Kita Mahimong Maluwas Gikan sa Bitik sa Tiglit-ag ug Langgam

“[Si Jehova] magaluwas kanimo gikan sa bitik sa tiglit-ag ug langgam.”—SALMO 91:3.

1. Kinsa ang “tiglit-ag ug langgam,” ug nganong peligroso siya?

 ANG tanang matuod nga mga Kristohanon adunay kaaway nga malipatlipaton ug mas intelihente kay sa tawo. Siya gitawag diha sa Salmo 91:3 ingong “tiglit-ag ug langgam.” Kinsa kining maong kaaway? Sukad pa sa Hunyo 1, 1883 nga gula niining magasina, gipaila na nga siya mao si Satanas nga Yawa. Kining gamhanang kaaway malinglahong naningkamot sa pagpahisalaag ug pagbitik sa katawhan ni Jehova sama ra sa usa ka tiglit-ag nga naningkamot sa pagbitik ug langgam.

2. Nganong gitandi si Satanas sa usa ka tiglit-ag ug langgam?

² Sa karaang panahon, lit-agon ang mga langgam tungod sa ilang mananoy nga honi, mabulokong mga balhibo, ug aron kaonon ug ihalad. Apan, idlas ang mga langgam. Busa, estudiyohan una pag-ayo sa tiglit-ag ug langgam ang kinaiya sa langgam nga gusto niyang lit-agon. Dayon, maghimo siyag pamaagi sa pagbitik niini. Sa pagtandi kang Satanas sa usa ka tiglit-ag ug langgam, ang Bibliya nagtabang kanato sa pagsabot sa iyang mga pamaagi. Estudiyohan sa Yawa ang matag usa kanato. Iyang obserbahan ang atong kinaiya ug magbutang siya ug mga lit-ag aron kita madakpang buhi. (2 Timoteo 2:26 ) Kon malit-agan kita ni Satanas, mohuyang ang atong espirituwalidad ug sa ngadtongadto mosangpot kini sa atong kalaglagan. Busa, aron kita makabantay, kinahanglan nga atong maila ang lainlaing paagi sa “tiglit-ag ug langgam.”

3, 4. Unsang mga taktika ni Satanas ang susama nianang sa leyon? sa kobra?

³ Ginamit ang tin-awng paghulagway, gipakasama usab sa salmista ang mga taktika ni Satanas sa mga taktika sa nating leyon ug sa kobra. (Salmo 91:13) Sama sa leyon, si Satanas mohimo usahay ug direktang pag-atake pinaagi sa paglutos o pagdili sa buluhaton sa katawhan ni Jehova. (Salmo 94:20) Ang samag-leyon nga mga pag-atake maoy hinungdan nga ang pipila mibiya kang Jehova. Hinunoa, kining dayag nga mga pag-atake kasagarang mosumbalik ug makapahiusa hinuon sa katawhan sa Diyos. Apan, sa unsang paagi buhaton ni Satanas ang malipoton, samag kobra nga pag-atake?

⁴ Ang Yawa naggamit sa iyang labaw-tawhanong intelihensiya aron sa paghimog malimbongon ug makamatay nga mga pag-atake sama sa nagtago nga lalang bitin nga mokalit ug paak. Niining paagiha, milampos siya sa paghilo sa hunahuna sa pipila ka alagad sa Diyos, nga naglimbong kanila sa pagbuhat sa iyang kabubut-on inay sa kabubut-on ni Jehova ug kini misangpot sa kadaotan. Maayo na lang kay kita dili kay walay alamag sa mga laraw ni Satanas. (2 Corinto 2:11) Atong susihon karon ang upat sa makamatayng mga bitik nga gigamit sa “tiglit-ag ug langgam.”

Kahadlok sa Tawo

5. Nganong epektibo kaayo ang lit-ag nga “pagpangurog tungod sa mga tawo?”

⁵ Ang “tiglit-ag ug langgam” nahibalo nga maoy normal nga tinguha sa tawo nga dawaton ug uyonan sa uban. Ang mga Kristohanon mabalaka usab kon unsay hunahuna ug pagbati sa mga tawo kanila. Kay nahibalo niini, gusto kanang pahimuslan sa Yawa. Pananglitan, iyang gamiton ang lit-ag nga “pagpangurog tungod sa mga tawo,” sa paglit-ag sa pipila sa mga alagad sa Diyos. (Proverbio 29:25) Kon ang mga alagad sa Diyos moduyog sa uban sa pagbuhat kon unsay gidili ni Jehova o dili mobuhat sa gisugo kanila sa Pulong sa Diyos tungod sa kahadlok sa tawo, nan, sila nalit-agan sa “tiglit-ag ug langgam.”—Ezequiel 33:8; Santiago 4:17.

