Saʻilia se Faamoemoe Uigā mo le Olaga

“Ia vivii atu iā Ioa o mea uma lava e mānava.”—SALAMO 150:6.

1. Faamatala saʻiliʻiliga a se tane talavou mo se faamoemoe i lenei olaga.

NA FAAPEA mai Seung Jin o sē na ola aʻe i Korea: * “Na ou aʻoga i le faafomaʻi ona ou te manaʻo e faaaogā loʻu olaga e fesoasoani ai i tagata. Ae na ou manatu o le mauaina o tulaga aloaʻia ma le tamaoaiga, o le a faafiafiaina ai aʻu. Sa ou lē fiafia ina ua ou iloa e itiiti se fesoasoani e mafai ona ou tuuina atu o se fomaʻi e tusa ai ma mea o loo moomia moni e se tagata. Ona ou galue lea o se tusiata, ae e itiiti foʻi se aogā o aʻu galuega mo isi, ma ua oo mai iā te aʻu le lagona pei ua ou manatu faapito. Sa ou toe galue o se faiaʻoga ma ou iloa ai, e na o le poto e mafai ona ou tuuina atu, na i lo o taʻiala e maua ai le fiafiaga moni.” E pei lava o le toʻatele, o loo saʻili Seung Jin mo se faamoemoe uigā mo lenei olaga.

2. (a) O le ā le uiga o le iai o se faamoemoe i le olaga? (e) E faapefea ona tatou iloa e i ai le faamoemoe na tuu ai i tatou e Lē na Foafoaina Mea i le lalolagi?

² O le iai o se faamoemoe i le olaga, e tatau ona iai se māfuaaga e ola ai, ni sini talafeagai, ma se taulaʻiga maumaututū e fai i ai a tatou taumafaiga. Pe mafai moni e tagata ona maua lea faamoemoe? Ioe! Ona ua iā i tatou le atamai, lotofuatiaifo, ma le tomai e iloa ai e iai le māfuaaga lelei, na tuu ai i tatou i le lalolagi e Lē na Foafoaina Mea. O lea la, e mafai ona maua ma faamalieina o tatou faamoemoega moni, e ala i le ola e tusa ma fuafuaga a Lē na Foafoaina Mea.

3. O ā mea o loo aofia i fuafuaga a le Atua mo tagata?

³ Ua faaali mai e le Tusi Paia e tele ni mea o loo aofia i fuafuaga a le Atua mo i tatou. Mo se faaaʻoaʻoga, o le auala matagofie na faia ai i tatou o loo faaalia moni ai le lē manatu faapito o le alofa o le Atua. (Salamo 40:5; 139:14) O le ola e tusa ma fuafuaga a le Atua, o lona uiga tatou te alofa lē manatu faapito mo isi e pei ona faia e le Atua. (1 Ioane 4:7-11) E uiga atu foʻi i le usiusitai i faatonuga a le Atua, lea e fesoasoani iā te i tatou e ola ai e tusa ma ana fuafuaga alofa.—Failauga 12:13; 1 Ioane 5:3.

4. (a) O le ā e manaʻomia ina ia maua ai se faamoemoe moni i le olaga? (e) O le ā le faamoemoe e aupito i sili e mafai ona maua e se tasi?

 ⁴ Na faia foʻi e le Atua tagata ina ia ola fiafia ma filemu ma isi, atoa ai ma isi foafoaga. (Kenese 1:26; 2:15) O le ā tatou te faia ina ia maua ai le fiafia, saogalemu, ma le filemu? E pei o se tamaitiiti e na te moomia le iai o ona mātua ina ia fiafia ma saogalemu, e tatou te manaʻomia se faiā lelei ma lo tatou Tamā o i le lagi ina ia maua se faamoemoe moni mo o tatou olaga. (Eperu 12:9) Ua mafai ona faia se faiā ma le Atua, e ala i lona tuuina mai o le avanoa e tatou te faalatalata atu ai iā te ia, ma faafofogaina a tatou tatalo. (Iakopo 4:8; 1 Ioane 5:14, 15) Pe a tatou ‘feooaʻi ma le Atua’ i le faatuatua ma avea ma ana uō, o le a tatou faafiafia ma viia lo tatou Tamā o i le lagi. (Kenese 6:9; Faataoto 23:15, 16; Iakopo 2:23) O le faamoemoe aupito i sili lenā e mafai ona maua e se tasi. Na faapea mai le faisalamo: “Ia vivii atu iā Ioa o mea uma lava e mānava.”—Salamo 150:6.

