Aníkena Satanás ñandereity iñuháme

“[Jehová] ndohejaichéne reʼa [pe kasadór] ñuhãme” (SALMO 91:3.)

1. Mávapa hína “pe kasadór”, ha mbaʼérepa ñañeñangarekovaʼerã chugui?

 UMI kristiáno añetetéva oñemoĩhína peteĩ iñarandu ha ikatupyryetevévare enterove yvypóragui. Salmo 91:​3-pe oñehenói chupe “pe kasadór”. Mávapa hína upéva? Pe Atalaya 1 de Junio 1883-pe guare omombeʼuvaʼekue mávapa. Satanás hína pe imbaretetéva oñemoĩva ñanderehe. Haʼe oñehaʼã ombotavy ha omoñuhã Ñandejára rembiguaikuérape, peteĩ kasadór ojapoháicha ojagarra hag̃ua guyrakuérape.

2. Mbaʼérepa oñembojoja Satanáspe peteĩ kasadór rehe?

² Yma ojejagarravaʼekue umi guyrápe heta mbaʼerã. Sapyʼánte oñehendu hag̃ua mbaʼéichapa opurahéi ha ojehecha hag̃ua ikolór. Oĩ katu ojagarráva hoʼu térã oikuaveʼẽ hag̃ua sakrifísioramo. Koʼã mymba hesaite rupi ndahaʼéi péicha péichante ojejagarráva. Umi kasadór yma guare omaña porã raẽ mbaʼeichaguápa pe guyra ha mbaʼépa ojapo jepi, omoñuhã hag̃ua. Upévare, ombojojávo Satanáspe peteĩ kasadór rehe, Ñandejára Ñeʼẽ ñanepytyvõ ñantende porã hag̃ua mbaʼépa haʼe ojapo. Satanás omañahína peteĩteĩ rehe. Ñepyrũrã ohecha mbaʼeichaguápa ñande ha mbaʼépa jajapo jepi. Upe rire omoĩ ñandéve umi ñuhã ñandereityete hag̃uáicha (2 Timoteo 2:26). Ñandereitýramo iñuhãme ikatu ñamboyke Ñandejárape, ha ipahápe ñanehundiete. Upévare ndajaʼaséiramo ko “kasadór” ñuhãme, tekotevẽ jaikuaa umi ñuhã oiporúva.

3, 4. Mbaʼérepa oñembojoja Satanáspe peteĩ león ha peteĩ mbói rehe?

³ Pe Sálmope oñembojoja avei Satanáspe peteĩ león raʼy ha peteĩ mbói rehe. Koʼã mbaʼe ñanepytyvõ jaikuaa porãve hag̃ua mbaʼépa haʼe ojapo (Salmo 91:13). Peteĩ león ojapoháicha, Satanás sapyʼánte oimehaitégui opo ñanderehe, ñandepersegi térã oiporu umi léi oñemoĩ hag̃ua ñanderehe (Salmo 94:20). Upévare oĩ jepi umi kristiáno ohejáva Ñandejára rape. Péro oikóramo jepe upéicha, Ñandejára siervokuéra oñemoag̃uive ojuehe. Ha mbaʼépa jaʼéta oñemoĩramo ñanderehe peteĩ mbói ojapoháicha?

⁴ Satanás ningo iñarandueteve yvyporakuéragui ha oiporu upéva ñanembotavy hag̃ua, ojapoháicha peteĩ mbói iponsóñava okañyha guive. Upéicha heta Jehová siervokuérape ombyai, omoinge iñakãmekuéra omboyke hag̃ua Ñandejárape ha ojapo hag̃ua haʼe oipotáva. Péro jaikuaaháicha koʼãvape ojere vaieterei upe rire. Javyʼavaʼerã, jaikuaa porãiterei haguére umi ñuhã Satanás oiporúva (2 Corintios 2:11). Jahechami upévare cuatro ñuhã oiporúva ko “kasadór”.

Yvypóragui jekyhyje

5. Mbaʼérepa peteĩ ñuhã yvypóragui jekyhyje?

⁵ Pe “kasadór” oikuaa porã yvyporakuéra oĩ porãseha enterove hapichakuéra ndive. Ha ñande kristianokuéra upéicha avei, jaikuaase mbaʼépa oñepensa ñanderehe. Satanás oikuaa, ha oñehaʼã oiporu upéva ñandereity hag̃ua iñuhãme. Ha upearã oiporu “yvypóragui jekyhyje” (Proverbios 29:25). Peteĩ oservíva Ñandejárape okyhyjéramo yvypóragui, ojapo umi mbaʼe noĩporãiva Jehová renondépe ha ndojapovéima Haʼe oipotáva. Upéicha hoʼa pe “kasadór” ñuhãme (Ezequiel 33:8; Santiago 4:17).

