Pagkaligtas sa mga Silo kan Paradakop nin Gamgam

“[Si Jehova] mismo magliligtas sa saimo sa silo kan paradakop nin gamgam.”​—SALMO 91:3.

1. Siisay an “paradakop nin gamgam,” asin taano ta peligroso sia?

AN GABOS na tunay na Kristiano napapaatubang sa sarong naniniba, saro na may nakakalabi sa tawo na intelihensia asin katusohan. Inaapod sia sa Salmo 91:3 bilang “paradakop nin gamgam.” Siisay an kaiwal na ini? Poon sa isyu kan Hunyo 1, 1883, ipinamidbid sia kan magasin na ini na daing iba kundi si Satanas na Diablo. An masakit daogon na kalaban na ini tusong naghihingoa na dayaon asin siloon an banwaan ni Jehova arog nin sarong paradakop nin gamgam na nagmamaigot na siloon an sarong gamgam.

2. Taano ta inagid si Satanas sa sarong paradakop nin gamgam?

² Sa suanoy na mga panahon, an mga gamgam dinadakop huli sa magayon na huni asin makolor na balukag kaini, saka tanganing kakanon patin iatang. Minsan siring, an mga gamgam natural nang maingat asin maulyas na mga linalang, na depisil siloon. Kun siring, an sarong paradakop nin gamgam kan mga panahon kan Biblia maingat ngunang pinag-aadalan an mga karakteristiko asin hiro kan klase nin mga gamgam na gusto niang siodon. Dangan, nag-iimbento sia nin tusong mga paagi tanganing siloon an mga iyan. Sa pag-agid ki Satanas sa sarong paradakop nin gamgam, tinatabangan kita kan Biblia na masabotan an saiyang mga paagi. An Diablo pinag-aadalan kita bilang mga indibiduwal. Inoobserbaran nia an satong mga ugale asin karakteristiko saka nagbubugtak sia nin tusong mga silo sa pagprobar na dakopon kitang buhay. (2 Timoteo 2:26) An pagkadakop nia sa sato nangangahulogan kan satong espirituwal na kapahamakan asin puedeng magresulta sa pagkalaglag niato sa huri. Huli kaini, para sa satong proteksion, kaipuhan na maaraman niato an manlaenlaen na pakana kan “paradakop nin gamgam.”

3, 4. Noarin an mga taktika ni Satanas nagigin kapareho kan sa sarong leon? sa sarong rimoranon?

³ Naggagamit nin buhay na marhay na pagkokomparar, inaagid man kan salmista an mga taktika ni Satanas sa mga taktika nin sarong ogbon na leon o nin sarong rimoranon. (Salmo 91:13) Siring sa sarong leon, kun beses ginagamit ni Satanas an hayag asin direktang mga pagsalakay paagi sa persekusyon o paggamit nin ley kan gobyerno tumang sa banwaan ni Jehova. (Salmo 94:20) An garo leon na mga pagsalakay na iyan puedeng magin dahelan na masingkog an nagkapira. Minsan siring, parateng marhay na kabaliktaran an nagigin epekto kan hayag na mga pagsalakay na ini asin iyan nagreresulta sa pagkasararo kan banwaan nin Dios. Pero, kumusta man an mas tuso asin garo rimoranon na mga pagsalakay ni Satanas?

⁴ Ginagamit kan Diablo an saiyang nakakalabi sa tawo na intelihensia tanganing maglansar nin madaya asin nakakagadan na mga pag-atake siring kan sa sarong mararang halas na nasa sarong tagong lugar. Sa paaging ini, nagin mapanggana sia sa paghilo sa isip kan nagkapira sa banwaan nin Dios, na dinadaya sinda na gibohon an saiyang kabotan imbes na an kabotan ni Jehova, na igwa nin makaturotristeng resulta. Marahay sana ta aram niato an mga pakana ni Satanas. (2 Corinto 2:11) Pag-olayan niato ngonyan an apat kan nakakagadan na silo na ginagamit kan “paradakop nin gamgam.”

Pagkatakot sa Tawo

5. Taano ta epektibong gayo an siod na “pagtakig sa mga tawo”?

⁵ Nasasabotan kan “paradakop nin gamgam” an normal na pagmawot nin tawo na akoon asin oyonan nin iba. An mga Kristiano bakong bagol asin indiperente sa mga kaisipan saka pagmate kan mga nakapalibot sa sainda. Huling aram ini, gustong aprobetsaran kan Diablo an pagkapurisaw ninda sa iisipon nin  mga tawo manongod sa sainda. Halimbawa, sinisilo nia an nagkapira sa banwaan nin Dios paagi sa paggamit kan siod na “pagtakig sa mga tawo.” (Talinhaga 29:25) Kun huli sa pagkatakot sa tawo, an mga lingkod nin Dios nakikiayon sa iba sa paggibo kan ipinagbabawal ni Jehova o naglilikay sa paggibo kan ipinagboboot kan Tataramon nin Dios na gibohon ninda, nasiod na sinda kan “paradakop nin gamgam.”—Ezequiel 33:8; Santiago 4:17.