O le ā Lou Faamoemoe i Lou Olaga?

5. Aiseā e lē talafeagai ai le faamuamuaina o manaʻoga i meafaitino?

⁵ O se tasi o vala o fuafuaga a le Atua mo i tatou, o le vaai faalelei o i tatou lava ma o tatou aiga. E aofia ai le tausia o manaʻoga faaletino ma le faaleagaga. Peitaʻi, e manaʻomia le paleni, ina ia aua neʻi aafia mea tāua faaleagaga ona o galuega totogi. (Mataio 4:4; 6:33) E faanoanoa lava, ona o le toʻatele o tagata ua taulaʻi atu o latou olaga i le mauaina o meafaitino. Peitaʻi, e lē talafeagai le taumafai e faamalieina o tatou manaʻoga e ala i le taulaʻi atoa i meafaitino. Na faaalia mai e se suʻesuʻega e faatatau i tagata milionea i Asia, o le toʻatele o i latou e “iai faalogona o le lē saogalemu ma le lē mautonu, e ui i o latou tulaga taualoa ma faalogona o le taulau manuia mai i a latou ʻoa o loo maua.”—Failauga 5:11.

6. O ā fautuaga ua aumaia e Iesu e faatatau iā i latou e saʻilia le ʻoa?

⁶ Na talanoa Iesu e faatatau i “le pepelo o le ʻoa.” (Mareko 4:19) E faapefea ona pepelo le ʻoa? E faafoliga mai e fiafia ai le tagata, ae e lē maua ai se fiafia. Na faapea mai le tupu poto o Solomona, “O lē ua manaʻo i le ario, e lē mafai ona faamalieina o ia.” (Failauga 5:10, The New English Bible) Pe mafai ona saʻilia sini i meafaitino, ma faaauau ona auauna i le Atua ma le loto atoa? E leai. Na faapea mai Iesu: “E leai sē na te mafaia ona auauna i alii e toʻalua; auā e ʻinoʻino o ia i le tasi, a e alofa atu i le tasi; a lē o lea, e faapipii atu ia i le tasi, a e faalēaogā i le tasi. Tou te lē mafaia ona auauna i le Atua atoa ma le ʻoa.” Na timaʻi Iesu i ona soo e toloaʻi ʻoa, e lē o meafaitino i le lalolagi, ae o ‘ʻoa i le lagi,’ i le faia o se igoa lelei ma le Atua, auā “ua silafia e lo outou Tamā mea ua outou matitiva ai, a o leʻi ōle atu outou iā te ia.”—Mataio 6:8, 19-25.

7. E faapefea ona tatou “fetagofi atu i le ola moni”?

⁷ I le tusi atu o le aposetolo o Paulo i lē na la galulue faatasi o Timoteo, na ia avatu i ai ni fautuaga malolosi. Na ia faapea atu iā Timoteo: “Ia e matuā fai atu i ē mauʻoa . . . aua foʻi le faamoemoe i le oloa e faalētumau, a o le Atua soifua, o loo foaʻi tele mai iā te i tatou mea uma lava e faafiafia ai . . . , ia mataalofa, ia latou avatu fua a latou mea, ma ia faapea ona latou teua oloa mo i latou lava, o le faavae lelei mo aso atalī, ina ia latou fetagofi atu i le ola moni lava.”—1 Timoteo 6:17-19.

O le ā “le Ola Moni”?

8. (a) Aiseā e taumafai ai le toʻatele e maua le tamaoaiga ma tulaga taualoa? (e) O le ā le mea e lē o iloa e i latou nei?

⁸ O le toʻatele o tagata a taʻua le faaupuga “ola moni,” e latou te mafaufau i le tele o le tamaoaiga ma mea faafiafia. Na faapea mai se mekasini o tala fou i Asia: “O ē matamata i ata po o le televise, latou te aʻoaʻoina ia latou mananaʻo i mea o loo latou vaavaai i ai, ma faamoemoe i mea atonu latou te maua.” O le  toʻatele o tagata ua avea ma sini i o latou olaga, le mauaina o le tamaoaiga ma tulaga taualoa. E toʻatele ua faataulaga o latou olaga talavou, soifua mālōlōina, olaga faaleaiga, ma mea tāua faaleagaga ona o le saʻilia o nei mea. E toʻalaiti e manatu i nei faasalalauga o ni mea o loo atagia mai ai “le agaga o lenei lalolagi”—o le manatu taatele lea e tele ina aafia ai mafaufau o le faitau piliona i le lalolagi, ma uunaʻia ai i latou e gaoioi e feteenaʻi ma fuafuaga a le Atua mo i tatou. (1 Korinito 2:12; Efeso 2:2) E lētioa a toʻatele tagata e lē o fiafia i aso nei!—Faataoto 18:11; 23:4, 5.