6. Mbaʼéichapa peteĩ mitãrusu ikatu hoʼa pe “kasadór” ñuhãme?

⁶ Ikatu ñamoĩ ehémploramo peteĩ mitãrusúpe. Ojopyetereígui chupe iñirũnguéra kolehiopegua, opita peteĩ sigarríllo. Oiméne nopensaiete opitataha osẽrõ guare hógagui. Upéicharamo jepe, ojapóma hína peteĩ mbaʼe ombohasyvaʼerã chupe ha naiporãiva Ñandejára renondépe (2 Corintios 7:1). Mbaʼéichapa hoʼa ko ñuhãme? Oiméne ijúnta vai raʼe ha okyhyje koʼãva  omboykéramo g̃uarã chupe. Upévare mitãrusu ha mitãkuñanguéra, aníkena penembotavy ko “kasadór”. Ndapeʼaséiramo iñuhãme, aníkena peguevi ni michĩmi pejejopy vaíramo. Penemanduʼa memékena Ñandejára Ñeʼẽ heʼiha ndajajeheʼaivaʼerãha umi júnta ñanembyai vaʼerã rehe (1 Corintios 15:33).

7. Mbaʼépa ikatu ojapo Satanás omboyke hag̃ua tuvakuérape umi mbaʼe iñimportantevévagui?

⁷ Umi tuvakuéra oservíva Ñandejárape oñehaʼãmbaite omeʼẽ ifamíliape umi mbaʼe oikotevẽva(1 Timoteo 5:8). Upéicha avei Satanás ikatu oiporu upéva, omboykese rupi chupekuéra umi mbaʼe iñimportantevévagui. Oĩ heta kristiáno ndohomeméiva rreunionhápe ohejágui ipatrón ojopy chupe ombaʼapove hag̃ua. Ikatu okyhyje rupi ndojeruréi permíso oho hag̃ua asambleahápe, omombaʼe hag̃ua Jehovápe iñermanokuéra ndive. Upévare ndajaʼaséiramo koʼãichagua ñuhãme ‘jajeroviavaʼerã Ñandejárare’ (Proverbios 3:​5, 6). Avei ñanemanduʼavaʼerã jaserviha Jehovápe, ha haʼe heʼíma oñangarekotaha ñanderehe. Tuvakuéra, pejeroviápa Jehová penepytyvõtaha ha pene famíliape pejapóramo haʼe oipotáva? Térãpa peʼáta Satanás ñuhãme, pekyhyje rupi yvypóragui ha pejapo haʼe oipotáva? Iporãvaʼerã peñemboʼe ha pejepyʼamongeta koʼã mbaʼére.

Pláta rayhu

8. Mbaʼéichapa oiporu Satanás pe pláta rayhu ñanemoñuhã hag̃ua?

⁸ Peteĩ ñuhã oiporúva avei Satanás haʼe pe pláta rayhu. Ko múndope pyʼỹinte ojeʼe sapyʼaitépe ikatuha ñagana ha ñande pláta heta. Oĩ ermáno ogueroviáva koʼã mbaʼe, upévare ikatu heʼi ñandéve: “Embaʼapo jejopy koʼág̃a. Reime porã vove ndepyʼaguapýtama rejapo hag̃ua opa mbaʼe, ha revyʼáta avei. Ha upe rire ikatu voi rejapo nde prekursorádo, rejaposéramo”. Péicha ikatu heʼi peteĩ oiporúva iñermanokuérape ogana heta hag̃ua. Péro ñamaña porãmína upe heʼivaʼekuére. Ndohechaukáipa opensaha upe kuimbaʼe ipláta hetáva opensahaguéicha, Jesús ohenoivaʼekue “výro”? (Lucas 12:​16-21.)