6. Anong halimbawa an nag-iilustrar kun paano an sarong hoben puedeng masilo kan “paradakop nin gamgam”?

⁶ Halimbawa, an sarong hoben tibaad magpadara sa impluwensia kan mga kaeskuela asin magsigarilyo. Tibaad dai man lamang nagsabong sa saiyang isip an pagsigarilyo kan sia magpasiring sa eskuelahan kan aldaw na iyan. Pero, dai nahaloy, ginigibo na nia an sarong bagay na nakakadanyar sa saiyang salud sagkod ikinakaanggot nin Dios. (2 Corinto 7:1) Paano sia natentaran? Tibaad naimbuelto sia sa salang klase nin kairiba asin natakot na tuyatuyaon sia kan mga ini. Mga hoben, dai nindo pagtogotan an “paradakop nin gamgam” na akiton asin siloon kamo! Tanganing malikayan na madakop na buhay, magmaan kamo dawa sa saradit na pakikikompromiso. Himateon an patanid kan Biblia na rayoan an maraot na pag-iriba.—1 Corinto 15:33.

7. Paano puedeng papangyarihon ni Satanas na mawara kan nagkapirang magurang an saindang espirituwal na pagkatimbang?

⁷ Sineseryosong marhay nin Kristianong mga magurang an saindang Makakasuratan na responsibilidad na sustentohan sa materyal an saindang pamilya. (1 Timoteo 5:8) Minsan siring, an katuyohan ni Satanas iyo na mawara an pagigin timbang nin mga Kristiano mapadapit digdi. Tibaad nagigin ugale na nindang magpalta sa mga pagtiripon huli ta nagpapadaog sinda sa panggigipit kan saindang mga among na gibohon an ekstrang trabaho. Tibaad natatakot sindang maghagad nin bakasyon tanganing makaatender sa gabos na sesyon nin sarong pandistritong kombension tanganing sambahon si Jehova kaiba kan saindang mga tugang. An proteksion tumang sa siod na ini iyo an ‘pagtitiwala ki Jehova.’ (Talinhaga 3:5, 6) Saro pa, an paggirumdom na kita gabos miembro kan harong ni Jehova asin na inobligar nia an saiyang sadiri na bantayan kita makakatabang sa sato na papagdanayon an pagigin timbang niato. Mga magurang, nagtutubod daw kamo na sa ano man na paagi si Jehova magmamakolog sa saindo asin sa saindong pamilya kun ginigibo nindo an saiyang kabotan? O madadakop daw kamong buhay kan Diablo asin ikakapagibo sa saindo an saiyang kabotan huli sa pagkatakot sa tawo? Sinasadol niamo kamo na mapagngayongayong isipon an mga hapot na ini.

An Siod nin Materyalismo

8. Sa anong paagi ginagamit ni Satanas an pang-akit nin materyalismo?

⁸ Ginagamit man ni Satanas an pang-akit nin materyalismo tanganing siloon kita. An komersial na sistema kan kinaban na ini sa parate nagpapalakop nin mga pakana na biglang pagyaman na puede pa nganing makadaya sa nagkapira sa banwaan nin Dios. Kun beses, tibaad sadolon an mga indibiduwal: “Magmaigot ka sa pagtrabaho. Kun maabot mo na an maginhawang kamugtakan, puede ka nang magrelaks asin mag-ogma sa buhay. Puede ka pa nganing magpayunir.” An siring na mga tataramon tibaad bakong timbang na pangangatanosan kan nagkapira na inaaprobetsaran sa pinansial an mga tugang sa Kristianong kongregasyon. Maingat na pag-isipan an pang-engganyar na iyan. Bako daw na ipinapabanaag kaiyan an kaisipan kan “bakong makatanosan” na mayaman na lalaki sa parabola ni Jesus?—Lucas 12:16-21.

