Kupuluka Kunyihetu Yachibinda Chatujila

‘Yehova diyi wakakupulwisha nimumwonji watayi chibinda.’—MASAMU 91:3.

1. ‘Chibinda chatujila’ hinyi, nawa muloñadi chekalilayi wafwana?

 ENIKRISTU alala ejima atalañanaña nachidanyi wukweti tufuta nimaana akubadika antu. Amushimuna haMasamu 91:3 hamu neyi ‘chibinda chatujila.’ Indi iwu chilumbu hinyi? Kufuma tuhu muKaposhi kaJune 1, 1883 kawundeli, iyi magazini yamwekesha nawu kwosi wacheñi wakubadika hadi Satana Diyaboluku. Iwu chilumbu wasweja ñovu nawa wukweti tufuta, wafwilaña kuluwañesha nikulawula antu jaNzambi mumuhetu neyi chafwilañayi chibinda chatujila kulawula kajila.

2. Muloñadi Satana chamwesekejelawu nachibinda chatujila?

² Kushankulu atujila adiña nakuyikwata hamuloña wakwimba chiwahi, hamuloña wamavuji awu amawahi, kuyidya hamu tuhu nikuyilambula. Hela chochu, atujila hiyileñaleña yababala kwesekeja nachayileñeluwu nawa akala kulawula mumuhetu. Dichi, chibinda chatujila mumpinji yamuBayibolu wasambilileña kudiza nakanañachima yililu yatujila twakeñeleñayi kulawula mumuhetu. Kufumahu hakutuña njila yakafuta kulonda kulawula tujila. Bayibolu yesekeja njila jaSatana najachibinda chatujila kulonda kutwikwasha kutiyishisha njila jindi. Diyabolu watudizaña hamuntu hamuntu. Wamonaña yililu yetu nakututila nyihetu yabulaña kumwekana kulonda kufwila kutwilawula amomi. (2 Timotewu 2:26) Neyi Satana yatulawula dikwila nawu wulunda wetu naNzambi wukutama nawa chumichi chikututwala kukujilumuka. Dichi hakwila nawu twikali akiñewa, twatela kwiluka tufuta twashiyashana ‘twachibinda chatujila.’

3, 4. Indi tufuta twaSatana twadifwanaña ñahi natwamutupa hela twakapela?

³ Ñimbi yamasamu wazatishili cheñi nyevulu kulonda kufwanisha tufuta twaSatana natufuta twamwenzi wamutupa nitwakapela. (Masamu 91:13) Kufwana mutupa, Satana mpinji yikwawu walukukaña hatooka kuhitila mukuzatisha makabisha hela nzatilu yanfulumendi kulonda kukañesha antu jaNzambi. (Masamu 94:20) Makabisha amuchidiwu anateli kuleñela antu antesha kumushiya Yehova. Hela chochu, kakavulu iku kulukuka kwahatooka kwakañanyaña nawa chafumañamu antu jaNzambi ekalaña anuñañana. Hanu dinu, kulukuka kwaSatana kudi neyi kwakapela kwazatikaña ñahi?

⁴ Diyabolu wazatishaña maanindi ahambakana antu kulonda kuzatisha kulukuka kwafwana nitufuta tudi neyi twakapela wasweja wulembi wudi mwiluña daswamanika. Muniyi njila, watwesha kutamisha yitoñojoka yawantu jaNzambi amakwawu, nakuyidimba kulonda eli nkeñelu yindi chatela kwila nkeñelu yaYehova, nawa chafumañamu chatama chikupu. Chamuzañalu nankashi muloña hitwayambashanaña hajinjila jaSatanaku. (2 Akorinda 2:11) Twayenu tushinshiki nyihetu yafwana yazatishañayi ‘chibinda chatujila.’

Kuchiina Muntu

5. Muloñadi muhetu ‘wakutiya antu woma’ chiwazatikaña chikupu?

⁵ ‘Chibinda chatujila’ cheluka nawu muntu wakeñaña kumwiteja kudi antu amakwawu. EniKristu hiyakoleshaña nyichima kuyitoñojoka hela kubula kusha maana antu ayinyeñumukaku. Hakwiluka chumichi, Diyabolu wakeñaña kuzatisha kwakamena kwawu hayuma yatoñojokañawu antu hadi wena. Chakutalilahu, wataña muhetu antu jaNzambi kuhitila mukuzatisha muhetu ‘wakutiya antu woma.’ (Yishimu 29:25) Hamuloña wakuchiina muntu, neyi antu jaNzambi adibomba nawantu amakwawu hakwila yuma yakanishayi Yehova hela kuleka kwila yuma yayilejawu Mwizu daNzambi, dikwila nawu anayilawuli mumuhetu kudi ‘chibinda chatujila.’—Ezekeli 33:8; Yakoba 4:17.