9. Mbaʼéichapa ikatu omoñuhã peteĩ kristiánope oipotapotavéramo heta mbaʼe?

⁹ Ko múndo aña oĩva Satanás poguýpe omomýi yvyporakuérape oipotapotave hag̃ua heta mbaʼe. Ha peteĩ kristiáno oipotavepotavéramo heta mbaʼe, ikatu mbeguekatúpe ndojapovéi mbaʼeve Ñandejára servísiope (Marcos 4:19). Ñandejára Ñeʼẽ ñanemokyreʼỹ javyʼa hag̃ua jarekóma guive jaʼu ha ñamondevaʼerã (1 Timoteo 6:8). Upéicharamo jepe, umi ndoikoséiva upéicha hoʼa pe “kasadór” ñuhãme. Oñemombaʼeguasu rupi, oimoʼãpa hikuái ikatuha oiko oikoseháichante? Ha ñande? Ñambotapykuépa Ñandejárape jaipotave rupi heta mbaʼe? (Ageo 1:​2-8.) Ñambyasýramo jepe, oĩ ombotapykuéva Ñandejárape ojejopy vai jave, oimoʼãgui ndoikoporãmoʼãveimaha. Koʼã mbaʼe ningo ombovyʼaiterei pe “kasadórpe”!

Umi vyʼarã ñanembyaíva

10. Mbaʼérepa jajepyʼamongetavaʼerã ñande kristiáno?

¹⁰ Koʼág̃a rupi heta hénte ndoikuaavéima mbaʼépa oĩ porã ha mbaʼépa oĩ vai. Upéva haʼe avei peteĩ ñuhã oiporúva pe “kasadór”. Yma ojeikohaguéicha Sodoma ha Gomórrape, upéicha avei ojejapo koʼág̃a rupi umi vyʼarã. Oĩ voi katu notisiéro ha umi rrevísta omombaʼéva ñorairõ ha teko vai. Upéicha rupi heta hénte ndoikuaavéima “mbaʼépa iporã ha mbaʼépa ivai” (Hebreos 5:14). Upéicharamo jepe, aníkena ñanderesarái Jehová heʼivaʼekue iproféta Isaías rupive: “Cháke peẽ, pejéva iporãha pe ivaíva, ha ivaiha upe iporãva” (Isaías 5:20). Upévare ñañeporandumi, ñandereitýmapa pe “kasadór” iñuháme ñapensa rupi upéicha? Enterove ñande kristiáno jajepyʼamongetavaʼerã ko mbaʼére (2 Corintios 13:5).

11. Mbaʼépa heʼi umi novélare pe rrevísta La Atalaya?

¹¹ Ojapótama veinticinco áño, La Atalaya oñeʼẽhague ñandéve télepe ojehechaukávare. * Oñeʼẽvo mbaʼéichapa umi novéla ñanembyai, upe rrevísta heʼi: “Umi novélape oĩ heta heko vaíva, ha heʼi oporohayhuhaguére oikoha upéicha.  Pór ehémplo, peteĩ kuñataĩ nomendáiva hyeguasu ha heʼi iñamígape: ‘Che ningo ahayhu Víctorpe ha ndaikuaaséi mbaʼeve. [...] Tahasa jepe oimeraẽ mbaʼe, cheryeguasu chugui ha upéva chembovyʼa!’ Pe músika vevuimi oñehendu rupi, ndojehechakuaái oĩ vaiha upe kuñataĩ ojapóva. Umi ohecháva pe novéla oguerohory avei Víctorpe. Ha oiporiahuvereko pe kuñataĩme. ‘Ontende chupe.’ Peteĩ kuña ohechaitereivaʼekue novéla heʼi: ‘Nañaimoʼãi péicha ñanemopensaha. Jaikuaa porã ningo ivaietereiha ñande reko vai. [...] Péro ahechakuaa che apensaha avei upéicha.’”.

12. Mbaʼérepa koʼág̃a rupi tekotevẽ avei ñañangareko jahecha hag̃ua téle?

¹² Umi artíkulo ojehai guive, koʼãichagua novéla hetaitereivéntema ojehecha. Oĩ voi ombohasáva ára pukukue javeve. Ha tahaʼe kuña, kuimbaʼe térã pyahukuéra ohecha koʼã novéla. Upéicharamo jepe, ñande kristiáno ndajahejaivaʼerã upéva ñanembotavy. Tuichaiterei ningo jajavýta ñapensáramo ndaivairiha jahecha, jaʼe rupi ivaiveha umi oikóva ñande jerére. Mbaʼépa heʼíta peteĩ kristiáno ovyʼáramo koʼãichagua tapicha ndive, arakaʼeve nomog̃uahẽmoʼãiva hógape?