9. Taano ta puedeng masiod an nagkapirang Kristiano sa pagmawot nin mga bagay?

 ⁹ Pinapahiro ni Satanas an saiyang marigsok na sistema paagi sa pag-impluwensia kaiyan sa mga tawo na magmawot nin mga bagay. An pagmawot na iyan puedeng sa kahurihurihi makaraot sa buhay nin sarong Kristiano, na garo pinupuot an tataramon asin ginigibo iyan na “dai nagbubunga.” (Marcos 4:19) Dinadagka kita kan Biblia na manigoan sa pagkaigwa nin kakanon asin gubing. (1 Timoteo 6:8) Minsan siring, dakol an nasiod kan “paradakop nin gamgam” huli ta dai ninda inaaplikar sa saindang sadiri an hatol na iyan. Posible daw na an pagigin orgolyoso iyo an nagpapangyari na isipon ninda na kaipuhan nindang magdanay sa sarong estilo nin pamumuhay? Kumusta man kita personalmente? An sato daw na pagmawot na magkaigwa nin mga rogaring nagpapangyari sa sato na ibilang na bakong gayong importante an tunay na pagsamba? (Haggeo 1:2-8) Makamomondo, durante kan mga panahon na masakit an pagbuhay, isinakripisyo kan nagkapira an saindang espirituwalidad tanganing mapagdanay an saindang estilo nin pamumuhay na pinagkatodan na ninda. An siring na pagigin materyalistiko nagpapaogma nanggad sa “paradakop nin gamgam”!

An Silo nin Nakakadanyar na Pag-aling-aling

10. Anong pagsiyasat sa sadiri an maninigong gibohon nin lambang Kristiano?

¹⁰ An saro pang taktika kan “paradakop nin gamgam” iyo na paluyahon an natural na pakamate nin tawo sa kun ano an marahay asin kun ano an maraot. An kaisipan na kapareho kan sa Sodoma asin Gomorra nakaimpluwensiang marhay sa industriya nin pag-aling-aling. Dawa an mga bareta sa telebisyon asin magasin nagtatampok nin kadahasan saka pinapanigoan an makababaldeng interes sa sekso. An kadaklan kan ibinibilang na aling-alingan sa media nagpapalibog sa kakayahan kan mga tawo na “mamidbid an tama sagkod an sala.” (Hebreo 5:14) Minsan siring, girumdomon an tataramon ni Jehova paagi ki propeta Isaias: “Herak man kan mga nagsasabing an marahay maraot asin an maraot marahay!” (Isaias 5:20) Naimpluwensiahan daw sa tusong paagi kan “paradakop nin gamgam” an saindong kaisipan paagi sa siring na nakakaraot na pag-aling-aling? Mahalagang marhay an pagsiyasat sa sadiri.—2 Corinto 13:5.

11. Anong patanid manongod sa mga telenobela an itinao sa magasin na ini?

¹¹ Haros 25 taon na an nakaagi, an The Watchtower mamomoton na nagpatanid sa tunay na mga parasamba sa Dios manongod sa mga telenobela. * Sinabi an komentong ini manongod sa tusong epekto kan popular na mga telenobela: “Ginagamit an paghanap nin pagkamoot tanganing ipangatanosan an ano man na paggawe. Halimbawa, an sarong daing agom na hoben na bados nagsabi sa saiyang amiga: ‘Alagad namomotan ko si Victor. Mayo akong pakiaram. . . . An magkaigwa nin aki sa saiya an pinakaimportante sa sako!’ An suabeng musika na kasabay kaiyan nagpapadepisil isipon na maraoton an saiyang ginibo. Kamo man naaakit na ki Victor. Naheherak na man kamo sa babae. Garo ‘nasasabotan’ na man nindo iyan. ‘Makangangalas nanggad na sa saimong isip makatanosan iyan,’ an sabi nin sarong paradalan na kan huri nakapag-isip-isip. ‘Aram mi na maraot an  imoralidad. . . . Alagad narealisar ko na sa isip nakikisimpatiya na ako.’”

12. Anong mga bagay an nagpaparisa kan pagigin angay sa presente kan patanid manongod sa nagkapirang programa sa TV?

¹² Poon kan ipublikar an mga artikulong iyan, orog pang nagdadakol an arog kaining klase nin nakakaraot sa puso na programa sa TV. Sa dakol na lugar, an siring na mga programa sa TV ipinapasale nin 24 oras kada aldaw. An mga lalaki, babae, asin dakol na tinedyer parateng ilinalaog sa saindang isip asin puso an siring na pag-aling-aling. Pero, dapat na dai niato pagdayaon an satong sadiri paagi sa falsong pangangatanosan. Salang ipangatanosan na an bikong aling-alingan daing gayo nakakadanyar na arog kan naheheling sa tunay na buhay. Puede daw talagang ipangatanosan nin sarong Kristiano an pagpili na maaling kan klase nin mga tawo na dai nia noarin man iisipon na imbitaran sa saiyang harong?