6. Unsang pananglitan ang nagpakita kon sa unsang paagi ang usa ka batan-on mabitik sa “tiglit-ag ug langgam”?

 ⁶ Pananglitan, ang usa ka batan-on nagpadaog tingali sa panghaylo sa iyang mga eskolmet nga manigarilyo. Tingali wala gayod siya maghunahuna nga iyang sulayan ang pagpanigarilyo sa dihang nagpaingon siya sa eskuylahan nianang adlawa. Apan, sa wala madugay, siya nagbuhat na sa butang nga makadaot sa iyang panglawas ug dili makapahimuot sa Diyos. (2 Corinto 7:1) Sa unsang paagi siya nahaylo? Tingali nakig-uban siya sa dili maayong mga higala ug nahadlok siya nga biaybiayon nila. Mga batan-on, ayaw kamo pagpahaylo o pagpabitik sa “tiglit-ag ug langgam”! Aron dili madakpang buhi, ayaw pagkompromiso bisan sa ginagmayng mga butang. Patalinghogi ang pasidaan sa Bibliya nga likayan ang daotang pakig-uban.—1 Corinto 15:33.

7. Sa unsang paagi nalit-agan ni Satanas ang ubang mga ginikanan nga mawad-an sa ilang espirituwal nga panimbang?

⁷ Ang Kristohanong mga ginikanan nagtuman gayod sa ilang Kasulatanhong responsibilidad sa pagtagana sa materyal nga panginahanglan sa ilang pamilya. (1 Timoteo 5:8) Apan, gusto ni Satanas nga mawad-an sa panimbang ang mga Kristohanon niining bahina. Tingali ang pipila kanunay nang makapalta sa mga tigom tungod kay nagpadaog sila sa pagpit-os sa ilang mga amo nga mag-obertaym. Mahadlok tingali silang mohangyo nga mobakasyon aron makatambong sa tanang sesyon sa distritong kombensiyon sa pagsimba kang Jehova uban sa ilang kaigsoonan. Aron dili malit-agan, kita kinahanglang ‘mosalig kang Jehova.’ (Proverbio 3:5, 6) Dugang pa, makapabilin kitang timbang kon atong hinumdoman nga kitang tanan maoy mga sakop sa panimalay ni Jehova ug iyang giisip nga iyang responsibilidad ang pag-atiman kanato. Mga ginikanan, may pagtuo ba kamo nga si Jehova mag-atiman kaninyo ug sa inyong pamilya kon inyong buhaton ang iyang kabubut-on? O magpalit-ag ba kamo sa Yawa sa pagbuhat sa iyang kabubut-on tungod sa inyong kahadlok sa tawo? Palihog palandonga kining mga pangutanaha uban ang pag-ampo.

Ang Lit-ag sa Materyalismo

8. Sa unsang paagi gigamit ni Satanas ang lit-ag sa materyalismo?

⁸ Si Satanas naggamit usab sa lit-ag sa materyalismo. Ang komersiyal nga sistema niining kalibotana subsob nga nagpasiugda sa makapadatog-dali nga mga negosyo nga naglit-ag bisan gani sa pipila ka alagad sa Diyos. Usahay, awhagon tingali ang mga igsoon: “Paningkamot mo pag-ayo. Kay kon madato na mo, mahimo na mong magpahayahay ug maglipaylipay. Makapayunir pa gani mo.” Kana maoy dili-timbang nga panghunahuna sa pipila ka Kristohanon nga nagpahimulos sa ilang mga igsoon sa pagtuo. Hunahunaag maayo ang ilang tanyag. Dili ba susama kini sa panghunahuna sa “walay buot” nga tawong dato sa sambingay ni Jesus?—Lucas 12:16-21.