13, 14. Mbaʼéichapa hetápe oipytyvõ umi artíkulo omombeʼuvaʼekue mbaʼéichapa ñanembyai jahecháramo umi novéla?

¹³ Heta ñane ermanokuérape oipytyvõ iñeʼẽrendu rupi ‘tembiguái jeroviaha ha iñarandúvape’ (Mateo 24:​45-47). Ohecha rire mbaʼeichaitépa Ñandejára Ñeʼẽ ñanehekomboʼe, umi oleevaʼekue koʼã artíkulo omombeʼu mbaʼeichaitépa oipytyvõ chupekuéra. Peteĩ kuña heʼi: “Trece áño pukukue ahechaitereivaʼekue umi novéla. Che aimoʼã nachembyaimoʼãiha aháramo rreunionhápe ha asẽramo predikasiónpe sapyʼapyʼa. Péro ndaupeichaiete. Añepyrũ avei apensa umi novélape ojehechaukaháicha: ne ména ndetrata vaíramo ha ndohechaukáiramo ndéve nderayhuha, ikatu remoakãratĩ chupe, haʼe voi ningo oheka. Aimoʼã rupi upéicha ‘oĩ porãha’ amoakãratĩ che ménape ha apyta vai Jehová renondépe”. Ko kuña oñemosẽ kongregasióngui. Heta tiémpo riréma ojepyʼamongeta ojapovaʼekuére, oñembyasy ha oñemoĩ porã jey Jehová ndive. Umi artíkulo oñeʼẽvaʼekue novéla rehe, omomýi chupe anive hag̃ua ohecha umi mbaʼe Jehovápe ombojeguarúva (Amós 5:​14, 15).

¹⁴ Ótro katu omombeʼu: “Che rasẽ aleévo koʼã artíkulo. Ahechakuaa namombaʼeveiha Jehovápe che pyʼaite guive. Apromete Ñandejárape ndahechaveimaha koʼã mbaʼe”. Oagradese rire koʼã artíkulore, peteĩ ermána omombeʼu ohechaitereiha umi novéla, haʼe heʼi: “Ndaikuaaporãi kuri [...] chemoĩ vaítapa Jehová ndive. Mbaʼéicha voi piko ajeheʼáta ‘hesekuéra’ [umi novelapegua rehe] ha avei aiko Jehová amíga ramo?”. Ohasáma veinticinco áño umi novéla ombyai hague hetaiterei tapichápe, mbaʼépa ojapo koʼág̃a rupi? (2 Timoteo 3:13.) Aníkena jaʼe vyroreinteha koʼã vyʼarã Satanás oiporúva ñanemoñuhã hag̃ua. Tahaʼe novéla, videojuego ha umi video musicales omombaʼéva teko vai.

 Jajoavy ñande rapicha ndive

15. Mbaʼéichapa oity Satanás hetápe iñuhãme?

¹⁵ Satanás oiporu avei umi mbaʼe ñande jajoavyhápe ñande rapicha ndive, ani hag̃ua jajogueraha porã ñane ermanokuérandi. Oimeraẽva ikatu hoʼa ko ñuhãme, tahaʼe haʼe ojapóva Ñandejára servísiope. Satanás hetápe oity iñuhãme ojapoukávo chupekuéra haʼe oipotáva. Ha oĩramo ojoavýva hapicha ndive, oiporu upéva oipeʼa hag̃ua pyʼaguapy ha ombyai hag̃ua Jehová kongregasión (Salmo 133:​1-3).

16. Mbaʼeichagua ñuhãpa oiporu avei Satanás?

¹⁶ Pe Primera Guerra Mundial aja, Satanás opersegi Jehová rembiguaikuérape ohundipaite hag̃uáicha chupekuéra. Péro nosẽi chupe upe ojaposéva (Revelación 11:​7-13). Upe guive oiporu umi ñuhã ivevuivéva. Upévare, jahejáramo umi mbaʼe jajoavyha ñanemomombyry ñane ermanokuéragui, jajapoñaína pe “kasadór” oipotáva. Ha upéicha jajapóramo pe espíritu sánto ndaikatumoʼãi ñanepytyvõ porã ñandéve ha ñane kongregasiónpe. Upéva ningo ombovyʼaitereíta Satanáspe. Haʼe oikuaa ndajajoguerahaporãiramo, ombyaiha ñane predikasión (Efesios 4:​27, 30-32).