13, 14. Paano ipinahayag nin nagkapira kun paano sinda nakinabang sa mga patanid manongod sa mga pasale sa TV?

¹³ Dakol an nakinabang kan isinapuso ninda an patanid na iyan na itinao kan “maimbod asin mapagmansay na oripon.” (Mateo 24:45-47) Pagkatapos na basahon an malinaw asin basado sa Biblia na hatol na iyan, nagsurat an nagkapira tanganing sabihon kun paano personalmenteng nakaapektar sa sainda an mga artikulong iyan. * An saro nagtuga: “Sa laog nin 13 taon bangkag ako sa telenobela. An paghona ko dai maaapektaran an sakong espirituwalidad paagi sana sa pag-atender sa Kristianong mga pagtiripon asin paminsanminsan na pakikikabtang sa paglilingkod sa langtad. Alagad inako ko na man an kinabanon na kaisipan na arog kan sa telenobela na kun minamaltrato kamo kan saindong agom o kun sa pagmate nindo dai kamo namomotan, makatanosan an pagsambay—sia an dapat basolon. Kaya kan hinohona ko na ‘may katanosan’ akong gibohon iyan nakagibo ako nin pagsambay asin nagkasala ki Jehova saka sa sakong agom.” Natiwalag an babaeng ini. Pag-abot nin panahon, sia nakapag-isip-isip, nagsolsol, asin nakabalik. An patanid kan mga artikulo tumang sa mga telenobela nagtao sa saiya nin kosog na likayan na maaling kan mga ikinakaongis ni Jehova.—Amos 5:14, 15.

¹⁴ An saro pang parabasa na naapektaran man an buhay nagsabi: “Naghibi ako kan mabasa ko an mga artikulo, huli ta nadiskobre ko na an sakong puso bako nang kompleto para ki Jehova. Nanuga ako sa sakong Dios na dai na ako magigin oripon kan mga telenobelang ini.” Pagkatapos na ipahayag nin sarong Kristiana an pagpasalamat para sa mga artikulo, inadmitir nia an saiyang pagkabangkag asin nagsurat: “Inisip-isip ko . . . kun puedeng maapektaran an sakong relasyon ki Jehova. Paano ko ‘sinda’ magigin mga katood asin kasabay kaiyan magin katood man si Jehova?” Kun an siring na mga pasale sa TV nakaraot sa puso nin mga tawo kaidtong 25 taon na an nakaagi, ano an puedeng magin epekto kaiyan ngonyan? (2 Timoteo 3:13) Kaipuhan na aram niato an silo ni Satanas manongod sa nakakaraot na pag-aling-aling sa gabos na porma kaiyan, baga man mga telenobela, madahas na mga kawat sa video, o imoral na mga musika sa video.

An Silo nin Personal na Dai Pagkaintindihan

15. Paano an nagkapira nadakop na buhay kan Diablo?

¹⁵ Ginagamit ni Satanas an personal na dai pagkaintindihan bilang silo na magpapangyari nin pagkabaranga sa tahaw kan banwaan ni Jehova. Puede kitang masilo sa paaging ini ano man an satong  pribilehio nin paglilingkod. An nagkapira nadakop na buhay kan Diablo huli ta tinogotan ninda an personal na dai pagkaintindihan na raoton an katoninongan asin pagkasararo saka an makangangalas na espirituwal na prosperidad na pinapangyayari ni Jehova.—Salmo 133:1-3.

16. Paano tusong pinagmamaigotan ni Satanas na raoton an satong pagkasararo?

¹⁶ Durante kan Guerra Mundial I, pinagmaigotan ni Satanas na raoton an daganon na kabtang kan organisasyon ni Jehova paagi sa direktang pagsalakay, alagad nasudya sia. (Kapahayagan 11:7-13) Poon kaidto, tuso siang nagmamaigot na raoton an satong pagkasararo. Kun tinotogotan niato an personal na dai pagkaintindihan na magin dahelan nin dai pagkasararo, tinawan niato nin lugar an “paradakop nin gamgam.” Sa siring, mapupugolan niato an daing olang na pagbolos kan banal na espiritu sa satong personal na buhay saka sa kongregasyon. Kun mangyayari iyan, maoogma si Satanas huli ta an ano man na pagkaraot kan katoninongan asin pagkasararo kan kongregasyon nakakaolang sa paghuhulit.—Efeso 4:27, 30-32.