9. O le ā le mea e lē mafai e tagata ona fai, ma aiseā?

⁹ Ae faapefea i latou o loo galulue mo le lelei o isi e ala i le taumafai e aveesea le oge, o faamaʻi, ma faiga lē tonu? O a latou galuega lelei ma taumafaiga lē manatu faapito e aogā i le toʻatele. E ui i a latou taumafaiga malolosi, ae e lē mafai ona latou suia lenei faiga o mea i se auala e tonu ma lelei. Aiseā? Ona o “le lalolagi uma o loo nofo toʻilalo i loo leaga,” o Satani, ma e na te lē manaʻo e suia lenā tulaga.—1 Ioane 5:19.

10. O afea o le a olioli ai ē faamaoni i “le ola moni”?

¹⁰ O se mea e faanoanoa ai pe a leai se faamoemoe o se tasi i se olaga e ese mai lenei lalolagi o loo iai! Na tusi Paulo, “Afai e gata i lenei olaga mea tatou te faamoemoe i ai iā Keriso, ua sili lo tatou malaia i tagata uma lava.” Na manatu nisi e talitonu e na o le pau lea o le olaga i le manatu faapea: “Inā tatou aai ma inu, auā o a taeao tatou te oti ai.” (1 Korinito 15:19, 32) Ae e iai le lumanaʻi, o le “lagi fou ma le lalolagi fou, pei o lana na folafola mai [e le Atua], e mau ai le amiotonu.” (2 Peteru 3:13) I lenā taimi, o le a mafai ai e Kerisiano ona olioli i “le ola moni,” o lona uiga o le “ola faavavau” i tulaga lelei atoatoa, a lē i le lagi po o le ola i lalo o le pulega a le Malo o le Atua!—1 Timoteo 6:12.

11. Aiseā e aogā ai le galulue e faaauiluma manaʻoga o le Malo o le Atua?

¹¹ Ua na o le Malo o le Atua o le a mafai ona taulau i le foʻiaina o faafitauli o tagata. O le galue e faaauiluma manaʻoga o le Malo o le Atua, o se taumafaiga e aupito i uigā lea e mafai ona e faia. (Ioane 4:34) A o faia se tatou  sao i lenā galuega, e tatou te olioli i le faaeaga tāua o le mauaina o se faiā ma lo tatou Tamā o i le lagi. E tatou te olioli foʻi i le auauna faatasi ma le faitau miliona o uso ma tuafāfine faaleagaga, o ē tutusa o tatou faamoemoe i lenei olaga.

Ia Saʻo Mea e Faataulagaina

12. Ia faatusatusa le olaga i lenei faiga o mea ma le olaga i “le ola moni.”

¹² O loo faapea mai le Tusi Paia, “E mavae atu foʻi le lalolagi, atoa ma lona tuʻinanau.” E leai ma se vaega o le lalolagi a Satani, e aofia ai le taʻutaʻua ma le ʻoa o le a faasaoina, “a o lē fai le finagalo o le Atua, e tumau lea e faavavau.” (1 Ioane 2:15-17) A faatusatusa atu i le tamaoaiga lē tumau, o viiga e vave mavae, ma faafiafiaga taufaaʻoleʻole o lenei faiga o mea, ae o “le ola moni,” le ola e faavavau i lalo o le Malo o le Atua, e tumau ma aogā ai lo tatou ola faataulaga, pe afai e saʻo mea tatou te faataulagaina.