17. Mbaʼépa jajapovaʼerã jajoavýramo ñane ermánondi?

¹⁷ Mbaʼépa jajapóta jajoavýramo peteĩ ñane ermáno ndive? Jaikuaa napeteĩchaiha jajoavy ñande rapichándi. Upéicharamo jepe, tahaʼe haʼéva umi mbaʼe jajoavyhague ñañemongetavaʼerã jajogueraha porã jey hag̃ua (Mateo 5:​23, 24; 18:​15-17). La Biblia heʼíva ñandéve koʼã mbaʼére Ñandejáragui ou ha ndaijojahái. Upévare, jajapókena Ñandejára Ñeʼẽ heʼíva, koʼãva ningo katuete ñanepytyvõta.

18. Mbaʼéichapa ñanepytyvõ Jehová iñehémplo rupive?

¹⁸ Jehová ningo ñaneperdonáta, haʼe oĩ ‘oheja rei hag̃uáicha ñandéve ñane rembiapo vaikue’ (Salmo 86:5; 130:4). Upévare, jahechauka hag̃ua jaserviha chupe ñaporoperdonavaʼerã haʼe ojapoháicha (Efesios 5:1). Enterovete ñande jajavy ha ñaikotevẽterei Jehová ñaneperdona. Upévare, jajepyʼamongeta porã vaʼerã hasýramo ñandéve ñaperdona hag̃ua ñande rapichápe. Ikatu oiko ñanderehe upe tembiguáire oikovaʼekue, Jesús omombeʼu haʼe noperdonaihague hapichápe. Pe Mburuvicha oheja rei vaʼekue chupe hetave odevéva, oikuaa haʼe ojápova ha upévare omoinge chupe kárselpe. Omombeʼupávo upe ehémplo, Jesús heʼi: “Péicha avei che Ru yvágape oĩva ojapóta pende rehe, pende pyʼaite guive ndapehejareíriramo pende rapichápe, pe ojapóva pende rehe” (Mateo 18:​21-35). Jajepyʼamongetamína ko ehémplo Jesús omombeʼuvaʼekuére. Ñapensamína, mboy vésema piko Jehová ñaneperdona. Katuete upéva ñanemokyreʼỹta ñañemongeta hag̃ua ñane ermánondi, oiméramo jajoavy hendivekuéra (Salmo 19:14).

Jaiko kyhyjeʼỹme “upe Yvatetegua ãme”

19, 20. Mbaʼéichapa jahechavaʼerã koʼág̃a rupi jaiko “upe Yvatetegua ãme”?

¹⁹ Jaiko ningo peteĩ tiémpo ijetuʼutereívape. Jehová noñangarekói rire ñanderehe, ymáma Satanás ñanehundipavaʼerãmoʼã. Upévare, ani hag̃ua pe “kasadór” ñandereity iñuháme, jaikovaʼerã “upe Yvatetegua ãme”. Upépe oñeñangarekóta ñanderehe, ñañemoĩramo “upe Ipuʼakapáva guýpe” (Salmo 91:1).

²⁰ Upévare, jahechakuaákena Ñandejára Ñeʼẽ heʼíva ha umi mbaʼe Haʼe ñanemomanduʼáva ñanepytyvõha. Enterove ñañemoĩhína peteĩ iñarandu ha ikatupyryvévare ñandehegui. Jehová ñanepytyvõ rupi añoite ikatu jajehekýi Satanás ñuhãgui (Salmo 124:​7, 8). Upévare jajerure memékena Jehovápe ñanepytyvõ hag̃ua, ani jaʼa pe “kasadór” ñuhãme (Mateo 6:13).

[Nóta]

Ñanemanduʼápa?

• Mbaʼérepa ikatu ñandereityete jakyhyjéramo yvypóragui?

• Mbaʼéichapa ñanemoñuhã Satanás jaipotapotavéramo heta mbaʼe?

• Mbaʼéichapa oiporu Satanás umi vyʼarã ñanembyaíva ñanemoñuhã hag̃ua?

• Mbaʼépa oiporu Satanás ñanemomombyry hag̃ua ñane ermanokuéragui?

[Porandu ñahesaʼỹijóva]

[Nóta oĩva taʼanga ndive páhina 31]

Rehechasépa nde umi mbaʼe Jehovápe ombojeguarúva?