9. Nganong ang pipila ka Kristohanon nalit-agan sa pagpangandoy ug mga butang?

⁹ Si Satanas naghimo niining daotang sistema nga makapadani kaayo aron sa paghaylo sa mga tawo sa pagpangandoy ug mga butang. Ang maong pangandoy inanayng modaot sa kinabuhi sa usa ka Kristohanon, nga motuok sa pulong ug busa kini “dili mamunga.” (Marcos 4:19) Ang Bibliya nagdasig kanato nga magmakontento sa pagkaon ug besti. (1 Timoteo 6:8) Apan, daghan ang nalit-agan tungod  kay wala nila ipadapat kanang tambaga. Dili kaha nga ang garbo maoy nagtukmod kanila sa paghupot sa usa ka estilo sa kinabuhi? Komosta kita ingong indibiduwal? Ato bang itugot nga ang pagpangandoy nga makabaton ug mga butang maghimo sa matuod nga pagsimba nga ikaduha na lang sa atong kinabuhi? (Haggeo 1:2-8) Ikasubo nga sa dihang mohuyang ang ekonomiya, isakripisyo sa uban ang ilang espirituwalidad aron lang mamentinar ang estilo sa kinabuhi nga ilang naandan. Ang maong materyalistikong tinamdan makapalipay sa “tiglit-ag ug langgam”!

Ang Bitik sa Makadaot nga Kalingawan

10. Nganong angayng susihon sa matag Kristohanon ang ilang kaugalingon?

¹⁰ Ang laing taktika sa “tiglit-ag ug langgam” mao ang pagdaot sa panghunahuna sa tawo bahin sa kon unsay maayo ug daotan. Ang panghunahuna nga sama nianang sa mga tawo sa Sodoma ug Gomora nag-impluwensiya sa dakong bahin sa industriya sa kalingawan. Bisan ang mga balita diha sa telebisyon ug sa mga mantalaan nagpasiugdag kapintasan ug nagtagbaw sa kaulag sa sekso. Ang kadaghanan sa mga kalingawan diha sa media nagdaot sa katakos sa mga tawo “sa pag-ila sa maayo ug sa daotan.” (Hebreohanon 5:14) Apan, hinumdomi ang mga pulong ni Jehova pinaagi kang manalagnang Isaias: “Alaot kadtong nagaingon nga ang maayo maoy daotan ug ang daotan maoy maayo!” (Isaias 5:20) Inanay bang nag-impluwensiya sa imong hunahuna ang “tiglit-ag ug langgam” pinaagi nianang makadaot nga kalingawan? Angay nimong susihon ang imong kaugalingon.—2 Corinto 13:5.

11. Unsang pasidaan bahin sa mga drama sa TV ang gihatag niining magasina?

¹¹ Duolan sa 25 ka tuig kanhi Ang Bantayanang Torre mahigugmaong nagpasidaan sa mga magsisimba sa Diyos bahin sa mga drama sa TV. a Mao kiniy komento sa maong artikulo bahin sa nagpahiping epekto sa popular nga mga soap opera o drama sa TV: “Ang gugma gigamit sa pagpakamatarong sa bisan unsang panggawi. Pananglitan, usa ka mabdos nga dalagita miingon sa iyang higala: ‘Pero gihigugma ko si Victor. Bahala nag unsay mahitabo. . . . Gusto gyod nakong magbunga ang among pagminahalay!’ Tungod kay giduyogan kana ug mananoy nga honi, morag dili ka makahunahuna nga daotan ang iyang gibuhat. Ikaw makagusto usab kang Victor. Ikaw maluoy sa babaye. Ikaw mosabot sa ilang kahimtang. ‘Daw dili katuohan nga ikaw makahunahuna nga kana matarong,’ mipahayag ang usa ka tumatan-aw nga sa ulahi nakaamgo ra sa iyang sayop. ‘Kita nahibalo nga daotan ang imoralidad. . . . Apan akong naamgohan nga sa kaisipan nakigbahin na diay ako niana.’”

12. Unsay nagpakita nga haom gayod karon ang pasidaan bahin sa pipila ka programa sa TV?

¹² Sukad mapatik ang maong mga artikulo, kining mga programaha nga makahugaw sa kasingkasing mas dali nang matan-aw. Diha sa daghang dapit, ang maong mga programa 24 oras nga gipasalida. Ang mga lalaki, babaye, ug mga tin-edyer subsob nga nagpakaon sa ilang mga hunahuna ug kasingkasing nianang matanga sa kalingawan.  Apan, dili nato limbongan ang atong kaugalingon sa sayop nga pangatarongan. Sayop ang paghunahuna nga ang mahilayong kalingawan wala ray kalainan sa atong makita sa kalibotan. Mahimo bang pakamatarongon sa usa ka Kristohanon ang iyang desisyon nga lingawon sa mga tawo nga dili gani niya gustong dapiton sa iyang balay?