6. Chakutalilahwinyi chinamwekeshi chatelawu kuyilawulawu atwansi kudi ‘chibinda chatujila’?

 ⁶ Chakutalilahu, kansi wanyanya nateli kwiteja ikakeja dakufuma kudi akwawu akushikola nakunwa makanya. Kunwa makanya chatela kwikala chuma chabulayi kukeña hampinji yayañayi kushikola odu ifuku. Hela chochu, nakwila chuma chafwana kumujimba windi nawa chamuhilishaña Nzambi. (2 Akorinda 7:1) Komana amweseka ñahi? Hekwawu wadibomba nawakwawu atama nawa wachiina nindi anateli kumuseha. Atwansi, bayi mwiteja ‘chibinda chatujila’ kuyitesha nikuyilawulaku. Hakwila mutondolweli kuyikwata, dihembenu hela mutuyuma twanyanya. Londelenu kubabesha kwakutondolwela kudikunda kwatama.—1 Akorinda 15:33.

7. Indi Satana nateli kwilisha ñahi anvwali amakwawu kusweja kukeña yuma yakumujimba?

⁷ Anvwali awiniKristu ashañaku maana chikupu hamudimu wawu wamuNsona wakwinka yisaka yawu yuma yakumujimba. (1 Timotewu 5:8) Hela chochu, nkeñelu yaSatana yakufwila kwilisha eniKristu kusha maana chikupu hakwikala nayuma yayivulu yakumujimba. Hekwawu eniKristu amakwawu ajiñaña kukupompa hamuloña wakwiteja ikakeja dakufuma kudi ayiñija mudimu kuzata mudimu wukwawu. Anateli kutiya woma wakulomba kubula kuzata kulonda kuwanika kukupompa kwankambi kwejima nakudifukula kudi Yehova hamu nawa ana kwawu. ‘Kumukuhwelela Yehova’ dichuma chatela kutukiña kumuhetu weniwu. (Yishimu 3:5, 6) Kubombelahu, kwanuka netu wejima wetu tuyantu amwitala daYehova nawa wekala namudimu wakutwakamena, chikutwikwasha kwikala akola. Anvwali, komana mukweti chikuhwelelu chakwila nenu Yehova nateli kuyakamena munjila yidi yejima hamu nachisaka chenu neyi chakwila mukwila nkeñelu yindi? Tahindi Diyabolu nateli kuyilawula mumuhetu windi wumu nakuyilisha kwila nkeñelu yindi hamuloña wawoma wawantu? Tunayikonkwomweni kulomba hampinji yimunakushinshika hanawa malwihu.

Muhetu waKukeñesha Yuma Yakumujimba

8. Munjilanyi mwazatishilañayi Satana kafuta kakukeñesha yuma yakumujimba?

⁸ Satana wazatishaña cheñi kafuta kakusweja kukeña yuma yakumujimba kulonda kutulawula. Kulanda nakulandulula kwamukaayi kamakonu kwakoleshaña njila jakuhetelamu swayi jawupwapoki jinateli kuluwañesha antu jaNzambi amakwawu. Mpinji yikwawu antu anateli kuyishinjila nawu: “Zataku nañovu. Neyi wunekali dehi namali amavulu, wunateli kunooka nakudiluñisha wumi. Wunateli nikuzataku wupayiniya.” Mazu amuchidiwu anateli kufuma kudi amakwawu muchipompelu, elaña mwenimu muloña wamali akwetuwu amana kwawu niahela muchipompelu chawiniKristu. Toñojokenu nakanañachima hayitoñojoka yakwikala namali amavulu kulonda mwakadiluñishi kumbidi. Komana chumichi hichamwekeshaña yitoñojoka yasamaheta “chisupi” wamuchishimu chaYesuku?—Luka 12:16-21.

