tʋmda,” n tog soay n moon koɛɛgã.—Rom dãmba 11:13.
17 Yaa a Davɩɩd sẽn yɩ ned sẽn ta Wẽnnaam yamã yĩng n kɩt tɩ d tẽr a yell n yɩɩdã. Pa a sẽn yɩ soda-naab la yɩɩn-yɩɩndã yĩng ye. (1 Sãmwɛll 13:14) A Daniɛll yɩɩ Babilon goosneemã nin-kãsenga. La yaa a sẽn yɩ a Zeova no-rɛɛs sẽn yɩ kɩs-sɩd soabã yĩng la a yʋʋr sẽn yi wã. D tẽra a Ɛstɛɛr yell a sẽn tall tẽeb la raood n kõ-d mak-sõngã yĩnga. Pa a sẽn yɩ Pɛrs rĩmã pagã yĩng ye. A Pɩɛɛr ne a Ãnder la a Zak ne a Zã yɩɩ zĩm-yẽedb sẽn da mi b tʋʋmdã sõma, la yaa b sẽn yɩ a Zezi tʋm-tʋmdbã yĩng la d sẽn tẽr-b yellã. Pa a Zezi sẽn yɩ “ra-wãadã” n tar yõod ne tõnd ye, yaa a sẽn yɩ “Kiristã” n tar yõod ne-do. (Mark 6:3; Matɩe 16:16) Nin-kãensã fãa bãngame tɩ baa b bãngre, b tarem wall b ziir bɩ b nug-tʋʋmd sẽn yaa a soaba, yaa Wẽnnaam daabã maaneg n da segd n pak-b n yɩɩge. B ra miime tɩ bũmb ning sẽn tõe n kɩt tɩ f paam yʋ-noog tɩ f vɩɩmã me tall barka, yaa f sẽn na n yɩ Wẽnnaam zoa.
18. Bõe la bi-bɩɩg a ye sẽn yaa kiris-ned yãk yam n na n maane, la a bãnga bõe?
18 Rao ning yell d sẽn gom d sõsgã sɩngrẽ wã wa n bãngame t’a segd n bao n yɩɩ Wẽnnaam neda. Ad a sẽn yeele: “Mam wa n yãka yam n bas logtoeemdã, te-neebã gʋlb la karen-saamdã, n dɩk m meng n kõ Wẽnnaam n deeg lisgu, n na n vɩɩmd tɩ zems ne m sẽn pʋlem-a bũmb ningã. Rũndã-rũndã, mam lebga Biiblã karen-saamba. M bee tẽng a ye b sẽn datẽ sõngre, n sõngd neb tɩ b rɩkd vɩɩm sẽn kõn sa wã sore. Mam da pa get so-pakrã wa tʋʋmd m sẽn tõe n tʋm wakat fãa tɩ tall yamleoog wʋsg ne-m ye. La masã, m sẽn maood n dat n toeem m nedemdã la m paas m karen-saamdã minim n tõog n sõng buud toɛy-toɛy nebã, wakat fãa m tara bũmb m sẽn segd n maane, la m sũur nooma hal wʋsg ne rẽ. Woto kɩtame tɩ m bãng tɩ yaa a Zeova raabã maaneg bal n sɩd kɩtd tɩ ned vɩɩm tall võore.”
19. Bõe la d tõe n maan tɩ d vɩɩmã sɩd tall võore?
19 D sẽn yaa kiris-nebã, d paama bãngr ning sẽn kɩtd tɩ ned paam vɩɩm sẽn pa satã la d paam fãagrã saagr me. (Zã 17:3) D sẽn paam wã fãa sẽn yaa Wẽnnaam barkã, bɩ d modg n da kong a yõodã ye. (2 Korẽnt dãmba 6:1) D rɩk d wakatã sẽn ketã gill n pẽg a Zeova. D sõng neb wʋsg tɩ b bãng bũmb ning sẽn kɩtd tɩ ned paam sũ-noog hakɩk masã, la vɩɩm sẽn kõn sa beoog daarã. D sã n maan woto, d na n yãame t’a Zezi sẽn yeel tɩ ‘kũun bee bark n yɩɩd reegrã’ sɩd yaa sɩda. (Tʋʋma 20:35) La sẽn paase, d vɩɩmã na n sɩd talla võore.
Y tõe n leokame bɩ?
• Bõe la ãdem-biig fãa tõe n maan t’a yõodã ka to?
• Bõe yĩng tɩ pa yam tʋʋmd tɩ d rɩk d sẽkã n pʋg arzɛka?
• “Vɩɩm hakɩkã” Wẽnnaam sẽn kãab tõndã na n yɩɩ vɩ-bʋg buudu?
• Wãn to la d tõe n dɩk d wakatã sẽn ketã n maan Wẽnnaam daabã?
[Zãmsgã sogsgã]
[Foto rãmba, seb-neng 20]
Kiris-nebã segd n baoa bũmb nins sẽn paad wakat fãa wã