13, 14. Unsang kaayohan ang natagamtam sa pipila sa dihang ilang gisunod ang mga pasidaan bahin sa pagtan-aw ug TV?

¹³ Daghan ang natabangan sa dihang ilang gisunod ang pasidaan nga gihatag sa “matinumanon ug maalamong ulipon.” (Mateo 24:45-47) Human mabasa kanang prangka, binase-sa-Bibliya nga tambag, ang uban misulat aron sa pagpahibalo kon sa unsang paagi sila natabangan sa maong mga artikulo. b Ang usa ka babaye misugid: “Sulod sa 13 ka tuig ako nagiyan sa drama. Abi kog ako luwas pinaagi sa yanong pagtambong sa Kristohanong mga tigom ug pagkahimong regular panagsa sa pagsangyaw sa kanataran. Apan akong gisagop ang kalibotanong tinamdan diha sa drama nga kon ikaw dagmalan sa imong bana o bation mong wala higugmaa, ang pagpanapaw makataronganon—kay kon buot hunahunaon, siya ang mabasol. Ug mao nga akong gibati nga ako ‘may katarongan’ sa dihang gisubay ko kining daotang dalan ug nakasala batok kang Jehova ug sa akong bana.” Kining babayhana napalagpot. Sa ngadtongadto, siya nakaamgo ra sa iyang sayop, naghinulsol, ug napasig-uli. Ang pasidaan sa maong mga artikulo batok sa mga drama sa TV nakapalig-on sa iyang determinasyon nga dili motan-aw sa mga butang nga gidumtan ni Jehova.—Amos 5:14, 15.

¹⁴ Ang laing magbabasa nga natabangan usab niana miingon: “Ako mihilak dihang akong nabasa ang mga artikulo kay akong nadiskobrehan nga ang akong kasingkasing dili na kompleto ngadto kang Jehova. Ako nanaad sa Diyos nga dili na ako magpaulipon sa maong mga drama.” Human ipahayag ang iyang pasalamat, usa ka Kristohanong babaye ang miangkon nga siya nagiyan niana. Siya misulat: “Ako naghunahuna . . . nga basig naapektohan ang akong relasyon kang Jehova. Sa unsang paagi ‘sila’ mahimong akong mga higala ug mahimong higala usab ni Jehova?” Kon ang maong mga programa sa TV nakahugaw sa kasingkasing sa mga Kristohanon duolan sa 25 ka tuig kanhi, unsa na kaha karon? (2 Timoteo 3:13) Kinahanglang magbantay kita sa bitik ni Satanas sa tanang matang sa makadaot nga kalingawan, sa mga drama man sa TV, mapintas nga mga dula sa video, o sa imoral nga mga musika sa video.

Ang Bitik sa Personal nga Kabingkilan

15. Sa unsang paagi ang pipila nadakpang buhi sa Yawa?

¹⁵ Si Satanas naggamit sa personal nga kabingkilan ingong bitik aron magkabahinbahin ang katawhan ni Jehova. Mahimong mabitik kita niini bisan unsa pay atong pribilehiyo sa pag-alagad. Ang uban nadakpang buhi sa Yawa tungod kay ilang gitugotan ang mga kabingkilan sa pagtugaw sa kalinaw ug panaghiusa ug sa pagbalda sa espirituwal nga pag-uswag nga gipahinabo ni Jehova.—Salmo 133:1-3.

16. Sa unsang paagi malinglahong naningkamot si Satanas sa pagbungkag sa atong panaghiusa?

¹⁶ Panahon sa Gubat sa Kalibotan I, gisulayan pagpuo ni Satanas ang yutan-ong bahin sa organisasyon ni Jehova pinaagi sa direktang pag-atake, apan napakyas siya. (Pinadayag 11:7-13) Sukad  niadto, siya malinglahong naningkamot sa pagbungkag sa atong panaghiusa. Kon atong tugotan ang personal nga mga kabingkilan nga mopahinabog pagkabahinbahin, atong gihatagag higayon ang “tiglit-ag ug langgam” sa paglit-ag kanato. Busa mababagan ang pag-agos sa balaang espiritu diha sa atong tagsatagsa ka kinabuhi maingon man sa kongregasyon. Kon mahitabo kana, malipay si Satanas tungod kay sa dihang matugaw ang kalinaw ug panaghiusa sa kongregasyon, mabalda ang buluhatong pagsangyaw.—Efeso 4:27, 30-32.