9. Muloñanyi eniKristu amakwawu chayilawilañawu hamuloña wakukeñesha yuma yakumujimba?

⁹ Satana wayulaña ñililu yindi yatama munjila yakwila yaluwañeshaña antu kulonda akeñeña yuma. Kukeña yuma kwamuchidiwu kunateli kutamisha chihandilu chamwiniKristu mukuhita kwampinji, kuvumbisha mazu nakuyilisha “kubula kusoña.” (Maku 4:19) Bayibolu yatwikoleshaña kutiya kuwaha neyi tukweti yakudya  niyakudivwika. (1 Timotewu 6:8) Hela chochu, amavulu ayilawulaña kudi ‘chibinda chatujila’ muloña hiyazatishaña iku kufumbaku. Komana chatela kwikala nawu kudivwimba kwayileñelaña kutiya nawu atela kwikala nachihandilu chacheñi? Indochu etwaweni? Komana mpwila yetu yakukeña kwikala nayuma yatuleñelaña kumona kudifukula kwalala neyi kwalema chantesha? (Hagayi 1:2-8) Chawushona, mumpinji yakukala kwamali, amakwawu adiwulaña wuspiritu wawu kulonda kutwalekahu nachihandilu chenjililawu dehi. Yililu yakukeñesha yuma yakumujimba yamuchidiwu yamuzañaleshaña ‘chibinda chatujila.’

Muhetu waYisela Yatama

10. Indi mwiniKristu wejima watela kudishinshika chamuchidinyi?

¹⁰ Kafuta kakwawu ‘kachibinda chatujila’ hikuzeyesha yitoñojoka yakusemuka nachu yakwambula yatama nayayiwahi. Yililu yidi neyi yadiña muSodoma naGomora yinakuyula antu ahemaña yisela. Hela akwakushimuna nsañu hatusanji twanyivwimbimbi nimagazini amwekeshaña madombu nikwilisha antu kwikala nampwila yatama yawuvumbi. Yuma yayivulu yamwekanaña neyi yakuzañalesha hayikunzulemba yaluwañeshaña yitoñojoka yawantu ‘yakwambula yayiwahi nayatama.’ (Aheberu 5:14) Hela chochu, anukenu mazu aYehova kuhitila mudi kaprofwetu Isaya akwila nawu: “Yayo awa akutena yatama nawu yayiwahi, yayiwahi nawu yatama!” (Isaya 5:20) Komana ‘chibinda chatujila’ watamisha dehi yitoñojoka yenu nayisela yabula kutelela yamuchidiwu? Chalema kudishinshika etwaweni.—2 Akorinda 13:5.

11. Kubabeshanyi kwayimwenu yahayisanji yanyivwimbimbi kwahenuwu muniyi magazini?

¹¹ Kwakwihi nayaaka 25 yinahituhu, Kaposhi Kakutalila kawundeli kasoñamishili chiwahi akwakudifukula aNzambi kutalisha hampanji jahachisanji chanyivwimbimbi. * Ahosheli kutalisha hansañu yafwana yayimwenu yahayisanji yanyivwimbimbi nawu: “Kukeñakeña akwizatishaña kulonda kuyiñisha yililu yidi yejima. Chakutalilahu, kansi wumu wabula kusumbuka wemitili, walejeli ibwambu dindi nindi: ‘Ilaña namukeña Victor. Hinachiiti kumuchimaku. . . . Kwikala namukeki windi dichuma chalema kudami!’ Kamina kawunda kanakutiyakena mwishina kanaluwañeshi antu kubula kwiluka nawu yililu yindi yatama. Akwakutala niwena amutiyaña Victor kuwaha. Munaditeji naniwu kansi wamumbanda. ‘Muneteji yililu yindi yatama.’ Mukwakutala wumu wamumbanda wamweni wubanji waniyi nsañu wahosheli nindi, ‘Chidi chakuhayamisha chiwatela kuyiñisha yitoñojoka yeyi. Tweluka netu wuvumbi watama. . . . Ilaña nelukili nami muyitoñojoka yami nadiña nakuditeja nawantu ekala nayililu yatama.’”

12. Yikumanyi yinamwekeshi kuwaha kwakubabesha kwakatataka kutalisha hamaprogiramu ahayisanji yanyivwimbimbi?

¹² Kufuma tuhu hampinji yasonekeluwu iyi yibaba, iwu muchidi wamaprogiramu akutamisha muchima anavuliluku nankashi. Mumaluña amavulu maprogiramu amuchidiwu ayishaña hachikunzulemba  mpinji yejima. Amayala, ambanda niatwansi amavulu eñijaña chikupu yitoñojoka ninyichima yawu kuyisela yamuchidiwu. Ilaña etu hitwatela kudidimba nayitoñojoka yakutwambaku. Chikwikala chatama kutoñojoka netu yisela yatama hiyasweja kutama kubadika yuma yitwamonaña chikupu mukaayuku. Komana chalala mwiniKristu watela kuyiñisha hakutonda kumutiyisha kuwaha kudi antu akabula kutoñojokahu hela ifuku dimu kuyitambika mwitala dindi?