17. Ano an makakatabang sa mga igwa nin personal na dai pagkaintindihan na maresolberan iyan?

¹⁷ Ano an puede nindong gibohon kun kamo igwa nin personal na dai pagkaintindihan sa sarong kapwa Kristiano? Totoo, an kada situwasyon daing kapareho. Minsan siring, mantang tibaad dakol an dahelan kun taano ta minatalubo an mga problema, mayo nin dahelan na dai maresolberan an personal na dai pagkaintindihan. (Mateo 5:23, 24; 18:15-17) Ipinasabong asin sangkap an sadol na nasa Tataramon nin Dios. Kun inaaplikar, an mga prinsipyo sa Biblia nungkang nasusudya. Pirmeng nagdadara iyan nin marahay na mga resulta!

18. Taano ta an pag-arog ki Jehova nakakatabang sa sato na resolberan an personal na dai pagkaintindihan?

¹⁸ Si Jehova “andam na magpatawad,” asin sia nagtatao nin ‘tunay na kapatawadan.’ (Salmo 86:5; 130:4) Ipinapaheling niato na kita mga aki na namomotan na marhay ni Jehova kun inaarog niato sia. (Efeso 5:1) Kita gabos nagkakasala asin desesperadong nangangaipo nin kapatawadan ni Jehova. Sa siring, kaipuhan na magin maingat kita kun may tendensia kita na dai magpatawad sa iba. Puede kitang magin arog kan oripon sa parabola ni Jesus na nagsayumang magpatawad sa saiyang kapwa oripon na an utang sadit sanang kabtang kan utang nia na pinatawad na kan saiyang kagurangnan. Kan maisihan ini kan kagurangnan, ipinabilanggo nia an habong magpatawad na oripon. Tinapos ni Jesus an parabola sa pagsabing: “Siring man an gigibohon sa saindo kan sakong langitnon na Ama kun dai kamo magpatinawadtawadan gikan sa saindong puso, an balang saro sa saiyang tugang.” (Mateo 18:21-35) An paghorophorop sa ilustrasyon na iyan asin pag-isip-isip manongod sa kun pirang beses si Jehova andam na nagpapatawad sa sato siertong makakatabang sa sato kun pinagmamaigotan niatong resolberan an personal na dai pagkaintindihan sa satong tugang!—Salmo 19:14.

Ligtas sa “Hilom na Lugar kan Kaharohalangkawe”

19, 20. Paano niato maninigong mansayon an “hilom na lugar” asin “limpoy” ni Jehova sa peligrosong mga panahon na ini?

¹⁹ Nabubuhay kita sa peligrosong mga panahon. Siertong kita gabos nalaglag na kutana ni Satanas kun bakong huli sa mamomoton na proteksion ni Jehova. Kun siring, tanganing makalikay na masilo kan “paradakop nin gamgam,” kaipuhan na magdanay kita sa piguratibong lugar nin proteksion, “nag-eerok sa hilom na lugar kan Kaharohalangkawe,” na naghahagad nin “ontokan sa mismong limpoy kan Makakamhan sa Gabos.”—Salmo 91:1.

²⁰ Logod na pirme niatong mansayon an mga pagirumdom asin paggiya ni Jehova na nagpoprotehir, nungkang naglilimitar. Gabos kita napapaatubang sa sarong naniniba na igwa nin nakakalabi sa tawong intelihensia. Kun mayo kan mamomoton na tabang ni Jehova, mayo nin makakadulag sa pagkasilo. (Salmo 124:7, 8) Kaya mamibi kita na logod iligtas kita ni Jehova sa mga silo kan “paradakop nin gamgam”!—Mateo 6:13.

[Mga Nota sa Ibaba]

Nagigirumdoman daw Nindo?

• Taano ta an “pagtakig sa mga tawo” sarong nakakagadan na silo?

• Paano ginagamit kan Diablo an pang-akit nin materyalismo?

• Paano siniod ni Satanas an nagkapira paagi sa silo nin nakakaraot na pag-aling-aling?

• Anong silo an ginagamit kan Diablo tanganing raoton an satong pagkasararo?

[Mga Hapot Para sa Pag-adal]

[Ritrato sa pahina 27]

An nagkapira nasiod kan “pagtakig sa mga tawo”

[Ritrato sa pahina 28]

Naaaling daw kamo kan mga bagay na ikinakaongis ni Jehova?

[Ritrato sa pahina 29]

Ano an magigibo nindo kun kamo igwa nin personal na dai pagkaintindihan sa sarong kapwa Kristiano?