17. Unsay makatabang sa pagsulbad sa personal nga mga kabingkilan?

¹⁷ Unsay imong mahimo kon mahitabo ang kabingkilan tali kanimo ug sa usa ka Kristohanon? Tinuod, lahi ang matag situwasyon. Apan, bisan tuod daghan tingali ang rason kon nganong motungha ang kabingkilan, walay katarongan kon nganong dili kini masulbad. (Mateo 5:23, 24; 18:15-17) Ang tambag diha sa Pulong sa Diyos inspirado ug hingpit. Kon ipadapat ang mga prinsipyo sa Bibliya, seguradong mobunga kinig maayo.

18. Nganong ang pagsundog kang Jehova motabang kanato sa pagsulbad sa mga kabingkilan?

¹⁸ Si Jehova ‘andam nga mopasaylo,’ ug iyang ihatag ang “matuod nga pagpasaylo.” (Salmo 86:5; 130:4) Atong gipakita nga kita hinigugmang mga anak ni Jehova kon atong sundogon siya. (Efeso 5:1) Kitang tanan mga makasasala ug nagkinahanglan gayod sa pagpasaylo ni Jehova. Busa, kita kinahanglang magbantay kon kita mobati nga dili nato mapasaylo ang atong igsoon. Mahimong mahisama kita sa ulipon diha sa sambingay ni Jesus nga wala magpasaylo sa utang sa iyang isigkaulipon nga wala ra sa kumingking sa iyang utang nga gipasaylo sa iyang agalon. Sa dihang nahibaloan kini sa agalon, iyang gipabilanggo ang dili-mapasayloong ulipon. Gitapos ni Jesus ang sambingay pinaagi sa pag-ingon: “Sa samang paagi makiglabot usab kaninyo ang akong langitnong Amahan kon ang matag usa kaninyo dili magpasaylo sa iyang igsoon gikan sa inyong mga kasingkasing.” (Mateo 18:21-35) Ang pagpalandong niana nga ilustrasyon ug paghunahuna kon pila ka higayon nga si Jehova nagapasaylo kanato seguradong motabang kanato sa dihang kita maningkamot sa pagsulbad sa mga kabingkilan uban sa atong igsoon!—Salmo 19:14.

Luwas Diha sa “Natago nga Dapit sa Labing Hataas”

19, 20. Unsay atong panglantaw sa “natago nga dapit” ug “landong” ni Jehova niining makuyaw nga mga panahon?

¹⁹ Nagkinabuhi kita sa makuyaw nga mga panahon. Napuo na unta kita ni Satanas kon wala pa ang mahigugmaong proteksiyon ni Jehova. Busa, aron dili mabitik sa “tiglit-ag ug langgam,” kinahanglang magpabilin kita sa mahulagwayong salipdanan, nga ‘magapuyo sa natago nga dapit sa Labing Hataas,’ nga makakaplag ug “kapahulayan ilalom sa landong sa Usa nga Labing Gamhanan.”—Salmo 91:1.

²⁰ Dili gayod nato angayng hunahunaon nga ang mga pahinumdom ug sugo ni Jehova mapig-oton, kondili usa kini ka proteksiyon alang kanato. Kitang tanan nag-atubang ug kaaway nga mas intelihente kay kanato. Kon wala ang mahigugmaong tabang ni Jehova, dili gayod kita makalikay sa mga bitik. (Salmo 124:7, 8) Busa mag-ampo kita nga luwason kita ni Jehova gikan sa mga bitik sa “tiglit-ag ug langgam”!—Mateo 6:13.

[Mga footnote]

Nahinumdom Ka Ba?

• Nganong ang “pagpangurog tungod sa mga tawo” usa ka peligrosong bitik?

• Giunsa paggamit sa Yawa ang lit-ag sa materyalismo?

• Sa unsang paagi nalit-agan ni Satanas ang pipila pinaagi sa makadaot nga kalingawan?

• Unsang bitik ang gigamit sa Yawa aron mabungkag ang atong panaghiusa?

[Mga Pangutana sa Pagtuon]

[Hulagway sa panid 27]

Ang uban nalit-agan gumikan sa “pagpangurog tungod sa mga tawo”

[Hulagway sa panid 28]

Malingaw ka ba sa mga butang nga gidumtan ni Jehova?

[Hulagway sa panid 29]

Unsay imong buhaton kon may gikabingkil ka nga igsoon?