13, 14. Indi antu amakwawu ahosheli ñahi chahetelelelumu hakubabesha kwakutalisha hachisanji chanyivwimbimbi?

¹³ Amavulu ahetelelumu hampinji yazatishiluwu iku kufumba kwahanini ‘nduñu wamaana nikashinshi.’ (Matewu 24:45-47) Hanyima yakutaña kufumba kwatiyakana kwashindamena haBayibolu, amakwawu asonekeli nakushimuna chayishikili yibaba yeniyi hanyichima. * Mumbanda wumu wetejeli nindi: “Nateñukili hadi yaaka 13 nayimwenu yahayisanji yanyivwimbimbi. Natoñojokeleña nami nikwikala wakola lwakuspiritu kuhitila hohu hakuwanikaña kukupompa nikukalakala mumudimu wakushimwina kazoku-kazoku. Ilaña nekalili nayililu neyi yawantu amuyimwenu yahayisanji yanyivwimbimbi yakwituña yakwila nawu neyi nfumweyi yakuhemba chatama hela neyi wutiya neyi hiwakeñewaku, chekala chiwahi kwila wuvumbi—natoñojokeleña nami iyala wamuchidiwu diyi wukweti muloña. Dichi, chinatoñojokeli nami ‘nayiña,’ nelili wuvumbi nakumuvulumuna Yehova hamu tuhu ninfumwami.” Iwu mumbanda amuhañili muchipompelu. Nkumininaku wetejeli nindi wavulumwini nawa wabalumukili mumuchima, dichi amufuntishili muchipompelu. Yibaba yakubabesha kutalisha hayimwenu yahayisanji yanyivwimbimbi yamukolesheli kukaana yisela yahelayi Yehova.—Amosa 5:14, 15.

¹⁴ Mukwakutaña mukwawu wadiña najakufumamu muwumi windi wahosheli nindi: “Hampinji yinatañili yibaba nadilili, muloña nelukili nami muchima wami hiwadiña wawanina kumesu aYehovaku. Namukanini Nzambi nami hinamba kekala cheñi nduñu waniyi yimwenuku.” Hanyima yakuhameka hayibaba, mumbanda wumu wawiniKristu wasonekeli kutalisha hakuteñuka kwindi nindi: “Najinooki neyi . . . chinakumi wulunda wami naYehova. Nateli kukwata ñahi wubwambu nawantu amuyimwenu yahayisanji yanyivwimbimbi hampinji yoyimu nikali ibwambu daYehova?” Neyi chakwila ana maprogiramu atamishili nyichima yawantu hayaaka 25 yinahituhu, indi makonu chikushika hachipimwinyi? (2 Timotewu 3:13) Twatela kwiluka nyihetu yaSatana yanyichidi yejima yayisela yabula kutelela, chili yimwenu yahachisanji chanyivwimbimbi, yisela yamadombu yahavidiyo chili tumina twawuvumbi twahavidiyo.

Muhetu Wakubula Kutiyashana

15. Indi antu amakwawu ayilawulaña ñahi amomi kudi Diyabolu?

¹⁵ Satana wazatishaña kubula kutiyashana hamu neyi muhetu waleñelaña chaambu hakachi kawantu jaYehova. Anateli kutulawula hichikweti muloña nachifulu chanyidimu yitukwetuku. Amakwawu ayikwata dehi amomi kudi Diyabolu  muloña eteja kubula kutiyashana kuluwañesha kuwunda nikunuñañana nikuya hambidi kwakuspiritu kwakuwahi kwaletayi Yehova.—Masamu 133:1-3.

16. Munjilanyi mwazatishilañayi Satana tufuta kulonda kweseka kuluwañesha kunuñañana kwetu?

¹⁶ Hampinji yaNjita yaKaayi kejima yatachi, Satana wesekeli kujilumuna kuloñesha kwaYehova kwahamaseki kuhitila mukulukuka kwahatooka, ilaña wakañenyi. (Chimwekeshu 11:7-13) Kufuma tuhu hayina mpinji, wakeñaña kuluwañesha kunuñañana kwetu kuhitila mukafuta. Neyi twiteja kubula kutiyashana kutukojeja kubula kunuñañana, tunakumwinka ‘chibinda chatujila’ chikuku chakutwilukukilahu kumbidi. Dichi tukukañesha spiritu yajila kubula kuzatika chiwahi muwumi wetu hamu tuhu nimuchipompelu. Neyi chumichi chizatika, Satana wukutiya kuwaha muloña kuluwañesha kudi kwejima kwakuwunda nikunuñañana kwamuchipompelu kwaluwañeshaña mudimu wakushimwina.—Aefwesesa 4:27, 30-32.