13. Na faapefea ona saʻo le faataulagaina na faia e se ulugalii?

¹³ Seʻi manatu iā Enelē ma Susana. Na la faatuatua atoatoa i le folafolaga a le Atua, o i latou uma e faamuamua le Malo i o latou olaga, o le a maua le fesoasoani a le Atua. (Mataio 6:33) Na la filifili e nonofo i se fale taugofie, na i lo le tau fai faigaluega totogi uma o laʻua, ma ua mafai ai ona faaalu le tele o le la taimi i mea faaleagaga faatasi ma le la fanau teine e toʻalua. (Eperu 13:15,16) Sa lē malamalama se tasi o a la uō lelei i le la filifiliga ua fai. Na ia faapea atu: “Susana e, afai e te fia nofo i se fale manaia, e tatau ona e faataulaga nisi mea.” Peitaʻi, na iloa e Enelē ma Susana o le faamuamua o Ieova, “o loo i ai le mea ua folafolaina mai i la le olaga nei atoa ma le atalī.” (1 Timoteo 4:8; Tito 2:12) Na ola aʻe le la fanau teine o ni faievagelia faataimi atoa maelega. I le avea o se aiga, latou te manatu e latou te lē o misia se mea, na i lo lea, ua tele ni aogā ua latou maua i le saʻilia o le faamoemoe o “le ola moni.”—Filipi 3:8; 1 Timoteo 6:6-8.

‘Ia Peiseaʻī ua Lē Fetagofi i Mea a le Lalolagi Nei’

14. O le galo o le tatou faamoemoe e oo atu ai i ā mala?

¹⁴ E telē se lamatiaga, pe afai e galo lo tatou faamoemoe moni ma faatalalē i “le ola moni.” Tatou te lamatia pe a “fetinaʻiina . . . i mea e popole ai, ma oloa, ma mea faafiafia o le olaga nei.” (Luka 8:14) O le lē pulea o faanaunauga i mea faitino, ma “popolega” o le olaga, e ono aafia tele ai i lenei faiga o mea. (Luka 21:34) E faanoanoa ona ua aafia nisi i faiga faapisinisi lē pulea ona “sesē ai lava lea o i latou i le faatuatua, ua tuʻia ai ua ati i latou e i latou i puapuaga e tele,” ma afāina ai le latou faiā tautele ma le Atua. E mataʻutia āuga e oo i ai pe a lē ‘tago atu i le ola faavavau’!—1 Timoteo 6:9, 10, 12; Faataoto 28:20.

15. Na faapefea ona maua e se aiga ni aogā i le peiseaī e lē “fetagofi i mea a le lalolagi”?

¹⁵ Ua lapataʻi mai Paulo, “o ē fetagofi i mea a le lalolagi nei, ia peiseaʻī ua lē fetagofi i ai.” (1 Korinito 7:31) Na usitaʻia e Kevini ma Pone lenei fautuaga. Na faapea mai Kevini: “Na avea aʻu ma se tasi o Molimau a Ieova a o lata ina faaiʻuina laʻu aʻoga faafomaʻi nifo. Sa tatau ona ou faia se filifiliga. E mafai ona tele ni gasegase ou te togafitia ma tele ai aʻu tupe, ae o le a aafia ai lo matou olaga faaleagaga. Sa ou filifili e faaitiitia gasegase ou te togafitia, ina ia faateleina le taimi mo mea faaleagaga ma le lelei o faalogona o lo matou aiga, lea e aofia ai se fanau teine e toʻalima. E seāseā iai se matou tupe faasili, ae sa faasoasoa lelei ā matou tupe, ma na maua lava mea matou te manaʻomia. Sa māfana ma faatumulia i le olioli le matou olaga faaleaiga. Na oo ina matou auai uma i le auaunaga faataimi atoa. Ua faaipoipo le ma fanau teine ma e toʻatolu ua fai fanau. O loo fiafia foʻi o latou aiga, a o faaauau ona latou faamuamua fuafuaga a Ieova.”

 Ia Faamuamua le Finagalo o le Atua i Lou Olaga

16, 17. O ā ni faaaʻoaʻoga o ni tagata talenia o loo i le Tusi Paia, ma e faapefea ona manatuaina i latou?

¹⁶ O loo i le Tusi Paia faaaʻoaʻoga o ē na ola ma ē na lē ola i le faia o le finagalo o le Atua. E aogā lesona mai nei faaaʻoaʻoga mo so o se tagata e tusa lava po o le ā le matua, aganuu, ma lona tulaga o iai. (Roma 15:4; 1 Korinito 10:6, 11) Na fausia e Nimarota ni aai tetele, ae na fai e faatautee ai iā Ieova. (Kenese 10:8, 9) Ae sa tele foʻi isi na avea ma faaaʻoaʻoga lelei. Mo se faaaʻoaʻoga, e leʻi faamuamua e Mose i lona olaga le faatumauina o lona tulaga taualoa o se Aikupito. Sa ia faatāuaina ona faaeaga faaleagaga o se “ʻoa lea e sili i faaputugaʻoa o Aikupito.” (Eperu 11:26) Atonu na fesoasoani le fomaʻi o Luka iā Paulo ma isi, e onosaia o latou gasegase. Ae sa taulaʻi atu Luka mo le lelei o isi e ala i le avea o ia ma se faievagelia ma se tusitala o le Tusi Paia. E leʻi lauiloa Paulo o sē e atamai i le Tulafono, ae o se misionare, ma o se “aposetolo o nuu ese.”—Roma 11:13.