17. Chumanyi chinateli kukwasha antu anakubula kutiyashana kumanisha kukala kwawu?

¹⁷ Chumanyi chimwatela kwila neyi hadi kubula kutiyashana namukwenu mwiniKristu? Nsañu yidi yejima yambuka. Hela chochu, kunateli kwikala nsañu yayivulu yinateli kuleta kukala, dichi kwosi muloña wutunateli kubula kumanisha kubula kutiyashana kwejima. (Matewu 5:23, 24; 18:15-17) Kufumba kwekala Mwizu daNzambi kwonenewa, nawa kwakuwahi. Nshimbi yamuBayibolu hiyakañanyañaku neyi tuyizatishaña. Mpinji yejima jazatikaña.

18. Muloñadi kumwimbujola Yehova chikukutwikwashila kumanisha kukala kwakubula kutiyashana?

¹⁸ Yehova “waanakenaña,” nawa ‘waanakenaña chikupu.’ (Masamu 86:5; 130:4) Twamwekeshaña nawu tudi anyana akeñewa aYehova neyi tumwimbujolaña. (Aefwesesa 5:1) Wejima wetu tuyakwanshidi nawa tunakukeña chikupu netu Yehova yotwanakeni. Dichi twatela kubabala chikupu neyi tunakutiya netu hitwatela kwanakena muntuku. Tunateli kwikala neyi nduñu wamuchishimu chaYesu wakanini kwanakena mukwawu nduñu mukudi wadiña wanyanya chikupu kwesekeja namukudi wamwanakenenuwu kudi mwanta windi. Chamulejeluwu mwanta windi, mwanta wamushili mukaleya nduñu wabulili kwanakena mukwawu. Yesu wakunkulwili chishimu nakuhosha nindi: “Dichi chakayilayi nawa niTata yami wamwiwulu, neyi enu mukubula kwanakena akwenu nyiloña yawu munyichima yenu.” (Matewu 18:21-35) Kutoñojoka chikupu hanichi chakutalilahu nikutoñojoka mapampa añahi anatwanakeniyi Yehova chakubula kukala chikutwikwasha chikupu hampinji yitunakufwila kumanisha kukala kwakubula kutiyashana namana kwetu!—Masamu 19:14.

Kukiñewa “muChiswamu chaMukwakubadika Kwiwulu”

19, 20. Munjilanyi mutunateli kumwena “muchiswamu” chaYehova ‘nimuwulelu’ windi muniyi mpinji yafwana?

¹⁹ Tunakushakama mumpinji yafwana. Neyi chakwila Yehova hadiña nakutukiñaku, mutenowu Satana wadi kutujilumuna wejima wetu. Hela chochu, hakwila nawu tutondolweli kubula kutulawula kudi ‘chibinda chatujila,’ twatela kushakama mwiluña dachifwikija dakukiñewa, ‘kwikala muchiswamu chaMukwakubadika Kwiwulu,’ dikwila nawu ‘kushakama muwulelu waChinaweji.’—Masamu 91:1.

²⁰ Mpinji yejima twatela kumona yanukishu yaYehova ninshimbi jindi hamu neyi yakutwikiña nachu, bayi neyi yakutwikañeshaku. Wejima wetu twatalañanaña nachidanyi wabadika antu maana. Chakubula wukwashu waYehova, wejima wetu anateli kutulawula. (Masamu 124:7, 8) Tulombenu netu Yehova yatwamwini kunyihetu ‘yachibinda chatujila’!—Matewu 6:13.

[Tumazu twaheshina]

Munakwanuka?

• Muloñadi “kutiya antu woma” chiwekalila muhetu wafwana?

• Munjilanyi mwazatishilañayi Diyabolu kafuta kakusweja kukeña yuma yakumujimba?

• Munjilanyi mwalawilayi Satana antu amakwawu mumuhetu wayisela yabula kutelela?

• Muhetwinyi wazatishañayi Diyabolu hakuluwañesha kunuñañana kwetu?

[Malwihu aKuzatisha haKudiza]

[Mwevulu wudi hefu 29]

Antu amakwawu ayilawula mumuhetu muloña ‘wakutiya antu woma’

[Mwevulu wudi hefu 30]

Kumana watiyaña kuwaha yisela yahelayi Yehova?

[Mwevulu wudi hefu 31]

Chumanyi chimwatela kwila neyi himunakutiyashana namukwenu wawiniKristuku?