¹⁷ E manatuaina Tavita e lē o se taʻitaʻi ʻau, po o se faipese po o se fatupese, ae o se “tagata . . . e tatau ma lona [Atua] finagalo.” (1 Samuelu 13:14) Tatou te iloa Tanielu, e lē o se tagata taualoa o le malo o Papelonia, ae o se perofeta faamaoni a Ieova; o Eseta, e lē ona o se tupu tamaʻitaʻi o Peresia, a o se faaaʻoaʻoga o le lototele ma le faatuatua; o Peteru, Aneterea, Iakopo ma Ioane, e lē ona o ni faifaiva taulau manuia, a o ni aposetolo o Iesu. Ua tatou iloa Iesu e lē o se “tufuga,” ae o “le Keriso.” (Mareko 6:3; Mataio 16:16) E manino le latou malamalamaaga po o ā lava taleni, meafaitino, po o tulaga taualoa na latou maua, e lē faaautū o latou olaga i galuega totogi, ae taulaʻi atu i le auaunaga i le Atua. Ua latou iloa o se fuafuaga aupito i aogā ma tonu e mafai ona latou maua, o le avea ma se tane po o se fafine e mataʻu i le Atua.

18. Na faapefea ona filifili se Kerisiano talavou e faaaogā lona olaga, ma o le ā le mea na ia mulimuli ane iloaina?

¹⁸ Na oo ina malamalama Seung Jin o lē o loo taʻua i le amataga o lenei mataupu, i lenā tulaga. Na ia faapea mai: “Na i lo le faaalu uma o loʻu malosi i le faafomaʻi, tusiata, po o se faiaʻoga, na ou filifili e faaōgatusa loʻu olaga ma loʻu tuuina atu i le Atua. O loo oʻu auauna nei i vaipanoa o loo matuā manaʻomia ai ni faiaʻoga o le Tusi Paia, ma fesoasoani iā i latou e ui i le ala o le ola e faavavau. Na masani ona ou manatu e lē tele ni luʻi o le auaunaga faataimi atoa. Ua tele nei luʻi i loʻu olaga, a o ou taumafai e faaleleia oʻu uiga totino ma le tomai e aʻoaʻo atu ai i tagata e ese a latou tū ma aganuu. Ua ou iloa o le faamuamua o le finagalo o Ieova i a tatou fuafuaga, ua na o le pau lea o le auala e maua ai se olaga faamalieina.”

19. E faapefea ona maua se faamoemoe uigā mo le olaga?

¹⁹ Ona o i tatou o ni Kerisiano, ua faamanuiaina i tatou i le mauaina o le poto e faasaoina ai ola ma maua ai le faaolataga. (Ioane 17:3) Ia aua neʻi o tatou “talia fua . . . le alofa tunoa o le Atua.” (2 Korinito 6:1) Na i lo lea, ia faaaogā lelei aso ma tausaga o o tatou olaga e vivii ai iā Ieova. Ia tatou faalauiloa atu le poto lea e maua ai le fiafiaga moni i le taimi nei, ma oo atu ai i le ola e faavavau. I le faia faapea, o le a tatou iloa ai le moni o fetalaiga a Iesu: “E sili le manuia o lē na te foaʻi atu, i lo lē na te talia mai.” (Galuega 20:35) O le a tatou maua ai se faamoemoe uigā mo le olaga.

[Faaopoopoga i lalo]

Pe Mafai Ona E Faamatala?

• O le ā le faamoemoe aupito i sili e mafai ona maua i lo tatou olaga?

• Aiseā e lē talafeagai ai ona ola mo le mauaina o meafaitino po o le ʻoa?

• O le ā “le ola moni” lea na folafola mai e le Atua?

• E faapefea ona faaaogā o tatou olaga mo fuafuaga a le Atua?

[Fesili mo le Suʻesuʻega]

[Ata i le itulau 18]

E manaʻomia e Kerisiano ona saʻo mea e faataulagaina